Khuasak-tintuknak Lamsialtu: Zeitindah Cozah-inn ngah khawh a si?

Source: Flickr / Paul Sableman CC BY 2.0

Australia ram ah a cozah-inn timi cu inn a caw kholomi, inn hlan-man hawibantuk in a pe kholomi asilole, hlawh tlawm a hmumi, biadang in ka chim a si ahcun sifak deuhmi caah a cozah nih a ngeihmi inn khi a chim duhmi a si. Cu inn cu sifak mi nih a cozah sin ah sokkhawh a si. Nain, sokkip ah pek a si lo, a herh mi minung lawng pek kha an si. Nangta a cozah-inn sok a herh mi na si sual maw? Asi ahcun, na hngalh a herhmi thil sining pa 5 ka hun chim lai. Asile tamdeuh in hun ngai hna usih.

1. A Cozah-inn A Soktlak Sile Silo Tahnak: Mah le umnak khualipi cio ah, a cozah-inn sokmi nih a tlinh lai tiah an timi zulhphung a um. Cucu thatein na rel, hlathlainak na tuah le na hngalh hmasa a hau. Tahchunhnak ah, New South Wales ah a ummi nih a cozah inn an sok timh a si ahcun, a tlinh lai an timi hna cu

  • Australia rammi a si lai asilole, Australia ram ah umthainak nawl a ngeimi a si lai.
  • NSW ramthen chungah khuasami a si lai
  • Kum 18 in a cunglei minung a si lai timi le
  • Cozah bawmhnak tangka (Centrelink) a eimi a si lai ti kha NSW a ummi caah tahnak an hmanmi a si.

Cuvebantukin, na umnak khualipi ah a cozah nih a sermi le tlinh a haumi phungphai an um cio lai. Cu-tahfung an hmanmi cu zei hna dah an si timi kha na sokhlan ah na hngalh hmasa a hau.

Ramzam le dornak-haltu minung zong nih a cozah-inn sok an herh a si ahcun, Australia rammi bantuk tein an sokmi cu chek le zohpiak a si lai. Ralzam le dornak haltu an si ruangah duhdanhnak ngeih le papeknak zeihmanh an tinco hlei lai lo. Dinrual tein zohkhenh an si lai. Hawi nih an ngah caan-sau ning tein an ngah ve ko lai.  

Australian citizenship

2. Khoika Hmunhma Ahdah Umkhawh A Si? Na umduhnak hmunhma cu chim le thim khawh a si nain, na um duhnak sang bel thim khawh a si lo. Sihmanhsehlaw, na um duhnak hmunhma kha thlen na duh a si ahcun tawlreltu nih na sokmi ca an in tlangtlakpiak cuahmah lio ah nawlngeitu sin ah thawngpang thanh in thlen than khawh a si zungzal ko. Cun, na herhmi inn-phun zong duhthim khawh a si. Tahchunhnak ah, na ngandamlo ruangah nam-thutdan na herh a si ahcun a dangtein form a um I cucu na ap-chih a haumi a si. Cu form cu, kahin lakkhawh a si >  application for special accommodation requirements (pdf here).

Australia

3. Zeitluk Rau Dah Ka Hngah Lai? A cozah-inn sokmi hi zei caan dah a rauh lai timi cu na umnak khualipi nih an ngeihmi zulhphung he aa hngatchanmi a si. Atlangpi in chim ahcun, na hngah caan cu a thla in a kum tiang a rau khomi a si. Cun, nangmah pumpak sining zong nih a ngeih lai. Na um duhnak hmunhma na thimmi zong nih a ngeih lai. Cozah-inn a soktu le a lawngmi inn a tlawm-tam zat zong nih lai a rel lai. Tahchunhnak ah, Victoria a si ahcun inn a lawngmi hi khuate lei deuh ah an tam cang.

Why is 2016 going to be one second longer?

4. A Cozah-inn Hlan Man Zeizatdah Ka Pek Lai?: A cozah-inn na um zongah inn hlan man cu pek a hau. Sihmanhsehlaw, na pekding zat tucu na hlawh chungin zatuak 25 nak tamdeuh cu a si hrim lai lo. Na hlawh chung in tiah ka ti tikah, Cozah bawmhnak (Centrelink) zong kha hlawh ah relchih a si. Tamdeuh hngalh a duhmi nih Social housing income and assets limits. ah zoh le rel khawh a si.

Australian dollars in Sydney, Friday, Jan. 15, 2016. (AAP Image/Joel Carrett) NO ARCHIVING

5. Zeitindah Ka Sokning A Si Lai?  Hi kong he pehtlaiin, mah le umnak khualipi cio ah hlathlai a haumi a si. Zulhphung aadan cio caah! Nangmah cu soktlak na sile-silo kha chekhlatnak tuah hmasa a hau. Victoria ramthen ah a ummi na si ahcun “housing.vic.gov.au” timi website ah len in tamdeuh rel khawh a si.

Tamdeuh hngalh a duhmi nih a tanglei hi hmeh in relkhawh an si.

NSW
Victoria
Western Australia
Queensland
Northern Territory
Tasmania
ACT
Dam tein,
SBS Hakha Chin