တၢ်ကလုၢ်တဖၣ်: https://www.sbs.com.au/language/karen/kar/collection/podcast/0ms9u5vjn
Anthony Albanese တဲလၢအဝဲမၤနၢၤ ၂ဝ၂၅ ကီၢ်စၢဖှိၣ်တၢ်ဃုထၢ ဒီး လ့ၢ်ဘၢၢ် ကကဲဘၣ်ဒီးပဒိၣ်ခံဘျီတဘျီ လၢအန့ၢ်ဘၣ်ဝဲပှၤနီၣ်ဂံၢ်အါကတၢၢ်န့ၣ်လီၤ.
Albanese တဲဘၣ်ဝဲ ပှၤဆီၣ်ထွဲမၤစၢၤအီၤဖဲဆ့ၣ်ဒနံၤသ့ၣ်တဖၣ်လၢ ဘၣ်ဟံးထီၣ်ဖီၣ်ထီၣ်မူဒါဒ်သိးကိတိာ်ခိၣ်ကျၢၢ်တဂၤအသိးန့ၣ် မ့ၢ်ဝဲတၢ်န့ၢ်လၤန့ၢ်ကပီၤအဒိၣ်ကတၢၢ်ဖဲအဝဲတၢ်အိၣ်မူအပူၤန့ၣ်လီၤ.
အဝဲစံးဝဲဒၣ်, “ပှဲၤဒီးတၢ်ဆီၣ်လီၤသးအါဒီး တၢ်သ့ၣ်ညါနၢ်ပၢၢ်တၢ်ဟံးမူဒါအသိး တၢ်အဆိကတၢၢ်တခါလၢယမၤအီၤဖဲတနၤအံၤန့ၣ်မ့ၢ် ယတဲဝဲ 'တၢ်ဘျုး' ဆူ အီစထြ့လယါအပှၤကမျၢၢ်သ့ၣ်တဖၣ် လၢအဟ့ၣ်ယၤတၢ်ခွဲးတၢ်ယလၢကဆဲး ဟံးထီၣ်ဖီၣ်ထီၣ်မူဒါ မၤတၢ်မၤလၢ ဟီၣ်ခိၣ်ချၢ ထံဖိကီၢ်ဖိအဂ့ၤအကတၢၢ်သ့ၣ်တဖၣ်အံၤအဂီၢ်န့ၣ်လီၤ.
“တနံၤအံၤ, အီစထြ့လယါကမျၢၢ်သ့ၣ်တဖၣ် ဟ့ၣ်ဝဲတၢ်ဖးလၢ ပှၤအီစထြ့လယါဖိသ့ၣ်တဖၣ်အလုၢ်အပှ့ၤအဂီၢ်: လၢတၢ်တီတၢ်လိၤအဂီၢ်, လၢအပှဲၤဒီးတၢ်သးကွံဒီး တၢ်ခွဲးတၢ်ယာ်လၢပှၤခဲလၢာ်အဂီၢ်န့ၣ်လီၤ.
“ပှၤအီစထြ့လယါဖိသ့ၣ်တဖၣ် ဟ့ၣ်ဝဲတၢ်ဖးလၢခါဆူညါအဂီၢ် လၢအအိၣ်ဒီးအလုၢ်အပှ့ၤသ့ၣ်တဖၣ်အံၤ, ခါဆူညါလၢတၢ်သူၣ်ထီၣ် တၢ်ကိးမံၤဒဲးလၢအဟဲစိာ်ဃုာ်ပှၤတပူၤဃီန့ၣ်လီၤ.”
ဖဲကီၢ်စဲၣ်အါဘ့ၣ်အပူၤပဒိၣ်တၢ်ဆီတလဲအိၣ်ဝံၤအလီၢ်ခံ Labor ကပၢဆှၢတၢ်ဒ်အဝဲသ့ၣ်အနီၣ်ကစၢ်ခွဲးယာ်အိၣ်သိး ဒီးကမၤလဲၢ်ထီၣ်ဝဲဘျီၣ်ဒိၣ် ကရၢဖိသ့ၣ်တဖၣ်န့ၣ်လီၤ.
လ့ၢ်ဘၢၢ်ဒိးန့ၢ်ဘၣ်တၢ်မၤနၢၤအကျါန့ၣ် ပၣ်ဃုာ်ဒီး ပှၤထီဒါတၢ်အခိၣ် Peter Dutton အလီၢ်ဆ့ၣ်နိၤဖဲ Dickson တၢ်လီၢ်, ခွံစလဲအပူၤန့ၣ်လီၤ.
