ગુજરાતી અને હિન્દી ફિલ્મ સંગીતમાં ઢોલની થાપ માટે પ્રસિદ્ધ જોડી સાજીદ ખાવરા અને અહેમદ ખાવરાએ SBS Gujaratiની મુલાકાત લીધી.
તેઓ ગુજરાતના કચ્છના વતની છે અને મુંબઈ તેમની કર્મભૂમિ છે. પોતાની ઢોલી તરીકેની સફર અંગે તેઓએ જણાવ્યું હતું કે ઢોલ વગાડવું એ તેમના પરિવારની પરમ્પરા સમાન છે. તેમના દાદા- પરદાદાના સમયથી આ કલા હસ્તાંતરિત કરવામાં આવી છે. નાનકડા ગામથી બૉલીવુડ સુધીનો સંઘર્ષ ખાટી - મીઠી યાદો અને પડકારભર્યો રહ્યો. આ જોડી દ્રઢપણે માને છે કે સંઘર્ષ બાદ સફળતા મળે જ છે.
તેમના પિતા પાસે તેઓએ ઢોલ વગાડવાની તાલીમ લીધી અને સંગીતકાર વીજુ શાહે તેઓને બોલીવુડમાં તક આપી. બોલીવુડ અને આધુનિક ગુજરાતી ફિલ્મોના મોટાભાગના પ્રખ્યાત સંગીતકારો સાથે તેઓએ કામ કર્યું છે.
તેમના ઢોલના તાલે પ્રસિદ્ધ થયેલ કેટલાક ગીતો - દંગલ ફિલ્મનું ટાઇટલ ગીત, ઝૂમ બરાબર ઝૂમ ફિલ્મના ગીતો, MTV COKE સ્ટુડીઓના ગીતો, રોન્ગ સાઈડ રજુ ફિલ્મનું ગોરી રાધાને કાળો કાન અને સોની ટીવી પર આવનનાર સિરિયલ પહેરેદાર પિયા કીનું ટાઇટલ ટ્રેક અને અન્ય ઘણા બધા ગીતો.
