အီစထြ့လယါကီၢ်ပူၤပှၤတဝၢတနီၤဒီး ပှၤအိၣ်ဆိးလၢကီၢ်ချၢတနီၤ အိၣ်ဝဲဒီးတၢ်သူၣ်ကိၢ်သးဂီၤ ဖဲလၢအဝဲသ့ၣ်ထံၣ်ဘၣ် One Nation ကရၢအခိၣ် Pauline Hanson ထုးထီၣ်ရီၤလီၤဝဲဒၣ် လံာ်တၢ်ကစီၣ်တဘ့ၣ် လၢအအိၣ်နီၤလီၤအသးတကုၤအီၣ်လဲအပျဲၣ်စီၣ်အဖီခိၣ်န့ၣ်လီၤ.
တၢ်ဘိးဘၣ်ရၤလီၤ လံာ်တၢ်ကစီၣ်အံၤ အမုၢ်နံၤမုၢ်သီန့ၣ်မ့ၢ်ဝဲလါဖ့ၤဘြူၤအါရံၤ ၁၁သီ, ဒီးဖဲလံာ်တၢ်ကစီၣ်အံၤအပူၤန့ၣ် ပာ်ဖျါဝဲတၢ်ဂ့ၢ်တၢ်ကျိၤလၢအမ့ၢ် ကရၢအံၤဆှၢနုာ်လီၤ ပှၤနုာ်ကီၢ်သနူတခါ ဘၣ်ဃးတၢ်ကက့ၤဆှၢဖျိးက့ၤ ပှၤသုးလီၢ်အိၣ်ဆိးလၢအဟဲနုာ်လီၤတဖိးသဲစးတၢ်ဘျၢဘၣ် ၇၅,ဝဝဝ ဆူအဝဲသ့ၣ်အထံအကီၢ်အလီၢ်အကျဲဒၣ်ဝဲန့ၣ်လီၤ.
ဖဲလံာ်တၢ်ကစီၣ်အံၤအပူၤန့ၣ် ကရၢအံၤအခိၣ် ဘျီၣ်ဒိၣ်ထးခီခၢၣ်စး Pauline Hanson စံးဝဲဒၣ် ပှၤကညီ ၇၅,ဝဝဝ ဂၤလၢအအိၣ်ဖဲအီစထြ့လယါကီၢ်ပူၤ တဖိးသဲစးတၢ်ဘျၢဘၣ်, လၢအပၣ်ဃုာ် ပှၤစိာ်လံာ်ခီကီၢ်လၢ အသးသမူလၢၤကွံာ်သ့ၣ်တဖၣ်, ပှၤမၤတၢ်ဖံးတၢ်မၤလၢတဖိးသဲစးတၢ်ဘျၢဘၣ်သ့ၣ်တဖၣ်, မ့တမ့ၢ် ပှၤမၤကမၣ်သဲစးတၢ်ဘျၢသ့ၣ်တဖၣ်, တၢ်ကက့ၤဆှၢဖျိးကွံာ်အဝဲသ့ၣ် လၢအတအိၣ်ဒီး တၢ်ပတံသကွံကညးဒီး Australian Review Tribunal — အီစထြ့လယါ တၢ်ကွၢ်ကဒါက့ၤ စံၣ်ညီၣ်ကွီၣ်ဘျီၣ်အအိၣ်ဘၣ်န့ၣ်လီၤ.
"One Nation, united, strong, and prosperous, celebrates its 11th year." Credit: One Nation Website
ဖဲ Ni-Vanuatu Facebook ကရူၢ်တခါပူၤ, ပှၤဖဲကရူၢ်အံၤအပူၤတဂၤ တီၣ်ဖျါထီၣ်ဝဲလံာ်တၢ်ကစီၣ်အံၤ ဒီး ဟ့ၣ်ပလီၢ်ဝဲ ပှၤဂုၤပှၤဂၤအဟံၣ်ဖိဃီဖိ လၢအအိၣ်ဒီးတၢ်လီၤဘၣ်ယိၣ်လၢတၢ်ကက့ၤဆှၢဖျိးကွံာ်အီၤသ့ၣ်တဖၣ်န့ၣ်လီၤ.
