သြစတြေးလျနိုင်ငံဟာ ကာကွယ်ဆေးထိုးထားတဲ့ ခရီးသည်တွေအတွက် နိုင်ငံတကာနယ်စပ်တွေ ပြန်လည်ဖွင့်လှစ်ပေးလိုက်ပြီးဖြစ်ပါတယ်။
ကမာ္ဘပေါ်မှာ ကိုဗစ်-၁၉ ကန့်သတ်ချက်တွေ အတင်းကြပ်ဆုံး ချမှတ်ထားတဲ့နိုင်ငံလို့ အသတ်မှတ်ခံထားရတဲ့ သြစတြေးလျနိုင်ငံဟာ ၂ နှစ်နီးပါးကြာပြီးတဲ့နောက် အခု ပထမအကြိမ်အဖြစ် ပြန်လည်ဖွင့်လှစ်ပေးခဲ့တာပါ။
နယ်စပ်တွေကို ပြန်လည်မဖွင့်လှစ်ခင် တရက်အလို တနင်္ဂနွေနေ့မှာ ပြုလုပ်တဲ့ သတင်းစာရှင်းလင်းပွဲအတွင်း "စောင့်ဆိုင်းရတဲ့အချိန်တွေကုန်လွန်သွားပြီ" လို့ သြစတြေးလျားဝန်ကြီးချုပ် Scott Morrison က ပြောပါတယ်။
ဒီနေ့မနက် ၆နာရီမှာတော့ Los Angeles ကနေပြီး ဆစ်ဒနီလေဆိပ်ကို ပထမဆုံးလေယဉ်တစင်းဆိုက်ရောက်လာခဲ့သလို၊ Tokyo, Vancouver နဲ့ Singapore ကနေ လာတဲ့ တခြားလေယဉ်တွေလည်း ဆိုက်ရောက်ဖို့ရှိနေပါတယ်။
ပထမဦးဆုံးရောက် ဆိုက်ရောက်လာတဲ့ ခရီးသည်တွေကိုတော့ ဖဒရယ်ခရီးသွားလာရေးဆိုင်ရာ ဝန်ကြီး Dan Tehan က သွားရောက်ကြိုဆိုခဲ့ပါတယ်။
သြစတြေးလျနိုင်ငံပြန်လည်ဖွင့်လှစ်ပြီး ၂၄နာရီအတောအတွင်း ဆိုက်ရောက်လာမယ့် နိုင်ငံတကာလေယဉ်ပေါင်း ၅၇ စင်းသာရှိပါတယ်။ ကပ်ရောဂါမဖြစ်ခင် အချိန်ကနဲ့ယှဉ်ရင်တော့ အများကြီးနည်းပါတယ်။ ဒါပေမယ့် ရှေ့လာမယ့်အတောအတွင်းမှာ နိုင်ငံတကာလေယဉ်တွေပိုမိုဆိုက်ရောက်လာဖို့ရှိမယ်ဆိုတာကို သံသယရှိစရာမလိုဘူးလို့ ဝန်ကြီးချုပ်ကပြောပါတယ်။
သြစတြေးလျနိုင်ငံဟာ ကိုဗစ်-၁၉ဆိုင်ရာ ကန့်သတ်ချက်တွေကို အတင်းကြပ်ဆုံးချမှတ်တဲ့နိုင်ငံတခုဖြစ်ပြီး ကန့်သတ်ချက်ကာလအတွင်း လူတိုင်းနီးပါး ဝင်ရောက်ခွင့်မရှိကြပါဘူး။ ချွင်းချက်အနေနဲ့ ခွင့်ပြုချက်ရတဲ့ သြစတြေးလျနိုင်ငံသားနဲ့ အမြဲတမ်းနေထိုင်ခွင့်ရှိသူတွေသာ သွားလာခွင့်ရှိခဲ့ကြတာပါ။
နယ်စပ်ပိတ်ချထားတဲ့အချိန်တုန်းက သြစတြေးလျနိုင်ငံသားတွေလည်း ပြည်ပထွက်ခွာခွင့်ပိတ်ပင်ခံထားရပါတယ်။
ကန့်သတ်ချက်ချမှတ်တဲ့မူဝါဒတွေကြောင့် ခန့်မှန်းချေအားဖြင့် သြစတြေးလျနိုင်ငံရဲ့ တရက်တာစီးပွားအပေါ် ဒေါ်လာ ၃ ့၆ ဘီလျံ ထိခိုက်မှုရှိတယ်လို့ Australian Chamber of Commerce and Industry ကဆိုပါတယ်။
With AAP
