ဟံၣ်ဃီအပှ့ၤလီၤအဃိ အီစထြ့လယါကီၢ်ဒီဘ့ၣ်ဟံၣ်သ့ၣ်တဖၣ်အပှ့ၤလီၤ

မ့ၢ်လၢစ့အ့ၣ်အလုၢ်အပှ့ၤဟဲအါထီၣ်ဒီး ဟံၣ်ဃီခိသွဲသ့ၣ်တဖၣ်ဆီတလဲသးအဃိ, ဟံၣ်ဃီတၢ်ဆါတၢ်ပှ့ၤအဖၠါ သကုၤအီစထြ့လယါကီၢ်ဒီဘ့ၣ်အပူၤ အပှ့ၤလီၤဝဲန့ၣ်လီၤ.

ဟံၣ်ဃီတၢ်စုလီၢ်ခိၣ်ခိၣ်တၢ်ပဲၤဖးနီၤဖးနီၣ်ဂံၢ်စရီခီပနံၣ်, Cotality အတၢ်ပာ်ဖျါအပူၤန့ၣ်, ဒုးနဲၣ်ဖျါဝဲလၢ အပူၤကွံာ်တလါန့ၣ် ဒီကလုာ်ဟံၣ်ဃီအလုၢ်အပှ့ၤသ့ၣ်တဖၣ်န့ၣ် လီၤဝဲဒၣ် ဝ.၇ မျးကယၤ, ဒီးစထီၣ်လၢ ၂ဝ၂၂နံၣ် လါဒံၤစဲဘၢၣ်န့ၣ် မ့ၢ်လါတလါလၢဟံၣ်အပှ့ၤလီၤဒိၣ်ကတၢၢ်တလါန့ၣ်လီၤ.

တနံၣ်တဘျီ အတၢ်ဒိၣ်ထီၣ်န့ၣ် လီၤကဘဲးဝဲတုၤလၢ ၅.၃ မျးကယၤ, လၢအလီၤဖုၣ်န့ၢ်ဒံးဝဲဒၣ် တနံၣ်အံၤ နံၣ်စးထီၣ်သီ နီၣ်ဂံၢ်ခံဖျၢၣ် အတၢ်မၤနီၣ်မၤဃါန့ၣ်လီၤ.

ထံကီၢ်အံၤ တၢ်ဆါတၢ်ပှ့ၤဟံၣ်ဃီဖၠါအဒိၣ်ကတၢၢ်, ဆ့ၣ်ဒနံၤဒီးမဲလ်ဘၢ ဝ့ၢ်တဖျၢၣ်စုာ်စုာ်န့ၣ်, ဟံၣ်အပှ့ၤလီၤဝဲဒၣ် ၁.၄ မျးကယၤ ဒီး ၁.၂ န့ၣ်လီၤ. ဝ့ၢ်ခံဖျၢၣ်လၢၤအံၤန့ၣ် ဟံၣ်အပှ့ၤလီၤအါန့ၢ်ဒ်လၢ အပူၤကွံာ်တယံၤဒ်ဘၣ် ဟံၣ်ပှ့ၤထီၣ်အခါ ၅ မျးကယၤန့ၣ်လီၤ.

ဖဲဘြံၣ်စဘဲဒီး အဲးဒလ့း သ့ၣ်တဖၣ်န့ၣ် အပူၤကွံာ်တယံၤဘၣ်အခါဟံၣ်ပှ့ၤထီၣ်ဝဲဒၣ် နာ်သက့ ခဲကနံၣ်အံၤန့ၣ် ဝ့ၢ်သ့ၣ်တဖၣ်အံၤတဖျၢၣ်စုာ်စုာ်န့ၣ် တၢ်ဆါတၢ်ပှ့ၤဟံၣ်အပှ့ၤသ့ၣ်တဖၣ်လီၤဝဲဒၣ် ဝ.၆ မျးကယၤ ဒီး ဝ.၂မျးကယၤန့ၣ်လီၤ.

မ့ၢ်ထိၣ်ဒီးဝ့ၢ်ကိးဖျၢၣ်ဒဲးန့ၣ်, ဖၢၣ်သ်ဝ့ၢ်န့ၣ်, တနံၣ်ဘၣ်နံၣ် ဟံၣ်အပှ့ၤဟဲထီၣ်ဝဲဒၣ်ကွ့ၢ်ကွ့ၢ် လၢအထီၣ်ဘးတုၤလၢ ၂၁.၈ မျးကယၤ, နာ်သက့ ခဲကနံၣ်အံၤ အပှ့ၤသ့ၣ်တဖၣ်န့ၣ် အိၣ်ထၢၣ်ဂၢၢ်အသး ဒီး ဟဲအါထီၣ်ဝဲဒၣ်ထဲ ဝ.၁ မျးကယၤန့ၣ်လီၤ.

