Flyweight Division ah Top 1 a si mi Brondon Royval cu Joshua Van nih a tei

UFC 317 zuamcawhnak ah Joshua Van nih Brandon Royval cu makpetu biakhiahnak in a tei.

Jun 28, 2025; Las Vegas, Nevada, USA; Joshua Van (blue gloves) reacts after the fight against Brandon Royval (red gloves) during UFC 317 at T-Mobile Arena. Source: SIPA USA / Stephen R. Sylvanie-Imagn Images/Sipa USA/AAP Image

Chin miphun le Myanmar (Burma) ram mi vialte nih thazaang kan pek mi le kan uar ngaingai mi Joshua 'The Fearless' Van cu June 28 UFC 317 zuamcawhnak ah a thong țhan.

Top 1 contender, Flyweight division ah top 1 a si mi, taisawmh ngeitu Alexandre Pontoja a zuam cawhtu dingah an ruahmi Brandon Royval cu UFC 317 ah Joshua Van he an i tong.

Ranking ah top 1 ah um mi le top 12 a um mi zei ruangah dah an ton ti si ahcun Brandon Royval he a tthua dingmi Manel Kape cu a khawn caah a țhua kho țhan lo.

A luancia zarh thum ah khan Joshua Van nih Bruno Silva cu TKO in a rak tei.

Myanmar's Joshua Van, right, punches Brazil's Bruno Silva during the second round of a light featherweight bout at the UFC 316 mixed martial arts event Saturday, June 7, 2025 in Newark, N.J. (AP Photo/Frank Franklin II) Source: AP / FRANK FRANKLIN II/AP/AAP Image

Asinain, dinh caan hman ngei loin UFC 317 ah Brandon Royval zuamcawh dingin an pehtlaih țhan.

UFC 317 zuamcawhnak ah Brandon Royval he a țhua dingmi Manel Kape cu a khawn caah an dinter.

Asinain ruah lo piin, Manel Kape chawngtu dingah Joshua Van cu an pehtlaih i lunglawm tein a cohlan hna.

Cucaah top 1 a si mi Brandon Royval le Joshua Van (top 12) an i tonnak hi a si.

Ranking in zoh tikah i thlau ngai hmanh hna sehlaw, round 3 tiang an i thongh hnu ah makpetu biakhiahnak in Joshua Van nih teihnak a hmu.

Zarhthum chungah Joshua 'The Fearless' Van cu a sunglawi taktak mi teinak voihnih tiang a hmu.

Atutan teinak a hmu mi hi a sunglawi khun, a ruang cu dinh caan le timhtuahnak caan zong ngeih manh huaha loin a țhua than nain teinak nganpi a hmu.

Joshua Van le Brandon Royval an i țhuatning zoh tikah mipi nih 'Fight of the Year' pek phu a si tiin an ceihphai.

UFC ngeitu Dana White nih Van le Royval nih 'fight of the night' laksawng an hmuh hmuh tiin thawng a thanh.

LAS VEGAS, NEVADA - JUNE 28: (L-R) Joshua Van of Myanmar shales hands with Alexandre Pantoja of Brazil in the UFC flyweight championship bout during the UFC 317 event at T-Mobile Arena on June 28, 2025 in Las Vegas, Nevada. Credit: Jeff Bottari/Zuffa LLC/Getty Images

Flyweight Division ah Top 1 a si mi Brandon Royval a tei cang caah a fiang mi cu atu lioah Champion taisam a ngeitu Alexandre Pantoja he tong kho an si.

Alexandre Pantoja hi atu lio ah a mak bak mi, Flyweight Division ah Champion taisawm a kilveng kho ngaingai mi pakhat a si.

UFC 317 co-main event ah Alexandre Pantoja nih Kai Kara France cu Submission in a tei caah Champion taisawmh cu a kilven khawh than.

Hmantlak ah kan rak tar bantuk in Champion Alexandre Pantoja le Joshua Van tonnak le biaruahnak an ngei.

Joshua Van nih " Alexandre Pantoja cu champion a si ko nain Joshua Van he a țhua bal rih lo," tiin a chim.

Atu tiangah cun UFC leiin Champion Alexandre Pantoja le Joshua Van i tonnak ding kong zeihmanh a chim rel mi a um rih lo.