፩ በሕይወታቸው ውስጥ ንቁ ተሳትፎ ይኑርዎ
ፍላጎታቸውን አስመልክቶ እርስዎም የፍላጎታቸው ተጋሪነትዎን ያሳዩዋቸው፤ አንዳንድ ነገሮችን አብሮዋቸው አዘውትረው የመከወን ልማድን ያዳብሩ። በየዕለቱ አብሮ ከመመገብ ጀምሮ ከቤተሰብ ጋር ጊዜን አብሮ ማሳለፍ በጣሙን ጠቃሚ ነው።
፪ ልጆችዎን ያድምጡ
ችግሮቻቸውን ለእርስዎ ለማካፈል ምቾት እንዲሰማቸው ያድርጉ፤ የእነሱ አተያዮች ዋጋ እንዳላቸው ልብ ለማሰኘት የቤተሰብ ውሳኔዎች ላይ ሃሳባቸውን እንዲያጋሩ ይጠይቋቸው።
፫ አርአያ ይሁኗቸው
የእርስዎ ባህርይ በእነሱ ላይ ያለውን ተፅዕኖ ዝቅ አድርገው አይመልከቱ፤ በተለይም አልክሆል፣ ወይም ትምባሆ፣ ወይም የተዛባ መድኃኒት አጠቃቀምን በተመለከተ።
፬. እውነተኛ ይሁኑላቸው
ስለ አደንዛዥ ዕፅ ሁሉንም ነገር አለማወቅዎ እንግዳ ነገር አይደለም። እርስዎ እውነተኛና ግልጽ አቋም ካለዎት፤ ልጆችዎም በቀላሉ ለእርስዎ ግልጽ ለመሆን ይቀላቸዋል።
፭. ተገቢ ጊዜን ይጠቀሙ
ከልጆችዎ ጋር ስለ አደንዛዥ ዕፅ ሲነጋገሩ ተገቢ ጊዜን መምረጥዎን ያስተውሉ። ምናልባትም ሁላችሁም ቴሌቪዥን እየተመለከታችሁ፣ ወይም እነሱ ትምህርት ቤታቸው ስላለ ግለሰብ፣ አሊያም ስለ ቡድን ጓደኞቻቸው እያወሩ ሳለ መሆኑን።
፮. ረጋ ይበሉ
ስለ አደንዛዥ ዕፅ በሚያነሱበት ወቅት ረጋ ማለትና ሚዛናዊ መሆን በጣሙን ጠቃሚ ነው፤ እንዲሁም ከሚገባው በላይ ነገሮችን አጋንኖ አለማቅረብ። ሲናገሩ ከማጣጣልና በስብከት መልክ ከመግለጽ ይቆጠቡ፤ አሊያ ለወደፊቱ አደንዛዥ ዕፅን አስመልክቶ የሚያደርጉት ውይይቶች ሳንካ ይገጥማቸዋል፤ ልጆችዎንም ከእነ አካቴው ለመነጋገር ፈቃደኞች እንዳይሆኑ ያደርጋቸዋል።
7. ግጭትን ያስወግዱ
ግጭት ሰፍኖ ሳለ ችግርን ለመፍታት አዋኪ ይሆናል። ፍጥጫው ከከረረ ንግግርዎን ይግቱና በሁለታችሁም ዘንድ መረጋጋት ሲሰፍን ይመለሱበት።
8. መነጋገርዎን ይቀጥሉበት
አንዴ አደንዛዥ ዕፅን በተመለከተ ውይይት ከጀመሩ ቀጥለውም ሌላ ውይይት ማድረጉ ጠቃሚ ነው። ከልጆችዎ ጋር ቀደም ብለው ስለ አደንዛዥ ዕፅ መነጋገር ይጀምሩ፤ በማናቸውም ጊዜም ከልጆችዎ ጋር ለመነጋገር ፈቃደኛ ይሁኑ።
9. ግልጽ የሆነ ወሰን ያብጁ
አደንዛዥ ዕፅ ያለበት ሁኔታዎች ሲገጥማቸው ልጆችዎ ምን ማድረግ እንዳለባቸው ይወያዩ፤ ይስማሙ። ለምሳሌ ያህል፤ በማናቸው ሰዓት ቢሆን ካሉበት ድረስ መጥተው እንደሚወስዷቸው ያስታውቋቸው። ሆኖም፣ መጀመሪያውኑም እንዲያ ላለ ሁኔታ ራሳቸውን በፍጹም ሊያጋልጡ እንደማይገባቸው ግልጽ ሊያደርጉላቸው ይገባል።
፲. አዎንታዊነት ላይ ያተኩሩ
ስለ ራሳቸው መልካም ስሜት እንዲሰማቸው ያበረታቱዋቸው፤ ከበሬታ እንድሚገባቸውና ራሳቸውንም ማክበር እንዳለባቸው ያሳውቋቸው።
Image
አደገኛ ዕፅ: የእውነታ መዘርዝርን የያዙ የህትመት ውጤቶችና ለወላጆች የሚሆኑ ምክር ለበስ አተያዮች በ13 ቋንቋዎች ተጽፈው ይገኛሉ።
የአልክሆልና አደንዛዥ ማዕከላት በክልልና ክፍለ ግዛት መንግሥታት በኩል፤ የመረጃ፣ ምክር፣ አግባብ ወዳላቸው ድርጅቶች የመምራት፣ የመቀበል፣ ግምገማ የማድረግና በቀን የ24 ሰዓታት ያልተቁረጠ ድጋፍ ይሰጣሉ። ግልጋሎቶቻቸውንም ለግለሰቦች፣ ለቤተሰቦቻቸውና ጓደኞቻቸው፣ ሐኪሞች፣ ሌሎች የጤና ባለሙያዎች፣ የንግድና ማኅበረሰባት ቡድናት ይሰጣሉ።
Share
