In brief
- နံးပီလ် ကီၢ်ပူၤ ထံလုၢ်ဘၢတၢ်ဒီး ဟီၣ်ခိၣ်လာ် ကဲထီၣ်ဒိၣ်ဒိၣ်မုၢ်မုၢ်အဃိ ပှၤသံအိၣ်ဝဲအကယၤအါမးဒီး ပှၤလၢအလီၤမၢ်သ့ၣ်တဖၣ်အိၣ်စ့ၢ်ကီးဝဲအကယၤအါမးန့ၣ်လီၤ.
- ကစီၣ်သ့ၣ်တဖၣ် အတၢ်ပာ်ဖျါအပူၤန့ၣ် ဖဲပှၤလီၤမၢ်သ့ၣ်တဖၣ်အကျါ ပၣ်ဃုာ်စ့ၢ်ကီးဒီး အီစထြ့လယါထံဖိကီၢ်ဖိ ၃၄ဂၤန့ၣ်လီၤ.
ဖဲမုၢ်ပျဲၤ—မုၢ်သၢနံၤန့ၣ် နံးပီလ်ဒီးတံဘဲး ကီၢ်ဆၢ အပူၤ ထံလုၢ်ဘၢတၢ်ဒီး ဟီၣ်ခိၣ်လာ် ကဲထီၣ်ဒိၣ်ဒိၣ်မုၢ်မုၢ်အဃိ ပှၤသံအစှၤကတၢၢ်အိၣ်ဝဲ ၁၆ဝ ဂၤဒီး ပှၤလီၤမၣ်အိၣ်ဒံးဝဲအကယၤအါမး, ဒီးတၢ်ပာ်ဖျါသ့ၣ်တဖၣ်စံးလၢ ဖဲပှၤလီၤမၢ်သ့ၣ်တဖၣ်အကျါန့ၣ်ပၣ်ဃုာ်ဒီး ပှၤအီစထြ့လယါ ၃၄ဂၤန့ၣ်လီၤ.
ပှၤမၤစၢၤတၢ်ဖိသ့ၣ်တဖၣ်စံးဝဲဒၣ် တၢ်အိၣ်ဆိးဆီလီၤဒီတခါ "လီၤမၢ်ကွံာ်ခဲလၢာ်" န့ၣ်လီၤ. ဖဲတၢ်အိၣ်ခိးကွၢ်တၢ် အတၢ်ဂီၤမူ အတၢ်မၤနီၣ်မၤဃါဖီၣ်န့ၢ်အပူၤ, လၢအဘၣ်တၢ်ပာ်ဂၢၢ်ပာ်ကျၢၤအီၤလၢ Agence France-Presse (AFP) တၢ်ကစီၣ်သန့န့ၣ် ဒုးနဲၣ်ဖျါဝဲဒၣ်, ပှၤကညီလၢ အဒၣ်စ့ၣ်အါမး ဃ့ၢ်ပူၤဖျဲးအသး ဒီး တၢးတၢ်သူၣ်ထီၣ်ဖးဒိၣ်ဖးထီသ့ၣ်တဖၣ် လီၤပှီၢ်ဝဲဒၣ်ဖဲ တရူးကီၢ် အကီၢ်ဆၢတကပၤ, ဆီၣ်ဖျိးကွံာ်ဝဲဒၣ် သိလ့ၣ်ဒိးလဲ—ဘၢးစ်ကါသ့ၣ်တဖၣ်ဒီး သိလ့ၣ်ဖးဒိၣ် တီၣ်တၢ်ဖိတၢ်လံၤသ့ၣ်တဖၣ်န့ၣ်လီၤ.
ဖဲတရူးပဒိၣ်တၢ်စီၣ်အပူၤန့ၣ် စံးဝဲဒၣ် ခီဖျိလၢ ဟီၣ်ခိၣ်ကပံာ်လာ်လီၤဒိၣ်ဒိၣ်မုၢ်မုၢ်ဖဲ တံဘဲးကီၢ်စၢတၢ်အိၣ်ဖှိၣ်ရိဖှိၣ်အလီၢ်အဃိ "တၢ်သံတၢ်ပှၢ်တၢ်ဘၣ်ဒိဘၣ်ထံးသ့ၣ်တဖၣ်အိၣ်ဝဲဒိၣ်ဒိၣ်မုၢ်မုၢ်" ဒီး ပှၤသံအိၣ်ဝဲသၢဂၤဒီး ပှၤကညီအဂၤ ၂၆၅ ဂၤသ့ၣ်တဖၣ် လီၤမၢ်ဒံးဝဲဒၣ်အဖၢမုၢ်န့ၣ်လီၤ.
