Australia Ram Ah Thimfung Thlakning Kong Theih A Herhmi

Caan rauh hlan ah Australia ramchung thimnak kong thanh a si cang lai, cucaah thimnak ah thimfung na thlak khawh ve nak ding caah na tuah ding le na theih a herhmi thil hna cu a tanglei ah kan rak tial lai.

Tasmanians complete ballot forms

Tasmanians complete ballot forms Source: Getty Images/Steve Bell


Thil biapimi

  • Thimfung na thlak khawh nak ding caah Australia ram mi sinak na ngeih a hau cun kum 18 na tlin a hau fawn.
  • Thimfung thlaknak caah min pek a hau I min peknak catlap silole online hmangin min pek khawh a si.
  • Australian Electoral Commission website ah thimfung thlaknak he a pehtlaimi thil kong vialte cu na nuhrin holh in siseh, cun rel fawi mirang ca in tial a si.
Advertisement

A ra lai dingmi ramkomh cozah thimnak ah hin cu cozah nih rak kan hruai seh tiin saduh na thah mi kha thimfung thlaknak hmangin na langhter khawh.

Thimfung ka thla kho ve ma?

Australia ram mi sinak a ngei mi poah cu thimfung an thlak hrimhrim a herh, asinain thimfung na thlak khawh nak ding caah tahfung an chiahmi na tlin le tlin lo na hlat hmasa a hau.

“Australia ram mi sinak a ngei cang mi chungin kum 18 a tling cang mi cu thimfung thlaknak ding cazin chungah min an i pe kho cang cun thimfung zong an thla kho cang” tiin Even Ekin-Smyth nih a chim. A nih hi Australian Electoral Commission nih chimphuannak nawl an pek mi a si.

“Asinain thimfung thlak na duh ahcun thimfung thlaknak ding cazin ah na min na khumh a hau.”

A ra lai dingmi thimnak ah thimfung thla dingin Australia ram mi sinak a hmu thar mi 400,000 tluk cu thimfung thlaknak ding cazin ah min an rak I khumh.
Voting Centre
Voting Centre Source: AEC


Zeitik ah dah ka min ka khumh lai?

“Australia ram mi sinak a hmu thar mi, tahfung a tling cang mi poah cu a rannak in an min an I khumh awk a si” tiin Mohammad Al-Khafaji nih a chim. A nih hi Federation of Ethnic Communities’ Councils of Australia i an hruaitu bik a si.

Thimnak a nile thla, cu tik ni ah a si lai ti thawng an thanhnak in zarhkhat chungah min i khumh hrimhrim ding a si. Cun, min a pe cang mi chungin na konglam a thlengmi pakhatpakhat a um si cun zarhkhat chungah theihternak na tuah a hau.

“Thimnak kong thawng an thanh kha hngah a hau theng lo” tiin Ekin Smyth nih a chim.

“Atu zongah na tuah khawh mi a si ko”

Minkhumhnak ah zeitin ka min ka khumh lai?

Online hmangin min khumhnak an tuahmi khan min khumh khawh a si. Na duh ahcun na phone zong na hman khawh.

Min I khumh duh ahcun  mah link hi hmat.

Min khumhnak catlap (enrolment forms) na duh a si ahcun AEC zung kipah va lak khawh a si. Silole, 13 23 26 chawn hna law nan inn ah minkhumhnak catlap cu an rak in kuat lai.

Min I khumhnak caah a herhmi ca pawl an um tahchunnak ah Australian passport, driver’s licence, silole citizenship certificate pawl hna an si.

A herhmi ca pawl rak langhter mi pawl na ngeih lo, na thlau sual hna a si ahcun a rannak in na sin an phak zaunak dingin na tawlrel hna an hau lai.

A cheukhat cu hmuh khawh thannak ding caah a zarhzarh hna an rau, sau ngai hngah an hau tawn, a cheukhat cu zarh li tluk hna an rau tawn.

Ballot box
Source: AEC


Thimfung thlak lai fatinte min I pek lengmang a hau lai ma?

Thimfung thlaknak ding caah voikhat min na pek/khumh cang ahcun, ramkomh thimnak, ramkulh thimnak le mah le umnak cozah riantuantu thimnak a um fatinte thimfung na thla kho cang.

A biapi mi belte cu na konglam a thleng mi a um sual ahcun zungah theihternak na tuah lengmang an hau.

Thimfung thlakni an thanh le cangka in zarhkhat chungah na konglam a thlengmi a um cun theihternak na tuah hna a hau tiin Ekin-Smyth nih a chim.

“Na umnak hmun hna na thial silole na min hna na thleng, thlennak pakhatkhat a um sual si cun theihternak na kan tuah zau ah a tha.”

hika ah theihternak na kan tuah khawh.

Thimfung thlak ah na min na pek cang le pek cang lo theih na duh ahcun ah na kawl khawh cun 13 23 26 ah na chawnh khawh.

Senate and house of representatives ballot box
Source: AEC


Thimfung thlaknak kong he pehtlaiin bawmh na herh a si ahcun lungre theih awk a um lo, bawmtu an um ko. Avoikhatnak thimfung a thla dingmi pawl hi voitam deuh cu mipem le mirang holh a thiam tuk lo mi le hi ka ram sining a thei tuk lo mi an si tikah bawmh an herh tawn.

Thimfung thlaknak kong he pehtlaiin bawmh na herh ahcun  Migrant Resource Centre pehtlaih khawh an si. Holh lei ah lungretheih awk a um lo, na nuhrin holh a hmangmi riantuantu pakhatkhat nih khan na herhning poah in an tlangtlak lai. Thimfung thlaknak caah min khumh in siseh, a herhmi thil tuah a haumi vialte zong an i tuahpi dih lai.

Thimfung a thla kho ding dirhmun na si ko buin thimfung thla dingin na min na pek lo i thimfung na thlak lo ahcun dan an in tat khawh. Thimfung hi thlak hrimhrim a hau mi a si.


Share
Published 29 March 2022 at 5:47pm
By Melissa Compagnoni
Presented by Cung Khuk Zawn