New South Wales ramkulh chaklei hmun cheukhat ah ti fak ngaiin a lianh caah ti a lianhnak hmun ah a ummi pawl cu fak ngain a hnursuan. Inn le lo siseh, hmun le hma pawl zong an rawk ngaingai cucaah a rawk ral mi thianh ding le bawmh a herh mi pawl bawmh dingah Australian Defence Force ralkap phu tam lak te thlah an si.
Har a tong mi hna caah tangka bawmhnak zong pek dingin timhlamh a si. Ramkomh cozah lutlai riantuantu hna nih tilian ruangah har a tongmi pawl caah bawmhnak an pek ding zat zong zohthannak an ngei lai.
NSW cozah nih har a tongmi hna an zohkhenh tluk hna tein le an bawmhchanh tluk hna tein kan bawmh chan ve te hna lai tiin Morrison nih a chim.
"Northern Rivers ah khua a sa mi pawl cu Australia ramkomh cozah nih kan dirkamh zungzal ko hna lai" tiin a chim chap.
"Mah hi cu khua caan ruangah ti a lian sawhsawh mi a si lo, rampi a kan hnursuang taktak tu harsatnak phun khat a si"
Ti lianh hram a thokka in bawmhnak kan tawlrelmi hi nuai $200 leng a si cang lai tiin ramhruaitu nih ti a lianh ruangah harsatnak kan tongmi kong a chim pah ah a telh chih.
Har a tong mi hna nih bawmh kan herh tluk in a kan bawm lo, kan i fimtawlnak ah kan i pha zo hrimhrim lo. Cozah leiin mi bawmtu an tlawm deuh tiin an phun zai caah bawmtu 5000 leng chap piak nolh an si lai.
ADF ralkap phu an phak a hnut deuhnak a ruang cu tlunkalnak ah harsatnak a um ruangah a si tiin Defence Minister Per Dutton nih a chim.
"ÄDF ralkap phu leiin an thil tuahmi zoh tikah lung a tling ngaingai ko nain, an thil tonmi nih an thinlung phurh rit in a um caah a si."
Ti a hun zor deuh in cun bawmh dingah tam deuh an rak chuak ko lai tiin Dutton a chim.
"Thil a cang mi kongah hin biatak tein khua kan ruah a herh. Ti lian sawhsawh a si lo, midang cio nih an chim bang, mah hi cu thlicia nih a hrawhhral mi an si," tiin a chim.
"Ïnn le lo an rawk dih, lam zong ti nih a phum dih, atu bantuk thil a cang mi sersiam le tawlrelnak ding caah cun caan a la ngaingai ding a si."
A rauh hlan ah, a rawkmi fawn line remh ding le lam pawl thianh dingah ADF ralkap phu thlah an si lai cun har a tongmi hna caah thil a herhmi pawl cu helicopter in chanh an si lai.
Fak ngaiin thlichia le ti lian nih a hrawh biknak hmun pawl nih bawmhnak an herh tluk in cozah sin in bawmhnak an hmu lo tiin kamkhat lei cozah riantuantu phu lei hruaitu pakhat nih a chim.
SES volunteers launch an inflatable rescue boat in Camden, South Western Sydney, on Tuesday, 8 March, 2022. Source: AAP / Dean Lewis
Atu lio ah an herh bik mi cu cozah lei bawmhnak le ADF leiin ralkap phu lei minung tam deuh nih dirkamh le bawmhchanh a si tiin Watt nih a chim.
Ti a lianh ruangah an inn le lo zaamtak a hau mi hi minung 80,000 tluk tam an si, a zual biknak hmun cu NSW ramkulh chaklei rili kam hrawng a si.
Peh zulh in ruah a sur lengmang caah Queensland ramkulh ramri in thlanglei Victoria ramkulh ramri tiang khin ti a lian.
NSW ramkulh chung nitlak thlanglei le nitlak lei Georges River kham hrawng, minung 60,000 tluk cu umnak sang 13 hna cu nan umnak nan chuah tak a hau lai tiin ralrinnak thawngthanh an si cang.
SES Commissioner Carlene York nih kan lung re a theih khun biknak hmunhma pawl cu Kempsey, Georges River, Hawkesbury Nepean River, Wollongong, Shoalheaven, St Georges Basin le Sussex Inlet hna an si a ti.
Sydney nitlak lei sang Wentworthville ah a ummi kum 67 tarnu le a fapa 34 fai a si mi cu an tlaunak in hmuh an si rih lo.
"An humhimnak kongah kan lungre a thei" tiin York nih a chim.
Suimilam 24 chungah bawmh kan herh tiin voi 2500 nak tam deuh phone in pehtlai kan tong tiin SES lei nih an chim.
