IN BRIEF
- ထံချၢကီၢ်ချၢ တၢ်သုးလီၢ်သုးအိၣ်ဆိးသ့ၣ်တဖၣ် ကစှၤလီၤတုၤလၢ ပှၤကညီ ၂၂၅,ဝဝဝ ဂၤအဂီၢ် ပဒိၣ်မၤဃံးထီၣ်ဝဲ တၢ်ဖီၣ်ဃံးသ့ၣ်တဖၣ်န့ၣ်လီၤ.
- တကတီၢ်ဃီန့ၣ်, ထံရူၢ်ကီၢ်သဲးကရၢ Nationals ဒီး Liberals ပှၤလီၢ်ဒိၣ်သ့ၣ်တဖၣ် ထုးယံၤကွံာ်အသးဒီး ဘျီၣ်ဒိၣ်ခၢၣ်စးလၢအဆ့ၣ်နီၤဖဲတၢ်မဲာ်ညါ ဒီး မ့ၢ်ပှၤလၢအဆှၢနုာ်လီၤ တၢ်ကဒီၣ်တဲာ်ကွံာ် ပှၤသုးလီၢ်အိၣ်ဆိးနီၣ်ဂံၢ်န့ၣ်လီၤ.
One Nation ပာ်ဂၢၢ်ပာ်ကျၢၤဝဲအတၢ်ရဲၣ်တၢ်ကျဲၤ လၢအဘၣ်ဃး တၢ်ပာ်လီၤနီၣ်ထိၣ်ဒီးပှၤသုးလီၢ်အိၣ်ဆိးဆူအီစထြ့လယါကီၢ်, လၢအကထုးစှၤလီၤဝဲ ပှၤကညီနီၣ်ဂံၢ် ၁၃ဝ,ဝဝဝ န့ၣ်, ကဒိးသန့ၤထီၣ်အသးလၢ တၢ်တယာ်ဆိပာ်စၢၤ ထံချၢကီၢ်ချၢ တၢ်သုးလီၢ်အိၣ်ဆိးအဖီခိၣ်န့ၣ်လီၤ.
အီစထြ့လယါကီၢ် တၢ်သုးလီၢ်အိၣ်ဆိး အပတီၢ်န့ၣ် ကဲထီၣ်ဝဲ ထံရူၢ်ကီၢ်သဲး အတၢ်ဂ့ၢ်လိာ်ဘှီလိာ်ဖးဒိၣ်တခါ, မ့ၢ်လၢ ထံကီၢ်အံၤ ဘၣ်ကွၢ်ဆၢၣ်မဲာ်ဒီး ဟံၣ်ဃီတလၢတလီၣ် ဒီး ဝဲၤကျိၤတၢ်မၤစၢၤ အတၢ်ဆီၣ်သနံးသ့ၣ်တဖၣ်, လီၤဆီဒၣ်တၢ်ဖဲ ဟီၣ်ကဝီၤလၢ အယံၤဒီးခူပူၤဝ့ၢ်ပူၤသ့ၣ်တဖၣ်န့ၣ်လီၤ.
ဘၣ်ဃးဒီးဟံၣ်ဃီတလၢတလီၣ်ဘၣ်အဂ့ၢ်န့ၣ်, ထံရူၢ်ကီၢ်သဲးပၣ်တံၣ်သ့ၣ်တဖၣ် အိၣ်ဒီးတၢ်ပာ်သးလၢ အပာ်ဒ့ၣ်ပာ်ကမၣ် ပှၤသုးလီၢ်အိၣ်ဆိးန့ၣ်, ပှၤသ့ပှၤဘၣ်စဲၤနီၣ်လၢ ပှၤသုးလီၢ်အိၣ်ဆိးဂ့ၢ်ဝီသ့ၣ်တဖၣ်ဟ့ၣ်ပလီၢ်ဝဲဒ်အမ့ၢ်တၢ်လီၤဘၣ်ယိၣ်ဘၣ်ဘှီသ့ၣ်တဖၣ်, လၢအစံးဝဲဒၣ် တၢ်သူၣ်ထီၣ်ဆီလီၤ ဟံၣ်ဃီအတၢ်ဖံးတၢ်မၤသ့ၣ်တဖၣ်အဂီၢ်န့ၣ် လိၣ်ဘၣ်ဝဲပှၤသုးလီၢ်အိၣ်ဆိး အပှၤမၤတၢ်ဖိသ့ၣ်တဖၣ် သပှၢ်ပှၢ်န့ၣ်လီၤ.
