IN BRIEF
- တၢ်မၤဘူၣ်သ့ၣ်တဖၣ်န့ၣ် အကမၤစၢၤဝဲ တၢ်ဟ့ၣ်လီၤ ဂ့ၢ်ဂီၢ်အူတၢ်အိၣ်ဆိးအလီၢ်, တၢ်အီၣ်တၢ်အီ, ထံကဆှီ, တၢ်ကဆှဲကဆှီပီးလီသ့ၣ်တဖၣ်ဒီး ကသံၣ်ကသီတၢ်အံးထွဲကွၢ်ထွဲသ့ၣ်တဖၣ်န့ၣ်လီၤ.
- ပှၤအီစထြ့လယါဖိသ့ၣ်တဖၣ် မၤဘူၣ်လီၤ တၢ်မၤဘူၣ်အံၤသ့ခီဖျိ Emergency Action Alliance's Nepal Flood Disaster Appeal အအိၣ်တဆီ မ့တမ့ၢ် ကိးဘၣ်လီတဲစိဖဲ ၁၃ဝဝ ၉၃၉ ဝဝဝ ဒီး မၤဘူၣ်လီၤအီၤသ့ဝဲန့ၣ်လီၤ.
ဖဲနံးပီလ်တံဘဲး ကီၢ်ဆၢန့ၣ် ပှၤတဝၢဒီတခါဘၣ်ဟးဂီၤကွံာ်ဖဲထံလုၢ်ဘၢတၢ်ဒီးဟီၣ်ခိၣ်လာ်အပူၤ, ဟံၣ်ဃီ, ကျဲ, တိၤ, ဒီး တၢ်သူၣ်ထီၣ်ဆီလီၤသ့ၣ်တဖၣ် လီၢ်ပှီၣ်ဟးဂီၤကွံာ်ခဲလၢာ်ခဲဆ့န့ၣ်လီၤ.
တၢ်ကွၢ်ဃုက့ၤတၢ်ဒီးတၢ်မၤပူၤဖျဲးတၢ်အတၢ်ဟူးတၢ်ဂဲၤသ့ၣ်တဖၣ် ဘၣ်တၢ်မၤဝဲအီၤအဖၢမုၢ်အခါ, ပှၤကညီလၢအထိကလးအါမးသ့ၣ်တဖၣ် လိၣ်ဘၣ်ဝဲ တၢ်အိၣ်ဆိးအလီၢ်, တၢ်အီၣ်တၢ်အီ, ထံကဆှီဒီး ကသံၣ်ကသီတၢ်ဆီၣ်ထွဲမၤစၢၤ လၢအဆိအချ့န့ၣ်လီၤ.
လၢကမၤစၢၤတၢ်သ့ၣ်တဖၣ်အံၤအဂီၢ် ပှၤအီစထြ့လယါ တၢ်ဟ့ၣ်သးကညီၤကရၢ ၁၄ ဖု ဖီၣ်လိာ်စုမၤသကိးတၢ်ဒီး စးထီၣ်ဝဲ ထံကီၢ်ဒီဘ့ၣ် တၢ်ဃ့ထီၣ် တၢ်မၤစၢၤတခါန့ၣ်လီၤ.
Emergency Action Alliance — ဂ့ၢ်ဂီၢ်အူတၢ်ဟူးတၢ်ဂဲၤသိၣ်မှံၤကရၢ
ဂ့ၢ်ဂီၢ်အူတၢ်ဟူးတၢ်ဂဲၤသိၣ်မှံၤကရၢ—Emergency Action Alliance (EAA) စးထီၣ်ဝဲ နံးပီလ်ထံလုၢ်ဘၢတၢ်တၢ်တတၢၤတနါတၢ်ဃ့ကညး — Nepal Flood Disaster Appeal အတၢ်ရဲၣ်တၢ်ကျဲၤတခါ, ဒ်အမ့ၢ်တၢ်ဟ့ၣ်သကညီကရၢ လၢအလီၤဆီလိာ်အသး အကလုာ်ကလုာ်သ့ၣ်တဖၣ် မၤသကိးတၢ်တပူၤဃီလၢအကဟ့ၣ်လီၤတၢ်ဆီၣ်ထွဲမၤစၢၤ ပှၤတဝၢလၢအဘၣ်ဒိဘၣ်ထံးဖဲတၢ်တတၢၤတနါအပူၤသ့ၣ်တဖၣ်အဂီၢ်န့ၣ်လီၤ.
