Yog koj xav nyeem zaj xov xwm ua lus Askiv ces nyeem tau ntawm no:
http://www.sbs.com.au/news/article/2017/04/20/defending-australian-values-pm-unveils-citizenship-crackdown
Los yog nyeem zaj xov xwm no ua lus Hmoob raws li hauv qab no tau:
Australia tus thawj pwm tsav hais tias cov kev hloov kho rau cov kev thov xeem los ua pej xeem Australia tsuas yog pov puag Australia tej cai coj taug zoo (Australian values) xwb.
Tsoom hwv Australia xav los sim cov neeg uas xav thov los ua pej xeem Australia seb puas paub zoo txog Australia tej cai coj tau ua zoo (Australian values) thaum Australia tus thawj pwm tsav Malcolm Turnbull qhia tias nws yauv xyuas kom tsim tau cov cai tswj cov laj fai neeg tsiv teb tsaws chaws no kom nruj ntxiv tuaj.
Cov neeg tsiv teb tsaws chaw yuav tau teb ib cov lus nug nyuaj heev thaum lawv mus xeem ua pej xeem tom qab lawv tuaj nyob tau 4 xyoo hauv Australia no tab sis lawv yuav tsum qhia tau tias lawv txawj siv lus English thiab pab txhim kho lub tebchaws Australia no.
Yog li ne kom puas muaj peev xwm yuav mus xeem tau los ua pej xeem Australia lawm?
Nyem lub vam sab no coj koj mus teb ib cov lus nug xeem ua pej xeem Australia piv txwv seb koj teb puas tau:
http://www.sbs.com.au/news/article/2015/05/28/could-you-pass-australias-citizenship-test
Cov neeg mus xeem ua pej xeem Australia yuav tsum tau teb ib cov lus nug hauv computer tab sis tsis paub seb puas xeem tau?
Kim Malcolm Turnbull uas yog Australia tus thawj pwm tsav hais tias “Tsuas yog peb xav los txhawb nqa peb lub tebchaws uas muaj ntau haiv neeg coj ntseeg kev cai dab qhuas thiab hais ntau hom lus sib txawv kom kub siab ua raws li Australia tej cai coj taug ua zoo xwb"
Yog li no ces cov neeg mus xeem ua pej xeem Australia yuav tsum qhia tau tias lawv yeej tau tuaj koom ua lub neej hauv tebchaws Australia no xws li mus ua hauj lwm, fim thiab hwm tej poj niam thiab lawv tseem yuav raug txheeb xyuas seb puas ua txhaum cai dab tsi ntxiv.
Kim Turnbull hais tias “Peb xav kom muab Australia tej cai coj taug ua zoo no los ua ib co tseem ceeb rau cov kev xeem ua pej xeem thiab ras los ua pej xeem Australia no."
Peter Dutton uas yog Australia tus pwm tsav lis laj fai tswj neeg tsiv teb tsaws chaw tau hais tias tsis yog yuav xav kom tej neeg uas xav xeem los ua pej xeem Australia no tso tseg lawv tej kab li kev cai los yog lawv teej tug dab tsi tab sis tsuas yog yuav tau ua raws li Australia tej cai coj taug ua zoo uas lub tebchaws no coj thiab ua raws xwb.
Cov lus nug thaum xeem ua pej xeem Australia ces muaj 20 nqe sib txawv ua lus English uas yuav tau xaiv nqe lus teb kom yog no yuav raug muab kho dua tshiab kom muaj cov kev xeem uas yuav tau nyeem, yuav tau sau thiab yuav tau mloog cov lus nug thiab yuav nug txog tej lus nug txog cov kev coj cuj pwm zoo uas paub qhov yog thiab qhov txhaum piv txwv li tus neeg teb cov lus nug ntawd puas pom zoo ntau nws tus txij nkawm.
