ઇન્ટરનેશનલ ચેમ્પિયનશિપમાં ભારતનું પ્રતિનિધિત્વ કરવું, ભાગ લેવો, મેડલ જીતવો તે આજના તમામ યુવા ખેલાડીઓનો લક્ષ્યાંક હોય છે. તેમાં પણ ભારત જેવા દેશમાં ઓછી પ્રચલિત એવી વિન્ટર ગેમ્સની આઇસ સ્કેટિંગની રમતમાં ભારત દેશ તરફથી રમવું અને તેમાં મેડલ જીતવો એ કોઇ નાની વાત નથી. અમદાવાદના વિશ્વરાજ જાડેજાનું એ સપનું છે કે તે વિન્ટર ગેમ્સમાં ભારતનું પ્રતિનિધિત્વ કરે અને દેશને મેડલ અપાવે તે માટે તે ભારતથી હજારો કિલોમીટર દૂર નેધરલેન્ડ્સની ઠંડીમાં પણ પોતાનો પરસેવો પાડી રહ્યો છે. જાણીએ તેની મહેનત, પ્રેક્ટિસ શીડ્યુલ, એચિવમેન્ટ્સ અને નેધરલેન્ડ્સ જેવા ઠંડા પ્રદેશમાં રહીને આઇસ સ્કેટિંગની પ્રેક્ટિસ સમયે પડતી મુશ્કેલીઓ અંગે...
મૂળ અમદાવાદનો વિશ્વરાજ જાડેજા નાનપણમાં સામાન્ય બાળકોની જેમ રોલર સ્કેટિંગ કરતો હતો પરંતુ તેનું લક્ષ્ય ભારત માટે ઓલિમ્પિક્સમાં ભાગ લેવાનું અને દેશને મેડલ અપાવવાનું હતું. વિશ્વરાજના જણાવ્યા પ્રમાણે તેને જ્યારે ખબર પડી કે રોલર સ્કેટિંગની રમતનો ઓલિમ્પિકમાં સમાવેશ કરાયો જ નથી ત્યારે તે ખૂબ જ નિરાશ થયો અને આઇસ સ્કેટિંગને કારકિર્દી તરીકે અપનાવવાનું નક્કી કર્યું કારણ કે આઇસ સ્કેટિંગનો વિન્ટર ઓલિમ્પિક્સની લોકપ્રિયમાંની એક રમત છે.
Ice Skater Vishwaraj Jadeja Source: Vatsal Patel
આઇસ સ્કેટિંગ માટે ભારતમાં પૂરતી સગવડ નહીં હોવાના કારણે નેધરલેન્ડ્સ જવું પડ્યું
વિશ્વરાજે એસબીએસ સાથે વાતચીતમાં જણાવ્યું હતું કે ભારતમાં આઇસ સ્કેટિંગ માટે યોગ્ય સગવડો તથા ઇન્ફ્રાસ્ટ્રક્ચરનો અભાવ છે તેથી મેં યુરોપમાં કોઇ દેશમાં જઇને આઇસ સ્કેટિંગનું કોચિંગ લેવાનું નક્કી કર્યું હતું આ માટે મારે મારે અમદાવાદની એન્જીનીયરીંગ કોલેજનો અભ્યાસ અધવચ્ચેથી છોડવો પડે તેમ હતો. તેથી મેં અમદાવાદમાં અભ્યાસ છોડીને નેધરલેન્ડ્સમાં સ્ટડી માટે એપ્લાય કર્યું. ત્યાં પહોંચ્યા બાદ કાતિલ ઠંડીનો પડકાર, નાણાની અછત, પ્રેક્ટિસ માટેના વાતાવરણને અનૂકુળ થવાના પડકાર સહિતની મુશ્કેલીઓનો સામનો કરવો પડ્યો હતો.
નેધરલેન્ડ્સમાં કઇ મુશ્કેલીઓ નડી?
