Poetry and Art: Kebedech Tekleab – Pt 1

ገጣሚ፣ ሰዓሊና በCity University of New York (CUNY), Queensborough College ረዳትፕሮፌሰር ከበደች ተክለአብ፤ በስንኝ ቁጥራት፣ የቅብና ንድፍ ሥራዎች ረቂቅ ውበት ተደምመው፤ ለስህበት ኃይሉ ውስጣዊ መንፈሳቸውን የማለለው በለጋ የልጅነት ዕድሜያቸው ነው። በአድናቂነት ብቻ ተወስነው መቅረትን አልመረጡምና የጥበብን ርቅቀትና ውበት ከምንጩ ሊጎነጩ ወደ አዲስ አበባ ሥነ ጥበብ ትምህርት ቤት ዘለቀዋል።

Kebedech Tekleab Source: Courtesy of KT and Leonardo Alfonso Correa

የአዲስ አበባ ሥነ ጥበብ ትምህርት ቤት ተማሪ ሳሉ በየካቲት ፷፮ቱ ሕዝባዊ አብዮት የትውልዳቸው አካል ሆነው በትግሉ እንቅስቃሴ ለአገራቸውና ለሕዝባቸው ለውጥ ለማምጣት የድርሻቸውን ለማበርከት ጥረዋል። በሂደቱም የኢትዮጵያ ሕዝብ አብዮታዊ ፓርቲ (ኢሕአፓ) ወጣቶች ክንፍ በነበረው የኢትዮጵያ ሕዝብ አብዮታዊ ወጣቶች ሊግ (ኢሕአወሊ) ተሳትፈዋል።

የሊጉ እንቃሴቃሴ ግና አብዮቱ ለወለደው አብዮታዊ ሰይፍ ዒላማ አደረጋቸው። ከቀይ ሽብር አረር ራሳቸውን ለማትረፍ ሲሉ ከአምስት ጓዶቻቸው ጋር ሆነው ወደ ጂቡቲ አመሩ።

Kebedech Tekleab Source: Courtesy of KTA

ዕጣ ፈንታቸው ግና ከስደት ይልቅ ለእሥር ዳረጋቸው። ቦሶማሊያ እሥር ቤቶች ውስጥም ከአንድ አሠርት ዓመት በላይ አሳለፉ።

ከቶውንም የእስራት ጊዜያቸው በስንኝ ቋጠሮ የአዕምሮ ማስሊያ ሆነላቸው። በመድሃኒት ፓኮ ላይ የተጠራቀሙት ማለፊያ የብዕር ጠብታዎቻቸውና ንጥር የአዕምሮ ጭማቂዎቻቸው ግዘፍ ነስተው ለሕትመት በቁ።

‘የት ነው?’ በሚል መጠይቀ ርዕስ ስር የተካተቱት ሥነ ግጥሞቻቸው ለተደራሲያን እነሆኝ ተባሉ።

'የት ነው?' Source: Courtesy of KTA

ስሙር ብዕረኝነታቸውም በታላቁ ብላቴን ጸጋዬ ገብረ መድኅን ፊት ሞገስን አገኘ።

የጸጋዬ ብዕር ስለ ከበደች የጥበብ ምስክርነቱን እንዲህ ሲል ገለጠ።

“ከበደች በልጅነቷ የ11 ዓመት ስደት ግዞትና ወህኒ መክፈልቷንበሥነ-ግጥም ውስጣዊ ብርሃኗ ተቋቋመችው። ይህ ነው የቅኔ ብዕር መከፈልቷና ሚስጥሯ። ከመከራ ሕይወቷ ውስጥ በሥነ-ግጥም ብ ዕሯ እየታዘለች የሱማሌ ሕዝብን አዲስ ፍቅር ዳሰሰችበት፣ ታቀፈችበት እንጂ፤ የኢትዮጵያንና የሱማሌን ሕዝብ የባህል ድልድይ ቀመረችበት እንጂ፤ በወህኒ ዕድሜዋ የምሬት ባህር አልሰጠመችም።”

Kebedech Tekleab and Tsegaye Gebremedhin Source: Courtesy of KTA

ኋላም ከእስር ወጥተው ወደ አገር ቤት ሲመለሱ፤ ቁስሉ ቢሽርም ጠባሳው አልጠፋምና ፈጥነው ወደ አገረ አሜሪካ አቀኑ። በምዕራቡ ዓለም ዩኒቨርሲቲ ዘልቀውም በሥነ ጥበብ ተጠበቡ። ዛሬም ድረስ የሚኖሩት በዚያው ነው። የጥበብ መንበራቸውን ዘርግተው ያስተምራሉ።

ሥነ ግጥምና ሥነ ስዕል፤ የሕይወት ዘመን ቅርሶቻቸው ከመሆን አልፈው የማንነታቸው መገለጫ እስከመሆን ደርሰዋል።