တၢ်လၢအဝဲသ့ၣ်ဟ့ၣ်သဆၣ်ထီၣ်အီၤသ့ၣ်တဖၣ်န့ၣ်မ့ၢ်ဝဲ,
“ဆှၢန့ၢ်တၢ်ကစီၣ်, တချုးလၢတၢ်စးထီၣ်ဟံးဂ့ၢ်ဝီတၢ်ဂ့ၢ်အံၤဘၣ်န့ၣ် မၢအဝဲသ့ၣ်ကဟဲက့ၤ”.
ပှၤဟ့ၣ်နီၤလီၤတၢ်ဂ့ၢ်အံၤအဂၤတဂၤစံးဝဲဒၣ်, “လၢပ Vanuatu ဟံၣ်ဖိဃီဖိသ့ၣ်တဖၣ်အဂီၢ်န့ၣ် ပသးတမုာ်ဘၣ်. ”
တၢ်ပာ်ဖျါအိၣ်ဝဲအါမး လၢအဘျးစဲဃုာ်ဝဲ သနူလံာ်တၢ်ဘိးဘၣ်သ့ၣ်ညါအံၤ ဒီး ကီၢ်ခိၣ် Trump အတၢ်မၤလီၤပှီၢ် ပှၤနုာ်ကီၢ် ဖဲကီၢ်အမဲရကၤအပူၤသ့ၣ်တဖၣ်အဂ့ၢ်န့ၣ်လီၤ.
ဖဲ SBS Bislama ထံၣ်ဘၣ်ဝဲ တၢ်ပာ်ဖျါန့ၣ်စံးဝဲဒၣ်, “Trump ဟ့ၣ်လီၤတၢ်ကလုၢ်ဆူကီၢ်အီစထြ့လယါ ... လၢကက့ၤဆှၢဖျိးကွံာ် ပှၤအိၣ်ဆိးဖဲအီစထြ့လယါကီၢ်ပူၤ လၢအတဖိးသဲစးတၢ်ဘျၢဘၣ်သ့ၣ်တဖၣ်စ့ၢ်ကီးန့ၣ်လီၤ.”
ပှၤသူကမျၢၢ်တၢ်ဆဲးကျိးတဝၢအံၤတနီၤနီၤန့ၣ် ပာ်ဖျါထီၣ်ဝဲ အဝဲသ့ၣ်တၢ်ထံၣ် လၢအဆီၣ်ထွဲဝဲသနူအံၤန့ၣ်လီၤ.
SBS Tetum ကျိာ် တၢ်ရဲၣ်တၢ်ကျဲၤ ကတိၤသကိးတၢ်ဒီး ပှၤသုးလီၢ်အိၣ်ဆိး တၢ်မၤဖိခံဂၤ Leo ဒီး Maria* လၢအဟဲန့ၢ်လၢ Timor-Leste န့ၣ်လီၤ. အဝဲသ့ၣ်ခံဂၤလၢၤ အံၤ ထံၣ်ဘၣ်ဝဲ လံာ်တၢ်ဘိးဘၣ်ရီၤလီၤတၢ်ကစီၣ်အံၤဖဲကမျၢၢ်တၢ်ဆဲးကျိးတဝၢ ပျဲၢ်စီၣ်အဖီခိၣ်န့ၣ်လီၤ.
အဝဲသ့ၣ်စံးဝဲဒၣ်, “ပသးကိၢ်တၢ်, ဘၣ်မနုၤလဲၣ်န့ၣ်, တၢ်ဟဲဆူအီစထြ့လယါကီၢ်န့ၣ်လၢပဂီၢ် မ့ၢ်တၢ်ခွဲးတၢ်ယာ်တခါ လၢပကလုၢ်အီၣ်ပဟံၣ်ဖိဃီဖိလၢအအိၣ်တ့ၢ်ဖဲဟံၣ်သ့ၣ်တဖၣ်န့ၣ်လီၤ. တုၤအခဲအံၤန့ၣ် ပလူၤပိာ်ထွဲတၢ်ဘျၢခဲလၢာ်ဒီး ပအိၣ်ဖဲတၢ်ပာ်လီၤသနူကျိၤကျဲအပူၤ နာ်သက့ မ့ၢ်လၢ ပနၣ်ဟူဘၣ်တၢ်ကစီၣ်ဒ်အံၤအဃိ ကဲထီၣ်တၢ်ကိၢ်တၢ်ဂီၤလၢပဂီၢ်န့ၣ်လီၤ.”