တၢ်လၢ ထံချၢကီၢ်ချၢ တၢ်သုးလီၢ်အိၣ်ဆိး အတၢ်တိၤကျဲၤန့ၣ် ဘၣ်တၢ်ဒွးဆိပာ်အီၤလၢ ထံကီၢ်အပူၤ ပှၤကညီနုာ်လီၤဟးထီၣ်အိၣ်ပှဲၤဂၤလဲၣ်အဖီခိၣ်; လၢအပၣ်ဃုာ် ပှၤအီစထြ့လယါဖိလၢအဟဲက့ၤနုာ်လီၤကဒါဆူထံကီၢ်ပူၤသ့ၣ်တဖၣ်န့ၣ်လီၤ.
တၢ်ထိၣ်ဒွးအံၤအပူၤန့ၣ် ပၣ်ဃုာ်ဝဲဒီး ပှၤတမှံၤဒီး ပှၤဟးကသုၣ်ကသီသ့ၣ်တဖၣ်, ဟံၣ်ဖိဃီဖိဒီး နီၣ်ဒီမါဝၤ လံာ်ခီကီၢ်သ့ၣ်တဖၣ်, ပှၤဟးကသုၣ်ကသီဖံးတၢ်မၤတၢ်သ့ၣ်တဖၣ်, ပှၤသုးလီၢ်အိၣ်ဆိးလၢအအိၣ်ဒီးတၢ်သ့တၢ်ဘၣ်, တကးဒ်ဘၣ်အမဲာ်ညါန့ၣ် ပၣ်ဃုာ်ဝဲဒီး ပှၤဘၣ်ကီဘၣ်ခဲဒီး ပှၤဂ့ၢ်ဝီတၢ်မၤစၢၤ အတၢ်ရဲၣ်တၢ်ကျဲၤ သ့ၣ်တဖၣ်န့ၣ်လီၤ.
ဖဲလ့ၢ်ဘၢၣ် အဖီလာ်န့ၣ်, ထံချၢကီၢ်ချၢတၢ်သုးလီၢ်အိၣ်ဆိးန့ၣ် ထီၣ်ဘးတုၤလၢအပတီၢ်အထီကတၢၢ်, လၢအမ့ၢ် COVID-19 တၢ်ဆါသံသတြိာ်ကဲထီၣ်ဝံၤဖဲ၂ဝ၂၃နံၣ်န့ၣ်, အနီၣ်ဂံၢ်အိၣ်ဝဲဒၣ် ၅၅၆,ဝဝဝ န့ၣ်လီၤ.
ဘၣ်ဆၣ်သနာ်က့ လ့ၢ်ဘၢၣ်မၤဃံးဒိၣ်ထီၣ်ဝဲ တၢ်ပာ်လီၤတၢ်ဖီၣ်ဃံးသ့ၣ်တဖၣ်, လၢအပာ်ဖျါထီၣ်ဝဲဒၣ် မ့ၢ်တုၤလီၤဖဲ ၂ဝ၂၇—၂ဝ၂၈နံၣ် ကပျိၣ်စ့နံၣ်န့ၣ် အနီၣ်ဂံၢ် ကဘၣ်စှၤလီၤတုၤလၢ ၂၂၅,ဝဝဝ ဂၤန့ၣ်လီၤ.
ပှၤသုးလီၢ်အိၣ်ဆိးအနီၢ်ဂံၢ်နီၣ်ဒွးသ့ၣ်တဖၣ် ကပှဲၤသိးလိာ်အသးဒ်သိးတၢ်ဒွးဆိပာ်အီၤအဂီၢ် ပဒိၣ်ကတဲာ်ကတီၤထီၣ်အသးလၢ ကပာ်ဖျါထီၣ်ဝဲ တၢ်ရဲၣ်တၢ်ကျဲၤ ဒီးပှၤသုးလီၢ်အိၣ်ဆိး အတၢ်ဆီတလီၤပာ်လီၤသ့ၣ်တဖၣ်န့ၣ်လီၤ.