Pwm tsav Dutton yeej lees paub tias " yeej yuav muaj cov neeg dag thiab" thaum lawv tau xeem thiab teb cov lus nug tab sis yeej yog tej yam tseem ceeb yuav tau coj los nug. Kim Dutton hais tias " Rau qhov tej thaum yeej muaj ib txhia yeej txhob txwm lam teb tej lus nug ntawd kom tau ras los ua pej xeem Australia xwb tab sis xyov lawv puas xav ua pej xeem Australia tiag los yog yoog thiab ua raws li Australia teu cai tswj hwm. Yog tias muaj ib tug twg dag thaum lawv xeem ces peb yuav siv tsab cai Citizenship Act los txwv tsis pub lawv ua pej xeem thiab."
Tab sis yog lawv ho xeem tsis tau 3 zaug lawm ces lawv yuav tsum tau tos li 2 xyoos ntxiv mam li rov qab muaj cai mus xeem dua ntxiv.
Australia tus thawj pwm tsav hais tias " Vim cov kev tau ras los ua tub koom siab nrog Australia tej cuab yig yeej yog tej yam tsim nuj heev thiab yuav tsum tau los ua raws peb tej cai coj taug ua zoo, hwm peb tej cai tswj hwm thiab kub siab ua laj kam thiab koom txhim teb kho chaw kom lub tebchaws Australia no vam meej los yog zoo tshaj no ntxiv."
Kim Turnbull Tau hais rau hnub zwj Teeb no tias nws tseem yuav coj cov hauj lwm no coj los tham qhia rau pab nom Labor thiab lwm cov pab nom me thiab xav kom lwm pab nom pab nws tsim kom tau tsab cai tshiab los tswj tej hauj lwm haiv no.
Yog li ces Kim Malcolm Turnbull uas yog Australia tus thawj pwm tsav thiaj tau qhia txog nws cov kev hloov kho tshiab rau cov kev xeem los ua pej xeem Australia tom qab 2 hnub uas nws tau qhia tias yuav tsis pub cov visa 457 rau cov eneg txawv tebchaws thov tuaj ua hauj lwm hauv Australia no ntxiv lawm. Nws hais tias yog li peb thiaj yuav tsum tau los xyuas cov kev xeem ua pej xeem no kom ua tau raws li peb haiv neeg no xav tau.
Ces tsoom hwv Australia thaij xav kho ntau yam cuam tshuam txog cov kev xeem ua pej xeem Australia uas yuav siv rau cov neeg uas tseem yuav mus xeem ua pej xeem tshiab ntawm lub tebchaws Australia no li no:
• Cov neeg xav xeem ua pej xeem yuav tsum qhia tau tias lawv yeej kub siab xav koom txhim teb kho chaw thiab pab tej neeg zej zog li lawv yuav tsum nrhiav hauj lwm ua, ua tub koom siab nrog ib lub koom haum twg, thiab coj lawv tej me nyuam mus kawm ntaub kawm ntawv).
• Cov lus nug thaum xeem pej xeem ntawd yuav muaj ib cov lus nug tshiab ua muaj ntsiab lus muaj txiaj ntsim heev coj los nug seb cov neeg xav xeem los ua pej xeem Australia ntawd puas pom zoo coj taug thias ua raws li Australia tej cai tswj hwm thiab tej pej xeem lub luag hauj lwm.
• Cov neeg uas tseem ua tsis ncaj rau lub caij lawv xeem ua pej xeem Australia ces yuav xeem poob kiag tam sim ntawd lawm xwb.
Tsis tas li no los yog tias tej cuj pwm ntawm cov neeg uas xav xeem los ua pej xeem Australia ntawd cov nyom nrog Australia tej cai coj taug ua zoo ces yuav raug siv coj los ua ib feem ntawm cov kev xeem ua pej xeem thiab.
Kim Turnbull hais tias " tej kev ua txhaum cai li tsim teeb meem kub ntxhov ntau poj niam tub se hauv cuab yig los yog muaj feem koom nrog tej neeg phem ua txhaum cai ces yuav cov nyom nrog Australia tej cai coj taug ua zoo."
