ဖဲနံးပီလ်ထံလုၢ်ဘၢတၢ် တၢ်ဟးဂူာ်ဟးဂီၤအပူၤ တၢ်ကွၢ်ဃုက့ၤပှၤလီၤမၢ်သ့ၣ်တဖၣ်ဒီး တၢ်မၤပူၤဖျဲးတၢ် အတၢ်ဖံးတၢ်မၤသ့ၣ်တဖၣ်အပူၤန့ၣ် အီစထြ့လယါကီၢ် ဟ့ၣ်လီၤအါထီၣ်ဝဲ တၢ်ပီးတၢ်လီသ့ၣ်တဖၣ်, လၢအပၣ်ဃုာ်ဒီး ပှၤလၢအသ့ဖီၣ်ဂၢၢ် ဒြိ အတၢ်ဖံးတၢ်မၤသ့ၣ်တဖၣ်ဒီး ပှၤသ့ပှၤဘၣ်စဲၤနီၣ်လၢ တၢ်ဃုသ့ၣ်ညါ မၤလီၤတံၢ်က့ၤ ပှၤကညီ အတၢ်ဖံးတၢ်မၤသ့ၣ်တဖၣ်န့ၣ်လီၤ.
အီစထြ့လယါပှၤမၤပူၤဖျဲးတၢ်ကရူၢ်တုၤလီၤဝဲဒၣ်ဖဲနံးပီလ်အပူၤ ဒ်သိးကနုာ်လီၤပၣ်ဃုာ်ဖဲတၢ်ကွၢ်ဃု ပှၤလၢအလီၤမၢ်ဖဲထံလုၢ်ဘၢတၢ်ဒိၣ်ဒိၣ်မုၢ်မုၢ်အပူၤ လၢအကဲထီၣ်အသးဖဲလါအီကၢးအတီၢ်ပူၤန့ၣ်လီၤ.
ပှၤသ့ပှၤဘၣ်လီၤဆီ ၁၅ဂၤ ကရူၢ်အံၤ တုၤလီၤဝဲဖဲမုၢ်ဖီဖး—မုၢ်ယဲၢ်နံၤဟါခီ, ဃုာ်ဒီးတၢ်ဆီၣ်ထွဲမၤစၢၤသ့ၣ်တဖၣ်, ဒီး မ့ၢ်လၢနံးပီလ်ပှၤဘၣ်မူဘၣ်ဒါသ့ၣ်တဖၣ် ဃ့ထီၣ်တၢ်မၤစၢၤအဃိ ပှၤသ့ပှၤဘၣ်စဲၤနီၣ်လၢ တၢ်ဃုသ့ၣ်ညါမၤလီၤတံၢ်က့ၤပှၤကညီသ့ၣ်တဖၣ်စ့ၢ်ကီး လဲၤဃီၤဝဲဒၣ်လံန့ၣ်လီၤ.
ဖဲလါအီကၢး ၂၆သီအနံၤန့ၣ် မ့ၢ်လၢထံခုၣ်ကိၢ်လိၢ်လီၤပှီၢ်ဖဲအဘူးဒီး နံးပီလ်ဒီး တံးဘဲးကီၢ်ဆၢအဃိ မၤဟးဂီၤကွံာ်ဝဲ ခူဝ့ၢ်ဒူသဝီဒီး တၢ်တြီၤလၢအအိၣ်ဖဲဟီၣ်ကဝီၤအံၤအပူၤန့ၣ်လီၤ.
အီစထြ့လယါလီၤမၢ်အစှၤကတၢၢ် အိၣ်ဒံးဝဲ ၃၆ဂၤအဃိ, ကီၢ်စၢဖှိၣ်ပဒိၣ် အိၣ်ဒီးတၢ်ဘၣ်ယိၣ်လၢအဝဲသ့ၣ်အဂီၢ်ဒိၣ်ဒိၣ်မုၢ်မုၢ်န့ၣ်လီၤ.