မ့မ့ၢ်နံးပီလ် ပၢၤကီၢ်သ့ၣ်တဖၣ်န့ၣ် စံးဝဲဒၣ် ဖဲလၢထံလုၢ်ဘၢတၢ်ဒိၣ်ဒိၣ်မုၢ်မုၢ်ဝံၤအလီၢ်ခံန့ၣ် အဝဲသ့ၣ် ထံၣ်န့ၢ်ဝဲဒၣ် ပှၤကညီအစိၣ် ၁၅၇ ဂၤ ဒီး ပၢၤကီၢ်ပှၤဘၣ်မူဘၣ်ဒါသ့ၣ်တဖၣ်အံၤ မၤစၢၤဝဲဒၣ် “ဟံၣ်ဖိဃီဖိလၢအအိၣ်ဖဲထံလုၢ်ဘၢတၢ် အတၢ်လီၤဘၣ်ယိၣ်အဟီၣ်ကဝီၤသ့ၣ်တဖၣ် လၢအသုးကွံာ်ဝဲဒၣ်အဝဲသ့ၣ်ဆူ တၢ်လီၢ်လၢအအိၣ်ဒီးတၢ်ပူၤဖျဲးန့ၣ်လီၤ.”
ဖဲလၢထံလုၢ်ဘၢတၢ် ဝၢ်လီၤဘၢကွံာ်ဝဲဒၣ် တၢ်သူၣ်ထီၣ်တၢးဖးဒိၣ်ဖးထီ အကထြၢးဖဲအဖီလာ်သ့ၣ်တဖၣ်ဝံၤအလီၢ်ခံ ပှၤမၤပူၤဖျဲးတၢ်သ့ၣ်တဖၣ် နုာ်လီၤမၤစၢၤဝဲဒၣ်တၣ်ဖဲကပံာ်ကျါဟီၣ်ခိၣ်လာ်လီၤအပူၤ ဒီးဟးကွၢ်ဃုဝဲပှၤလၢအမူတ့ၢ်သ့ၣ်တဖၣ်န့ၣ်လီၤ.
နံးပီလ် ကီၢ် ပှၤဟးဆှၣ်ကီၢ်ဝဲၤကျိၤ စံးဝဲဒၣ် တၢ်တတၢၤတနါအံၤကဲထီၣ်အသးဝံၤ လၢအနၣ်ရံၣ်အါမးအတီၢ်ပူၤန့ၣ် ပှၤဟးကသုၣ်ကသီ ဟးဆှၣ်ကီၢ် ၄ဝ၃ ဂၤန့ၣ်လီၤမၢ်ဝဲဒၣ် ဒီးအဝဲသ့ၣ်အကျါ ၃၄၁ ဂၤန့ၣ်မ့ၢ်ဝဲပှၤထံချၢကီၢ်ချၢသ့ၣ်တဖၣ်န့ၣ်လီၤ.
ဖဲပှၤဟးဆှၣ်ကီၢ်ဝဲၤကျိၤ အပှၤကတိၤတၢ်ပၢ ဆှၢန့ၢ်ဝဲ ABC News တၢ်ကစီၣ်သန့အစရီအပူၤန့ၣ် ပှၤလီၤမၢ်သ့ၣ်တဖၣ်အကျါန့ၣ် ပၣ်ဃုာ်ဒီး ပှၤအီစထြ့လယါဖိ ၃၄ဂၤန့ၣ်လီၤ.
ဘၣ်ဆၣ်သနာ်က့ တုၤလီၤခဲကနံၣ်အံၤန့ၣ် နီၣ်ဂံၢ်နီၣ်ဒွးအံၤ အီစထြ့လယါထံဂုၤကီၢ်ဂၤဒီးတၢ်ကူၣ်လဲၤမၤကၤဝဲၤကျိၤ—Department of Foreign Affairs and Trade (DFAT) တပာ်ဂၢၢ်ပာ်ကျၢၤဘၣ်အီၤဒံးဘၣ်.
