တၢ်ဖံးတၢ်မၤလီၢ်ဂ့ၢ်ဝီစံၣ်ညီၣ်ကွီၢ်ကရၢအံၤ မၤဝဲဒၣ်တၢ်ဆၢတဲာ်ဆိအံၤဖဲတၢ်ဘၢၣ်စၢၤလၢခံခီယၢ်ခီအဂီၢ်ဒ်အမ့ၢ်အါထီၣ်ဝဲပှၤကွၢ်ထွဲသူၣ်က့သးပှၢ်ပှၤမၤတၢ်ဖိသ့ၣ်တဖၣ် အတၢ်မၤအဘူးအလဲ ၁၅မျးကယၤန့ၣ်လီၤ.
ဖဲလါနိးဝ့ဘၢၣ် ၄သီန့ၣ် Fair Work Commission တၢ်ဖံးတၢ်မၤလီၢ်ဂ့ၢ်ဝီစံၣ်ညီၣ်ကွီၢ်ကရၢ စံးဝဲ တၢ်မၤအါထီၣ်တၢ်အဘူးအလဲအံၤမ့ၢ်ဝဲ Aged Care ဒီး SCHADS Awards တၢ်မၤအဘူးအလဲအစှၤကတၢၢ်လၢတၢ်နီၤဖးအီၤလိၤလိၤ လၢပှၤမၤတၢ်ဖိဖဲတၢ်အံးထွဲကွၢ်ထွဲသူၣ်က့သးပှၢ်တၢ်လီၢ်သ့ၣ်တဖၣ် ဘၣ်တၢ်ဟ့ၣ်ကနၢၤအဝဲသ့ၣ်ဖဲ Nurses Award ခိၣ်ဖးတၢ်ဟ့ၣ်ကနၢၤအပူၤ လၢအမ့ၢ်ခိၣ်ဖးတခါလၢတၢ်ဒိးန့ၢ်ဘၣ်အီၤခီဖျိ အတၢ်ဖံးတၢ်မၤသ့ၣ်တဖၣ်အိၣ်ဒိးအလုၢ်အပှ့ၤလၢအဂ့ၤသ့ၣ်တဖၣ်အဃိန့ၣ်လီၤ.
စံၣ်ညီၣ်ကွီၢ်ကရၢအံၤစံးဝဲ အဝဲသ့ၣ်တၢ်ဆၢတဲာ်အံၤ တပၣ်ဃုာ်ဒ်ဝဲဒၣ်ဒီး ပှၤမၤတၢ်ဖိအဂုၤအဂၤသ့ၣ်တဖၣ် လီၤဆီဒၣ်တၢ် တၢ်မၤလီၢ်အံၤအပူၤ ပှၤတီခိၣ်ရိၤမဲရဲၣ်ကျဲၤဝဲၤဒၢးတၢ်ဖံးတၢ်မၤဒီး ပှၤဆိၣ်ထွဲမၤစၢၤ ပှၤကွၢ်ထွဲသူၣ်က့သးပှၢ်ပှၤမၤတၢ်ဖိအဘူးအလဲ ၂၅မျးကယၤ ပှၤမၤတၢ်ဖိကရၢဃ့ထီၣ်ပာ်အီၤန့ၣ်လီၤ.
ဖဲကိတိာ် Mark Butler, Anika Wells ဒီး Tony Burke အတၢ်ဘိးဘၣ်ရၤလီၤသဃဲၤအပူၤန့ၣ် ပဒိၣ်စံးဝဲဒၣ် ပှၤကွၢ်ထွဲသူၣ်က့သးပှၢ်ပှၤမၤတၢ်ဖိသ့ၣ်တဖၣ် တၢ်မ့ၢ်တစးထီၣ်ဟ့ၣ်လီၤအဝဲသ့ၣ်အဘူးအလဲဂ့ၤဂ့ၤဘၣ်ဘၣ် ဘၣ်န့ၣ်ဟီၣ်ကဝီၤအံၤအပူၤပှၤမၤတၢ်ဖိသ့ၣ်တဖၣ် တအိၣ်လၢလၢလီၣ်လီၢ်လၢတၢ်ကကွၢ်ထွဲဝဲဒၣ် ပှၤအီစထြ့သူၣ်က့သးပှၢ်သ့ၣ်တဖၣ်န့ၣ်လီၤ.
