Hirap na sila sa kanilang kinakaharap na kalagayan, ngunit mas lalo pang nagiging grabe ang sitwasyon para sa mga taong may kapansanan lalo na kung hindi Ingles ang kanilang pangunahing wika.
Kumikilos ang Multicultural Disability Advocacy Association of NSW (MDAA) na matulungan ang mga may-kapansanan na mula sa iba't ibang kultura at wika na maipaalam at maipaabot ang mga impormasyon para sa mga serbisyo na ibinibigay ng gobyerno na kanilang magagamit sa kanilang pang-araw-araw na pangangailangan.
Sa pamamagitan ng libreng programa ng gobyerno na National Disability Insurance Scheme (NDIS) may mga serbisyo at suporta na maaaring magamit ng mga taong may-kapansanan.
Ipinaabot ni Charlotte Dela Roca, isang Community Connector mula sa MDAA, ang mga impormasyon tungkol sa mga serbisyo na makukuha ng mga taong may-kapansanan mula sa National Disability Insurance Scheme (NDIS).
Kabilang sa mga suporta at serbisyo ang pagtulong sa mga pang-araw-araw na gawain, pagbili ng mga kagamitan para maayos na makakilos at suporta para magawa ang mga bagay at hangarin na nais na gawin ng isang taong may kapansanan.