တၢ်ပဲၤဖးနီၤဖးဟံၣ်ဃီတၢ်စုလီၢ်ခီၣ်ခိၣ်အဂ့ၢ်တၢ်ဖံးတၢ်မၤအံၤစံးဝဲဒၣ်, “ပှၤပှ့ၤတၢ်ဖိလၢအအိၣ်တ့ၢ်ဒံးဖဲတၢ်ဆါတၢ်ပှ့ၤဖၠါအပူၤသ့ၣ်တဖၣ်, တၢ်ပြၢလိာ်သးအိၣ်စှၤဒီး ဟံၣ်ဃီသ့ၣ်တဖၣ်န့ၣ်အပှ့ၤထီၣ် (မ့ၢ်ထိၣ်သတြီၤအီၤဒီးနံၣ်စးထီၣ်သီအခါ) အခီပညီန့ၣ်မ့ၢ်ဝဲဒၣ် တၢ်ဃုထၢသ့ၣ်တဖၣ်အိၣ်အါထီၣ်ဒီး တၢ်တၢၣ်ပီၣ်ထိၣ်ဃူအစိကမီၤသ့ၣ်တဖၣ်အိၣ်အါထီၣ်ဝဲန့ၣ်လီၤ.

ဘၣ်ဆၣ်သနာ်က့, တၢ်အပှ့ၤလီၤသ့ၣ်တဖၣ်အံၤန့ၣ် ဘၣ်တၢ်တီခိၣ်ရိၤမဲအီၤလၢ ဟံၣ်ဃီလၢအပှ့ၤဒိၣ်ဖဲတၢ်ဆါတၢ်ပှ့ၤဖၠါအပူၤသ့ၣ်တဖၣ်, ဒီးမ့ၢ်လၢသၢနံၣ်အတီၢ်ပူၤ စ့အ့ၣ်အလုၢ်အပှ့ၤသ့ၣ်တဖၣ်ထီၣ်အါထီၣ်အဃိ ပှၤလၢအပှ့ၤဟံၣ်အဆိကတၢၢ်တဖျၢၣ်, လၢအမ့ၢ်ပှၤသ့ၣ်တဖၣ်လၢ အဃ့လိၢ်စ့န့ၢ်အကံၢ်အစီအိၣ်စှၤသ့ၣ်တဖၣ်အဂီၢ်န့ၣ် တၢ်အဘျုးအဖှိၣ်အိၣ်ဒၣ်ထဲတဆဲးဖိန့ၣ်လီၤ.

သၢလါအတီၢ်ပူၤ တုၤလီၤဖဲလါယူၤလံန့ၣ်, တၢ်ဆါတၢ်ပှ့ၤဖၠါအပူၤ ဟံၣ်လၢအပှ့ၤအိၣ် တၢ်ဖီခိၣ်ကတၢၢ်သ့ၣ်တဖၣ် အလုၢ်အပှ့ၤလီၤကွံာ်ဝဲဒၣ် ၃.၂ မျးကယၤ, နာ်သက့ မ့ၢ်ထိၣ်သတြီၤဒီး ဟံၣ်အပှ့ၤအစှၤကတၢၢ်အပတီၢ်န့ၣ် ဟဲအါထီၣ်ဝဲဒၣ် ၀.၃ မျးကယၤန့ၣ်လီၤ.

မ့မ့ၢ်တၢ်ဆါတၢ်ပှ့ၤဟံၣ်ဃီဖဲ ခိခိၣ်ဟီၣ်ကဝီၤအပူၤသ့ၣ်တဖၣ်န့ၣ် အပှ့ၤလီၤကွံာ်ဝဲဒၣ် ဝ.၂ မျးကယၤ — စးထီၣ်လၢ ၂ဝ၂၃နံၣ် လါယနူၤအါရံၤန့ၣ် မ့ၢ်တၢ်အပှ့ၤလီၤအဆိကတၢၢ်တဘျီန့ၣ်လီၤ.