Carla Chung, လၢအမ့ၢ်ပှၤသုးလီၢ်အိၣ်ဆိးအပှၤမၤစၢၤတၢ်ဖိဖဲ ACRATH's (Australian Catholic Religious Against Trafficking in Humans), တဂၤစံးဝဲဒၣ် ဖဲလံာ်တၢ်ဘိးဘၣ်ရၤလီၤတၢ်ကစီၣ်အံၤ ဝးတရံးရၤလီၤအသးဖဲအီၣ်လဲပူၤအခါ အဝဲဒိးန့ၢ်ဘၣ်တၢ်ကစီၣ်ဖုၣ်ကိးတဘျုးခါန့ၣ်လီၤ.
အဝဲစံးဝဲဒၣ်, “ဖဲအဝဲသ့ၣ်ထံၣ်ဘၣ် Pauline Hanson လံာ်တၢ်ကစီၣ်အခါ ယထံၣ်ဘၣ်လၢ ပှၤမၤတၢ်ဖိသ့ၣ်တဖၣ်န့ၣ် အိၣ်ဒီးတၢ်သူၣ်ကိၢ်သးဂီၤ ဒီး တၢ်သးသဟီၣ်လီၤသထြုးန့ၣ်လီၤ.”
“ယတဲဘၣ်အဝဲသ့ၣ်လၢ တၢ်အံၤမ့ၢ်ဒၣ်ထဲ ထံရူၢ်ကီၢ်သဲးပၣ်တံၣ်ဆံးကိးဖိတဖု အတၢ်ထံၣ်တၢ်ပာ်သးတခါ ... ယတဲဘၣ်အဝဲသ့ၣ်လၢတဘၣ်သူၣ်ကိၢ်သးဂီၤတၢ်ဘၣ်, ဒီး ဆဲးမၤသုတၢ်မၤန့ၣ်.”
ခီဖျိလၢ သနူအံၤအဃိ Leo ဒီး Maria*, လၢအမ့ၢ်ပှၤလၢအပျံၤလၢ ကဘၣ်သဂၢၢ်ဒီးတၢ်က့ၤဆှၢဖျိးကွံာ်အဝဲသ့ၣ်အံၤ တဲဘၣ်ဝဲ SBS Tetum ကျိာ်တၢ်ရဲၣ်တၢ်ကျဲၤလၢ တုၤလၢ အဝဲသ့ၣ်ထံၣ် တၢ်ရှဲပၠး တၢ်ဂ့ၢ်တၢ်ကျိၤလၢအဘၣ်တခါ ဒီးတၢ်တီၣ်ဖျါထီၣ်အီၤဖဲ Facebook အပူၤမး အဝဲသ့ၣ် သ့ၣ်ညါလီၤတံၢ်က့ၤ တၢ်ဂ့ၢ်တၢ်ကျိၤန့ၣ်လီၤ.
အဝဲသ့ၣ်စံးဝဲဒၣ်, “social media — ကမျၢၢ်တၢ်ဆဲးကျိးတဝၢအတၢ်ဂ့ၤန့ၣ်မ့ၢ်ဝဲ တၢ်ဂ့ၢ်တၢ်ကျိၤအံၤ တမ့ၢ်အဟဲန့ၢ်လၢပဒိၣ်အအိၣ်ဖိးသဲစးတၢ်ဘျၢဘၣ်န့ၣ် ပဃုသ့ၣ်ညါအီၤသ့န့ၣ်လီၤ.”
One Nation ပၣ်တံၣ် အပှၤကတိၤတၢ်ပၢတဂၤ တဲဘၣ် SBS Examines တၢ်ရဲၣ်တၢ်ကျဲၤလၢ “တၢ်ထုးထီၣ်ရၤလီၤလံာ်တၢ်ကစီၣ်အံၤ ဒုးအိၣ်ထီၣ်တၢ်နၢ်ပၢၢ်ကမၣ်န့ၣ် အဝဲသ့ၣ်တသ့ၣ်ညါပလီၢ်ဘၣ်အသးဘၣ်, ပှၤသုးလီၢ်အိၣ်ဆိးအပှၤတဝၢ လၢတၢ်ကိၢ်တၢ်ဂီၤအိၣ်ထီၣ် ခီဖျိ လံာ်တၢ်ဘိးဘၣ်ရၤလီၤအံၤန့ၣ် One Nation တသ့ၣ်ညါပာ်သူၣ်ပာ်သးဘၣ်အီၤဘၣ်န့ၣ်လီၤ.”
