Coming Up Mon 4:00 PM  AEST
Coming Up Live in 
Live
Lao radio

ຂໍ້ມູນກ່ຽວກັບ ໂກໂຣນາໄວຣັສ (ໂກວິດ-19)***

Avustralya 140 milyon doz aşı için anlaşma imzaladı. Source: AAP

SBS ອູທິດໃ່ສ່ການບໍຣິການການລາຍງານຕ່າງໆທີ່ໄວ້ວາງໃຈນຳໄດ້ທີ່ເຮັດໃຫ້ທ່ານຊາບກ່ຽວກັບການຣະບາດຂອງ ໂກວິດ-19 ເປັນພາຂອງທ່ານເອງ. ເຈັ້ຍຂໍ້ມູນນີ້ຮຽບຮຽງເອົາຂໍ້ມູນທີ່ຈຳຕ້ອງຮູ້ສຳຮັບທຸກໆຄົນໃນຊຸມຊົນ.

ເຈັ້ຍ​ຂໍ້​ມູນ​ຄວາມ​ຈິງນີ້​ໄດ້​ຖືກ​ອັບ​ເດດ​ຄັ້ງ​ລ່າ​ສຸດ​ໃນ​ວັນ​ທີ 12/01/2021.  ສຳ​ລັບ​ຂໍ້​ມູນ​ອັບ​ເດດ​ເປັນ​ພາ​ສາ​ລາວ ຂໍ​ໃຫ້​ເຂົ້າ​ໄປ​ເບິ່ງ​ທີ່ SBS Lao


 

 

ການ​ສັກ​ຢາ​ວັກ​ຊີນ COVID-19 ໃນ​ອອ​ສ​ເຕ​ຣ​ເລັຍ

ຣັ​ຖ​ບານອອ​ສ​ເຕ​ຣ​ເລັຍ​​ຖື​ເປັນ​ພາ​ຣະ​ໃນ​ການອຳ​ນວຍ​ໃຫ້​ປະ​ຊາ​ຊົນ​ອອ​ສ​ເຕ​ຣ​ລຽນ​ທຸກ​ຄົນ​ໄດ້​ເຂົ້າ​ເຖິງ​ການ​ສັກ​ຢາ​ວັກ​ຊີນ COVID-19 ທີ່​ປອດ​ໄພ​ແລະ​ເປັນ​ຜົນ ໃນ​ທັນ​ທີ​ທີ່​ຢາ​ວັກ​ຊີນ​ມີ​ໃຫ້​ບໍ​ຣິ​ການ.

ອອ​ສ​ເຕ​ຣ​ເລັຍ​ມີ ແຜນ​ການ​ເລີ່ມການ​ສັກ​ຢາ COVID-19 ແຫ່ງ​ຊາດ ເຊິ່ງ​ລະ​ບຸເຖິງ:

  • ປະ​ຊາ​ກອນ​ທີ່​ໄດ້​ຮັບບູ​ຣິ​ມະ​ສິດ​ໃນ​ການ​ສັກ​ຢາ, ​ແລະ​ຂັ້ນ​ຕອນ​ເວ​ລາ​ທີ່​ຢາ​ວັກ​ຊີນ​ຈະ​ມີ​ໃຫ້​ໃນ​ປະ​ເທດອອ​ສ​ເຕ​ຣ​ເລັຍ
  • ​ລາຍ​ລະ​ອຽດ​ກ່ຽວ​ກັບ​ວິ​ທີ​ທີ່​ຢາ​ວັກ​ຊີນ​ຈະ​ຖືກ​ນຳ​ໄປ​ສັກ​ໃຫ້​ບັນ​ດາ​ພະ​ນັກ​ງານ​ດູ​ແລ​ສຸ​ຂະ​ພາບ​ຂັ້ນ​ແນວ​ໜ້າ, ​ພະ​ນັກ​ງານ​ທີ່​ເຮັດ​ວຽກ​ກ່ຽວ​ກັບ​ການ​ກັກ​ຕົວ​ແລະ​ຕາມ​ເຂດ​ຊາຍ​ແດນ, ແລະ ​ຜູ້​ອາ​ໄສ​ຢູ່​ໃນ​ເຮືອນ​ພັກ​ດູ​ແລ​ຜູ້​ສູງ​ອາ​ຍຸ​ແລະ​ຄົນ​ພິ​ການ​ພ້ອມ​ດ້ວຍ​ພະ​ນັກ​ງານທີ່​ເຮັດ​ວຽກ​ຢູ່​ສະ​ຖານ​ທີ່​ດັ່ງ​ກ່າວ
  • ສະ​ຖານ​ທີ່ຫຼັກ, ທົ່ວ​ປະ​ເທດອອ​ສ​ເຕ​ຣ​ເລັຍ, ທີ່​ຈະ​ດຳ​ເນີນ​ງານ​ເລື່ອງ​ວັກ​ຊີນ.