Dutton ရှူဝဲဒၣ် Labor ခၢၣ်စးလၢအဒိးဃုထၢသး Ali France, အဃိ မ့ၢ်တၢ်အဆိကတၢၢ်တဘျီလၢ ပှၤထီဒါတၢ်အခိၣ်ရှူကွံာ်အဝဲသ့ၣ်လီၢ်ဆ့ၣ်နီၤ ဖဲကီၢ်စၢဖှိၣ်တၢ်ဃုထၢအပူၤန့ၣ်လီၤ.
ကရၢစၢဖှိၣ်အတၢ်ရှူကွံာ် တၢ်ဃုထၢအံၤ Mr Dutton တူၢ်လိာ်ဝဲအီၤဒီးဟံးဝဲမူဒါလၢပှဲၤန့ၣ်လီၤ.
အဝဲစံးဝဲဒၣ်, “ဖဲတၢ်လီၤတၢ်ကရၢကရိတဘျီအံၤ ပမၤအီၤတလၢပှဲၤထီၣ်ဘးဂ့ၤဘၣ်, တၢ်အံၤအိၣ်ဖျါဝဲဒၣ်ရှဲရှဲဖိဖဲတနၤအံၤန့ၣ်လီၤ.”
“ထီဘိန့ၣ်ယအဲၣ်ဒိးတၢ်အဂ့ၤကတၢၢ်လၢပထံပကီၢ်အဂီၢ် ဒီး တၢ်အဂ့ၤကတၢၢ်လၢ ပှၤအီစထြ့လယါကိးဂၤဒဲးအဂီၢ်န့ၣ်လီၤ.”
“တၢ်အံၤမ့ၢ်ဝဲတၢ်စံၣ်စိၤတဲစိၤအဆၢကတီၢ်တခါလၢ Labor Party အဂီၢ်ဒီးပပာ်ပနီၣ်အီၤန့ၣ်လီၤ.”
Mr Albanese ဘိးဘၣ်သ့ၣ်ညါလီၤ သနူသ့ၣ်တဖၣ်အကျါန့ၣ် ပၣ်ဃုာ်ဒီး တၢ်ပျဲ ပှၤပှ့ၤဟံၣ်ဆိကတၢၢ်တဖျၢၣ်သ့ၣ်တဖၣ် ကနုာ်လီၤဆူ တၢ်ဆါတၢ်ပှ့ၤဟံၣ်ဃီအပူၤ လၢအမ့ၢ် စ့ပာ်ဖှိၣ်ဖဲစ့တၢးပူၤမ့ၢ်အိၣ်ထဲ ၅မျးကယၤန့ၣ်ကန့ၢ်ပှ့ၤဘၣ်ဟံၣ်, ဒီး အၢၣ်လီၤစ့ၢ်ကီးဝဲလၢ အကဘျၢနုာ်လီၤဒီလၣ် ဘံလယၢၢ် ၁ဝ လၢကသူၣ်ထီၣ်ဟံၣ်သီအဖျၢၣ် ၁ဝဝ,ဝဝဝ လၢပှၤပှ့ၤဟံၣ်အဆိကတၢၢ်တဖျၢၣ်သ့ၣ်တဖၣ်အဂီၢ်န့ၣ်လီၤ.
အဝဲအၢၣ်လီၤစ့ၢ်ကီးဝဲဒၣ် ဒီလၣ် ၈.၅ ဘံလယၢၢ် လၢအမ့ၢ်တၢ်ဟ့ၣ်အါထီၣ် စ့ဒီလၣ် ၁၈ကကွဲၢ်လၢ တၢ်လဲၤထံၣ်လိာ်သးဒီး ကသံၣ်သရၣ်ထီရီၤ တနံၣ်စုာ်စုာ်အဂီၢ် ဒ်အမ့ၢ်တၢ်မၤဆူၣ်ထီၣ် Medicare အဂံၢ်အဘါန့ၣ်လီၤ.
Labor အၢၣ်လီၤစ့ၢ်ကီးလၢ ကဘျၢနုာ်လီၤဝဲဒီလၣ် ၂.၃ ဘံလယၢၢ် လၢဟံၣ်ဒူၣ်သ့ၣ်တဖၣ် အတၢ်ထီထီၣ်မုၢ်ဂံၢ်သဟီၣ်လီအ့ၣ်, ဒီးတကတီၢ်ဃီန့ၣ် အၢၣ်လီၤဝဲလၢ အကမၤလီၤပှီၢ်ကွံာ် စူၣ်ဖၢၣ်မၤကဲၣ် အတၢ်မၤထီၣ်တၢ်အပှ့ၤ လၢအတဘၣ်အခၢးဘၣ်သ့ၣ်တဖၣ်န့ၣ်လီၤ.
