Advertisement
Fikrou Kidane (Courtesy of FK)

ጋዜጠኛ ፍቅሩ ኪዳኔ፤ የመጀመሪያው የኢትዮጵያ ስፖርት ጋዜጠኛ ናቸው። ተኮትኩተው ያደጉት በታላቁ የኢትዮጵያ ዘመናዊ ስፖርት መሐንዲስ ይድነቃቸው ተሰማ ነው። 

By
Kassahun Seboqa
Published on
Friday, November 3, 2017 - 17:13
File size
7.03 MB
Duration
15 min 21 sec

በምልሰት የሕይወት ጎዞ ጅምራቸውንና ዘመን ያጎለመሰ ወርቃማ አሻራቸውን ነቅሰው የሚያወጉት ዕትብታቸው ከተቆረጠበት የአዲስ አበባው ፍልውኃ ሆስፒታልና ቦርቀው ካደጉባት ጉለሌ ሠፈር ነው።

የኢትዮጵያ ማስታወቂያ ሚኒስቴር ለመጀመሪያ ጊዜ የስፖርት ጋዜጠኛ ይሁነኝ ብሎ የቀጠረው ፍቅሩ ኪዳኔን ነው። በኢትዮጵያ የስፖርት ታሪክ ውስጥም ለመጀመሪያ ጊዜ ከአዲስ አበባ ስታዲየም ኢንተርናሽናል የእግር ኳስ ግጥሚያን በሬዲዮ ያስተላልፉትም እሳቸው ናቸው።  

ፍቅሩ ኪዳኔ፤ በአገር ውስጥ የስፖርት ጋዜጠኛነት ተወስነው አልቀሩም፤ ባሕር ማዶ ተሻግረው የስፖርት ዓለም አባታቸውን የይድነቃቸውን ዱካ ተከትለው የዓለም አቀፉ ኦሎምፒክ ኮሚቴ ፕሬዚደንት ጽህፈት ቤት እስከ መሰየም ደርሰዋል።

ከዘመናችን የዓለም መሪዎች ጋር በስፖርቱ ዘርፍ መክረዋል።

በ፲፮ኛው የሜልበር - አውስትራሊያ የበጋ ኦሎምፒክ ጨዋታዎች ላይ ኢትዮጵያ ለመጀመሪያ ጊዜ እ.አ.አ. በ1956 ዓ/ም ስትሳተፍ በኢትዮጵያ አየር ኃይል DC-3 አውሮፕላን ከኢትዮጵያውያን አትሌቶችና የቡድን መሪዎች ጋር ተሳፍረው 125 ሰዓታት በፈጀ በረራ በኦሎምፒክ መንደር ተገኝተዋል። የአገራቸውን የመጀመሪያ የኦሎምፒክ ተሳትፎ ዋቤ ሆነው ዘግበዋል።

የክፍል አንድ ትረካቸው የሚያጠነጥነውም በእኒህ ጉዳዮች ዙሪያ ነው።