တၢ်ရဲၣ်တၢ်ကျဲၤ အိၣ်ပာ်စၢၤလၢ အပူၤကွံာ်တနွံန့ၣ် ထံလီၢ်ကီၢ်ပူၤဂ့ၢ်ဝီကိတိာ် Tony Burke ကဘၣ်ပာ်ဖျါထီၣ်ဝဲတၢ်ရဲၣ်တၢ်ကျဲၤအံၤဖဲ ဒီကလုာ်တၢ်ဘိးဘၣ်သ့ၣ်ညါလီၤတၢ်ကစီၣ်ကရၢ—National Press Club အပူၤ — နာ်သက့ ဘၣ်တၢ်ပာ်ပတုာ်ဃာ်ဝဲအီၤ ခီဖျိလၢ ပဒိၣ်ပှၤကူၣ်လိာ်တၢ်ကရၢ ဘၣ်ယိၣ်ဝဲဒၣ် တၢ်ထုးစှၤလီၤအံၤ အဃိ အကဘၣ်ကွၢ်ဆၢၣ်မဲာ်ဒီး ထံရူၢ်ကီၢ်သဲးတၢ်ဂ့ၢ်ပိာ်ထွဲသ့ၣ်တဖၣ်အဃိန့ၣ်လီၤ.
ဒ်သိးလၢအဝဲသ့ၣ်တၢ်ပာ်ဖျါဖဲအလီပှာ်ယဲၤသန့အပူၤန့ၣ်, One Nation သနူန့ၣ်မ့ၢ်ဝဲ "ဒ်သိးကထုးစှၤလီၤကွံာ်တၢ်ဆီၣ်သနံးလၢဟံၣ်ဃီ, တၢ်အဘူးအလဲသ့ၣ်တဖၣ်ဒီး ဂံၢ်ခီၣ်ထံးတၢ်သူၣ်ထီၣ်ဆီလီၤသ့ၣ်တဖၣ်အဂီၢ် တနံၣ်န့ၣ် တၢ်ဟ့ၣ်လီၤ လံာ်ခီကီၢ် တၢ်ဖီၣ်ဃံးအနီၣ်ထိၣ်န့ၣ် ကအိၣ်ဝဲဖဲ ၁၃ဝ,ဝဝဝ န့ၣ်လီၤ."
One Nation အပှၤကတိၤတၢ်ပၢ ပာ်ဂၢၢ်ပာ်ကျၢၤတဲလီၤတံၢ်ဘၣ်ဝဲဒၣ် SBS World News လၢအမ့ၢ် ဘၣ်ဃးဒီး ထံချၢကီၢ်ချၢ တၢ်နုာ်လီၤဟးထီၣ် တၢ်လီၢ်လီၤဟိအိၣ်တ့ၢ်အဖီခိၣ် တၢ်ဟ့ၣ်လီၤ လံာ်ခီကီၢ် အနီၣ်ထိၣ်န့ၣ် ကအိၣ်ဝဲဒၣ်ဖဲ ၁၃ဝ,ဝဝဝ န့ၣ်လီၤ.
တၢ်အဝဲန့ၣ် မ့ၢ်ဝဲတၢ်ထုးစှၤလီၤကွံာ်အီၤဒိၣ်ဒိၣ်မုၢ်မုၢ်ဒီး နီၣ်ဂံၢ်နီၣ်ဒွးလၢအအိၣ်ပာ်စၢၤခဲကနံၣ်အံၤ, အဃိပဒိၣ်န့ၣ်ဂ့ၢ်လိာ်ဘှီလိာ်ဝဲလၢ တၢ်မၤဒ်န့ၣ်,န့ၣ် ကဘၣ်ဒိဘၣ်ထံးဝဲ လံာ်ခီကီၢ်စရီအါမးဒီး ကမၤတံာ်တာ်ဝဲ ထံကီၢ်ဒီဘ့ၣ် တၢ်တ့ထုးထီၣ်တၢ်ဖံးတၢ်မၤသ့ၣ်တဖၣ်န့ၣ်လီၤ.