ໃຫ້​ເບິ່ງແຜນ​​ງານຂອງ​ການ​ນຳ​ໃຊ້​ວັກ​ຊີນ ທີ່ນີ້

COVID-19 vaccine national roll-out strategy
COVID-19 vaccine national roll-out strategy
Australian Government - Department of Health

ເນື່ອງ​ຈາກວ່າ​ໃນ​ລະ​ຍະ​ຕົ້ນໆ​ຢາ​ສັກ​ອາດ​ມີ​ຈຳ​ກັດ, ກຸ່ມ​ທີ່​ມີ​ບູ​​ຣິ​ມະ​ສິດ​ສູງ​ສູດ​ຈະ​ໄດ້​ສັກ​ວັກ​ຊີນ​ກ່ອນ​ໃນ​ລະ​ຍະ​ຕົ້ນ​ໆ​ຂອງ​ການ​ເປີດ​ຕົວ​ຂອງ​ຢາ​ສັກ​ນີ້:

  • ຂັ້ນທີ 1 - ​ຢາ​ສັກ Pfizer/BioNTech: ພະ​ນັກ​ງານ​ກັກ​ກັນ​ແລະ​ຕາມ​ເຂດ​ຊາຍ​ແດນ, ພະ​ນັກ​ງານ​ດູ​ແລ​ສຸ​ຂະ​ພາບ​ຂັ້ນ​ແນວ​ໜ້າ, ພະ​ນັກ​ງານ​ດູ​ແລ​ຜູ້​ສູງ​ອາ​ຍຸ​ແລະ​ຄົນ​ພິ​ການແລະ​ຜູ້​ອາ​ໄສ​ຢູ່​ບ້ານ​ພັກ​ດັ່ງ​ກ່າວນັ້ນ.
  • ​ຂັ້ນ​ທີ 2 -  ຢາ​ສັກ Pfizer/BioNTech: ຜູ້​ສູງ​ອາ​ຍຸ​ທີ່​ມີ​ອາ​ຍຸ​ເກີນ 70 ປີ, ພະ​ນັກ​ງານ​ດູ​ແລ​ສຸ​ຂະ​ພາບ​ອື່ນໆ, ຊາວ​ອາ​ບໍ​ຣິ​ຈິ​ໂນ​ລ​ແລະ​ທໍ​ເຣ​ສ​ເຕ​ຣດອາຍ​ແລ​ນ​ເດີ ທີ່​ມີ​ອາ​ຍຸ​ເກີນ 55 ປີ, ຊາວ​ໜຸ່ມ​ທີ່​ມີ​ບັນ​ຫາ​ສຸ​ຂະ​ພາບ​ຢູ່​ກ່ອນແລ້ວ, ລວມ​ທັງ​ຄົນ​ພິ​ການ, ພະ​ນັກ​ງານ​ທີ່​ມີ​ຄວາມ​ສ່ຽງ​ສູງ ລວມ​ທັງ​ຕຳຫຼວດ, ​ໜ່ວຍດັບ​ເພິງ, ​ໜ່ວຍປ້ອງ​ກັນ, ບໍ​ລິ​ການ​ສຸກ​ເສີນ ແລະ ຜະຫຼິດ​ຕະ​ພັນ​ຊີ້ນ.
  • ຂັ້ນ​ທີ 3 -ຢາ​ສັກ AstraZeneca ແລະ Novavax: ຜູ້​ໃຫຍ່​ທີ່​ມີ​ອາ​ຍຸ​ເກີນ 50 ປີ, ຊາວ​ອາ​ບໍ​ຣິ​ຈິ​ໂນ​ລ​ແລະ​ທໍ​ເຣ​ສ​ເຕ​ຣດ​ອາຍ​ແລນ​ເດີ ທີ່​ມີອ​າ​ຍຸ​ເກີນ 18 ປີ, ພະ​ນັກ​ງານ​ທີ່​​ມີ​ຄວາມ​ສ່ຽງ​ສູງ​ແລະ​ເຮັດ​ວຽກ​ທີ່ຈຳ​ເປັນ.
  • ຂັ້ນ​ທີ 4 - ຢາ​ສັກ  AstraZeneca ແລະ Novavax: ປະ​ຊາ​ກອນ​​ທົ່ວ​ໄປຕາມ​ຄວາມ​ສົມ​ດູນ, ສັກ​ໃຫ້​ຄົນ​ອອ​ສ​ເຕ​ຣ​ລຽນ​ທີ່ບໍ່​ໄດ້​ຮັບ​ການ​ສັກ​ຢາ​ຈາກ​ຂັ້ນ​ຕອນ​ກ່ອນໆ.
  • ຂັ້ນ​ທີ 5 - ຢາ​ສັກ  AstraZeneca ແລະ Novavaxs: ຄົນ​ໜຸ່ມ​ແລະ​ເດັກ​ທີ່​ມີ​ອາ​ຍຸ​ຕໍ່​າກວ່າ 18 ປີ, ຖ້າ​ໄດ້​ຮັບ​ການ​ແນະ​ນຳ.

ການ​ອູ້ມ​ຊູ​ດ້ານ​ສຸ​ຂະ​ພາບ​ຈິດທີ່​ກ່ຽວ​ພັນ​ກັບ Covid-19

ຣັ​ຖ​ບານອອ​ສ​ເຕ​ຣ​ລຽນ​ໄດ້​ສນອງ​ໃຫ້​​​ມີການ​ອູ້ມ​ຊູ​ດ້ານ​ສຸ​ຂະ​ພາບ​ຈິດ​ທີ່​ກ່ຽວ​ພັນ​ກັບ Covid-19 ຜ່ານປະ​ຕູ​ເວັບ​ໄຊ້​ສຸ​ຂະ​ພາບ​ຈິດ "Head to Health" ເພື່ອ​ໃຫ້​ຂໍ້​ມູນ​ແລະ​ຄຳ​ແນະ​ນຳເຣື່ອງ​ການ​ຮັກ​ສາ​ສຸ​ຂະ​ພາບ​ທີ່​ດີ​ໃນ​ລະ​ຫວ່າງ​ການ​ລະ​ບາດ​ຂອງ​ໂຄ​ໂຣ​ນາ​ໄວ​ຣັ​ສ​ແລະ​ໃນ​ລະ​ຫວ່າງ​ການ​ແຍກປ່ຽວ​​ໂຕ​ເອງ.

