SBS Radio App

Download the FREE SBS Radio App for a better listening experience

Advertisement
Emeritus Prof Bereket Habte Selassie (Courtesy of Elias)

ፕሮፌሰር በረከት ሃብተስላሴ፤ በክፍል ሁለት የግለ ሕይወት ትረካቸው የዓይን ምስክርና ተሳታፊ የነበሩባቸውን ሁለት አንኳር የታሪክ ምዕራፎችን ያነሳሉ።

የ1953ቱን የታህሳስ ‘ግርግር’ እና የየካቲት ‘66ቱን የአብዮት ‘ፍንዳታ’ ታሪካዊ ክስተቶች።

By
Kassahun Seboqa
Published on
Friday, March 9, 2018 - 20:51
File size
9.53 MB
Duration
20 min 49 sec

በታህሳሱ ግርግር ወቅት በአብዮት ቀስቃሽነትና መሪነት ለክስ የተዳረጉትን በዳኝነት ተሰይመው እንዲፈርዱ በልዑል ዓሥራተ ካሣ ይመረጣሉ። እሳቸው ራሳቸው ከለውጥ ፈላጊዎቹ አንዱ ነበሩና በአለቆቻቸው ፊት ሞገስን ለመላበስ ሲሉ ከታሪክና ከኅሊናቸው ጋር መጋጨትን አልወደዱም።

ይልቁንም ምርጫ አድርገው የዘየዱት ከአዲስ አበባ መሰወርን ነበር።

“የታሪክ አውራ የሆኑና የማከብራቸው [እነ ጄኔራል መንግሥቱ ንዋይን] ሰዎች ላይ ዳኛ ሆኜ ልፈርድባቸው ስላልፈቀድኩ ከአዲስ አበባ ጠፍቼ ወደ ሐረር ሔጄ ተደበቅኩ” ይላሉ።     

ሌላኛው የሕይወት ጉዟቸው ውስጥ የገጠማቸው የታሪክ ምዕራፍ የየካቲት ‘66ቱ ሕዝባዊ አብዮት ክስተት ነው።

የቀዳማዊ ኃይለ ሥላሴ  የዘውድ ሥርዓት በአዲሱ የልጅ እንዳልካቸው መኮንን መንግሥት እጅ ሲገባ ባሕር ተሻግረው ይገኙ የነበረው አገረ አሜሪካ ነበር።

አዲሱ መራሄ መንግሥት ልጅ እንዳልካቸው መኮንን ራሳቸው ለዶ/ር በረከት ስልክ መትተው እገዛቸውን እንደሚሹ ጠይቀዋቸዋል። ሆኖም የዶ/ር በረከት ምላሽ በልጃቸው የሕክምና እርዳታ መሻት ሳቢያ ‘አይቻለኝም’ የሚል ሆነ።

ይሁንና የልጅ እንዳልካቸው መንግሥት ሲያከትም፤ ወዳጃቸውና ዘመዳቸው ሌተና ጄኔራል አማን አንዶም የተተኪው የጊዜያዊው ወታደራዊ አስተዳደር ደርግ ሊቀመንበር በመሆናቸው ዳግም ወደ አገር ቤት ተጠሩ።

የዘውድ ሥርዓቱን ባለ ሥልጣናት እንዲመረምሩም በደርግ የተቋቋመው መርማሪ ኮሚሽን ምክትል ሊቀመንበር ሆነው ተሾሙ።

የዛሬው መነሻችን ከታህሳሱ የለውጥ እንቅስቃሴ ክሽፈት በኋላ የዳኝነት ስየማ ሂደት ላይ ነው።