ဖဲမုၢ်ဆၣ်အနံၤန့ၣ် တရူးမုၢ်ထီၣ်ကဘီယူၤကျိၤ အနီၣ်ဂံၢ် ၇၃၇—၈ဝဝ လၢအတီၣ်ပှၤလဲၤတၢ်ဖိ ၁၃၂ဂၤ လီၤတဲာ်ဝဲဒၣ်ဖဲတရူးကီၢ်ကလံၤစိၤကစၢၢ်ကျါန့ၣ်လီၤ။
တၢ်ကစီၣ်သ့ၣ်တဖၣ်ပာ်ဖျါလၢ ကဘီယူၤလီၤတဲၤဝံၤအလီၢ်ခံ ဖျါလၢပှၤတအိၣ်မူနီတဂၤလၢၤဘၣ်န့ၣ်လီၤ။
ကဘီယူၤခီပနံၣ်အံၤ ပာ်ဖျါထီၣ် အဝဲသ့ၣ်တၢ်သးအုးဒိၣ်ဒိၣ်ကလဲာ် လၢပှၤလဲၤတၢ်ဖိဒီး အဝဲသ့ၣ်ကဘီယူၤ ပှၤမၤတၢ်ဖိလၢအပၣ်ဃုာ်ပှၤနီကဘီယူၤသ့ၣ်တဖၣ် သံခီဖျိကဘီယူၤအံၤလီၤတဲာ်အဃိန့ၣ်လီၤ။
ဖဲတၢ်ဂီၤမူလၢတရူးတၢ်ကစီၣ်သန့ပာ်ဖျါအီၤအပူၤန့ၣ် ဒုးနဲၣ်ဖျါဝဲဒၣ်လၢ ကဘီယူၤအံၤ အခိၣ်ယူၤလီၤဆှိဆူဟီၣ်ခိၣ်လိၤ သ့ၣ်ထူၣ်သ့ၣ်တဖၣ်အလီၢ်ခံ ကအိၣ်ဝဲဒၣ် ၃၅ ဒံကရံၣ်ဃၣ်ဃၣ်န့ၣ်လီၤ။
ဘၣ်ဆၣ်သနာ်က့ တၢ်ဂီၤမူအံၤ အတၢ်လီၤတံၢ်လီၤဆဲးအိၣ်ထဲလဲၣ်န့ၣ် ရွဲၣ်ထၢၣ်တၢ်ကစီၣ်သန့ပာ်ဂၢၢ်ပာ်ကျၢၤအီၤတန့ၢ်ဘၣ်။
တၢ်ကစီၣ်သန့လၢ အမၤန့ၢ်ဘၣ်တၢ်ကစီၣ်လၢ ပှၤမၤပူၤဖျဲးတၢ်ဖိအပှၤဘၣ်မူဘၣ်ဒါအအိၣ် စံးဝဲဒၣ် ကဘီယူၤအံၤလီၤတဲာ်အဃိ မ့ၣ်အူကဲၤကပျီၣ်အူအီၣ်ထီၣ်ဝဲဒၣ်ဝၣ်ထူၣ်ဖဲအလီၤတဲာ်အလီၢ်သ့ၣ်တဖၣ်န့ၣ်လီၤ။
ပှၤမၤသံမ့ၣ်အူဝဲၤကျိၤအပှၤဘၣ်မူဘၣ်ဒါစံးဝဲဒၣ်လၢ ဖဲကဘီယူၤအက့အခီသ့ၣ်တဖၣ်အကျါန့ၣ် တၢ်ပနီၣ်တအိၣ်ဖျါလၢ ပှၤအိၣ်မူလီၤတဲာ်တ့ၢ်ကအိၣ်နီတဂၤဘၣ်န့ၣ်လီၤ။
လၢန့ၣ်အမဲာ်ညါ အဝဲသ့ၣ်တထံၣ်ဘၣ်စ့ၢ်ကီး ပှၤလဲၤတၢ်ဖိသ့ၣ်တဖၣ် အတၢ်ပီးတၢ်လီ အိၣ်လီၤတဲာ်တ့ၢ်နီတမံၤဘၣ်န့ၣ်လီၤ။
တရူးကီၢ် ပှၤပၢဆှၢရဲၣ်ကျဲၤ ကဘီယူၤ စံးဝဲဒၣ် ကဘီယူၤလၢအတီၣ်ပှၤလဲၤတၢ်ဖိ ၁၂၃ဂၤဒီး ကဘီယူၤပှၤဘၣ်မူဘၣ်ဒါ ၉ဂၤအံၤ အတၢ်ဆဲးကျိးလီၤမၢ်ကွံာ်ဝဲဒၣ်ဖဲ ယူခၠီဝ့ၢ်အဖီခိၣ်န့ၣ်လီၤ။
ကဘီယူၤလၢအလီၤတဲာ်အံၤ အသးနံၣ်အိၣ်ဒံးဒၣ်ထဲ ၆နံၣ်န့ၣ်လီၤ။
Share