ຣັ​ຖ​ບານ​ໄດ້​ອະ​ນຸ​ມັດ​ເພີ່ມ​ໃຫ້​ຄົນ​ສາ​ມາດ​ໃຊ້​ບໍ​ຣິ​ການ​ປິ່ນ​ປົວ​ດ້ານ​ຈິດ​ໃຈ​ໄດ້​ຕື່ມ​ອີກ 10 ຄັ້ງ​ໂດຍ​ໃຊ້​ບັດ​ເມ​ດີ​ແຄໃນ​ແຕ່​ລະ​ປີ​ປະ​ຕິ​ທິນ ສຳ​ລັບ​ຄົນ​ເຈັບ​ທຸກໆ​ຄົນ​ທີ່​ມີ​ເງື່ອນ​ໄຂ​ພາຍ​ໃຕ້ ໂຄງ​ການ​ດູ​ແລ​ສຸ​ຂະ​ພາບ ເພື່ອ​ການ​ເຂົ້າ​ເຖິງ ຈິ​ຕ​ແພດ, ນັກ​ຈິ​ຕວິ​ທ​ຍາ ແລະ ແພດ​ປິ່ນ​ປົວ​ທົ່ວ​ໄປ ໂດຍ​ຜ່ານ​ໂຄງ​ການ​ລິ​ເລີ່ມ MBS (ການ​ເຂົ້າ​ເຖິງ​ທີ່​ດີກວ່າ).

ບັນ​ຫາ​ດ້ານ​ການ​ເງິນ (ເງິນ​ຊ່ວຍ​ເຫຼືອຍາມ​ພັກ​ການ​ຍ້ອນ​ໄພ​ພິ​ບັດການ​ລະ​ບາດ)

ຖ້າ​ທ່ານ​ກຳ​ລັງ​ປະ​ສົບ​​ຄວາມ​ຫຍຸ້ງ​ຍາກ​ດ້ານ​ການ​ເງິນ​ໃຫ້​ເຂົ້າ​ໄປ​ທີ່ Covid19 ບໍ​​ຣິ​ຫານ​ເງິນ​ຢ່າງ​ສະຫຼາດ  ຫຼື​ໂທ​ຫາ ສາຍ​ຊ່ວຍ​ເຫຼືອແຫ່ງ​ຊາດ​ດ້ານ​ໜີ້​ສິນ​​ທີ່ 1800 007 007. 

ຣັ​ຖ​ບານ​ກາງ​ໄດ້​ມີ "ເບັ້ຍ​ລ້ຽງ​ໄພ​ພິ​ບັດ" ໄວ້ຈ່າຍ​ໃຫ້ສຳ​ລັບ ການ​ຂໍ​ພັກ​ລະ​ຫວ່າງ​ມີ​ການ​ລະ​ບາດ .

ການ​ຈ່າຍ​ເງິນ​ຈະ​ມີ​ໃຫ້​ແກ່​ພະ​ນັກ​ງານ​ທີ່ບໍ່​ສາ​ມາດ​ມີ​ລາຍ​ໄດ້​ເພາະ​ວ່າ​ເຂົາ​ເຈົ້າ​ຕ້ອງ​ແຍກ​ປ່ຽວ​ຕົນ​ເອງຫຼື​ຕ້ອງ​ກັກ​ກັນ​ໂຕ, ຫຼື​ຕ້ອງ​ດູ​ແລ​ໃຜ​ຜູ້​ນຶ່ງ​ທີ່​ມີCOVID-19.

​ໃຫ້​ຄ​ລິກ​ລິ້ງ​ຄ໌ ທາງ​ຂ້າງ​ລຸ່ມນີ້​ເພື່ອ​ຊອກ​ເອົາ​ຂໍ້​ມູນ​ກ່ຽວ​ກັບ​ການ​ລາ​ພັກ​ຍ້ອນໄພ​ພິ​ບັດ​ການ​ລະ​ບາດ ຢູ່​ໃນ​ແຕ່​ລະ​​ຣັດຫຼື​ເຂດ​ປົກ​ຄອງ:

COVID-19 ແພ່​ຜາຍ​ຢ່າງ​ໃດ​ແລະ​ທ່ານ​ຈະ​ປ້ອງ​ກັນ​ມັນ​ໄດ້​ຢ່າ​ງ​ໃດ?

COVID-19 ແພ່​ຜາຍ​ຈາກ​ຄົນ​ນຶ່ງ-ໄປ​ຫາ-ອີກ​ຄົນ​ນຶ່ງ ໂດຍ​ຜ່ານ:

  • ການ​ສຳ​ຜັດ​ໃຫ້​ຊິດ​ກັບ​ຄົນ​ນຶ່ງ​ໃນ​ລະ​ຫວ່າງ​ທີ່​ເຂົາ​ເຈົ້າ​ຕິດ​ເຊື້ອ​ຢູ່, ເຖິງ​ແມ່ນ​ວ່າ​ກ່ອນ​ເຂົາ​ຈະ​ສະ​ແດງ​ອາ​ການ.
  • ການ​ສຳ​ຜັດ​ໃກ້​ຊິດ​ກັບ​ຄົນ​ທີ່​ໄອຫຼື​ຈາມ​ທີ່​ຖືກຢັ້ງ​ຢືນ​ວ່າ​ຕິດ​ເຊື້ອແລ້ວ.
  • ​ຈັບ​ບາຍ​ສິ່ງ​ຂອງຫຼື​ໜ້າ​ພຽງ (ເຊັ່ນ​ລູ​ກ​ບິດ​ປະ​ຕູຫຼືໜ້າ​ໂຕະ) ທີ່​ມີ​ເຊື້ອ​ພະ​ຍາດ​ຕິດ​ຢູ່​ຈາກ​ການ​ໄອຫຼື​ຈາມ​ຂອງ​ຄົນ​ທີ່ຖືກຢັ້ງຢືນ​ວ່າ​ໄດ້​ຮັບ​ການ​ຕິດ​ເຊື້ອ​ແລ້ວ, ແລະ ຫຼັງ​ຈາກນັ້ນ​ໄດ້​ມາ​ຈັບ​ບາຍ​ປາກຫຼື​ໃບ​ໜ້າ​ຂອງ​ຕົນ.

