મેડીકલની પ્રવેશ પરીક્ષા પાસ કરવી તે મોટાભાગના વિદ્યાર્થીઓ માટે ઘણી પડકારનજક હોય છે. તેથી, ઘણી વખત પરીક્ષામાં ઉમેદવારો ચોરી કરવાના અવનવા નુસખા અજમાવતા જોવા મળે છે.
ટેક્નોલોજી જેમ જેમ વધુ સારી થતી ગઇ છે, તેમ તેમ વિદ્યાર્થીઓ પરીક્ષામાં ચોરી કરવાની વિવિધ રીતે અપનાવી રહ્યા છે. પરંતુ, તેમને રોકવા માટે નીરિક્ષકો પણ વિવિધ ટેક્નોલોજીનો ઉપયોગ કરતાં જોવા મળી રહ્યા છે.
હાલમાં જ ઇન્ટરનેટ પર એક વીડિયો વાઇરલ થયો છે અને તે ભારતમાં ક્યાંક ફિલ્માવાયો હોય તેમ લાગી રહ્યું છે. તે વીડિયોમાં નિરીક્ષકો વિદ્યાર્થીઓના કાનમાં કંઇક શોધી રહ્યા હોય તેમ લાગી રહ્યું છે. ટ્વિટર પર વીડિયોની સાથે મૂકવામાં આવેલા સંદેશમાં લખાયું છે કે નિરીક્ષકો ઉમેદવારોએ બ્લૂટૂથ ડીવાઇસ છૂપાડીને રાખ્યું છે કે કેમ તેની ચકાસણી કરી રહ્યા છે.
ધ ઇન્ડિયન એક્સપ્રેસમાં છપાયેલા રીપોર્ટ પ્રમાણે, નીરીક્ષકો ઓટોસ્કોપ નામના સાધન વડે પરીક્ષાર્થીઓના કાનમાં બ્લૂટૂથ ડીવાઇસ છૂપાડીને રાખ્યું છે કે કેમ તે તપાસી રહ્યાં છે.
આ વીડિયો ટ્વિટર પર મૂકવામાં આવ્યો હતો અને તે ઇન્ટરનેટ પર વાઇરલ થયો હતો.
ભૂતકાળમાં ભારતના વિવિધ રાજ્યોમાં પરીક્ષા દરમિયાન ચોરી કરવાના ઘણા કિસ્સા નોંધાયા હોવાથી શિક્ષણ વિભાગ વધારે કાળજી રાખી રહ્યો છે. થોડા સમય અગાઉ ભારતના બિહાર રાજ્યમાં ધોરણ 10ની પરીક્ષા આપી રહેલા વિદ્યાર્થીઓના પરિવારજનો તથા મિત્રો તેમને ચોરી કરાવતા નજરે ચડ્યા હતા. ત્યાર બાદ, શિક્ષણ વિભાગે 600 જેટલા વિદ્યાર્થીઓને કાઢી મૂક્યા હતા.