သိၣ်မှံၤကရၢအံၤစံးဝဲဒၣ် တၢ်မၤဘူၣ်သ့ၣ်တဖၣ် ကမၤစၢၤဝဲဒၣ် တၢ်ဟ့ၣ်လီၤပှၤဂ့ၢ်ဝီတၢ်လိၣ်ဘၣ်လၢအဆိအချ့သ့ၣ်တဖၣ်, လၢအပၣ်ဃုာ် ဂ့ၢ်ဂီၢ်အူတၢ်အိၣ်ကဒုအလီၢ်, တၢ်အီၣ်တၢ်အီ, ထံကဆှီ, နီၣ်ခိတၢ်ကဆှဲးကဆှီပီးလီသ့ၣ်တဖၣ်ဒီး ကသံၣ်ကသီတၢ်အံးထွဲကွၢ်ထွဲသ့ၣ်တဖၣ်န့ၣ်လီၤ.
ပှၤတဝၢလၢအဘၣ်ဒိဘၣ်ထံးတနီၤနီၤအိၣ်တၢ်လီၢ်န့ၣ် တၢ်လဲၤနုာ်လီၤဘၣ်အီၤကီဒိၣ်မး, မ့ၢ်လၢ ကျဲသ့ၣ်တဖၣ်ဟးဂီၤကွံာ်ဒီး မူခိၣ်ကလံၤသီၣ်ဂီၤတၢ်အိၣ်သးသ့ၣ်တဖၣ် ကဲထီၣ်တၢ်တံာ်တာ်လၢ ပှၤကျဲးစၢးလဲၤနုာ်လီၤမၤစၢၤပှၤလိၣ်ဘၣ်တၢ်မၤစၢၤသ့ၣ်တဖၣ်န့ၣ်လီၤ.
ပှၤအီစထြ့လယါဖိသ့ၣ်တဖၣ်တၢ်ဟ့ၣ်သဆၣ်ထီၣ်အဝဲသ့ၣ်လၢ အကဟ့ၣ်လီၤတၢ်မၤဘူၣ်ခီဖျိ EAA လီပှာ်ယဲၤသန့အပူၤတဆီ မ့တမ့ၢ် ကိးဘၣ်လီတဲစိနီၣ်ဂံၢ် ၁၃ဝဝ ၉၃၉ ဝဝဝ ဒီးဟ့ၣ်လီၤတၢ်မၤဘူၣ်သ့ဝဲန့ၣ်လီၤ.
တၢ်ဟ့ၣ်သးကညီၤကရၢလၢအပၣ်ဃုာ်ဖဲတၢ်ဃ့ထီၣ်တၢ်မၤစၢၤအပူၤသ့ၣ်တဖၣ်န့ၣ်မ့ၢ်ဝဲ, Save the Children Australia, Plan International Australia, Oxfam Australia, Australia for UNHCR, ActionAid Australia, CARE Australia, Caritas Australia, ADRA, Act for Peace, Anglican Overseas Aid, Australian Lutheran World Service, Baptist World Aid Australia, CBM Australia ဒီး Tearfund Australia သ့ၣ်တဖၣ်န့ၣ်လီၤ.
ဒ်သိးကဆီၣ်ထွဲမၤစၢၤ ပှၤလၢအတူၢ်ဘၣ် တၢ်တတၢၤတနါသ့ၣ်တဖၣ်အံၤအဂီၢ်, EAA ပှၤပၢဆှၢတၢ်ခိၣ်ကျၢၢ် Kerren Morris စံးဝဲဒၣ်လၢ, တၢ်ဃ့တၢ်မၤစၢၤ အတၢ်ရဲၣ်တၢ်ကျဲၤအံၤဟ့ၣ်လီၤဝဲပှၤအီစထြ့လယါဖိသ့ၣ်တဖၣ် ကျိၤကျဲလၢ အပှဲၤဒီးတၢ်နာ်အီၣ်အီၤသ့န့ၣ်လီၤ.
