Lai Paih le Nunphung: Chin Miphun Ni

0:00

Aluancia zarh ahkhan, Melbourne khuasa Chin miphun hna nih Chinmi caah nisunglawi a simi: Chin Miphun Ni cu zalawngtein le hlunghlai taktak in tuah a rak si. Hi ni ah Lai Paih, hlasaknak le laam phunphun in caan hman a rak si.

Australia ah Chin milu a karh thluahmah bantuk in, Australia a rak hlum hmasami zong an khuasak tintuknak ah a fekmi dirhmun an phan. Ramdang miphun, mipem tampi nih an intuar cio bantuk in Chin miphun zong nih Australia um hmun khuar tikah, nunphung idan ruangah siseh, holh ikhahlo ruangah harsatnak ton le in cio a si.

Ramdang khuasak hnu harsatnak a phunphun ton si ai kun, Chin miphun sinak le kokek nunning cu hnulei chittak le mertak a si hlei lo. Ramdang khuasak zongah

Lai Thuam
Chin Miphun Ni 2019 ah Sui Tin Par le Laithuam
SBS Hakha Chin

mah le nuhring holh le khrihfa biaknak cu pehzulh tein itlaih le hman a si.

Chin miphun cu Kawlram (Burma) ah khrihfa an si. An biaknak ruangah Chinmi cheukhat cu harsatnak le namnehnak an tong. Biaknak ruangah harsatnak ton a si tik ah, Chinmi cheukhat cu mi ramdang, Australia tibantuk ah ‘ralzam’ sinak in a phanmi an si. 

Melbourne Chin Khrihfabu chungah member pakhat a simi, Pu Hre Cem nih SBS Hakha Chin sin ah a chimmi cu, “Chinmi cu miphun pakhat kan si” tiah a ti. A chim rihmi cu, “Ramdang mi nih kannih cu Chinmi a kan hngalhmi kan si.  Ram a ngeimi kan si, miphun pakhat tiah pommi le cohlanmi kan si, hihi, kan caah a thatnak a si” tiah a ti.

Tukum, Chin Miphun Ni cu nitlaklei Melbouirne ah, February 16, kum 2019, a hmun: Sunshine ah tuah a rak si. A rak chuakkhomi minung hi ngakchia upa fonh dih ah minung 1000 dengmang an si. Hini ah, Chin nunphung-laam phunphun, hlasaknak le rawl einak in sunglawi tak in caan hman a si. Hi Ni cu Chinmi caah pakhat le pakhat ipehtlaihnak le Chin nunphung le sining thar chuahthannak le hngalhter thannak can ah hman ni zong a si fawn.

Lai Paih nak caah caan hmanmi hi suimilam 4 le cheu hrawng cu a si. Hi bantuk Lai Paih hi cu ramdang miphun dang an I paihmi he aadang mi a si tik ah Chin miphun caah a sunglawikhun mi lentecelhnak, zaangleknak pakhat a si. Lai Paih cu Lai pa an thazaang thawnnak, hneksaknak langhter caah caantharem zong a si fawn.

A duhmi paoh nih Lai Paih ah itel khawh a si. Nain, a voikhatnak paih aa zuammi caah zulhphung a um. Cucu, tukum Lai Paih ah haotu a tuantu: Pu Thawng Tum nih a tawifinanak in hrilhfiahnak a tuah. A chimmi cu, “Pai-tu nih minung pahnih a tei hna a hau, a teilo ahcun, cung kai khawh a si lo, cun, aapaimi kha an tai ah puan fami tein ttem an si. Aattemmi puai cu i tlaih in, anmah le pahrang chuah in an ral cu an tengh hna a hau” tiah a ti. Aa paimi minung tampi chungin teitu pakhat a chuah tik ah, bualcotu zong thanh chih a si. Tukum, Lai Paih ah minung 15 tluk hrawng nih an I zuam. Bualcotu pakhat a chuah khawhnak dingah a dihmi caan hi suimilam 4 le cheu tluk cu a si lai dah.

A voihnihnak Australia Chin Idol, ah pahnihnak a simi, Mary Magdalene nih a chim mi cu, Chin Miphun Ni thawng in Chinmi unau pakhat le pakhat karlak ah a fekmi dawtnak a kan ngeih ter tiah a ti. A chim rihmi cu, “Hi Ni ah, pakhat le pakhat itonnak a kan pek, kan nunphung zong sunglawi tein kan sunhsak kho. Cutikah, a ka nuamhter I ka lung zong a hmui” tiah a ti.

Kawlram ahcun, Chin Miphun Ni hi Chinmi nih zalawng tein tuahkhawh a si lo. Sihmanhsehlaw, Australia ram ahcun, zalawng tein tuah khawh a si. Curuangah, Chin Miphun Ni caah tlangtla-tu mibu chungah aatel vemi, Robert Ngun Sang nih Australia rami le a cozah cungah a lunglawmhnak zong a chim. Australia cozah nih Chin miphun dornak inn a kan pekmi le nuhring nawlvo zong a herh ning in hmannak nawl a kan pekmi cung hrim ah biatak tein a lunglawmhnak bia a phuan chap. A chim rihmi cu, “nihin ah, kan Chin Miphun Ni sunglawi tein kan tuahkhawhmi hi kan van a tha tuk. Australia rammi le a cozah nih a kan cohlan mi cungah le kan nunphung, kan sining tein kan um khawhnak caah kan ilawmhnak a ngan ko. Australia cozah nih Chin miphun cungah dawtnak, velngeih le zawnruahnak a kan ngeihmi cung hrim ah lawmhbia chim ka duh ko” tiah a ti.