ທ່ານ​ປ້ອງ​ກັນ​ເຊື້ອໂຣກ​ນີ້ໄດ້​ດ້ວຍ​ການ​ປະ​ຕິ​ບັດ​ການລ້າງ​ມື​ແລະ​ຈາມ/ໄອ​ແບບ​ຖືກ​ອະ​ນາ​ໄມ​ທີ່​ດີແລະ​ໃຫ້​ຢູ່​ຫ່າງ​ຈາກ​ຄົນ​ອື່ນ​ເວ​ລາ​ທ່ານບໍ່​ສະ​ບາຍ ​ນັ້ນແມ່ນ​ວິ​ທີ​ການ​ຕໍ່​ສູ້​ທີ່​ດີ​ທີ່​ສຸດ​ຕໍ່​ເຊື້ອ​ໄວ​ຣັ​ສ​ເກືອບ​ທຸກ​ຊະ​ນິດ.  ທ່ານ​ຄວນ:

  • ຮັກ​ສາ​ລະ​ຍະ​ການ​ຢູ່​ຫ່າງ​ຈາກ​ຄົນ​ອື່ນ​ໃນ​ສັງ​ຄົມ​ຢ່າງ​ນ້ອຍ 1.5 ແມັດ​ແລະ​ຕ້ອງ​ປະ​ຕິ​ບັດ​ຕາມ​ກົດ​ລະ​ບຽບ 1 ຄົນ ຕໍ່ ສີ່​ແມັດ​ມົນ​ທົນ.
  • ລ້າງ​ມື​ຂອງ​ທ່ານ​ເປັນ​ປະ​ຈຳ​ດ້ວຍ​ສະ​ບູ​ແລ​ນ້ຳ, ກ່ອນ​ແລະຫຼັງ​ກິນ​ອາ​ຫານ, ແລະຫຼັງ​ຈາກໄປ​ເຂົ້າ​ຫ້ອງ​ນ້ຳ.
  • ​ໃຫ້​ປົກ​ປິດ​ການ​ໄອ​ແລະ​ຈາມ​ໄວ້, ເອົາ​ເຈັ້ຍ​ທິດ​ຊູ​ຖິ້ມ, ແລະ ໃຊ້​ນ້ຳ​ຢາ​ຖູມື​ທີ່​ມີ​ເຊື້ອ​ເຫຼົ້າ​ປົນ.
  • ຖ້າ​ທ່ານບໍ່​ສະ​ບາຍ, ໃຫ້ຫຼີກ​ລ່ຽງ​ການ​ໄປ​ໃກ້​ຊິດ​ກັບ​ຄົນ​ອື່ນ (ໃຫ້​ຢູ່​ຫ່າງ​ເກີນ 1.5 ແມັດ​ຈາກ​ຜູ້​ຄົນ)

ຣັ​ຖ​ບານ​ປະ​ເທດອອ​ສ​ເຕ​ຣ​ເລັຍ​ແນະ​ນຳ​ໃຫ້​ປະ​ຊາ​ຊົນ​ທຸກ​ຄົນ​ດາວ​​ນ໌ໂຫຼດ​ເອົາ​ແອັບ COVIDSafe app. 

ຖ້າ​ທ່ານ​ມີ​ອາ​ການ, ໃຫ້​ໄປ​ກວດ  

ອາ​ການ​ຂອງ​ໂຄ​ໂຣ​ນາ​ໄວ​ຣັ​ສ​ ສາ​ມາດເປັນ​ໄດ້​ນັບ​ຈາກ​ການ​ເຈັບ​ເປັນ​ພຽງ​ເບົາ​ບາງ​ໄປ​ຈົນ​ເຖິງ​ການ​ເປັນ​ໂຣກ​ປອດ​ອັກ​ເສບ, ແລະ ມີ​ອາ​ການ​ຄ້າຍ​ກັບ​ໄຂ້​ຫວັດ​ແລະ​ໄຂ້​ຫວັດ​ໃຫຍ່ ແລະ ລວມ​ອາ​ການ​ຕ່າງໆ​ດັ່ງ​ນີ້:

  • ເປັນ​ໄຂ້
  • ອ​າ​ການ​ທາງ​ລະ​ບົບ​ຫາຍ​ໃຈ:
  • *ໄອ
  • *ເຈັບ​ຄໍ
  • *ຫາຍ​ໃຈ​ຝືດ

ອາ​ການ​ອື່ນໆ​ອາດ​ລວມ​ມີ ຂີ້​ມູກ​ຍ້ອຍ, ເຈັບ​ຫົວ, ປວດ​ຕາມ​ກ້າມ​ເນື້ອ​ແລະ​ຂໍ່, ປວດ​ຮາກ, ຖອກ​ທ້ອງ, ຮາກ, ບໍ່​ໄດ້ກິ່ນ, ​ຣົດ​ຊາດ​ອາ​ຫານ​ປ່ຽນ​ໄປ, ກິນ​ເຂົ້າ​ບໍ່​ແຊບ ແລະ ເມື່ອຍ​ອ່ອນ​ເພັຍ.