ဖဲလံာ်တၢ်ဘိးရၤလီၤအပူၤန့ၣ် အဝဲစံးဝဲဒၣ်, “အခဲအံၤန့ၣ်လၢဂ့ၢ်ဂီၢ်အူတၢ်အိၣ်ဒုအလီၢ်, တၢ်အီၣ်တၢ်အီ, ထံအိကဆှီဒီး ကသံၣ်ကသီတၢ်ဆီၣ်ထွဲမၤစၢၤသ့ၣ်တဖၣ် တၢ်လိာ်ဘၣ်အီၤလၢအဆိအချ့, ဒီး လၢတၢ်ဆၢကတီၢ်ယံၤထၢတၢ်မၤဘၣ်လီၢ်ဘၣ်ဆးက့ၤတၢ်အဂီၢ် တၢ်ဖံးတၢ်မၤသ့ၣ်တဖၣ် တၢ်ကဘၣ်ဆဲးမၤဝဲအီၤလၢအလါအါမးန့ၣ်လီၤ.”
တၢ်ဟ့ၣ်သးကညီကရၢသ့ၣ်တဖၣ်မၤတၢ်မနုၤလဲၣ်
တၢ်ဟ့ၣ်သးကညီကရၢသ့ၣ်တဖၣ် လၢတၢ်ခီဆၢတတၢၤတနါအံၤအဂီၢ် ဟဲစိာ်ဝဲဒၣ် ပှၤဂ့ၢ်ဝီတၢ်ဟ့ၣ်သးကညီတၢ်မၤစၢၤသ့ၣ်တဖၣ် ဖဲဟီၣ်ကဝီၤလၢအလီၤဆီလိာ်အသးသ့ၣ်တဖၣ်အပူၤ, ဒီး ဒ်သိးကဟ့ၣ်လီၤတၢ်မၤစၢၤအဆိအကချ့သ့ၣ်တဖၣ် ဆူပှၤတူၢ်ဘၣ်တၢ် အပှၤတဝၢသ့ၣ်တဖၣ်အအိၣ်အဂီၢ် အဝဲသ့ၣ်မၤသကိးတၢ်ဒီး တၢ်ကရၢကရိသ့ၣ်တဖၣ်ဒီး အဝဲသ့ၣ် လီၢ်ကဝီၤပှၤမၤသကိးတၢ်သ့ၣ်တဖၣ်န့ၣ်လီၤ.
Save the Children Australia
Save the Children ကရၢအံၤ ပာ်လီၤဝဲတၢ်ပညိၣ်ဖဲ ဖိဒံဖိသၣ်သ့ၣ်တဖၣ်ဒီး ဟံၣ်ဖိဃီဖိလၢ အတူၢ်ဘၣ်တၢ်သ့ၣ်တဖၣ်အဖီခိၣ် လၢအဆီၣ်ထွဲမၤစၢၤဟ့ၣ်လီၤဝဲ ပှၤဂ့ၢ်ဝီတၢ်ဟ့ၣ်သးကညီၤဂ့ၢ်ဂီၢ်အူတၢ်မၤစၢၤသ့ၣ်တဖၣ်န့ၣ်လီၤ.
Oxfam Australia
Oxfam Australia န့ၣ်မၤဝဲဒၣ် ပှၤဂ့ၢ်ဝီတၢ်မၤစၢၤအတၢ်ဖံးတၢ်မၤ လၢအပၣ်ဃုာ် တၢ်ဆီၣ်ထွဲမၤစၢၤ ဝဲၤကျိၤလၢတၢ်လိၣ်ဘၣ်အီၤနီၣ်နီၣ်သ့ၣ်တဖၣ်, လၢအမ့ၢ်ဒ်သိး တဟ့ၣ်လီၤထံကဆှီ, တၢ်မၤတၢ်ကဆှဲကဆှီတၢ်သ့ၣ်တဖၣ်ဒီး ဂ့ၢ်ဂီၢ်အူ တၢ်တိစၢၤမၤစၢၤသ့ၣ်တဖၣ်န့ၣ်လီၤ.