ဆူၣ်ချ့ဒီး တၢ်ကွၢ်ထွဲသူၣ်က့သးပှၢ်ကိတိာ် Mr Butler စံးဝဲ ပဒိၣ်အိၣ်ဒီးတၢ်ပာ်သးကျၢၤမုဆှု လၢတၢ်တီၣ်ဖျါထီၣ်ဝဲဒၣ်တၢ်ဂ့ၢ်အံၤဒီး အဆၢလၢကအိၣ်ဖျါထီၣ်န့ၣ် ကဆီၣ်ထွဲမၤစၢၤဝဲစ့ၢ်ကီးန့ၣ်လီၤ.
အဝဲစံးဝဲ “တၢ်မၤအဘူးအလဲမ့ၢ်ဂ့ၤန့ၣ် ကန့ၢ်ဘၣ်ပှၤမၤတၢ်ဖိဂ့ၤအါထီၣ်ဒီး တၢ်အံးထွဲကွၢ်ထွဲစ့ၢ်ကီးကဂ့ၤဒိၣ်ထီၣ်န့ၣ်လီၤ.”
ခီဖျိလၢ ခွံနံၣ်အတီၢ်ပူၤ တၢ်ကွၢ်ကပၤအီၤအဃိ တၢ်မၤလီၢ်အံၤအပူၤ ပှၤမၤတၢ်ဖိတအိၣ်လၢလၢလီၣ်လီၣ်ဘၣ် ဒီး လၢတၢ်ကမၤပှဲၤထီၣ်ကဒါက့ၤပှၤမၤတၢ်ဖိသ့ၣ်တဖၣ်အဂီၢ် တၢ်အံးထွဲကွၢ်ထွဲသူၣ်က့သးပှၢ်ကိတိာ် Ms Wells စံးဝဲဒၣ် တၢ်ကဘၣ်ကိးန့ၢ်ကဒါက့ၤ ပှၤမၤတၢ်ဖိဖဲ ဟီၣ်ကဝီၤအံၤတၢ်မၤလီၢ်အပူၤအံၤန့ၣ်လီၤ.
အဝဲစံးစ့ၢ်ကီးဝဲဒၣ်လၢ ပိာ်မုၣ်ဒီး ပိာ်ခွါပှၤမၤတၢ်ဖိသ့ၣ်တဖၣ်အဘၢၢ်စၢၤ တၢ်ဟ့ၣ်လီၤတၢ်ဖံးတၢ်မၤအဘူးအလဲန့ၣ် ကဘၣ်အိၣ်ဒီးတၢ်တုၤသိးပှဲၤသိးန့ၣ်လီၤ.
တၢ်ဖံးတၢ်မၤလီၢ်တၢ်ရ့လိာ်ကိတိာ် Mr Burke စံးဝဲ တၢ်အံးထွဲကွၢ်ထွဲသူၣ်က့သးပှၢ်တၢ်မၤန့ၣ် မ့ၢ်တၢ်လၢတၢ်ဘၣ်မၤအီၤနးဒိၣ်မး နာ်သက့ ပှၤဟ့ၣ်လီၤတၢ်ဖံးတၢ်မၤအဘူးအလဲန့ၣ် စှၤန့ၢ်ဒ်တၢ်ကြၢးဟ့ၣ်လီၤအီၤ တၢ်မၤအါထီၣ်တၢ်ဖံးတၢ်မၤအဘူးအလဲခဲကနံၣ်အံၤန့ၣ် မ့ၢ်တၢ်ဆီတလဲအခီၣ်ခါ အဆိကတၢၢ်တပတီၢ်န့ၣ်လီၤ.
ဆူၣ်ချ့ဝဲၤကျိၤကျိၤကရၢတူၢ်လိာ်မုာ်ဝဲ တၢ်ဆၢတဲာ်ဆိလၢတၢ်ကဟ့ၣ်အါထီၣ် တၢ်ဖံးတၢ်မၤအဘူးအလဲအံၤန့ၣ်လီၤ.