Cotality တၢ်ဃိထံသ့ၣ်ညါအခိၣ် Gerard Burg စံးဝဲဒၣ်, “ပှၤပှ့ၤတၢ်ဖိဒီး ပှၤဆါလီၤတၢ်ဖိသ့ၣ်တဖၣ်အဘၢၣ်စၢၤ တၢ်အပှ့ၤသ့ၣ်တဖၣ်န့ၣ် အတဘၣ်လိာ်အသး ဒ်တၢ်မုၢ်လၢ်ပာ်အီၤအသိးဘၣ်.”

တၢ်အိၣ်ဆိးအပှ့ၤဒိၣ်ထီၣ်, တၢ်လီၤတံၢ်လီၤဆဲးတအိၣ်ဘၣ် ခီဖျိမုၢ်ထီၣ်ခၢၣ်သးတၢ်ဒုးတၢ်ယာ်ဒီး ခိသွဲတၢ်ဆီတလဲ လၢအဘၣ်တၢ်မၤအီၤဖဲ လါမ့ၤ စ့တိာ်ကျဲၤအပူၤအဃိ ဘၣ်ဒိဘၣ်ထံးဝဲဒၣ် ပှၤသူစွဲတၢ်ဖိသ့ၣ်တဖၣ်န့ၣ်လီၤ.

Burg စံးဝဲဒၣ်, “ဖဲအပူၤကွံာ်စှၤကိးနွံအတီၢ်ပူၤန့ၣ် ပထံၣ်ဘၣ်ထံကီၢ်ဒီဘ့ၣ်အပူၤ ဟံၣ်ဃီတၢ်စုလီၢ်ခီၣ်ခိၣ်အပှ့ၤလီၤနးဒိၣ်ထီၣ်စရီအသီသ့ၣ်တဖၣ်, လၢအဘၣ်တၢ်တီခိၣ်ရိၤမဲအီၤလၢ ဆ့ၣ်ဒနံၤ, ပှၤလၢအတၢ်အိၣ်သးအိၣ်လၢအကဆါလီၤတၢ်သ့ၣ်တဖၣ်န့ၣ် သမံသမိးထံဝဲဒၣ် တၢ်ဆါတၢ်ပှ့ၤဖၠါ လၢအဂံၢ်စၢ်လီၤအံၤဒီး အဝဲသ့ၣ်ဃုထၢလၢ အကအိၣ်ခိးတၢ် တုၤလၢတၢ်အိၣ်သးဟဲက့ၤဂ့ၤထီၣ်တစုန့ၣ်လီၤ.

မ့မ့ၢ်တၢ်ဒိးလဲလီၤဟံၣ်ဃီအပှ့ၤသ့ၣ်တဖၣ်န့ၣ် ဆဲးဒိၣ်ထီၣ်ကွ့ၢ်ကွ့ၢ် မ့ၢ်လၢဟံၣ်ဃီအိၣ်ကလီသ့ၣ်တဖၣ် စှၤဒိၣ်မးအဃိန့ၣ်လီၤ. Burg စံးဝဲဒၣ် အပူၤကွံာ်ယဲၢ်နံၣ်အတီၢ်ပူၤ ထံကီၢ်ဒီဘ့ၣ်တၢ်ဒိးလဲဟံၣ်ဃီအပှ့ၤ လၢအအိၣ်ဖဲအကြၢးန့ၣ် ဟဲထီၣ်အါထီၣ်ဝဲဒၣ် လၢအမ့ၢ်တနွံန့ၣ် အပှ့ၤဒိၣ်ထီၣ် အါန့ၢ် ၂ဝဝ ဒီလၣ်န့ၣ်လီၤ.

အဝဲစံးဝဲဒၣ်, “ဟံၣ်ဃီအပှ့ၤတၢ်အိၣ်သးသ့ၣ်တဖၣ် တၢ်ဃံးတၢ်စ့ၤ မ့ၢ်အိၣ်နာ်သက့, ဘၣ်ဃးဒီး တၢ်ဒိးလဲဟံၣ်အပှ့ၤသ့ၣ်တဖၣ် ကဟဲဒိၣ်ထီၣ်ထဲလဲၣ်န့ၣ် တၢ်သံကွၢ်သ့ၣ်တဖၣ်အိၣ်ဒ်ဝဲန့ၣ်လီၤ.

—တၢ်ပာ်ဖျါအံၤပၣ်ဃုာ်ဒီး Australian Associated Press တၢ်ကစီၣ် အတၢ်ဂ့ၢ်တၢ်ကျိၤတနီၤန့ၣ်လီၤ.

For the latest from SBS News, download our app and subscribe to our newsletter.