Cawn nithumni ah, ngandamnak le sii lei vuancicho Paul Kelly nih atu lio pulrai zawtnak COVID-19 a puan lio zongah tha tein kan i runveng kho ngai ko a ti.
Australian ramchung ngandamnak lei i runvennak ah timhlamh cia kan si, hmailei caan ah zawtnak dang hmanh chuak sehlaw kan i kham kho cang lai tiin a chim.
Hmailei caan zawtnak a chawn mi an tlawm deuh nak hnga i zuam loin, a zaw fak mi pawl kha an tuar innak a nem deuh khawh nak ding caah an i zuam deuh tiin Professor Kelly nih a chim.
New South Wales ngandamnak lei hruaitu pakhat a si mi Brad Hazzard cu COVID-19 in positive a si. A nih hi raikhamsii tling in a chun cang, rian lei he pehtlaiin tonnak cu online hmangin a telpi hna lai.
Khuasik thla ah zawtnak a puan chin lo ahcun pulrai zawtnak a ngei mi he naihniam in a um thu mi pawl hi i erh fial ti lo dingiin Scott Morrison nih ramkulh hruaitu pawl a chimh cang hna.
Atu lio vawlei cungah rai a chawk cuahmah mi hi Australia sii lei thiamsang nih an kherhlai tikah zawtnak dang an hmuh chap mi a um. Cucu COVID Variant 'XE' a si. An zumh ningah Variant BA.2 le Omicron a si lai.
EX hi a luancia thla 3 ah khan UK ram ah rak hmuh hmasa bik. BA.2 nak in zatuak 10% nak rang in i chawnh a fawi teiin kherhlaitu nih an chim, nain tam deuh in kherhlainak tuah bel a hau rih hnga.
Northern Territory ah cun runvennak zulhphung cheukhat cu hloh an si cang. Tahchunnak ah leng chuah tikah le dawr chung luhnak ah raikhamsii i chunhnak catlap hmuhsak an hau ti lo.
Khualtlawng nih an i chunh dingmi raikhamsii caah Covaxin (Bharat Biotech) Australia nih a cohlan cang.
Australia ramchung rai a chawn mi cazin 6 April 2022
New South Wales: Rai a chawn thar mi 24,151 an si, Siizung ah thlop lio mi 1444, ICU ah a ummi 51 cun Rai in 15 an thi.
Victoria: Rai a chawn thar mi 12,150 an si, Siizung ah thlop lio mi 331, ICU ah a ummi 16 cun Rai in 3 an thi.
Queensland: Rai a chawn thar mi 8,534 an si, Siizung ah thlop lio mi 468, ICU ah a ummi 14 cun Rai in 1 an thi.
Western Australia: Rai a chawn thar mi 8449 an si, Siizung ah thlop lio mi 259, ICU ah a ummi 9 cun Rai in 5 an thi.
Tasmania: Rai a chawn thar mi 2408 an si, Siizung ah thlop lio mi 39, ICU ah a ummi 1 cun Rai in 1 an thi.
Northern Territory: Rai a chawn thar mi 513 an si, Siizung ah thlop lio mi 20.
COVID-19 raikhamsii kong cu na nuhrin holh in rel khawh a si
Zawtnak I Chek Khawhnak Hmun hna
RAT in zawtnak an chek i positive na si sual cun hika ah theihternak tuah khawh a si.
