Highlights
- Chef na nawalan ng trabaho dahil sa pandemya nagbukas ng sariling online store
- Sa puhunan na $1,000 ay nailunsad niya ang kanyang negosyo
- Nagbebenta siya ng mga produkto mula Australia at pinapadala sa Pilipinas
Handa na sanang maging ganap na chef si April Kabigiting matapos mag-graduate sa kanyang kurso na hospitality major in commercial cookery noong Nobyembre taong 2019.
Ngunit dahil sa pandemya, napilitang magsara ang maraming mga negosyo at lubos na naapektuhan ang sektor ng hospitality at turismo.
Isa si April sa milyon-milyong Australyano na nawalan ng pinagkakakitaan.
Mahirap man ang sitwasyong kinakahaharap ay hindi pinanghinaan ng loob si April.
Sa gitna ng mga dagok na dulot ng COVID-19, na-ilunsad ni April ang kanyang online business.
Sa puhunan na isang libong dolyar ay nagtayo si April ng kanyang online store sa Facebook kung saan ay nagbebenta siya ng mga produkto na mula sa Australia na siya namang ipinapadala sa Pilipinas.
Inamin ni April na bago siya nagsimula ay natakot siya na baka hindi bumenta at masayang ang kanyang puhunan ngunit wala pang ilang buwan ay pumatok ito.
Payo ni April sa mga nais pasukin ang pagnenegosyo, huwag matakot na muling magsimula, alamin ang iyong market at maging pasensyoso.
April is now back to work at Boxhill RSL Source: April Kabigting
Si April ay patunay na sa gitna ng mga pagsubok, ay may mga posibilidad.
Kamakailan ay nakabalik na din siya sa kanyang trabaho bilang chef.
