တၢ်ပာ်ဖျါထီၣ်လၢပယီၤသုးပျၢ်ထီၣ်ကွံာ်အီစထြ့လယါပှၤသ့မုၢ်ကျိၤဝဲၤကွာ်ပီညါ Sean Turnell

အီစထြ့လယါပှၤသ့မုၢ်ကျိၤဝဲၤကွာ်ပီညါ Sean Turnell လၢပယီၤသုးဖီၣ်ဒုးဃာ်အီၤအံၤ တၢ်ပာ်ဖျါထီၣ်လၢ ပယီၤသုးပျၢ်ထီၣ်ကွံာ်အီၤလံန့ၣ်လီၤ. တၢ်အံၤမ့ၢ်ပယီၤသုးအတၢ်ရဲၣ်တၢ်ကျဲၤလၢ ကပျၢ်ထီၣ်ဖျဲးကွံာ်ပှၤဃိးဖိအဂၤ ၆ဝဝဝ အတၢ်ရဲၣ်တၢ်ကျဲၤတခါဒီး Sean Turnell ပၣ်ဃုာ်ဖဲပှၤသ့ၣ်တဖၣ်အံၤအကျါန့ၣ်လီၤ.

Australian economist Sean Turnell was arrested in Myanmar in 2021. Source: AAP, EPA / Milken Institute

တၢ်ပာ်ဖျါထီၣ်လၢ ပယီၤသုးပှၢ်ထီၣ်ကွံာ် အီစထြ့လယါ ပှၤသ့မုၢ်ကျိၤဝဲၤကွာ်ပီညါ Sean Turnell ဒီး ပှၤကီၢ်ချၢဖိအဂၤသၢဂၤန့ၣ်လီၤ. တၢ်ပျၢ်ထီၣ်အဝဲသ့ၣ်န့ၣ် မ့ၢ်ဝဲဒၣ်ဖဲတၢ်ပျၢ်ကွံာ်ပှၤဃိးဖိအဂၤ ၆ဝဝဝ တၢ်ကမၣ် တချုးဖဲကီၢ်ပယီၤဒီကလုာ်မုၢ်နံၤဒ်ဘၣ်န့ၣ်လီၤ.

ဖဲမုၢ်လ့ၢ်ဧိၤ တနံၤအံၤန့ၣ် ပယီၤသုးအပှၤကတိၤတၢ်ပၢ သုးခိၣ် Zaw Min Tun တဲဘၣ် တၢ်ကစီၣ်သန့ လၢအမ့ၢ် Voice of Myanmar ဒီး Yangon Media Group သ့ၣ်တဖၣ်လၢ Mr Turnell ဃုာ်ဒီးယပၣ်ပှၤဒိတၢ်ဂီၤ Toru Kubota ဒီး British အမီၢ်သီလီၢ်လံၤ Vicky Bowman, ဃုာ်ဒီး ပှၤအမဲရကၤတဂၤလၢတၢ်တပာ်ဖျါအမံၤဘၣ်သ့ၣ်တဖၣ် တၢ်ပျၢ်ထီၣ်ကွံာ်အဝဲသ့ၣ်ဒီး ဆှၢဖျိးထီၣ်ကွံာ်အဝဲသ့ၣ်လၢကီၢ်ချၢလံန့ၣ်လီၤ.

လၢခံန့ၣ် ပယီၤသုးဆီၣ်ထွဲတၢ်ကစီၣ်သန့ကွဲၤထံဟူ MRTV ပာ်ဂၢၢ်ပာ်ကျၢၤဝဲ တၢ်ကစီၣ်ဟူထီၣ်သါလီၤသ့ၣ်တဖၣ်အံၤ ဘၣ်ဆၣ်သနာ်က့ တၢ်ပျၢ်ထီၣ်ကွံာ်အဝဲသ့ၣ်တဖၣ်အံၤလံန့ၣ် တုၤခဲကနံၣ်အံၤ တၢ်ပာ်ဖျါလီၤဆီ လၢအပာ်ဂၢၢ်ပာ်ကျၢၤအီၤတအိၣ်ဒံးဘၣ်န့ၣ်လီၤ.

Australian citizen Sean Turnell with Myanmar's Aung San Suu Kyi. Source: Facebook

Mr Turnell လၢအသးနံၣ်အိၣ် ၅၈ နံၣ်အံၤ မ့ၢ်ဝဲသရၣ်ဒိၣ်စိ ဘၣ်ဃးမုၢ်ကျိၤဝဲၤကွာ်ပီညါဖဲ Macquarie University, ဖၠၣ်စိမိၤလၢအအိၣ်ဖဲဆ့ၣ်ဒနံၤဝ့ၢ်တဖျၢၣ်န့ၣ်လီၤ. အပူၤကွံာ်န့ၣ် အဝဲမၤတၢ်မၤဖဲကီၢ်ပယီၤအပူၤ ဒ်သိးပှၤဟ့ၣ်ကူၣ်ဟ့ၣ်ဖး ဒီၣ်အီၣ်စါစူၣ်ကၠံၤ လၢပယီၤသုးဖီၣ်ဒုးဃာ်အီၤခဲကနံၣ်အံၤန့ၣ်လီၤ. စးထီၣ်ဖဲ ၂ဝ၂၁နံၣ် ပယီၤသုးဟံးန့ၢ်ဆူၣ်ကွံာ်ထံကီၢ်တၢ်စိတၢ်ကမီၤန့ၣ် ပယီၤသုးဖီၣ်ဒုးပှၤသ့ၣ်တဖၣ်အကျါ ပၣ်ဃုာ်ဒီး Sean Turnell န့ၣ်လီၤ.

ဖဲလါစဲၤပထ့ဘၢၣ်န့ၣ် ပယီၤသုးကွီၣ်ဘျီၣ် ဆၢတဲာ်လၢ အဝဲဘၣ်လီၤဃိးပူၤ ၃နံၣ် မ့ၢ်လၢအမၤကမၣ်ထံကီၢ်တၢ်ခူသူၣ်သဲစးတၢ်ဘျၢဒီး ပှာ်နုာ်ကီၢ်သဲစးတၢ်ဘျၢ သ့ၣ်တဖၣ်အဃိန့ၣ်လီၤ.

ကပာ်ဖျါအါထီၣ်တၢ်ဂ့ၢ်တၢ်ကျိၤခါဆူညါ——