ທາງ​ການ​ໄດ້​ສ້າງ  ລະ​ບົບ​ກວດ​ເບິ່ງ​ອາ​ການ​ຂອງ COVID19 ຂຶ້ນ​ມາ​ເພື່ອ​ໃຫ້​ທ່ານ​ນຳ​ໃຊ້ໄດ້​ຢູ່​ເຮືອນ​ຕົນ​ເອງ.

​ບໍ່​ມີ​ການ​ປິ່ນ​ປົວ​ສະ​ເພາະ​ສຳ​ລັບ​ໂຄ​ໂຣ​ນາ​ໄວ​ຣັ​ສ, ແຕ່​ວ່າ​ອາ​ການ​ສ່ວນ​ໃຫຍ່​ສາ​ມາດ​ປິ່ນ​ປົວ​ໄດ້​ໂດຍ​ການ​ດູ​ແລ​ອູ້ມ​ຊູ​ທາງ​ການ​ແພດ. ຢາ​ຕ້ານ​ເຊື້ອ​ໃຊ້​ບໍ່​ໄດ້​ຜົນ​ກັບ​ບັນ​ດາ​ເຊື້ອ​ໄວ​ຣັ​ສ.

ຖ້າ​ທ່ານ​ມີ​ອາ​ການ, ທ່ານ​ຄວນ​ໄປ​ກວດ. ຢ່າ​ໄປ​ຄ​ລີ​ນິກກວດ​ພະ​ຍາດຫຼື​ໂຮງ​ໝໍ​ໂດຍບໍ່​ແຈ້ງ​ໃຫ້​ເຂົາ​ເຈົ້າ​ຊາ​ບ​ກ່ອນ​ວ່າ​ທ່ານ​ມີ​ອາ​ການ. ທ່ານ​ຕ້ອງ​ສືບ​ຕໍ່ແຍກ​ປ່ຽວ​ຕົນ​ເອງ​ຢູ່​ໃນ​ເຮືອນ​ຂອງ​ທ່ານ, ໃນ​ໂຮງ​ແຮມຫຼື​ຢູ່​ໃນ​ການ​ດູ​ແລ​ຂອງ​ແພດ​ຈົນ​ກວ່າ​ທາງ​ການ​ສາ​ທາ​ຣະ​ນະ​ສຸກຢັ້ງ​ຢືນ​ວ່າ​ເປັນ​ການ​ປອດ​ໄພ​ທີ່​ທ່ານ​ຈະ​ກັບ​ໄປ​ເຮັດ​ກິດ​ຈະ​ກັມ​ໄດ້​ປົກ​ກະ​ຕິ.

ຖ້າ​ທ່ານ​ຕ້ອງ​ການ​ຢາກ​ໂອ້​ລົມ​ກັບ​ໃຜ​ຜູ້​ນຶ່ງ​ກ່ຽວ​ກັບ​ອາ​ການ​ຂອງ​ທ່ານ, ໃຫ້​ໂທ​ໄປ​ສາຍ​ຊ່ວຍ​ເຫຼືອ​ແຫ່ງ​ຊາດ​ດ້ານ​ໂຄ​ໂຣ​ນາ​ໄວ​ຣັ​ສ ເພື່ອ​ຂໍ​ຄຳ​ແນະ​ນຳ. ສາຍນີ້​ເຮັດ​ວຽກ    ຕ​ລອດ 24 ຊົ່ວ​ໂມງ​ໃນ​ແຕ່​ລະ​ມື້, ເຈັດ​ມື້​ຕໍ່​ອາ​ທິດ: 1800 020 080 

ທ່ານ​ຈ​ະ​ໄປ​ກວດ​ໄດ້​ຢູ່​ໃສ?

ຄ​ລິກ​ລິ້ງຄ໌​​ຂ້າງ​ລຸ່ມນີ້​ເພື່ອ​ຊອກ​ຫາ​ຄ​ລີ​ນິກກວດ​ເຊື້ອ​ໃນ​ແຕ່​ລະ​ຣັດ​ແລະ​ເຂດ​ປົກ​ຄອງ:

ຖ້າ​ທ່ານ​ຖືກ ​ບົ່ງ​ມະ​ຕິ​ວ່າ​ມີ COVID-19, ທ່ານ ຕ້ອງ​ແຍກ​ປ່ຽວ​ຕົນ​ເອງ:

  • ຢ່າ​ອອກ​ໄປ​ຕາມ​ສະ​ຖານ​ທີ່​ສາ​ທາ​ຣະ​ນະ​ເຊັ່ນ ໄປ​ເຮັດ​ວຽກ, ໄປ​ໂຮງ​ຮຽນ​, ຫ້າງ​ສັ​ພ​ສິນ​ຄ້າ, ສູນ​ຝາກ​ເດັກ ຫຼື ມະ​ຫາ​ວິ​ທ​ຍາ​ໄລ
  • ໃຫ້​ຂໍ​ໃຫ້​ໃຜ​ຜູ້​ນຶ່ງ​ເອົາ​ອາ​ຫານ​ແລະ​ຂອງ​ໃຊ້​ຈຳ​ເປັນ​ມາ​ໃຫ້​ທ່ານ​ແລະ​ໃຫ້​ເອົາ​ປະ​ໄວ້​ຢູ່​ປະ​ຕູ​ໜ້າ​ບ້ານ​ຂອງ​ທ່ານ

ຢ່າ​ໃຫ້​ຄົນ​ມາ​ຢ້ຽມ​ຢາມ - ໃຫ້​ມີ​ແຕ່​ຄົນ​ທີ່​ຢູ່​ຮ່ວມ​​ເຮືອນດຽວ​ກັນ​ຕາມ​ປົກ​ກະ​ຕິ​ເທົ່າ​ນັ້ນ​ ທີ່​ຢູ່​ໃນ​ເຮືອນ​ນຳ​ກັນ​ໄດ້

 

ແມ່ນ​ໃຜ​ແດ່​ທີ່​ມີ​ຄວາມ​ສ່ຽງ​ສູງ​ສຸດ​ທີ່​ຈະ​ເກີດ​ການ​ເຈັບ​ປ່ວຍ​ຮ້າຍ​ແຮງ?

