Australia ram i thilman hlathlaitu nih datsi man a kai tukmi kong ah fianternak pe ding in datsi zuartu pawl cu an auh hna lai.
Australia ram i thilman hlathlaitu nih datsi man a kai tukmi kong ah fianternak pe ding in datsi zuartu pawl cu an auh hna lai.
Ampol, BP, Chevron, Exxon Mobil, le 7-Eleven telh in datsi zuartu phu cheukhat cu Australian Competition and Consumer Commission (ACCC) nih biaruahnak ngei dingin meeting (emergency meeting) ngei ding in a auh hna lai.
Iran ram nih vawleicung zinan phorhnak lam pakhat a si mi, Strait of Hormuz cu a khar, hihi US-Israel ral a chuakmi ruang ah a khar mi a si.
Cu nih cun zinan man a kaiṭer i, Australia khuapi hna ah unleaded petrol cu litre khat ah $2.20 cung a si cang, cun diesel zong $2.60 cung a phan.
Treasurer Jim Chalmers nih a chimmi cu, Middle East ral a chuah hnu ah zinan man a kai tukmi nih ACCC caah lungretheihnak nganpi a chuahter.
"ACCC nih datsi zuartu le dawr ngeitu hna cu fianternak pe ding in an auh hna," tiah a chim.
"A hlei in thil hmaan lo an tuahmi an hmuh ahcun, ACCC nih dantatnak fak (throw the book at them) an ing lai," tiah a chimchap.
Ral a chuah hnu ah mawṭaw mawngtu hna kha hlen le rawi an si nakhnga lo caah, Labor party nih thilman a hlathlaitu kha datsi man hlat (monitor) ding in an rak fial cang hna.
Energy Minister Chris Bowen nih datsi a tam deuh nakhnga datsi cawknak he pehtlaiin rikhiahnak (fuel standards) cu thla hnih chung tuah a si lai, tiah a chim. Hi nih hin thla khat ah litre (million) 100 a chuahter lai, cucu ni hnih chung hman khawh ding za a si.
Motoring phu hna le cozah nih mipi cu thinphang in thanti i chiahkhon (panic buying) lo ding in an forhfial hna, thanti cu ram chung ah a lut peng rih ko tiah mipi an hnemh hna.
One Nation MP Barnaby Joyce nih thanti cu lofatuahtu (farmers) hna le hmun dang deuh caah i chiah (reserve) ding in ruahnak a chuahpi, ral a rauh deuh ahcun khuapi hna caah thanti hman zat khiah (rationing) ding in ruahnak a chuahpi.
Thanti phurtu phu hna nih hi ruahnak cu an bawmh. Sihmanhsehlaw NRMA nih hi ruahnak cu a el, datsi man zat khiah (rationing) nih chawlehnak le mipi nunnak ah ṭhatlonak a chuahter lai tiah an chim.
Opposition Leader Angus Taylor nih cozah nih datsi um zat (supply) ah buaibainak a um ti hi an cohlan a hau tiah a chim. "A herh mi cu datsi hi a rannak in mipi sin phakṭer a si," tiah Nine’s Today ah a chim.
"Datsi kan hmunhmi (refinery) ram leng ah a kuat mi an um, ramdang ah kuat loin Australia mipi hman dingah chiah le khon ding a si," tiah a chimchap.
Finance Minister Katy Gallagher nih cozah rian a si mi cu hmailei i ral ruang ah buaibainak a chuak kho mi hna caah timhtuahnak (contingencies) le I runvennak khawh ding in timhtuah a si tiah a chim.
"Kan ngeihmi vialte kan hman cuahmah, ral le buainak pehzulh in a kal chung poah kan hman peng ko lai," tiah ABC News Breakfast ah a chim.
For the latest from SBS News, download our app and subscribe to our newsletter.