ဘၣ်ဆၣ်သနာ်က့ One Nation ကရၢခိၣ် Pauline Hanson ဂ့ၢ်လိာ်ဘှီလိာ်ဝဲလၢ, ဒ်သိးမုၢ်ကျိၤဝဲၤကွာ် ကလဲၤဝးတရံးသးအဂီၢ်န့ၣ် ပဒိၣ်အံၤ ဒိးသန့ၤအသးဒီး ပှၤသုးလီၢ်အိၣ်ဆိးသ့ၣ်တဖၣ်အါတလၢကွံာ်အခၢးန့ၣ်လီၤ.
Bragg ပာ်ဖျါထီၣ်တၢ်သူၣ်ဒိၣ်သးဖျိးဒီးကီၢ်ပူၤတၢ်ဂ့ၢ်လိာ်ဘှီလိာ်ဘၣ်ဃးတၢ်သုးလီၢ်အိၣ်ဆိးအဂ့ၢ်
တကတီၢ်ဃီန့ၣ်, ထံရူၢ်ကီၢ်သဲးကရၢ Nationals ဒီး Liberals ပှၤလီၢ်ဒိၣ်သ့ၣ်တဖၣ် ထုးယံၤကွံာ်အသးဒီး ဘျီၣ်ဒိၣ်ခၢၣ်စးလၢအဆ့ၣ်နီၤဖဲတၢ်မဲာ်ညါ ဒီး မ့ၢ်ပှၤလၢအဆှၢနုာ်လီၤ တၢ်ကဒီၣ်တဲာ်ကွံာ် ပှၤသုးလီၢ်အိၣ်ဆိးနီၣ်ဂံၢ်န့ၣ်လီၤ.
ဖဲအပူၤကွံာ်တနွံ မုၢ်ပျဲၤ—မုၢ်သၢနံၤန့ၣ် Andrew Bragg သူဝဲအတၢ်ကတိၤလီၤတၢ်ဖဲ National Press Club အပူၤန့ၣ် ဂ့ၢ်လိာ်ဘှီလိာ်ဝဲ ကရၢစၢဖှိၣ်အသနူန့ၣ် လၢကပာ်ဝဲဒၣ် ထံချၢကီၢ်ချၢ တၢ်သုးလီၢ်အိၣ်ဆိးအနီၣ်ဂံၢ်ဖဲ ၁၈ဝ,ဝဝဝ န့ၣ်လီၤ.
ဘၣ်ဆၣ်သနာ်က့ မ့မ့ၢ် Nationals ကရၢခိၣ် Matt Canavan န့ၣ်, တၢ်လၢအကမၤစှၤလီၤ ခိခိၣ်ဟီၣ်ကဝီၤ တၢ်ဖံးတၢ်မၤလီၢ် အဂံၢ်အဘါန့ၣ် အဝဲပာ်ဖျါပာ်စၢၤ အတၢ်ထီဒါသ့ၣ်တဖၣ်လံန့ၣ်လီၤ.
ဖဲအပူၤကွံာ်တနွံ မုၢ်လ့ၢ်ဧိၤ—မုၢ်လွံၢ်နံၤန့ၣ်, ပှၤထီဒါတၢ်ကရၢခိၣ် Angus Taylor စံးဝဲဒၣ် Bragg အတၢ်ကတိၤန့ၣ် မ့ၢ်ဝဲတၢ်ပာ်ဖျါထီၣ် အနီၣ်ကစၢ်ဒၣ်ဝဲအတၢ်ထံၣ်သ့ၣ်တဖၣ်, ဒီး တချုးလၢအကတိၤလီၤတၢ်ဂ့ၢ်အံၤဒ်ဘၣ်န့ၣ်, တဲဒုးသ့ၣ်ညါဆိပာ်စၢၤအီၤတအိၣ်ဘၣ်.
For the latest from SBS News, download our app and subscribe to our newsletter.