ບາງ​ຄົນ​ທີ່​ຕິດ​ເຊື້ອ​ອາດບໍ່​ເຈັບ​ປ່ວຍ​ຫຍັງ​ໝົດ, ບາງ​ຄົນ​ອາດ​ມີ​ອາ​ການ​ພຽງ​ເບົາ​ບາງ​ເຊິ່ງ​ຈະ​ຫາຍ​ຈາກ​ພະ​ຍາດ​ໄດ້​ໂດຍ​ງ່າຍ, ແລະ ຄົນ​ອື່ນໆ​ອາດ​ຈະ​ເຈັບ​ປ່ວຍ​ຢ່າງ​ແຮງ, ແລະ​ເປັນ​ຢ່າງ​ໄວ​ວາ. ຈາກ​ປະ​ສົ​ບ​ການ​ທີ່​ຜ່ານ​ມາ​ກ່ຽວ​ກັບ​ເຊື້ອ ໂຄ​ໂຣ​ນາ​ໄວ​ຣັ​ສ ຊະ​ນິດ​ອື່ນໆ, ຄົນ​ທີ່​ມີ​ຄວາມ​ສູງ​ສຸດ​ຕໍ່​ການ​ຕິດ​ເຊື້ອ​ທີ່​ຮ້າຍ​ແຮງ​ແມ່ນ:

  • ຊາວ​ອາ​ບໍ​ຣິ​ຈິ​ໂນ​ລ​ແລະ​ທໍ​ເຣ​ສະ​ເຕ​ຣກ​ອາຍ​ແລນ​ເດີ ທີ່​ມີ​ອາ​ຍຸ 50 ປີແລະ​ສູງ  ​ກ່​ວາ ທີ່​ມີ​ພະ​ຍາດ​ເຮື້ອ​ຮັງ​ຢ່າງ​ນຶ່ງຫຼືຫຼາຍກວ່າ​ນັ້ນຢູ່​ແລ້ວ
  • ຄົນ​ທີ່​ມີ​ອາ​ຍຸ 65 ປີ​ແລະ​ສູງ​ກວ່າ ​ທີ່​ມີ​ພະ​ຍາດ​ເຮື້ອ​ຮັງ. ​ພະ​ຍາດຕ່າງໆ​ທີ່​ລວມ​ໄວ້​ໃນ ‘ອາ​ການ​ທາງ​ແພດ​ທີ່​ເປັນ​ເຮື້ອ​ຮັງ’ ຈະ​ໄດ້​ໃຫ້​ຄຳ​ນິ​ຍາມ​ເມື່ອ​ມີຫຼັກ​ຖານເພີ່ມ​ເຕີມ​.
  • ຄົນ​ທີ່​ມີ​ອາ​ຍຸ 70 ປີ​​ແລະ​ສູງ​ກວ່ານັ້ນ
  • ຄົນ​ທີ່​ລະ​ບົບພູມ​ຕ້ານ​ທານ​ເຊື້ອບໍ່​ແຂງ​ແຮງ

ຂ້ອຍ​ຕ້ອງ​ໃສ່​ໜ້າ​ກາກອະ​ນາ​ໄມ​ບໍ?

ບາງ​ຣັດ​ແລະ​ເຂດ​ປົກ​ຄອງ​ໃນ​ອອ​ສ​ເຕ​ຣ​ເລັຍ ແນະ​ນຳ​ຫຼື​ອອກ​ຄຳ​ສັ່ງ​ໃຫ້​ມີ​ການ​ໃສ່​ໜ້າ​ກາກ​ອະ​ນາ​ໄມ. ຖ້າ​ວ່າ​ສະ​ພາບ​ການ​ໃນ​ຣັດຫຼື​ເຂດ​ປົກ​ຄອງ​ຂອງ​ທ່ານ​ມີ​ການ​ປ່ຽນ​ແປງ  ຄຳ​ແນະ​ນຳ​ໃນ​ການ​ໃຊ້​ໜ້າ​ກາກ​ກໍ​ອາດ​ຈະ​ຕ້ອງປ່ຽ​ນ​ແປງ​ເຊັ່ນ​ກັນ. ​ເປັນ​ສິ່ງ​ສຳ​ຄັນ​ທີ່​ທ່ານ​ຕ້ອງ​ຮູ້​ທັນ​ກັບ​ຄຳ​ແນະ​ນຳ​ອັນ​ລ່າ​ສຸດ​ໃນ​ເຂດ​ທ້ອງ​ຖິ່ນ​ຂອງ​ທ່ານ.

