Zapi nih kan theih cio dih bantuk in Joshua Van cu Ultimate Fighting Championship (UFC) ah Myanmar ram aiawh dingin 2023 ah a rak lut ve.
UFC a luhnak caan hmanh a sau rih lo nain Dec 6 2025 ah Championship taisawh ngeitu Alexandre Pantoja he thir kulh chungah an lut.
Caan tlaitu nih i tthua cang uh tiah dar khing an hun tum i, Pantoja nih Joshua van cu a hun zuan hnawh colh. Van chiat ah, Pantoja nih Joshua Van a lu ah ka chuih a tinak ah, siarem lo ngaiin a tluk caah fak taktak in a ban a hliam.
Pantoja cu pehzulh in a thong kho ding a si ti lo tikah Joshua Van cu Technical Knockout (TKO) in teinak an pek. An i thongh caan zoh tikah Joshua Van nih Pantoja cu second 26 chungah a tei.
UFC Championship taisawmh a kan hmuh piaktu Joshua Van cu UFC tuanbia ah Champion sinak a hmu mi lakah a kum no bik pahnihnak a si. Kum no bik Champion sinak a hmu mi cu Jon Jones a si.
Joshua Van cu UFC tuanbia chungah Asia ram chuak pa lakah UFC champion sinak a hmu hmasa bikmi tuanbia thar a tialtu a si. Cun, kum 2000 hnu a chuakmi pa lakah Champion ahmu hmasa bik mi zong a si fawn.
Press conference ah thawngpang hlattu pawl nih Joshua Van cu biahalnak an ngeih.
"Teinak cu ka hmuh ko lai tiah ka rak i ruahchan mi a si ko nain, atu bantuk in thil cang lai ti cu ka rak ruat lo," tiah a chim.
Pantoja nih damnak tling a hmuh tikah i ton tthannak ding saduh a thahmi zong a chim phuan.
Bia haltu nih UFC ngeitu Dana White an hal mi pakhat cu champion Joshua Van le Tatsuro Taira i thuatnak ding kong a si.
Zakhat ah zakhat a fiang mi thil cu a si rih lo nain Japan ram ah Joshua Van le Tatsuro Taira i tong kho hna seh ti hi kan duh ve mi a si ko tiin Dana White nih a chim.
Champion Joshua Van zong nih bia haltu sinah a chim ve mi cu thla lawng i dinh in tuan lei pangah i thuat than a duhnak, kum khat chungah voi 3, voi 4 hrawng i thuat a duhnak kong a chim ve.
Chin miphun le Myanmar ram tuanbia lawng si loin, vawlei cung tuanbia ah Joshua Van c Burmese- Chin American Flyweight Champion tiin theih le cinken peng a si cang lai.
Share