DFAT အပှၤကတိၤတၢ်ပၢ တဲဘၣ်ဝဲ SBS တၢ်ကစီၣ်သန့လၢ “ပသ့ၣ်ညါလၢ ဖဲဟီၣ်ကဝီၤအံၤအပူၤန့ၣ် ပှၤအီစထြ့လယါဖိသ့ၣ်တဖၣ်အိၣ်ဝဲတဘျုးဂၤဒီး ဒ်သိးကမၤလီၤတံၢ် အဝဲသ့ၣ် အတၢ်အိၣ်သးအံၤအဂီၢ်န့ၣ် အီစထြ့လယါပှၤဘၣ်မူဘၣ်ဒါသ့ၣ်တဖၣ် မၤဝဲတၢ်မၤလၢအဆိအချ့လံ. ပမၤသကိးတၢ်ဒီး လီၢ်ကဝီၤပှၤဘၣ်မူဘၣ်ဒါသ့ၣ်တဖၣ် ဃုာ်ဒီး ပှၤဟးဆှၢပှၤတမှံၤ တၢ်ဖံးတၢ်မၤအလီၢ်သ့ၣ်တဖၣ်န့ၣ်လီၤ.”
“လၢကဟ့ၣ်လီၤမီၣ်သီတၢ်ဆီၣ်ထွဲမၤစၢၤအဂီၢ်ပအိၣ်ကတီၤပာ်ပသးဂ့ၤဂ့ၤလံန့ၣ်လီၤ.”
ပှၤဟးဆှၣ်ကီၢ် ပှၤဘၣ်မူဘၣ်ဒါစံးဝဲဒၣ်, ပှၤထံချၢကီၢ်ချၢလၢအလီၤမၢ်သ့ၣ်တဖၣ်အကျါန့ၣ် ပၣ်ဃုာ်ဒီး ပှၤအ့ဒံယါ ၁၄၂ဂၤ, ဒီး ပှၤဂုၤပှၤဂၤသ့ၣ်ဖၣ်န့ၣ် မ့ၢ်ပှၤလၢအဟဲန့ၢ်လၢ အီစထြ့လယါကီၢ်, ကီၢ်အဲကလံး, မလ့ရှါကီၢ်, ကီၢ်နဲးသလဲး, ပီးတူးကၢးလ်ကီၢ်, ဆီၣ်သ်အးဖြံးကး, ဆီၣ်သ်ခိးရံယါ ဒီး ကီၢ်အမဲကရၤ သ့ၣ်တဖၣ်န့ၣ်လီၤ.
ထံဂုၤကီၢ်ဂၤ ဂာ်တဲာ်ဂီၤဒီး လါထီၣ်သီ ကရၢကရိ—International Federation of Red Cross and Red Crescent Societies (IFRC) စံးဝဲဒၣ်, “ဟီၣ်ကဝီၤအံၤအပူၤ ဒူသဝီဒီး တၢ်ဆါတၢ်ပှ့ၤလီၢ်သ့ၣ်တဖၣ် တၢ်ဝၢ်လီၤမၢ်ကွံာ်အီၤဝဲခဲလၢာ်” န့ၣ်လီၤ.
ကရၢအံၤစံးဝဲဒၣ်လၢ အဝဲသ့ၣ်ဆှၢဃီၤဝဲဒၣ် ဂ့ၢ်ဂီၢ်အူတၢ်ဖိတၢ်လံၤသ့ၣ်တဖၣ်လံ, လၢအပၣ်ဃုာ် ယၣ်လုာ်, ဂ့ၢ်ဂီၢ်အူတၢ်ကူစါယါဘျါဆိပီးလီသ့ၣ်တဖၣ်, စုာ်စိာ်ပှၤဆါသ့ၣ်တဖၣ်ဒီး တဲၢ်ဒၢလၢတၢ်ပၢနုာ်ပှၤစိၣ်သ့ၣ်တဖၣ်အဂီၢ်န့ၣ်လီၤ.
နံးပီလ် ကိတိာ်ခိၣ်ကျၢၢ် Balendra Shah အၢၣ်လီၤဝဲလၢ အကဟ့ၣ်လီၤတၢ်မၤစၢၤလၢာ်လၢာ်ဆ့ဆ့န့ၣ်လီၤ.
ဖဲတၢ်ဘိးဘၣ်ရၤလီၤတၢ်ကစီၣ်အပူၤန့ၣ် အဝဲစံးဝဲဒၣ်, “သုတၢ်သူၣ်အုးသးအုးဒီးတၢ်လီၤမၢ်သ့ၣ်တဖၣ်အံၤအတမ့ၢ်တၢ်ဆံၤကိးဖိဘၣ်. နာ်သက့ ယအဲၣ်ဒိးတဲလီၤတံၢ်ဘၣ်သုလၢ ဖဲတၢ်ကီတၢ်ခဲအဆၢကတီၢ်အံၤ တၢ်တပာ်လီၤတဲာ်တ့ၢ်ကွံာ်နၤထဲတဂၤဧိၤဘၣ် — ထံကီၢ်အံၤ အတၢ်ဂံၢ်တၢ်ဘါ ကံၢ်စီပီးလီ ကျိၤကျဲ တၢ်မၤစၢၤခဲလၢာ် အိၣ်ဝဲဒၣ်ဒီးသုန့ၣ်လီၤ.”