ເພື່ອ​ໃຫ້​ຮູ້​ທັນ​ກັບ​ຄຳ​ແນະ​ນຳ​ໃນ​ການ​ໃສ່​ໜ້າ​ກາກ​ອັນ​ລ່​າ​ສຸດ, ໃຫ້​ຕິດ​ຕາມ​ການ​ແຈ້ງ​ຂ່າວ​ລ່າ​ສຸດ​ຂອງ​ຣັ​ຖ​ບານ​ທ້ອງ​ຖິ່ນ​ຂອງ​ທ່ານ:

ເມື່ອ​ທ່ານ​ໃສ່​ໜ້າ​ກາກ​ອະ​ນາ​ໄມ, ເປັນ​ສິ່ງ​ສຳ​ຄັນ​ທີ່​ທ່ານ​ຕ້ອງ​ໃສ່​ໃຫ້​ຖືກ​ແບບ:

  • ໃຫ້​ລ້າງ​ຫຼື​ຖູ​ມື​ດ້ວຍ​ນ້ຳ​ຢາ​ກ່ອນ​ໃສ່ຫຼື​ຖອດ​ໜ້າ​ກາກ​ອອກ
  • ໃຫ້​ໝັ້ນ​ໃຈ​ວ່າ​ໜ້າ​ກາກນັ້ນ​ກວມ​ເອົາ​ພາກ​ສ່ວນ​ດັງ​ແລະ​ປາກ​ຂອງ​ທ່ານ​ແລະ​ໃຫ້​ໜ້າ​ກາກ​ແນບ​ຕິດ​ກັບ​ດ້ານ​ຂ້າງ​ຂອງ​ໃບ​ໜ້າ​ຂອງ​ທ່ານ
  • ຢ່າ​ຈັບ​ບາຍ​​ສ່ວນ​ທາງ​ໜ້າ​ຂອງ​ໜ້າ​ກາກ​ຂອງ​ທ່ານ​ໃນ​ຂະ​ນະ​ທີ່​ໃສ່​ຢູ່ຫຼື​ຖອດ​ອອກ
  • ຢ່າ​ປ່ອຍ​ໜ້າ​ກາກ​ຫ້ອຍ​ໄວ້​ຢູ່​ຄໍຫຼື​ໃຕ້​ດັງ
  • ຢ່າ​ໃຊ້​ໜ້າ​ກາກ​ແບບ​ໃຊ້​ເທື່ອດຽວ​ຄືນ​ໃໝ່; ໃຫ້​ຊັກ​ແລະ​ຕາກ​ໜ້າ​ກາກ​ທີ່​ໃຊ້​ຄືນ​ໄດ້ຫຼັງ​ຈາກ​ໃຊ້​ແລ້ວ​ແລະ​ໃຫ້​ເກັບ​ໄວ້​ຢູ່​ບ່ອນ​ແຫ້ງ​ແລະ​ສະ​ອາດ.

ການ​ເດີນ​ທາງ​ອອກ​ຈາກ, ໄປ​ສູ່ ຫຼື ພາຍ​ໃນ​ອອ​ສ​ເຕ​ຣ​ເລັຍ

ບັນ​ດາ​ຣັດ​ແລະ​ເຂດ​ປົກ​ຄອງສາ​ມາດ​ໃຊ້​ລະ​ບຽບ​ຂໍ້​ຈຳ​ກັດ​ຂອງ​ຕົນ​ເອງ, ລວມ​ທັງ​ການ​ປິດ​ຊາຍ​ແດນ​ຂອງ​ຕົນ.

ການ​ເກັບ​ກຳ​ຂໍ້​ມູນ​ທີ່​ບັງ​ຄັບ

ນັບ​ຈາກວັນ​ທີ 1 ຕຸ​ລາ 2020,  ໄດ້​ມີ​ກົດ​ລະ​ບຽບ​ບັງ​ຄັບ​ໃຫ້​ເກັບ​ຂໍ້​ມູນ​ກ່ຽວ​ກັບ​ຖ້ຽວ​ບິນ​ພາຍ​ໃນ​ປະ​ເທດ​ເພື່ອ​ຊ່ວຍ​ບັນ​ດາ​ຣັດ​ແລະ​ເຂດ​ປົກ​ຄອງ​ຕ່າງໆ​ເມື່ອ​ເຖິງ​ຍາມ​ທີ່​ຈະຕ້ອງ​ນຳ​ຮອຍ: ​ຊື່, ທີ່​ຢູ່​ອີ​ເມ​ລ, ເລກ​ໂທ​ຣະ​ສັບ​ມື​ຖື, ແລະ​ຣັດ​ທີ່​ຕົນ​ອາ​ໄສ​ຢູ່.

ຫຼັກ​ການ​ແຫ່ງ​ຊາດກ່ຽວ​ກັບ​ການ​ເດີນ​ທາງ​ສາ​ທາ​ຣະ​ນະ  

ການ​ບໍ​ຣິ​ການ​ເດີນ​ທາງ​ສາ​ທາ​ຣະ​ນະ​ແມ່ນ​ຢູ່​ພາຍ​ໃຕ້​ຄວາມ​ຮັບ​ຜິດ​ຊອບ​ຂອງ​​ຣັດ​ແລະ​ເຂດ​ປົກ​ຄອງ​ຕ່າງໆ, ແລະ​ທຳ​ນຽບ​ຣັ​ຖ​ບານ​ແຫ່ງ​ຊາດ​ເປັນ​ຜູ້​ອະ​ນຸ​ມັດບັນ​ດາຫຼັກ​ການ​ຕ່າງໆ​ເພື່ອ​ຊ່ວຍ​ຈັດ​ການ​ໃນ​ດ້ານ​ສຸ​ຂະ​ພາ​ບ​ແລະ​ຄວາມ​ປອດ​ໄພ​ຂອງ​ບັນ​ດາ​ພະ​ນັກ​ງານ​ແລະ​ຜູ້​ໂດຍ​ສານ​​ໃນ​ເຄືອ​ຂ່າຍ​ການ​ເດີນ​ທາງ​ສາ​ທາ​ຣະ​ນະ, ລ​ວມ​ທັງ: ບໍ່​ໃຫ້​ເດີນ​ທາງ​ເມື່ອ​ຮູ້​ສຶກບໍ່​ສະ​ບ​າຍ, ຢູ່​ຫ່າງ​ຈາກ​ຄົນ​ຂັບ​ແລະ​ຜູ້​ໂດຍ​ສານ​ຄົນ​ອື່ນໆ ແລະຫຼີກ​ລ່ຽງ​​ການ​ຈ່າຍ​ເງິນ​ສົດ.  