ကတီၢ်ဖဲတၢ်ဘိးဘၣ်ရၤလီၤလံာ်တၢ်ကစီၣ်အံၤဒုးအိၣ်ထီၣ်တၢ်ကိၢ်တၢ်ဂီၤလၢပှၤတနီၤနီၤအဂီၢ်အခါ, ဟီၣ်ခိၣ်ဒီဘ့ၣ်ပှၤသုးလီၢ်အိၣ်ဆိးဂ့ၢ်ဝီ ပှၤသ့ပှၤဘၣ်စဲၤနီၣ် Associate Professor Anna Boucher စံးဝဲလၢ တၢ်ဂ့ၢ်အံၤမ့ၢ်ဝဲဒၣ် One Nation အတၢ်ပနီၣ်တခါန့ၣ်လီၤ.
“ဘၣ်ဃးပှၤသုးလီၢ်အိၣ်ဆိးအတၢ်ဂ့ၢ်န့ၣ် လၢအစးထီၣ်သီအခါလံၤလံၤလံ တၢ်အံၤမ့ၢ်ဝဲဒၣ် One Nation သနူပျဲၢ်စီၢ်နီၣ်နီၣ်တခါန့ၣ်လီၤ.”
အဝဲနာ်လၢ လံာ်တၢ်ကစီၣ်လၢတၢ်ဘိးဘၣ်ရၤလီၤအီၤအံၤ မ့ၢ်တၢ်ဟ့ၣ်လီၤတၢ်ကတိၤဒိၣ်ဒိၣ်မုၢ်မုၢ်တခါ ဆူပှၤလၢအဆီၣ်ထွဲအဝဲသ့ၣ်တဖၣ်အအိၣ်န့ၣ်လီၤ.
A/Prof Boucher မ့ၢ်ပှၤသိၣ်လိ Public Policy and Political Science အဂ့ၢ်အကျိၤဖဲ University of Sydney တဂၤ ဒီးမ့ၢ်စ့ၢ်ကီးကီၢ်စၢဖှိၣ်ပဒိၣ်ကိတိာ်ဖဲ Ministerial Advisory Council on Skilled Migration — ပှၤသုးလီၢ်အိၣ်ဆိးလၢအအိၣ်ဒီးတၢ်သ့တၢ်ဘၣ် တၢ်ဟ့ၣ်ကူၣ်ဟ့ၣ်ဖးကီၣ်ကရၢဝဲၤကျိၤန့ၣ်လီၤ.
အဝဲတဲဘၣ်ဝဲ SBS Examines တၢ်ရဲၣ်တၢ်ကျဲၤလၢ သနူလၢတၢ်ကွဲးပာ်ဖျါထီၣ်အီၤဖဲတၢ်ဘိးဘၣ်ရၤလီၤလံာ်တၢ်ကစီၣ်အပူၤသ့ၣ်တဖၣ်န့ၣ် တမ့ၢ်တၢ်လၢအအိၣ်ဒီးတၢ်တုၤထီၣ်ထီၣ်ဘး မ့တမ့ၢ် တမ့ၢ်တၢ်လၢ တၢ်ကမၤလၢပှဲၤထီၣ်ဘးအီၤဘၣ်.
အဝဲစံးစ့ၢ်ကီးဝဲဒၣ် တၢ်လၢတၢ်ဆှၢက့ၤကဒါဒိၣ်ဒိၣ်မုၢ်မုၢ်န့ၣ် တမ့ၢ်တၢ်ယိယိဖိတခါဘၣ်, ဒီး တၢ်ဃ့သကွံာ်ကညး လၢတၢ်ဃ့ထီၣ်အီၤဖဲ Administrative Review Tribuna — တၢ်ကွၢ်ကဒါက့ၤစံၣ်ညီၣ်ကွီၣ်ဘျီၣ်အအိၣ်န့ၣ် One Nation ကရၢအံၤ အတၢ်စိတၢ်ကမီၤတအိၣ်လၢအကထုးကွံာ်အီၤအဂီၢ်ဘၣ်န့ၣ်လီၤ.