Australia tus pwm tsav lis laj fai tswj neeg tsiv teb tsaws chaws hais tias tsim nyog yuav tau kub siab los xyuas cov lus nug kom nug txog tej cai coj taug ua zoo thaib kev tuaj koom txhim teb kho chaw nyob xyaws tej neeg zejzog tsis yog yuav nug txog lwm yam tsis tseem ceeb.
Yog li cov neeg uas tseem npaj yuav los xeem ua pej xeem Australia tab sis yog cov neeg puas cev los yog cov hluas hnub nyoog qes dua 16 xyoo yuav tsus tau xeem thiab teb cov lus nug ua lus English uas yuav tau nyeem, sau, thiab mloog ua lus English mam li teb tej lus nug ntawd.
Australia tus thawj pwm tsav hais tias twb tau muaj neeg txog li 5 roob tus tau xeem thiab ras los ua pej xeem Australia txij xyoo 1949 los lawm.
Tab sis Penny Wong uas yog pab nom Labor tus pwm tsav lis laj fai pej kum tsis totaub tias yog vim li cas thiaj pheej yuav muaj cov kev xeem los ua pej xeem Australia no hloov kho dua tshiab.
Nws hais tias ib cov lus rau xov tooj cua ABC tias "Yog yuav xeem cov cai siv ntawv thiab lus Askiv mas ntshe twb tsis hais tej neeg no tab sis cov nom kis xeev hauv tsev tsoom hwv no kiag los ntshe yeej xeem tsis tau."
Yog li ces tej hauj lwm yuav hloov kho tshiab no tsuas yog xyuas kom cov neeg uas tseem yuav xeem ua pej xeem Australia tshiab hwm pej xeem Australia, ua siab ncaj yoog raws thaib ua raws nws tej cai xwb.
Penny Wond kuj tau hais tias yog tej yam zoo tab sis tseem tsis tau paub qhov tseeb seb tsoom hwv Australia yuav ua li cas tiag.
Hos Pauline Hanson uas yog tus coj Australia pab nom One Nation los kuj tau sau ib cov lus qhuas nws hauv twitter tias tsoom hwv Australia tau ua li nws cov lus taw qhia thaum xeem ua pej xeem ntawd lawm thiab. Thaum tseem ntxov lub lim piam no, Sanator Hanson tau hais tias tej zaum tsoom hwv yuav tsis kam txheeb xyuas cov neeg txawv tebchaws uas thov visa tuaj ua hauj lwm hauv Australia no vim pab nom One Nation yeej tau hais tias sawv daws yeej paub qhov tseeb tias yog li cas lawm.
Thiab mloog tau ntau yam xov xwm ntawm xov tooj cua SBS Radio Hmong Program ntawm:
www.sbs.com.au/hmong zwj Teeb (Thursday) 6 pm, hnub zwj Hnub (Sunday) sij hawm 11 thaus sawv ntxov.
www.sbs.com.au/podcasts/yourlanguage/hmong
www.facebook.com/sbshmong
Digital TV tshooj 38
Downlaod SBS Radio App ntawm Google Play thiab App Store tso rau koj lub smartphone ces mloog tau rau hnub Thursday 6pm thiab Sunday 11am.
Xa messenger tuaj rau SBSHmong facebook los yog 042 999 6263
Xa email tuaj rau vixay.vue@sbs.com.au
Hu xov tooj tuaj nrog SBS Radio Hmong Program tham tau ntawm +61 3 9949 2259
Thiab mloog tau raws li cov Radio freguencies ntawm Australia ccov nroog li hauv qab no tau:
HOBART 105.7FM
MELBOURNE 93.1FM OR 1224 AM
CANBERRA 105.5FM OR 1440 AM
SYDNEY 97.7FM or 1107 AM
BRISBANE 93.3 FM
CAIRNS 90.5 FM
#SBSHmong