​ຂໍ້​ຈຳ​ກັດ​ໃນ​ການ​ເດີນ​ທາງ

​ໄດ້​ມີ​ການ​ວາງ​ລະ​ບຽບ​ການ​ຊົ່ວ​ຄາວສຳ​ລັບ​ຖ້ຽວ​ບິນ​ສາ​ກົນ​ເຊິ່ງ​ໄດ້​ມີ​ການ​ທົບ​ທວນ​ເປັນ​ປ​ະ​ຈຳ​ໂດຍ​ຣັ​ຖ​ບານ.

ລະບຽບ​ການ​ດັ່ງ​ກ່າວ​ອາດ​ຈະ​ກະ​ທົບ​ຖ້ຽວ​ບິນ​ເຂົ້າ​ມາປະ​ເທດອອ​ສ​ເຕ​ຣ​ເລັຍ​ຂອງ​ທ່ານ. ຂໍ້​ມູນ​ມີ​ການ​ປ່ຽນ​ແປງເລື້ອຍໆ.

ສຳ​ລັບ​ຂໍ້​ມູນ​ເພີ່ມ​ເຕີມ​ໃຫ້ ກວ​ດ​ເບິ່ງຂໍ້​ມູນອັ​ບ​ເດດ​ລ່າ​ສຸດ​ທີ່ ​ນັກ​ເດີນ​ທາງ​ທີ່​ສ​ລາດ .

ເງື່ອນ​ໄຂການ​ກັກ​ກັນ​ຕົວ​ແລະ​ກວດ​ພະ​ຍາດ​ແມ່ນ​ຈັດ​ການ​ແລະ​ບັງ​ຄັບ​ໃຊ້​ໂດຍ​ຣັ​ຖ​ບານ​ປະ​ຈຳ​ຣັດ​ແລະ​ເຂດ​ປົກ​ຄອງ:

ຖ້າ​ທ່ານ​ຕ້ອງ​ການ​ເດີນ​ທາງ​ໄປ​ຕ່າງ​ປະ​ເທດ, ທ່ານ​ອາດ​ຈະ​ມີ​ສິດ​ຂໍ​ຍົກ​ເວັ້ນ​​ທາງ​ອອນ​ລາຍ​ນ໌ ໄດ້ ເພື່​ອ​ເດີນ​ທາງ ຖ້າ​ທ່ານ​ຕົກ​ຢູ່​ໃນ​ເງື່ອນ​ໄຂ​ໃດ​ນຶ່ງ​ດັ່ງ​ຂ້າງ​ລຸ່ມນີ້: 

  • ການ​ເດີນ​ທາງ​ຂອງ​ທ່ານ​ແມ່ນ​ພາກ​ສ່ວນ​ນຶ່ງ​ໃນ​ການ​ຕອບ​ຮັບ​ຕໍ່​ການ​ລະ​ບາດ ຂອງ COVID-19, ລວມ​ທັງ​ການ​ໃຫ້​ຄວາມ​ຊ່ວຍ​ເຫຼືອ  
  • ການ​ເດີນ​ທາງ​ຂອງ​ທ່ານ​ແມ່ນ​ມີ​ຄວາມ​ຈຳ​ເປັນ​ຕໍ່​ການ​ດຳ​ເນີນ​ທຸ​ຣະ​ກິດ​ແລະ​ອຸ​ສາ​ຫະ​ກັມ​ທີ່​ຈຳ​ເປັນ (ລວມ​ທັງ​ອຸ​ສາ​ຫະ​ກັມ​ນຳ​ອອກ​ແລະ​ນຳ​ເຂົ້າ) 
  • ທ່ານ​ເດີນ​ທາງ​ເພື່ອ​ໄປ​ຮັບ​ການ​ປິ່ນ​ປົວ​ດ້ານ​ສຸ​ຂ​ະ​ພາບ​ທີ່​ຮີບ​ດ່ວນ​ແລະ​ບໍ່​ມີ​ໃຫ້​ຢູ່​ໃນ​ອອ​ສ​ເຕ​ຣ​ເລັຍ  
  • ທ່ານ​ເດີນ​ທາງ​ໄປ​ປະ​ກອບ​ທຸ​ຣະ​ກິດ​ສ່ວນ​ຕົວ​ທີ່​ຮີບ​ດ່ວນ​ແລະຫຼີກ​ລ່ຽງ​ບໍ່​ໄດ້
  • ເຫດ​ຜົນ​ທີ່​ອີງ​ໃສ່​ພື້ນ​ຖານ​ຄວາມ​ເມດ​ຕາ​ປາ​ນີຫຼື​ມະ​ນຸ​ສ​ຍະ​ທັມ   
  • ການ​ເດີນ​ທາງ​ຂອງ​ທ່ານ​ແມ່ນ​ເປັນຜົນ​ປ​ໂຍດ​ຕໍ່​ປະ​ເທດ​ຊາດ.  

ໃຫ້​ຄ​ລິກ​ທີ່ນີ້ ສຳ​ລັບ​ຂໍ້​ມູນ​ເພີ່ມ​ເຕີມ​ກ່ຽວ​ກັບ​ເງື່ອນ​ໄຂ​ໃນ​ການເດີນ​ທາງ​ອອກ​ໄປ​ຈາກ​ປະ​ເທດອອ​ສ​ເຕ​ຣ​ເລັຍ