Australia ah Chin Hakha holh a hmangmi hi 4,806 kan si tiin 2016 milurelnak nih a langhter. Asinain, kum 2021 milurelnak kan zoh than tikah Chin Hakha holh a hmang mi cu 6,394 an tling. Kum nga chungah Chin Hakha holh a hmang mi zatuak 33% tluk in kan karh tinak a si.
Chin mi cu Victoria, South Australia, Queensland le Western Australia ramkulh ah umhmun kan khuar. Chin miphun a tam deuh khua kan saknak hi Victoria ramkulh a si. A sangveng in kan then a si ahcun, Mooroolbark, Croydon le Kilsyth ah Chin miphun a tam bik khua kan sa.
Khoika sang le vengah dah Chin miphun khua kan sak timi a tanglei ah kan rak langhter lai.
Kumkhua lei he pehtlaiin Chin miphun kan dirhmun kan zoh a si ah cun, kum 5 in 9 karlak hi a milu in an tam cem. Pa hi an dihlak ah 411 an si i, nu hi an dihlak ah 406 an si ve. Abuaktlak in kan zoh a si ahcun Chin miphun chungin Australia ah khua a sa mi hi kum 25 in 29 kar an si tiin milurelnak nih a langhter.
Chin miphun chungah Australia ram mi sinak a hmu cang mi le a hmu rih lo mi hi kan i thlau tuk lo. Ram mi sinak a hmu cang mi hi zatuak 44.7% cun ram mi sinak a hmu rih lo mi zatuak 55% an si. Zatuak 0.3% ram misinak he pehtlaiin zapi sinah an langhter duh lo.
Fimcawnnak he pehtlaiin Chin miphun kan dirhmun milurelnak nih a langhter mi kan rak zoh than hna lai. Kan miphun chungah siangnaurun a cawng lio mi hi an tam cem. Sianginn a kai lio mi an dihlak chungah zatuak 20% tluk hi siangnaurun a cawng lio mi an si.
Sianginn a kai lio mi an dihlak chungah sianghleirun a cawng lio mi hi an dihlak ah zatuak 6.7% an si, cun cawnnak dangdang a kai lio mi hi zatuak 2.5% an si.
Pumpak dirhmun in kumkhat chungah kan hmuhmi phaisa kan rak langhter lai. Kumkhat chungah zapi zaran nih tangka kan hmuhmi hi $41,600 in $52,000 kar a si. Kumkhat chungah phaisa fangkhat hmanh ka hmu lo a ti mi hi zatuak 10.3% an si.
Chungkhar dirhmun in kumkhat chungah tangka hmuhmi kan zoh a si ahcun $65,000 in $78,000 kar a hmu mi chungkhar hi zatuak 12.4% an si i, $104,000 in $130,000 kar a hmu mi chungkhar hi zatuak 12.1% an si.
Chin miphun chungin inn leiba a ngei mi hi zatuak 46.8% an si. Inn a hlang lio mi nakin inn a caw mi an tam deuh, inn a hlangmi hi zatuak 42.7% an si. Asinain, inn man a pe dih cang mi hi 8.4% lawng an si tiin milurelnak nih a langhter.
Zapi zaran nih inn kan hlan mi man hi $300 in $324 kar a si tiin milurelnak nih a langhter. Inn man peknak kongah kan lungre a thei, kan van a sang ko a ti mi hi zatuak 36.1% an si. Inn man peknak kongah lungrethei in kan um lo a ti mi hi zatuak 57.6% an si.
Australia ram ah Chin miphun kan dirhmun le sining tam deuh theih na duh a si ahcun SBS Australian Census Explorer ah zoh khawh a si.