Australia for UNHCR
မ့မ့ၢ် Australia for UNHCR န့ၣ် မ့ၢ်ဝဲဒၣ် ဘီမုၢ်စၢဖှိၣ်ကရၢ ပှၤဘၣ်ကီဘၣ်ခဲဂ့ၢ်ဝီ အဝဲၤကျိၤတခါ လၢအမၤသကိးတၢ်ဒီးအီစထြ့လယါကီၢ်, ဒီး ဟ့ၣ်လီၤဝဲ ပှၤဂ့ၢ်ဝီတၢ်မၤစၢၤသ့ၣ်တဖၣ် ခီဖျိ UNHCR တၢ်ဖံးတၢ်မၤပှာ်ယဲၤတဆီန့ၣ်လီၤ.
တၢ်မၤဘူၣ်သ့ၣ်တဖၣ်န့ၣ်ကကဲထီၣ်အသးဒ်လဲၣ်
ပှၤတဝၢလၢအဘၣ်ဒိဘၣ်ထံးခီဖျိ တၢ်တတၢၤတနါအံၤဒီး လိၣ်ဘၣ်ပှၤဂ့ၢ်ဝီတၢ်မၤစၢၤသ့ၣ်တဖၣ်အတၢ်အိၣ်သးန့ၣ် တၢ်ဟ့ၣ်သးကညီကရၢသ့ၣ်တဖၣ်အံၤ ဆဲးမၤဝဲ တၢ်ဃုထံသမံသမိး အဝဲသ့ၣ်အတၢ်လိၣ်ဘၣ်သ့ၣ်တဖၣ်န့ၣ်လီၤ.
EAA အံၤစံးဝဲဒၣ် အဝဲသ့ၣ်အကရၢဖိသ့ၣ်တဖၣ်န့ၣ် မၤဝဲတၢ်ဆၢတဲာ် လၢအဘၣ်ဃးဒီး တၢ်ဆီၣ်ထွဲမၤစၢၤသ့ၣ်တဖၣ်န့ၣ် ကဘၣ်လဲၤဝဲဆူတၢ်အိၣ်သးလၢတၢ်လိၣ်ဘၣ်အီၤအဆိအချ့သ့ၣ်တဖၣ်အအိၣ်, လၢအမ့ၢ်ဒ်သိး တၢ်ကွၢ်ဃုမၤပူၤဖျဲးတၢ် အတၢ်ဖံးတၢ်မၤသ့ၣ်တဖၣ်န့ၣ်လီၤ.
တၢ်ဃ့သကွံညးတၢ်မၤစၢၤအံၤ ဘၣ်တၢ်ဆီၣ်ထွဲပာ်ဂၢၢ်ပာ်ကျၢၤအီၤလၢ အီစထြ့လယါကီၣ်ကးကရၢလၢထံဂုၤကီၢ်ဂၤတၢ်ဂုၤထီၣ်ပသီထီၣ်အဂီၢ်—Australian Council for International Development (ACFID) ကရၢ, လၢအမ့ၢ်ဝဲဒၣ် ပှၤအီစထြ့လယါ တၢ်ကရၢကရိ လၢအပၣ်ဃုာ်ဖဲ ပှၤဂ့ၢ်ဝီတၢ်မၤစၢၤအတၢ်ဟူးတၢ်ဂဲၤဒီး ထံဂုၤကီၢ်ဂၤတၢ်ဂုၤထီၣ်ပသီထီၣ်အပူၤ အကရၢမိၢ်ပှၢ်, လၢအတမ့ၢ် ပဒိၣ်အတၢ်ကရၢကရိဘၣ်န့ၣ်လီၤ.
ABC စ့ၢ်ကီး ဆီၣ်ထွဲမၤစၢၤဝဲ တၢ်ဃ့ထီၣ်တၢ်မၤစၢၤအံၤ ခီဖျိ အဝဲသ့ၣ် ABC Gives တၢ်ရဲၣ်တၢ်ကျဲၤတဆီန့ၣ်လီၤ.
