નવ ડિસેમ્બરે યોજાનારી ૮૯ બેઠકો માટેની ચૂંટણીનું જાહેરનામું બહાર પાડવા સાથે ગુજરાત વિધાનસભાના જંગનો મંગળવારે વિધિવત આરંભ થયો છે. પહેલા તબક્કામાં સૌરાષ્ટ્ર-કચ્છ સહિતના વિસ્તારોમાં મતદાન થશે. આ મતદારસંઘોમાં મંગળવારથી ઉમેદવારીપત્ર ભરવાની શરૂઆત થઈ છે.
સંભવિત બળવાખોરી ટાળવા છેક છેલ્લા દિવસે જ સત્તાવાર ઉમેદવારોની યાદી બહાર પડશે.
ચૂંટણીના પહેલા તબક્કામાં જે બેઠકો માટે મતદાન છે ત્યાં ૨૧ નવેમ્બર સુધી ઉમેદવારી નોંધાવી શકાશે. રાજ્યના બંને મુખ્ય પક્ષો સંભવિત બળવાખોરી ટાળવા છેક છેલ્લા દિવસે જ સત્તાવાર ઉમેદવારોની યાદી બહાર પાડશે. ભારતીય જનતા પક્ષે એના ઉમેદવારો વિશે ચર્ચા કરવા પ્રદેશ નેતાઓને આજે દિલ્હી બોલાવ્યા છે. કહેવાય છે કે પક્ષના રાષ્ટ્રીય અધ્યક્ષ અમિત શાહ વચ્ચે અમદાવાદ આવ્યા ત્યારે અમુક નામ પર સર્વાનુમતિ સધાઈ હતી. એમ છતાં એ નામ સુધ્દ્ધાં જાહેર કરવામાં નહીં આવે.
એક બાજુ ચૂંટણીના ગાજાવાજાની વિધિવત શરૂઆત થઈ છે તો યુવા પાટીદાર આગેવાન હાર્દિક પટેલની હોવાનું કહેવાતી બે સેક્સ સીડી બહાર આવતાં ગુજરાતનું રાજકારણ ગરમાયું છે. હાર્દિકે આ સીડી પોતાની હોવાનું નકાર્યું છે અને ભાજપે આ ગંદી હરકત કરી હોવાનો આક્ષેપ કર્યો છે. અહીં એક ઉલ્લેખ કરવો રહ્યો કે થોડા દિવસ પહેલાં ખુદ હાર્દિક પટેલે ભાજપ પોતાની આવી કોઈ સીડી બહાર પાડશે એવી શક્યતા વ્યક્ત કરી હતી. ભાજપ નેતાગીરીએ આ સીડી મામલાથી હાથ ધોઈ નાખ્યા છે. જો કે હાર્દિકે કહ્યું છે કે એ આ સીડી પાછળનું કાવતરું ખુલ્લું પાડશે.
સેક્સ સીડી પાછળનું કાવતરું ખુલ્લું પાડશે.
દરમિયાન, પહેલા તબક્કાના મતદાન માટે જાહેરનામું બહાર પાડવામાં આવતાંની સાથે ભાજપ અને કોંગ્રેસે એના વધુ ને વધુ આગેવાનોને ગુજરાતમાં ઉતારવાની તૈયારી આદરી દીધી છે.
કોંગ્રેસે પાટીદારોને અનામત આપવાના મુદ્દે હજી કોઈ સ્પષ્ટતા ન કરી હોવા છતાં પાટીદાર અનામત આંદોલન સમિતિ એટલે કે "પાસ"ના સંયોજક હાર્દિક પટેલ હવે કોંગ્રેસને જ સમર્થન આપશે એ નક્કી થતાં ભાજપ એની રણનીતિમાં થોડો ફેરફાર કરે એમ લાગે છે.
સમાજના શક્ય એટલા વધુ વર્ગના માટે અંકે કરવા ભાજપ એના ૩૦થી વધુ કેન્દ્રીય નેતા અને પ્રધાનોને પ્રચાર માટે ગુજરાત તેડાવશે. વડાપ્રધાન નરેન્દ્ર મોદી ખુદ રાજ્યમાં ૩૦થી ૫૦ જેટલી સભા સંબોધે એવી શક્યતા છે. ભાજપે કેન્દ્રમાં એનો સહયોગ ધરાવતા નીતિશ કુમાર અને રામવિલાસ પાસવાન સહિતના નેતાઓને પણ ગુજરાતના રણમોરચે ઉતાર્યા છે.
બીજી બાજુ કોંગ્રેસ ઉપ પ્રમુખ રાહુલ ગાંધી પણ વધુ ત્રણ દિવસ રાજ્યમાં પ્રચાર માટે આવવાના છે. કોંગ્રેસ તરફથી હમણાં ભૂતપૂર્વ વડાપ્રધાન મનમોહન સિંહ અમદાવાદ આવ્યા હતા. મનમોહન સિંહે મોદી સરકારના નોટબંધી અને "જીએસટી" કર માળખાંને લગતા નિર્ણયની આકરી ટીકા કરી હતી.
ભાજપના જ આગેવાન યશવંત સિંહાએ મોદી સરકારની ટીકા કરતાં ભાજપ માટે ક્ષોભજનક સ્થિતિ સર્જાઈ તો હાર્દિક પટેલને ગામબંધી ફરમાવતા બેનર્સ પણ દેખા દઈ રહ્યા છે.
ભાજપના જ આગેવાન યશવંત સિંહાએ પણ મંગળવારે અમદાવાદમાં એક બેઠકમાં મોદી સરકારની આ મુદ્દે ટીકા કરતાં ભાજપ માટે ક્ષોભજનક સ્થિતિ સર્જાઈ છે.
એમ તો સુરત, સૌરાષ્ટ્ર અને ઉત્તર ગુજરાતના અમુક પાટીદાર વર્ચસ્વ ધરાવતા વિસ્તારોમાં ભાજપ નેતાઓનો બહિષ્કાર સૂચવતા પોસ્ટર્સ લાગતાં શાસક પક્ષ માટે ત્યાં મુશ્કેલ પરિસ્થિતિ છે.
એ સામે કેટલાક સ્થળે પાટીદાર આગેવાન હાર્દિક પટેલને ગામબંધી ફરમાવતા બેનર્સ પણ દેખા દઈ રહ્યા છે.
Share