‘တၢ်လိာ်ကွဲဃုာ်ဒီးတၢ်သူၣ်ပျံၤသးဖုး’
ဖဲတၢ်ဘိးဘၣ်ရၤလီၤလံာ်တၢ်ကစီၣ်အပူၤန့ၣ် စံးစ့ၢ်ကီးဝဲဒၣ်လၢ ပှၤနုာ်ကီၢ်အတၢ်မၤနီၣ်မၤဃါဖဲပဒိၣ်ခဲကနံၣ်အံၤတဖုအဖီလာ်န့ၣ် မ့ၢ်ဝဲတၢ်ဂ့ၢ်လၢအဒုးကဲထီၣ်ဟံၣ်ဃီတၢ်အိၣ်ဆိးအတၢ်ကီတၢ်ခဲသ့ၣ်တဖၣ်, ဒုးကဲထီၣ်စ့သိၣ်သွံ စ့အလုၢ်အပှ့ၤလီၤဒီး မၤနးမၤဖှီၣ် ကမျၢၢ်ဝဲၤကျိၤသ့ၣ်တဖၣ်ဒီး ခီၣ်တဃာ်အတၢ်သူၣ်ထီၣ်ဆီလီၤသ့ၣ်တဖၣ်န့ၣ်လီၤ.
ဖဲလၢတၢ်သံကွၢ်ဘၣ်ဃး တၢ်ဂ့ၢ်တၢ်ကျိၤ တၢ်မၤနီၣ်မၤဃါ မ့တမ့ၢ် တၢ်ဂ့ၢ်တၢ်ကျိၤလၢအဆီၣ်ထွဲတၢ်ဂ့ၢ် လၢအဘၣ်ဘျးလိာ်အသးဒီး, ပှၤသုးလီၢ်အိၣ်ဆိး, ဟံၣ်ဃီဒီး စ့သိၣ်သွံအခါ ပၣ်တံၣ်အံၤအပှၤကတိၤတၢ်ပၢ ဟ့ၣ်လီၤဝဲဒၣ် တၢ်ပဲၤထံနီၤဖးအတၢ်ကွဲးတခါ လၢအဘၣ်တၢ်ကွဲးအီၤဖဲ ABC တၢ်ကစီၣ်သန့ ဒီး The Australian တၢ်ကစီၣ်သန့ တၢ်ကွဲးတၢ်ပဲၤထံနီၤဖးသနၢၣ်အပူၤန့ၣ်လီၤ.
အဝဲသ့ၣ်တၢ်ပဲၤထံနီၤဖးတၢ်ကွဲးအပူၤန့ၣ်စံးဝဲဒၣ်, “တၢ်သ့ၣ်တဖၣ်အံၤန့ၣ် မ့ၢ်ဝဲတၢ်ဂ့ၢ်တၢ်ကျိၤလၢအအိၣ်ဖျါထြၢၣ်ကလၤလၢ အဒုးနဲၣ်ဖျါ, လၢတၢ်ဂ့ၢ်တၢ်ကျိၤနီၣ်ကီၢ်လၢတၢ်ဂ့ၢ်လိာ်အီၤတန့ၢ်ဘၣ်, လၢအခီပညီမ့ၢ် အီစထြ့လယါကီၢ်ပူၤပှၤကညီဟဲအါထီၣ်အဃိ အတၢ်သူဝဲၤကျိၤသ့ၣ်တဖၣ်ဟဲအါထီၣ်, တၢ်သူၣ်ထီၣ်ဆီလီၤဒီး ဟံၣ်ဃီသ့ၣ်တဖၣ်ဟဲအါထီၣ်န့ၣ်လီၤ.”
ဘၣ်ဆၣ်သနာ်က့ Emeritus သရၣ်ဒိၣ်စိ ဘၣ်ဃးတၢ်အိၣ်ဆိးလီၢ်ကျဲဂ့ၢ်ဝီလၢ Crawford School of Public Policy ဝဲၤကျိၤဖဲ Australian National University, Peter McDonald တဲဘၣ်ဝဲ SBS Examines တၢ်ရဲၣ်တၢ်ကျဲၤလၢ ပှၤနုာ်ကီၢ်အဃိ ဘၣ်ဒိဘၣ်ထံးဟံၣ်ဃီတၢ်အိၣ်တၢ်ဆိးန့ၣ် အိၣ်ဒၣ်ထဲတစဲးဖိန့ၣ်လီၤ.
