လာမယ့်ဖေဖော်ဝါရီလ ၂၁နေ့ကျရင် ကာကွယ်ဆေးအပြည့်အဝထိုးထားတဲ့ဗီဇာရ ခရီးသည်တွေအတွက် သြစတြေးလျနိုင်ငံအနေနဲ့ နိုင်ငံတကာနယ်စပ်ပြန်လည်ဖွင့်လှစ်ပေးသွားမှာဖြစ်ပါတယ်။
ရှေ့လာမယ့် သီတင်းပါတ် ၂ပတ်အတွင်း ကမာ္ဘလှည့်ခရီးသွားအပါအဝင် နိုင်ငံတကာခရီးသွားဧည့်သည်အားလုံး နိုင်ငံထဲကိုပြန်ဝင်ခွင့်ပြုတော့မှာဖြစ်တယ်လို့ ဝန်ကြီးချုပ် Scott Morrison က ဒီကနေ့ တနင်္လာနေ့မှာကြေညာခဲ့ပါတယ်။
"တကမာ္ဘလုံးကိုပြန်လည်ကြိုဆိုလိုက်ပါတယ်။ အခုလိုလုပ်ဆောင်နိုင်တာဟာ သြစတြေးလျားနိုင်ငံရဲ့ အရေးကြီးတဲ့နောက်ထပ်အောင်မြင်မှုခြေလှမ်းတခုဖြစ်တယ်လို့ ကျနော်ထင်ပါတယ်" ဆိုပြီး Mr Morrison က သတင်းထောက်တွေကိုပြောပါတယ်။
အခုဆုံးဖြတ်ချက်ဟာ ၂၀၂၀ မတ်လ ၂၀ ရက်နေ့က စတင်ချမှတ်တဲ့ နှစ်နှစ်နီးပါးကြာ ကိုဗစ်-၁၉ ခရီးသွားစည်းမျဉ်းကန့်သတ်ချက်တွေကို နောက်တခုထပ်မံ ဖြေလျော့ပေးလိုက်တာဖြစ်ပါတယ်။
နိုင်ငံတကာကျောင်းသားတွေ၊ အားလပ်ရက်အတွင်း အလုပ်လုပ်ခွင့်ရတဲ့ဗီဇာကိုင်ဆောင်သူတွေနဲ့ ကျွမ်းကျင်လုပ်သားတွေအတွက် ခရီးသွားကန့်သတ်ချက်တွေကို ပြီးခဲ့တဲ့နှစ် ဒီဇင်ဘာလကတည်းက ပယ်ဖျက်ပေးလိုက်ပြီဖြစ်ပါတယ်။
နိုင်ငံတကာခရီးသွားတွေအနေနဲ့ ကာကွယ်ဆေး ၂ချောင်းထိုးပြီးသား သက်သေအထောက်အထား ဒါမှမဟုတ် ကျန်းမာရေးအခြေအနေကြောင့် ကာကွယ်ဆေးထိုးလို့မရတဲ့ စာရွက်စာတမ်းအထောက်အထေားတွေကိုပြသရမှာဖြစ်ပါတယ်။
နယ်စပ်ပိတ်ချမှုကြောင့် ခရီးသွားလုပ်ငန်းနယ်ပယ် ထိခိုက်နှစ်နာရတဲ့အတွက် နီုင်ငံတကာနယ်စပ်ပြန်လည်ဖွင့်လှစ်ပေးဖို့ ခရီးသွားလုပ်ငန်းတွေက တိုက်တွန်းနေကြတာဖြစ်ပါတယ်။
အခုလိုနယ်စပ်ပြန်လည်ဖွင့်လှစ်မယ့်ဆုံးဖြတ်ချက်ကို ကြိုဆိုကြောင်းနဲ့ အသေးစိတ်လုပ်ငန်းတွေကို ဆောင်ရွက်ဖို့လိုအပ်သေးတယ်လို့ Tourism & Transport Forum CEO Margy Osmand ကပြောပါတယ်။
ရောဂါခြေချုပ်ဖြစ်တဲ့ ကွာရန်တင်းစည်းမျဉ်းစည်းကမ်းတွေကတော့ သက်ဆိုင်ရာ ပြည်နယ်အပေါ် မူတည်ပြီး ဆက်လက်ရှိနေမှာဖြစ်ပါတယ်။
အခုလောလောဆယ်ဆယ်မှာတော့ Western Australia ပြည်နယ်က ၂ပတ်ကြာ ကွာရန်တင်းနေရမှာကလွဲရင် ပြည်နယ်တော်တော်များများက နိုင်ငံတကာခရီးသွားတွေကို ကွာရန်တင်းကင်းလွတ်ခွင့်ပေးထားပါတယ်။