တၢ်လီၤဘၣ်ယိၣ်လၢ ထံလုၢ်ဘၢတၢ်အသီကကဲထီၣ်အိၣ်ဒ်ဧါ.
ဖဲလၢပှၤသ့ပှၤဘၣ်စဲၤနီၣ်သ့ၣ်တဖၣ် အိၣ်ဒီးတၢ်ပလီၢ်သးလၢ ထံကျိအဒ့ၣ်တီၤလၢအကးတံာ်အသးသ့ၣ်တဖၣ် ဘၣ်သ့ၣ်သ့ၣ် ကဖျိးလီၤဒုးအိၣ်ထီၣ်ကဒီး ထံလုၢ်ဘၢတၢ်အသီတဘျီသ့အခါ ပှၤလီၢ်ကဝီၤဖိသ့ၣ်တဖၣ် အိၣ်ပှဲၤဒီးတၢ်ပျံၤတ့ၢ်တၢ်န့ၣ်လီၤ.
ပှၤလီၢ်ကဝီၤဖိ Raju Bhadel လၢအသးနံၣ်အိၣ် ၅၆နံၣ်တဂၤ စံးဝဲဒၣ်, “တဂီၤအံၤန့ၣ် ယယီၤဖး ကိးယၤလီတဲစိ လၢအပှဲၤဒီးတၢ်ဟီၣ်တၢ်ယၢၤဒီး စံးဝဲဒၣ် အဝဲသ့ၣ်ဟံၣ်လီၤမၢ်ကွံာ်ခဲလၢာ်န့ၣ်လီၤ. အဝဲသ့ၣ်ဟံၣ်ဖိဃီဖိသၢဂၤန့ၣ် တၢ်မၤပူၤဖျဲးအီၤန့ၢ်, နာ်သက့ အဝဲအကၠီန့ၣ် လီၤမၢ်ဒံးအဖၢမုၢ်န့ၣ်လီၤ.”
ထံလုၢ်ဘၢတၢ်ကဲထီၣ်သး အဂ့ၢ်အကျိၤန့ၣ် တုၤခဲကနံၣ်အံၤ တၢ်တသ့ၣ်ညါဘၣ်အီၤ လီၤတံၢ်လီၤဆဲးဒ်ဘၣ်.
ဘၣ်ဆၣ်သနာ်က့ နံးပီလ် ထံဂုၤကီၢ်ဂၤကိတိာ် Shishir Khanal စဲးဝဲဒၣ် ဖျါလီၤဂာ်လၢ ဟီၣ်ခိၣ်ဟူးတခါခါန့ၣ် ဒုးအိၣ်ထီၣ်ဝဲ ဟီၣ်ခိၣ်လာ်အံၤ, လၢအကပံာ်တံၢ်ကွံာ်ဝဲထံကျိဒီး ထံသ့ၣ်န့ၣ် ဖျိးထီၣ်ယွၤလီၤဝဲဆူတၢ်ဖီလာ်န့ၣ်လီၤ.
နံးပီလ် တၢ်တတၢၤတနါပှၤဘၣ်မူဘၣ်ဒါစံးဝဲဒၣ် စဲးထလဲး—မူဖျၢၣ်ဒိ အတၢ်ဂ့ၢ်ထၢဖှိၣ်န့ၢ်အပူၤန့ၣ် ဒုးနဲၣ်ဖျါအသးလၢ ဘၣ်သ့ၣ်သ့ၣ်န့ၣ် ထံလုၢ်ဘၢတၢ်အံၤ အကဲထီၣ်အသးခီဖျိလၢ နံးပီလ်ဒီး တရူးကီၢ် ကီၢ်ဆၢ အပူၤ “ဘှ့ၣ်ပစီၤကစၢၢ်လီၤပှီၢ်လီၤလာ်” အဃိန့ၣ်လီၤ.
