ပိာ်ခွါလၢအနုာ်လီၤခးတၢ်ခံဂၤအကျါတဂၤန့ၣ်ခဲကနံၣ်အံၤအိၣ်ဝဲဒၣ်ဖဲတၢ်ဖီၣ်ဒုးဃာ်အပူၤဒီး အဂၤတဂၤန့ၣ်သံဝဲဖဲတၢ်ကဲထီၣ်သးအပူၤန့ၣ်လီၤ.
ပှၤဆါသ့ၣ်တဖၣ်န့ၣ် ဘၣ်တၢ်လဲၤစိာ်အဝဲသ့ၣ်ဆူ St Vincent တၢ်ဆါဟံၣ်, Royal Prince Alfred တၢ်ဆါဟံၣ်, Westmead တၢ်ဆါဟံၣ်ဒီး Royal North Shore တၢ်ဆါဟံၣ်န့ၣ်လီၤ. တုၤခဲကနံၣ်အံၤ အဝဲသ့ၣ် တၢ်အိၣ်သး အိၣ်ဒ်လဲၣ်န့ၣ် တၢ်တသ့ၣ်ညါဘၣ်အီၤရှဲရှဲဒ်ဘၣ်.
ဖဲလံာ်တၢ်ဘိးဘၣ်ရၤလီၤအပူၤန့ၣ်, ကိတိာ်ခိၣ်ကျၢၢ် Anthony Albanese စံးဝဲဒၣ် တၢ်ကဲထီၣ်အသးဖဲ Bondi န့ၣ် မ့ၢ်ဝဲတၢ်လၢအလီၤကမၢကမၣ်ဒီး လီၤသူၣ်ကိၢ်သးဂီၤဒိၣ်မးန့ၣ်လီၤ.
Mr Albanese စံးဝဲဒၣ် ဘၣ်ဃးဒီးတၢ်ကဲထီၣ်သးအံၤ အဝဲကတိၤဘၣ်တၢ်ဒီး အီစထြ့လယါ ကီၢ်စၢဖှိၣ် ပၢၤကီၢ်အခိၣ်ဒီး နယူဆီၣ်သ်ဝံ ကီၢ်စဲၣ်ခိၣ်လံန့ၣ်လီၤ.
အဝဲဟ့ၣ်သဆၣ်ထီၣ်ပှၤကညီသ့ၣ်တဖၣ်လၢ ကလူၤပိာ်ထွဲဝဲဒၣ် တၢ်ဂ့ၢ်တၢ်ကျိၤလၢအဟဲန့ၢ်လၢ နယူဆီၣ်သ်ဝံပၢၤကီၢ်အအိၣ်န့ၣ်လီၤ.
ဘၣ်ဃးဒီးတၢ်ဂ့ၢ်အံၤန့ၣ် ပၢၤကီၢ် ဟူးဂဲၤဃိထံသ့ၣ်ညါတၢ် ဆဲးအိၣ်ဒ်ဝဲအဖၢမုၢ်, ဒီးနယူဆီၣ်သ်ဝံပၢၤကီၢ် ဟ့ၣ်သဆၣ်ထီၣ်ပှၤကညီ လၢအအိၣ်ဖဲတၢ်ကဲထီၣ်သး ဟီၣ်ကဝီၤအပူၤသ့ၣ်တဖၣ် လၢကအိၣ်ဝဲဒၣ်ဖဲတၢ်ကဒုအလီၢ် ဒီးအိၣ်ခိးကနၣ် ခါဆူညါ ပၢၤကီၢ်အတၢ်ဘိးဘၣ်သ့ၣ်ညါလီၤသ့ၣ်တဖၣ်န့ၣ်လီၤ.
တၢ်ခးတၢ်တဘျီအံၤကဲထီၣ်အသးဖဲလၢပှၤကညီသ့ၣ်တဖၣ် လဲၤဟးအိၣ်ဖှိၣ်သကိးဝဲဒၣ်ဖဲ Bondi Beach ဒ်အမ့ၢ် ကၠူအပှၤတဝၢသ့ၣ်တဖၣ် အတၢ်မၤလၤကပီၤ ဟးနူၣ်ခၣ်—Hanukkah အမူးန့ၣ်လီၤ.