ACFID ကရၢခိၣ်ကျၢၢ် Matthew Maury စံးဝဲဒၣ် မ့ၢ်လၢ ပှၤဂ့ၢ်ဝီတၢ်မၤစၢၤ အတၢ်လိၣ်ဘၣ်သ့ၣ်တဖၣ် အကဆဲးအိၣ်အါထီၣ်အဃိ တၢ်တၢၣ်ပီၣ်မၤသကိးတၢ်တပူၤဃီန့ၣ်မ့ၢ်ဝဲတၢ်အရ့ဒိၣ်တခါန့ၣ်လီၤ.
အဝဲစံးဝဲဒၣ်, “လၢတၢ်ဆီၣ်ထွဲမၤစၢၤပှၤတူၢ်ဘၣ်တၢ်တတၢၤတနါသ့ၣ်တဖၣ်အံၤအဂီၢ် တၢ်ဃ့ထီၣ်တၢ်မၤစၢၤအတၢ်ရဲၣ်တၢ်ကျဲၤအံၤ ဟ့ၣ်လီၤဝဲ ပှၤအီစထြ့လယါဖိသ့ၣ်တဖၣ် ကျိၤကျဲလၢအအိၣ်ပှဲၤဒီးတၢ်နာ်အီၣ်သ့ဒီး အိၣ်ဒီးတၢ်တုၤထီၣ်ထီၣ်ဘးသ့ၣ်တဖၣ်န့ၣ်လီၤ.”
အီစထြ့လယါကီၢ်အၢၣ်လီၤလၢကဟ့ၣ်လီၤတၢ်မၤစၢၤဒီလၣ် ၅ကကွဲၢ်
ပှၤတဝၢလၢအဘၣ်ဒိဘၣ်ထံးဖဲနံးပီလ်ဒီးတရူးကီၢ်ဆၢသ့ၣ်တဖၣ်အဂီၢ် အီစထြ့လယါကီၢ် ပာ်ဂၢၢ်ပာ်ကျၢၤလၢ အကဟ့ၣ်လီၤဝဲ ဒီလၣ် ၅ ကကွဲၢ် ပှၤဂ့ၢ်ဝီတၢ်မၤစၢၤအဘိၣ်န့ၣ်လီၤ.
ကျိၣ်စ့တၢ်မၤစၢၤအံၤ ကဆီၣ်ထွဲမၤစၢၤဝဲ ဂ့ၢ်ဂီၢ်အူတၢ်ခီဆၢလၢတၢ်တတၢၤတနါ ဒီး တၢ်က့ၤမၤဘၣ်လိာ်က့ၤတၢ်လၢတၢ်ဆၢကတီၢ်ဖးယံၤ ခံခါလၢာ်အံၤအဂီၢ်, ဒီးပဒိၣ်စံးဝဲဒၣ် ကျိၣ်စ့တၢ်မၤစၢၤအံၤ ကမၤစၢၤဟ့ၣ်လီၤဝဲ တၢ်အီၣ်တၢ်အီ, ဂ့ၢ်ဂီၢ်အူတၢ်အိၣ်ကဒုအလီၢ်, ထံကဆှီဒီး တၢ်ကဆှဲကဆှီအဂီၢ်သ့ၣ်တဖၣ်န့ၣ်လီၤ.