ဖဲနံးပီလ် ပၢၤကီၢ် ဟ့ၣ်နီၤလီၤ ပာ်ဖျါတၢ်ဂီၤသ့ၣ်တဖၣ်အပူၤန့ၣ် ထံလုၢ်ဘၢအံၤ ဟဲဖျိးထီၣ်န့ၢ်ဝဲဒၣ်လၢထံကျိအပူၤ, ဒီးဟံၣ်လၢအအိၣ်ဖဲအကျိၤပူၤသ့ၣ်တဖၣ်န့ၣ် ဝၢ်လီၤထွံကွံာ်ဝဲခဲလၢာ်န့ၣ်လီၤ. မ့မ့ၢ်လၢ AFP အတၢ်ဂီၤသ့ၣ်တဖၣ်အပူၤန့ၣ် ဟံၣ်တဖျၢၣ်အဖီခိၣ်န့ၣ် အိၣ်ပှဲၤဒီး ဟီၣ်ခိၣ်ကပံာ်သ့ၣ်တဖၣ်န့ၣ်လီၤ.
နံးပီလ် သုးဖိသ့ၣ်တဖၣ် လဲၤမၤစၢၤဝဲတၢ်ဒီးကဘီယူၤ လၢအလဲၤမၤစၢၤ သုးပူၤဖျဲးကွံာ်ပှၤကညီလၢအအိၣ်ဖဲတၢ်လီၤဘၣ်ယိၣ် ဟီၣ်ကဝီၤအပူၤသ့ၣ်တဖၣ်န့ၣ်လီၤ.
နံးပီလ် လီမ့ၣ်အူပှၤဘၣ်မူဘၣ်ဒါစံးဝဲဒၣ်, တၢ်ထုးထီၣ်လီမ့ၣ်အူဂံၢ်သဟီၣ် ဘၣ်ဒိဘၣ်ထံးဝဲဒၣ် ၄၃ဝ မဲးကၢးဝာ်, လၢအပၣ်ဃုာ် ထံဂံၢ်သဟီၣ်ဒီး မုၢ်ဂံၢ်သဟီၣ် တၢ်သူၣ်ထီၣ်အလီၢ်သ့ၣ်တဖၣ်, အဃိဒုးအိၣ်ထီၣ်တၢ်တၢ်တံာ်တာ်လၢ တၢ်ဟ့ၣ်လီၤလီမ့ၣ်အူအဂီၢ်န့ၣ်လီၤ.
'ဟီၣ်ခိၣ်လာ်တၢ်တတၢၤတနါ'
ထံဂုၤကီၢ်ဂၤကစၢၢ်ကလိတၢ်ဂုၤထီၣ်ပသီထီၣ်အတၢ်မၤသကိးဝဲၤလီၢ် (ICIMOD) လၢအအိၣ်ဆီလီၤအသးဖဲ Kathmandu, တၢ်ဖီၣ်ဂၢၢ်တၢ်လၢတၢ်လီၢ်အယံၤဒီး တၢ်ထိၣ်ဒွးဟီၣ်ခိၣ်ဂီၤ ပှၤပဲၤထံနီၤဖးတၢ် Sarthak Shrestha အတၢ်ထိၣ်ဒွးဆိပာ်စၢၤအပူၤန့ၣ်စံးဝဲဒၣ်, ဖဲတရူးကီၢ် အကီၢ်ဆၢတကပၤန့ၣ် တၢ်အိၣ်သးလၢ အတဘၣ်လီၢ်ဘၣ်ဆးဘၣ် သ့ၣ်တဖၣ် တၢ်တထံၣ်ဘၣ်အီၤဘၣ်.
အဝဲတဲဘၣ် AFP တၢ်ကစီၣ်သန့လၢ, “ပနာ်လၢ လၢၢ်ဖးဒိၣ်—ထံခုၣ်ကိၣ်လိၣ်လီၤပှီၢ်ကဲထီၣ်ဖဲနံးပီလ်အပူၤ, ဒီးပံးတံၢ်လီၤဝဲ Lhende ထံကျိမိၢ်ပှၢ်, အဃိန့ၣ် ဒုးအိၣ်ထီၣ်ဝဲ ထံလုၢ်ဘၢတၢ်ဒိၣ်ဒိၣ်မုၢ်မုၢ်အံၤန့ၣ်လီၤ.”