ဖဲမုၢ်ယဲၢ်နံၤ, ပှၤဘၣ်မူဘၣ်ဒါဘိးဘၣ်ရၤလီၤဒုးသ့ၣ်ညါ နီၣ်ဂံၢ်နီၣ်ဒွးအပူၤန့ၣ်, တုၤလီၤအခဲအံၤ နံးပီလ်အပူၤ ပှၤသံလၢတၢ်ကဲထီၣ်သးအံၤအဃိန့ၣ် အိၣ်ဘူးထီၣ်ဝဲဒၣ် ၁,၃ဝဝ ဒီး ပှၤကညီဘူးထီၣ်လၢ အဂၤ ၄,၈ဝဝ န့ၣ် လီၤမၣ်ဒံးဝဲဒၣ်, လၢအပၣ်ဃုာ် ပှၤထံချၢကီၢ်ချၢ ၆ဝ၁ဂၤ န့ၣ်လီၤ.
မ့မ့ၢ်လၢတံဘဲးကီၢ်ဆၢတကပၤန့ၣ်, တရူးပဒိၣ်တၢ်ကစီၣ်ပာ်ဖျါဝဲလၢ တုၤလီၤဖဲမုၢ်ယဲၢ်နံၤန့ၣ် ပှၤသံနီၣ်ဂံၢ်ဟဲအါထီၣ်တုၤလၢ ၃၁ တဂၤ, စးထီၣ်လၢတၢ်ကဲထီၣ်သးဝံၤန့ၣ် တၢ်အံၤမ့ၢ်ဝဲဒၣ်ပှၤသံအနီၣ်ဂံၢ်ဟဲအါထီၣ် အဂၤ ၁ဝ န့ၣ်လီၤ.
ဘၣ်ဆၣ်သနာ်က့ ဒ်သိးလၢ Reuters တၢ်ကစီၣ်ပာ်ဖျါဝဲအသိးန့ၣ်, ပှၤသံသ့ၣ်တဖၣ်အံၤမ့ၢ်တရူးအထံဖိကီၢ်ဖိဧါ, ပှၤထံချၢကီၢ်ချၢဧါန့ၣ် တၢ်တသ့ၣ်ညါဘၣ်အီၤလီၤတံၢ်လီၤဆဲးဘၣ်. ဒီးပှၤလီၢ်မၢ်အိၣ်ဒံးဝဲ ၅၃၁ ဂၤန့ၣ်လီၤ.
ဖဲမုၢ်လ့ၢ်ဧိၤ—မုၢ်လွံၢ်နံၤန့ၣ်, ထံဂုၤကီၢ်ဂၤကိတိာ် Penny Wong ပာ်ဂၢၢ်ပာ်ကျၢၤဝဲဒၣ်, လီၢ်ကဝီၤ ပှၤဘၣ်မူဘၣ်ဒါသ့ၣ်တဖၣ် ကဃုကွၢ်ဝဲတၢ်ဖဲ ဟီၣ်ကဝီၤလၢအမ့ၢ်, တၢ်နာ်လၢ ပှၤအီစထြ့လယါဖိသ့ၣ်တဖၣ် အိၣ်ဆိးတ့ၢ်အီၤ အါအါဂီၢ်ဂီၢ်အပူၤန့ၣ်လီၤ.
အဝဲစံးဝဲဒၣ် အီစထြ့လယါ ပှၤနီ ဒြိသ့ၣ်တဖၣ် ဒီး ပှၤသ့ပှၤဘၣ်စဲၤနီၣ်လၢ တၢ်ရဲၣ်ကျဲၤ တၢ်ကြထီၣ်သးဒ်အံၤသ့ၣ်တဖၣ်န့ၣ် တၢ်ကဆှၢအဝဲသ့ၣ်ဆူ ဟီၣ်ကဝီၤအံၤအပူၤ ဒ်သိးကမၤစၢၤပျီပူၤ ပှၤမၤစၢၤတၢ်သ့ၣ်တဖၣ်အဂီၢ်န့ၣ်လီၤ.
ဘျီၣ်ဒိၣ်ထးခီခၢၣ်စး Wong တဲဘၣ်ဝဲပှၤဃုထၢတၢ်ကစီၣ်ဖိသ့ၣ်တဖၣ်ဒ်အံၤ, “ယတဲအီၤသ့လၢ, ဖဲပသံကွၢ်အဝဲသ့ၣ်ဝံၤအလီၢ်ခံန့ၣ်, နံးပီလ်ပှၤဘၣ်မူဘၣ်ဒါသ့ၣ်တဖၣ် တဲဘၣ်ပှၤလၢ အဝဲသ့ၣ်မၤဝဲ တၢ်ကွၢ်ဃု ဖဲတၢ်လီၢ်လၢ အီစထြ့လယါ ပာ်ပနီၣ်အီၤသ့ၣ်တဖၣ်အပူၤ လၢအပၣ်ဃုာ်, The Kailash Hotel ဒီး Royal Himalaya Hotel သ့ၣ်တဖၣ်န့ၣ်လီၤ.”