စ့ဒီလၣ် ၅ကကွဲၢ် တၢ်မၤစၢၤအဘိၣ်အံၤ တၢ်ကဟ့ၣ်လီၤဝဲအီၤခီဖျိ ပှၤဂ့ၢ်ဝီတၢ်မၤစၢၤအကရၢအပှၤမၤသကိးတၢ်လၢအအိၣ်ပာ်စၢၤလံသ့ၣ်တဖၣ်, လၢအမ့ၢ် ဒီလၣ် ၂ကကွဲၢ်န့ၣ် တၢ်ကဟ့ၣ်လီၤအီၤဆူဟီၣ်ခိၣ်ဒီဖျၢၣ်တၢ်အီၣ်တၢ်အီအတၢ်ရဲၣ်တၢ်ကျဲၤ— World Food Programme အအိၣ် လၢတၢ်အီၣ်တၢ်အီဒီး ဝံစိာ်တီဆှၢတၢ်ဆီၣ်ထွဲမၤစၢၤအဂီၢ်, ဒီလၣ်အဂၤ ၂ကကွဲၢ်န့ၣ် တၢ်ဟ့ၣ်လီၤအီၤအီၤခီဖျိ အီစထြ့လယါပှၤဂ့ၢ်ဝီတၢ်မၤစၢၤအပှၤမၤသကိးတၢ်လၢဂ့ၢ်ဂီၢ်အူတၢ်ဆီၣ်ထွဲမၤစၢၤအဂီၢ်, လၢအမ့ၢ်ဒ်သိး တၢ်အိၣ်ကဒုအလီၢ်, တၢ်ကဆှဲးကဆှီးပီးလီ, ယၣ်လုာ်, ကသံၣ်ကသီတၢ်အံးထွဲကွၢ်ထွဲဒီး နီၣ်သးဆူၣ်ချ့ တၢ်ဆီၣ်ထွဲမၤစၢၤအဂီၢ်သ့ၣ်တဖၣ်, ဒီး လၢအအိၣ်တ့ၢ်ဒီလၣ် ၁ကကွဲၢ်န့ၣ် တၢ်ကဟ့ၣ်လီၤအီၤဆူ EAA အအိၣ် ဒ်သိးကဆီၣ်ထွဲမၤစၢၤတၢ်လၢ လီၢ်ကဝီၤ တၢ်က့ၤမၤဘၣ်လီၢ်ဘၣ်ဆးက့ၤတၢ်အဂီၢ် ဒီး တၢ်သူၣ်ထီၣ်ကဒါက့ၤတၢ်အိၣ်မူအဂီၢ်သ့ၣ်တဖၣ်န့ၣ်လီၤ.
ဒ်သိးကနၢ်ပၢၢ်တၢ်အိၣ်သးအဂီၢ်ဒီး တၢ်ဃုသ့ၣ်ညါပှၤတူၢ်ဘၣ်တၢ်သ့ၣ်တဖၣ်အတၢ်လိၣ်ဘၣ်အဂီၢ်, ထံဂုၤကီၢ်ဂၤကိတိာ်ခိၣ်၂ Matt Thistlethwaite စံးဝဲဒၣ် အီစထြ့လယါပှၤဘၣ်မူဘၣ်ဒါသ့ၣ်တဖၣ် မၤသကိးတၢ်မၤဒီး နံးပီလ် ပှၤဘၣ်မူဘၣ်ဒါသ့ၣ်တဖၣ်န့ၣ်လီၤ.
Thistlethwaite စံးစ့ၢ်ကီးဝဲလၢ ဒ်သိးကမၤလီၤတံၢ်ပှၤအီစထြ့လယါဖိဖဲဟီၣ်ကဝီၤအံၤ အတၢ်အိၣ်သးအဂီၢ်, ပဒိၣ်န့ၣ် မၤဝဲတၢ်မၤလၢအတအိၣ်ဘှံးအိၣ်သါတအိၣ်ပတုာ်ဘၣ်, ဘၣ်ဆၣ်သနာ်က့ ကျဲဟးဂီၤဒီး တၢ်ဆဲးကျိးအတၢ်သူၣ်ထီၣ်ဆီလီၤသ့ၣ်တဖၣ်ဟးဂူာ်ဟးဂီၤအဃိ ဒုးအိၣ်ထီၣ်တၢ်ကီတၢ်ခဲလၢ တၢ်ကဆဲးကျိးတၢ်အဂီၢ်န့ၣ်လီၤ.
