အီစထြ့လယါကီၢ်အိးထီၣ်ကဒါက့ၤထံဂုၤကီၢ်ဂၤကီၢ်ဆၢ လၢပှၤဟးဝ့ၤဝီၤကသုၣ်ကသီ လၢအဆဲးဘၣ်လံကသံၣ်ဒီသဒၢတဖၣ်အဂီၢ်န့ၣ်လီၤ။
ဟီၣ်ခိၣ်ဒီဘ့ၣ်အပူၤ အီစထြ့လယါကီၢ် ပာ််လီၤဝဲဒၣ်ခိဘံး—၁၉တၢ်ဖီၣ်ဃံး လၢအဃံးကတၢၢ် ဘူးထီၣ်လၢခံနံၣ်ဝံၤအလီၢ်ခံ အခဲအံၤန့ၣ်အိးထီၣ်ကဒါက့ၤဝဲဒၣ်အဆိကတၢၢ်တဘျီန့ၣ်လီၤ။
တချုးလၢကီၢ်ဆၢအိးထီၣ်ဒ်ဘၣ်တသီ ဖဲမုၢ်ဒဲးနံၤ အဝဲကတိၤလီၤတၢ်ဖဲ တၢ်ဘိးဘၣ်သ့ၣ်ညါလီၤတၢ်ကစီၣ်အဂ့ၢ်အခါ ကိတိာ်ခိၣ်ကျၢၢ်စကီၣ်မီၤရံၤစၢၤစံးဝဲ “တၢ်ဘၣ်အိၣ်ခိးအဆၢကတီၢ်န့ၣ်တလၢကွံာ်လံ” န့ၣ်လီၤ။
ဖဲတဂီၤအံၤ ၆နၣ်ရံၣ်န့ၣ် ကဘီယူၤအဆိကတၢၢ်တဘ့ၣ်လၢ်အဟဲန့ၢ်လၢ လီစ်အဲကၠၢလံ ဟဲတုၤလီၤဖဲ ဆ့ၣ်ဒနံၤ ကဘီယူၤသန့ ဒီး ကဘီယူၤအဂုၤအဂၤ လၢအဟဲန့ၢ်လၢ တိကၠိ (ယပၣ်ကီၢ်) ဘဲခူဘၢ (ကီၢ်ခဲနဒၢ်) ဒီး ကီၢ်စ့ၣ်ကဖူၣ်သ့ၣ်တဖၣ်စ့ၢ်ကီး ကဟဲတုၤလီၤဝဲဒၣ်န့ၣ်လီၤ။
ပှၤဟဲတုၤလီၤအဆိကတၢၢ်တဖုသ့ၣ်တဖၣ်န့ၣ် ကီၢ်စၢဖှိၣ်တၢ်ဟးဝ့ၤဝီၤကသုၣ်ကသီဂ့ၢ်ဝီကိတိာ် ဒဲန် ထ့ဟါ လဲၤအိၣ်ခိးတူၢ်လိာ်အဝဲသ့ၣ်န့ၣ်လီၤ။
ဖဲလၢအီစထြ့လယါကီၢ်အိးထီၣ်ကဒါက့ၤကီၢ်ဆၢဝံၤအလီၢ်ခံ ၂၄နၣ်ရံၣ်အတီၢ်ပူၤန့ၣ် ထံဂုၤကီၢ်ဂၤကဘီယူၤ ကဟဲတုၤလီၤဝဲဒၣ်ထဲ ၅၆ဘ့ၣ်ဒံးန့ၣ်လီၤ။ မ့ၢ်ထိၣ်သတြီၤတချုးဒ်လၢတၢ်ဆါသံတြိာ်ကဲထီၣ်ဒံးဘၣ်အခါန့ၣ်မ့ၢ်တၢ်စှၤဒိၣ်မးန့ၣ်လီၤ။ နာ်သက့ ကိတိာ်ခိၣ်ကျၢၢ်စံးဝဲဒၣ် ဆူမဲာ်ညါန့ၣ်ကဘီယူၤနီၣ်ဂံၢ်ကဟဲအါထီၣ်ဝဲဒၣ်ကွ့ၢ်ကွ့ၢ်န့ၣ် တၢ်သးဒ့ဒီအလီၢ်တအိၣ်ဘၣ်န့ၣ်လီၤ။
ဒ်သိး ခိဘံး—၁၉ အတၢ်ဘၣ်ကူဘၣ်ဂာ်ကစှၤလီၤအဂီၢ် စးထီၣ်လၢ ၂ဝ၂ဝနံၣ် လါမးရှးန့ၣ် အီစထြ့လယါကီၢ် ကးတံာ်လီၤကီၢ်ဆၢဒီး ပှၤကိးဂၤဒဲးဃၣ်ဃၣ် ဟဲနုာ်လီၤတန့ၢ်ဘၣ်၊ ပှၤဟးထီၣ်ဟးလီၤန့ၢ်သ့ဒၣ်ထဲ အပှၤထံဖိကီၢ်ဖိဒီး ပှၤအိၣ်ဆိးလီၤစိၤသ့ၣ်တဖၣ်န့ၣ်လီၤ။
အီစထြ့လယါကီၢ် အတၢ်ပာ်လီၤ တၢ်ဖီၣ်ဃံးသ့ၣ်တဖၣ်န့ၣ် တၢ်ပာ်အီၤဒ်အမ့ၢ် တၢ်အဃံးကတၢၢ်လၢဟီၣ်ခိၣ်ဒီဘ့ၣ်န့ၣ်လီၤ။ တၢ်ပာ်လီၤတၢ်ဖီၣ်ဃံးသ့ၣ်တဖၣ်အခါန့ၣ် အီစထြ့လယါထံဖိကီၢ်ဖိဒၣ်လဲာ်တၢ်မ့ၢ်တဟ့ၣ်အခွဲးဘၣ်န့ၣ် ဟးထီၣ်လၢကီၢ်ပူၤတန့ၢ်ဘၣ်န့ၣ်လီၤ။
ခီဖျိလၢတၢ်ပာ်လီၤတၢ်ဖီၣ်ဃံးသနူသ့ၣ်တဖၣ်အဃိ အီစထြ့လယါ တၢ်မၤပနံာ်တၢ်ကၤဒီး စဲးဖီကဟၣ်တၢ်မၤ ဘျီၣ်ဒိၣ်ကရၢ တယးလၢ ကိးလါဒဲးန့ၣ် အဘၣ်ဒိဘၣ်ထံး ပနံာ်တၢ်ဖံးတၢ်မၤ လီၤလၢ ဒီလၣ် ၃ ့ ၆ (သၢဖီးဃု) ဘံလယၢၢ်န့ၣ်လီၤ။ တၢ်မၤလီၢ်လၢအဘၣ်ထံးနးကတၢၢ်န့ၣ်မ့ၢ်ဝဲ တၢ်ဟးဝ့ၤဝီၤကသုၣ်ကသီ တၢ်ဖံးတၢ်မၤန့ၣ်လီၤ။