တၢ်ဆီၣ်ထွဲမၤစၢၤ တၢ်ခီဆၢ တၢ်တတၢၤတနါကရူၢ်—Disaster Assistance Response Team အံၤ ပၣ်ဃုာ်ဒီး ပှၤသ့ပှၤဘၣ်စဲၤနီၣ်လၢ ခွံစလဲမ့ၣ်အူဝဲၤကျိၤ—Queensland Fire Department ဒီး ညူဆီၣ်သ်ဝံမ့ၣ်အူဒီးပှၤမၤပူၤဖျဲးတၢ်ဝဲၤကျိၤ— Fire and Rescue NSW န့ၣ်လီၤ.
ဖဲမုၢ်ယဲၢ်နံၤန့ၣ်, Fire and Rescue NSW ဝဲၤကျိၤခိၣ် Jeremy Fewtrell ဆၢဂ့ၤဆၢဝါဝဲအပှၤနီဒြိဃုဂၤဒီး ပှၤသ့ပှၤဘၣ်လီၤဆီလၢတၢ်ရဲၣ်ကျဲၤတၢ်ကဲထီၣ်သး လွံၢ်ဂၤ အတၢ်လဲၤဆူနံးပီလ်န့ၣ်လီၤ.
ဒြိ လၢအဝဲသ့ၣ်လဲၤစိာ်အီၤန့ၣ် ပၣ်ဃုာ်ဒီးစဲးဖီကဟၣ် လၢအအိၣ်ဒီး ယီၤကူၣ်ဆး—AI အကံၢ်အစီ လၢအမၤစၢၤတၢ်ကွၢ်ဃုမၤနီၣ်ပှၤကညီလၢအတူၢ်ဘၣ်တၢ်သ့ၣ်တဖၣ်, ဒီးပာ်ဖျါထီၣ်န့ၢ် ပှၤလၢအအိၣ်ကတာ်ထီသ့ၣ်တဖၣ်အတၢ်ဂီၤ သ့ဝဲန့ၣ်လီၤ.
အီစထြ့လယါထံဂုၤကီၢ်ဂၤဒီးတၢ်ကူၣ်လဲၤမၤကၤဝဲၤကျိၤ—DFAT ဆဲးမၤသကိးဝဲတၢ်ဒီး နံးပီလ်ပှၤဘၣ်မူဘၣ်ဒါသ့ၣ်တဖၣ်, လၢတၢ်ဃုသ့ၣ်ညါပှၤအီစထြ့လယါဖိလၢအပၣ်ဃုာ်ဖဲတၢ်ကဲထီၣ်သးအပူၤသ့ၣ်တဖၣ်အိၣ်တၢ်လီၢ်ဒီး ကန့ၢ်ဆဲးကျိးဘၣ်က့ၤဒီးအဝဲသ့ၣ်အဟံၣ်ဖိဃီဖိအဂီၢ်န့ၣ်လီၤ.
ဖဲမုၢ်ပျဲၤ—မုၢ်သၢနံၤန့ၣ် အီစထြ့လယါသုးကဘီယူၤ—Royal Australian Air Force လၢအတီၣ်တၢ်ဆီၣ်ထွဲမၤစၢၤပီးလီအါမး လဲၤတုၤလီၤဝဲဒၣ်ဖဲ Kathmandu အပူၤန့ၣ်လီၤ.
ဖဲတၢ်မၤစၢၤပီးလီသ့ၣ်တဖၣ်အပူၤန့ၣ် ပၣ်ဃုာ်ဒီး နီၣ်တဂၤတၢ်ကဆှဲကဆှီအဂီၢ်ပီးလီအါန့ၢ် ၁၄ဝဝ, မုၢ်သဟီၣ်ဂံၢ် မ့ၣ်အူတၢ်ကပီၤ ၂,၂ဝဝ ဒီး တၢ်သြီထီၣ်က့ၤ လီတဲစိစိာ်စု လီအ့ၣ်ဂံၢ် တၢ်ပီးတၢ်လီသ့ၣ်တဖၣ်န့ၣ်လီၤ.
For the latest from SBS News, download our app and subscribe to our newsletter.