အီစထြ့လယါတၢ်ဆီၣ်ထွဲမၤစၢၤသ့ၣ်တဖၣ်ဟဲအါထီၣ်ကွ့ၢ်ကွ့ၢ်
ဒ်သိးကမၤစၢၤတၢ်ဃုသ့ၣ်ညါတၢ်လိၣ်ဘၣ်သ့ၣ်တဖၣ်ဒီး တၢ်ဆီၣ်ထွဲမၤစၢၤဂ့ၢ်ဂီၢ်အူတၢ်ခီဆၢတၢ်အိၣ်သးသ့ၣ်တဖၣ်အဂီၢ် အီစထြ့လယါကီၢ်ဆှၢလီၤဝဲဒၣ် ပှၤဂ့ၢ်ဝီတၢ်မၤစၢၤ ဂ့ၢ်ဝီပှၤသ့ပှၤဘၣ်သ့ၣ်တဖၣ်ဆူနံးပီလ်ကီၢ် ဒီးတုၤလီၤဝဲဒၣ်ဖဲ ၄၈နၣ်ရံၣ်အတီၢ်ပူၤန့ၣ်လီၤ.
ပှၤသ့ပှၤဘၣ်စဲၤနီၣ်သ့ၣ်တဖၣ်အံၤ တၢ်လဲၤဆီလီၤအီၤခီဖျိ အီစထြ့လယါကီၢ်တၢ်ဆီၣ်ထွဲမၤစၢၤအတၢ်ရဲၣ်တၢ်ကျဲၤတဆီ ဒီးအဝဲသ့ၣ်န့ၣ် မ့ၢ်ပှၤသ့ပှၤဘၣ်လၢအဘၣ်ဃးဒီး တၢ်ဃုသ့ၣ်ညါပှၤဂ့ၢ်ဝီအတၢ်မၤစၢၤ, ဝံစိာ်တီဆှၢအဂ့ၢ်, တၢ်ဆဲးကျိးဆဲးကျၢအဂ့ၢ် ဒီးတၢ်ရဲၣ်လီၤကျဲၤလီၤ တၢ်ဖံးတၢ်မၤသ့ၣ်တဖၣ်န့ၣ်လီၤ.
မ့မ့ၢ်တၢ်ခီဆၢတၢ်တတၢၤတနါကရူၢ် အကရၢဖိတဂၤ ဒီး ဟီၣ်ကဝီၤ မီၢ်သီပှၤဘၣ်မူဘၣ်ဒါတဂၤန့ၣ် အိၣ်ပာ်စၢၤလံဖဲပျီပူၤတၢ်မဲာ်ညါ ဖဲ Kathmandu ဟီၣ်ကဝီၤအပူၤ ဃုာ်ဒီး အီစထြ့လယါမီၢ်သီပှၤဘၣ်မူဘၣ်ဒါသ့ၣ်တဖၣ်န့ၣ်လီၤ.
ပှၤအီစထြ့လယါဖိလၢအအိၣ်ဖဲတၢ်ကဲထီၣ်သးဟီၣ်ကဝီၤပူၤ
ထံဂုၤကီၢ်ဂၤကိတိာ် Penny Wong စံးဝဲဒၣ်, တၢ်တတၢၤတနါအံၤမ့ၢ်တၢ်လၢအဒိၣ်မးဒီး အိၣ်စီၤစုၤယံၤမးအဃိ, လၢတၢ်ခီဆၢတၢ်တတၢၤတနါဒီး တၢ်က့ၤသူၣ်ထီၣ်ဆီလီၤက့ၤသးအဂီၢ်န့ၣ် တၢ်တာ်တၢ်သ့ၣ်တဖၣ်အိၣ်ဝဲအါအါဂီၢ်ဂီၢ်န့ၣ်လီၤ.
အဝဲစံးဝဲဒၣ်, “ကျဲဒီးတိၤသ့ၣ်တဖၣ်ဟးဂူာ်ဟးဂီၤ, ပှၤတဝၢသ့ၣ်တဖၣ်အိၣ်စီၤစုၤအိၣ်လီၤဖျဲၣ်ဒီး ကဆဲးကျိးလိာ်သးအဂီၢ်တၢ်ကီတၢ်ခဲအိၣ်အဃိ ကဲထီၣ်တၢ်တံာ်လၢ ကဟ့ၣ်လီၤပှၤဂ့ၢ်ဝီတၢ်ဆီၣ်ထွဲမၤစၢၤအဂီၢ်သ့ၣ်တဖၣ်န့ၣ်လီၤ.”