တရူးပဒိၣ် ပှၤဘိးဘၣ်ရၤလီၤတၢ်ကစီၣ် CCTV အတၢ်ပာ်ဖျါ ဖဲမုၢ်သၢနံၤန့ၣ် စံးဝဲဒၣ်, “ဟီၣ်ခိၣ်လာ်တၢ်တတၢၤတနါ” ကဲထီၣ်အသးဖဲ နံးပီလ် ကီၢ်တကပၤအဃိ ဖဲ တံဘဲး Gyirong Port ကဘီသန့န့ၣ် “တၢ်သံတၢ်ပှၢ်ဒီး ပှၤကညီလီၤမၢ်” အိၣ်ဝဲအါအါဂီၢ်ဂီၢ်န့ၣ်လီၤ.
ဖဲ CCTV တၢ်ပာ်ဖျါအပူၤန့ၣ် တရူးကီၢ်ခိၣ် Xi Jinping စံးဝဲဒၣ်, “တၢ်အရ့ဒိၣ်ကတၢၢ် ကဘၣ်မၤအီၤလၢအဆိအချ့န့ၣ်မ့ၢ်ဝဲဒၣ် ကဘၣ်လဲၤဆူတၢ်လီၢ်အံၤကိးတီၤဒဲးဒီး ကွၢ်ဃုမၤပူၤဖျဲးပှၤလၢအလီၤမၢ်သ့ၣ်တဖၣ်န့ၣ်လီၤ.”
တံဘဲးကီၢ်စဲၣ် ရှံၤဂၣ်ဆီဝ့ၢ် သိလ့ၣ်ပှၤဘၣ်မူဘၣ်ဒါသ့ၣ်တဖၣ်စံးဝဲဒၣ် ကျဲမုၢ်ဖဲဟီၣ်ကဝီၤသ့ၣ်တဖၣ်အံၤအပူၤန့ၣ် “အိၣ်ပှဲၤဒီးဟီၣ်ခိၣ်ကပံာ် ဒီးတၢ်ပူၤဖျဲးတအိၣ်လၢ တၢ်ကလဲၤထီၣ်က့ၤလီၤအဂီၢ်” ဘၣ်န့ၣ်လီၤ.
ဖဲအ့ရှၢၣ်ကလံၤထံးတကပၤန့ၣ် တၢ်စူၤခါအဆၢကတီၢ်—ဖဲလါယူၤဒီး လါစဲးပထ့ဘၢၣ်အတီၢ်ပူၤန့ၣ် ညီနုၢ် ဒုးအိၣ်ထီၣ်ဝဲ ထံလုၢ်ဘၢတၢ်ဒီးဟီၣ်ခိၣ်လာ် လၢအအိၣ်ဒီးတၢ်သံတၢ်ပှၢ်သ့ၣ်တဖၣ်န့ၣ်လီၤ.
ပှၤစဲအ့ၣ်ဖိသ့ၣ်တဖၣ်စံးဝဲဒၣ် မူခိၣ်ကလံၤသီၣ်ဂီၤတၢ်ဆီတလဲ အတၢ်မၤသးသ့ၣ်တဖၣ်အဃိ ဒုးအိၣ်ဝဲဒၣ် ဟီၣ်ကဝီၤအံၤအပူၤ မူခိၣ်ကလံၤသီၣ်ဂီၤတၢ်အိၣ်သးလၢအဆူၣ်အကိၤသ့ၣ်တဖၣ်န့ၣ်လီၤ.
ICIMOD—မူခိၣ်ကလံၤသီၣ်ဂီၤတၢ်ဆီတလဲဒီး ခိၣ်ဃၢၤန့ဆၢၣ်တၢ်လီၤဘၣ်ယိၣ်ဝဲၤလီၢ်အခိၣ် Qianggong Zhang ဟ့ၣ်ပလီၢ်ဝဲလၢ, ထံလုၢ်ဘၢတၢ်ခံဘျီတဘျီ ကဲထီၣ်သ့န့ၣ်လီၤ.
အဝဲတဲဘၣ် AFP တၢ်ကစီၣ်သန့လၢ, “မ့ၢ်လၢ နံးပီလ်ဒီးတရူးကီၢ် ကီၢ်ဆၢထံကျိ လၢထးခီတကပၤန့ၣ် ကးတံာ်လီၤသးအဃိ, ပှၤဘၣ်မူဘၣ်ဒါသ့ၣ်တဖၣ် ဟ့ၣ်ပလီၢ်ပာ်ဝဲလၢ ထံလုၢ်ဘၢတၢ် ခံဘျီတဘျီ ကဲထီၣ်သ့” န့ၣ်လီၤ.
For the latest from SBS News, download our app and subscribe to our newsletter.