જે દેશમાં ભારતીયો વેકેશન ગાળવા માટે આવે છે તે દેશમાં વિશ્વરાજ પોતાનું સપનું પૂરું કરવા માટે પ્રવેશ્યો હતો. વિશ્વરાજે જણાવ્યું હતું કે ગુજરાતમાં સામાન્ય રીતે 40 ડીગ્રી જેટલું તાપમાન હોય છે જ્યારે નેધરલેન્ડ્સમાં તાપમાન શૂન્ય ડીગ્રીથી પણ નીચે જતું રહે છે. આ પ્રકારના વાતાવરણમાં બોડીને અનૂકુળ કરવું ખૂબ જ અઘરું બની જાય છે. આ ઉપરાંત નાણાની તંગી હોવાના કારણે મેં વહેલી સવારે ઠંડીમાં લોકોના ઘરે ન્યૂઝપેપર નાંખવાથી લઇને રેસ્ટોરન્ટમાં પણ કામ કર્યું છે. જોકે નેધરલેન્ડસના લોકો ખૂબ જ સપોર્ટીવ છે. મેં સ્પેનમાં વર્લ્ડ ચેમ્પિયનશિપમાં ભાગ લીધો ત્યાં જ એક ન્યૂઝ પેપરની મારા પર નજર પડી અને તેમાં મારા વિશેનો એક આર્ટીકલ પ્રિન્ટ થયો કે વિશ્વરાજ અહીં પોતાના માટે કોચ શોધી રહ્યો છે. આ જ આર્ટીકલ મારા માટે આશિર્વાદ રૂપ સાબિત થયો અને નેધરલેન્ડ્સના પ્રખ્યાત કોચ વિમ ન્યુવાનહ્યુઝ મને કોચિંગ આપવા માટે તૈયાર થઇ ગયા. મને હજી પણ તેમની સાથેની પ્રથમ મુલાકાત યાદ છે, તેમણે કહ્યું હતું કે જો તું તારું સપનું પૂરું કરવા માટે ભારતથી અહીં નેધરલેન્ડ્સ આવી શકતો હોય તો હું પણ તને કોચિંગ આપવા તૈયાર છું.
Image
આઇસ સ્કેટિંગમાં એચિવમેન્ટ્સ
વિશ્વરાજે અત્યાર સુધીમાં ભારત માટે અલગ અલગ અંતરની રેસમાં 66 વખત નેશનલ રેકોર્ડ્સ બ્રેક કર્યા છે. યુરોપ ખાતે લોઅર ડિવીઝનની રેસમાં પોડીયમ ફિનિશ, રોલર સ્કેટિંગમાં નેશનલ ગોલ્ડ મેડલ, 2004-05માં સ્કેટિંગમાં સફળતા બદલ સરદાર પટેલ એવોર્ડનો પણ સમાવેશ થાય છે.
સમર અને વિન્ટરમાં અલગ અલગ પ્રેક્ટિસ શીડ્યુલ
વિશ્વરાજ સમર તથા વિન્ટર સિઝનમાં અલગ અલગ પ્રેક્ટિસ શિડ્યુલ અનુસરે છે. સમર સિઝનમાં તે મોટાભાગે ફિટનેસ, સ્ટેન્થ, કન્ડિશનીંગ પર ધ્યાન આપે છે. તેમાં દરરોજ લગભગ 50 કિલોમીટર જેટલી સાઇક્લિંગ પ્રેક્ટિસનો સમાવેશ થાય છે. વિન્ટર સિઝનમાં આઇસ ટ્રેક પર સ્પીડ સ્કેટિંગની પ્રેક્ટિસ કરવામાં આવે છે. ઓક્ટોબરથી માર્ચ મહિના દરમિયાન વીકેન્ડ્સમાં યોજાતી આઇસ સ્કેટિંગની રેસમાં ભાગ લઇ વિશ્વરાજ પોતાની રમત સુધારે છે.
ઇન્જરી થઇ અને 2018 વિન્ટર ઓલિમ્પિક્સનું સપનું તૂટ્યું
વિશ્વરાજનું સપનું 2018 વિન્ટર ઓલિમ્પિક્સમાં ભાગ લેવાનું હતું પરંતુ સમર સિઝન વખતે પ્રેક્ટિસ દરમિયાન તેને સાઇક્લિંગ અને આઇસ રીંક પર ડાબા પગના ઘૂંટણમાં ઇજા પહોંચી અને તેનું વિન્ટર ઓલિમ્પિક્સમાં ભાગ લેવાનું સપનું રોળાયું. વિશ્વરાજે જણાવ્યું હતું કે આ ઘટના માનસિક તથા શારીરિક રીતે તેના માટે ઘણી નિરાશાજનક રહી હતી.
Ice Skater Vishwaraj Jadeja Source: Facebook
આગામી લક્ષ્ચાંક
વિશ્વરાજે જણાવ્યું હતું કે તે હાલમાં એશિયન ચેમ્પિયનશિપ માટે ફિટ થવા પ્રેક્ટિસ કરી રહ્યો છે. 2018માં એશિયન ચેમ્પિયનશિપ બાદ વિન્ટર એશિયન ગેમ્સમાં ગોલ્ડ મેડલ જીતવાનો લક્ષ્યાંક ધરાવતા વિશ્વરાજે જણાવ્યું હતું કે 2017માં જાપાનમાં યોજાયેલી એશિયન વિન્ટર ગેમ્સમાં હું એકમાત્ર એથ્લેટ હતો કે જેણે તમામ અંતરની રેસિંગમાં ભાગ લીધો હોય અને પોતાના વ્યક્તિગત રેકોર્ડને સુધાર્યો હતો.
Share