ပှၤအီစထြ့လယါဖိလၢ အအိၣ်ကတာ်ထီဒီးလီၤမၢ်ဖဲ တၢ်တတၢၤတနါအံၤအပူၤသ့ၣ်တဖၣ် မ့ၢ်အအိၣ်ဖဲလဲၣ်န့ၣ်ကသ့ၣ်ညါဘၣ်အီၤအဂီၢ် အီစထြ့လယါ ပှၤဘၣ်မူဘၣ်ဒါသ့ၣ်တဖၣ် ဆဲးမၤဝဲတၢ်ဖံးတၢ်မၤသ့ၣ်တဖၣ်န့ၣ်လီၤ.
ဖဲပဒိၣ်တၢ်ပာ်ဖျါစရီလၢအခံကတၢၢ်အပူၤ ပှၤအီစထြ့လယါဖိလၢအလီၤမၢ်ဖဲတၢ်ကဲထီၣ်သးအပူၤအံၤ အစှၤကတၢၢ်အိၣ်ဝဲ ၃၉ဂၤန့ၣ်လီၤ.
ဒ်သိးကမၤလီၤတံၢ် အဝဲသ့ၣ်တၢ်အိၣ်သးဒီး ဆဲးကျိးဒီးအဟံၣ်ဖိဃီဖိအဂီၢ် ထံဂုၤကီၢ်ဂၤဂ့ၢ်ဝီဒီးတၢ်ကူၣ်လဲၤမၤကၤဝဲၤကျိၤန့ၣ် မၤသကိးဝဲတၢ်မၤဒီး နံးပီလ် ပှၤဘၣ်မူဘၣ်ဒါသ့ၣ်တဖၣ်, ပှၤဟးဆှၢထီၣ်ဆှၢလီၤပှၤတမှံၤသ့ၣ်တဖၣ်ဒီး ပှၤဂုၤပှၤဂၤသ့ၣ်တဖၣ်န့ၣ်လီၤ.
ဘၣ်ဃးနံးပီလ်ကီၢ်ထံလုၢ်ဘၢတၢ်ဒီးဟီၣ်ခိၣ်လာ် တၢ်တတၢၤတနါအဂ့ၢ်န့ၣ် ပှၤအီစထြ့လယါဖိလၢအလိၣ်ဘၣ် ဂ့ၢ်ဂီၢ်အူမီၢ်သီဝဲၤဒၢးတၢ်ဆီၣ်ထွဲမၤစၢၤသ့ၣ်တဖၣ် ဆဲးကျိးဒီး အီစထြ့လယါကီၢ် ထံဂုၤကီၢ်ဂၤဒီး တၢ်ကူၣ်လဲၤမၤကၤဝဲၤကျိၤ (DFAT) သ့ဝဲဒၣ် ၂၄နၣ်ရံၣ်, ဖဲမီၢ်သီဝဲးဒၢးဂ့ၢ်ဂီၢ်အူဝဲၤကျိၤ— Consular Emergency Centre, လီတဲစိနီၣ်ဂံၢ် ၁၃ဝဝ ၅၅၅ ၁၃၅, မ့တမ့ၢ် လၢထံချၢကီၢ်ချၢအဂီၢ်န့ၣ် ကိးဘၣ် +၆၁ ၂ ၆၂၆၁ ၃၃ဝ၅ တက့ၢ်.
ပှၤအီစထြ့လယါဖိလၢအအိၣ်ဖဲတၢ်ကဲထီၣ်သးအလီၢ်သ့ၣ်တဖၣ်န့ၣ် အီစထြ့လယါပဒိၣ်ဟ့ၣ်သဆၣ်ထီၣ်စ့ၢ်ကီးအဝဲသ့ၣ်လၢ အကမၤထွဲလီၢ်ကဝီၤပှၤဘၣ်မူဘၣ်ဒါဒီး ပှၤအိၣ်ခိးကွၢ်ထွဲတၢ်တၢ်လဲၤတၢ်က့ၤသ့ၣ်တဖၣ် အတၢ်ဟ့ၣ်ကူၣ်ဟ့ၣ်ဖးန့ၣ်လီၤ.
For the latest from SBS News, download our app and subscribe to our newsletter.