အဝဲစံးဝဲဒၣ်, “ဖဲလၢပှၤကွဲးတၢ်ပဲၤထံနီၤဖးအဂ့ၢ်သ့ၣ်တဖၣ်ဒီး ပှၤဂဲၤလိာ်ထံရူၢ်ကီၢ်သဲးသ့ၣ်တဖၣ် ပာ်ဝဲဒၣ် ဟံၣ်ဃီတၢ်ဆါတၢ်ပှ့ၤ အတၢ်ကီတၢ်ခဲသ့ၣ်တဖၣ်ခဲလၢာ်ဒ်အမ့ၢ် ပှၤနုာ်ကီၢ်တၢ်ဂ့ၢ်ကီအခါ, တၢ်အံၤမ့ၢ်ဝဲဒၣ် အဝဲသ့ၣ် ထုးဖးယံၤကွံာ် ဟံၣ်ဃီတၢ်ဂ့ၢ်ကီ လၢတကွီၣ်လဲၢ် သနူတၢ်ဖံးတၢ်မၤကျိၤကျဲသနၢၣ် လၢတၢ်လိၣ်ဘၣ်ဘှါရှဲအီၤသ့ၣ်တဖၣ်န့ၣ်လီၤ”.
အဝဲစံးဝဲဒၣ် ပှၤသုးလီၢ်အိၣ်ဆိးန့ၣ် အတၢ်ဘၣ်ဒိဘၣ်ထံး တၢ်ပှ့ၤဟံၣ်ပှ့ၤဃီဒီး တၢ်ဒိးလဲလီၤဟံၣ်ဃီအဖၠါအိၣ်ဒၣ်ထဲတစဲးဖိဒီး တၢ်ဖီၣ်ဃံာ်ပာ်လီၤနီၣ်ထိၣ်ဒီးပှၤသုးလီၢ်အိၣ်ဆိးအနီၣ်ဂံၢ်န့ၣ် တမ့ၢ်တၢ်လၢအကဘှါရှဲကွံာ်တၢ်ဂ့ၢ်ကီအံၤဘၣ်န့ၣ်လီၤ.
University of Queensland, Urban Planning ဝဲၤကျိၤ Associate Professor Dr Dorina Pojani စံးဝဲဒၣ် တၢ်ဂ့ၢ်ကီထဲတမံၤဧိၤန့ၣ်မ့ၢ်ဝဲ ဟံၣ်ဃီသ့ၣ်တဖၣ်တအိၣ်လၢပှဲၤဘၣ်န့ၣ်လီၤ.
အဝဲစံးဝဲဒၣ်, “မ့ၢ်ဝဲတၢ်ယိယိဖိတခါ, ပဟံၣ်ပဃီတအိၣ်လၢပှဲၤလၢ ကမျၢၢ်ထံဖိကီၢ်ဖိနီၣ်ဂံၢ်လၢအအိၣ်ဒီးပှၤသ့ၣ်တဖၣ်အဂီၢ်ဘၣ် ဒီးတၢ်အံၤတမ့ၢ်လၢပှၤနုာ်ကီၢ်သ့ၣ်တဖၣ်အဃိဘၣ်. မ့ၢ်ဒၣ်လၢ ပတ့ဒုးအိၣ်ထီၣ်ဟံၣ်ဃီတအိၣ်လၢလၢပှဲၤပှဲၤဘၣ်အဃိန့ၣ်လီၤ”
“ဖဲ ၂ဝဝဝ နံၣ်အခိၣ်အဃၢၤန့ၣ်, ပပတုာ်ကွံာ်တၢ်သူၣ်ထီၣ်ဟံၣ်ဃီ ဒ်သိးတၢ်လိၣ်ဘၣ်အိၣ်အသိးဒီး စးထီၣ်ဖဲန့ၣ် ဟံၣ်ပှ့ၤစ့ၢ်ကီးဟဲဒိၣ်ထီၣ်ဝဲကွ့ၢ်ကွ့ၢ်န့ၣ်လီၤ.”
A/Prof Boucher စံးဝဲဒၣ်, One Nation အတၢ်ဆၢတဲာ်လၢ အပာ်ဖျါထီၣ် ဟံၣ်ဃီတၢ်ဂ့ၢ်ကီဒီး ပှၤနုာ်ကီၢ်အတၢ်ဂ့ၢ်န့ၣ်, တၢ်ဂ့ၢ်တၢ်ကျိၤသ့ၣ်တဖၣ် ဘၣ်မ့ၢ်ဂ့ၤ ကမၣ်မ့ၢ်ဂ့ၤ, မ့ၢ်တၢ်လၢအဒုးအိၣ်အါထီၣ်တၢ်ပျံၤတၢ်ဖုးသ့ၣ်တဖၣ်န့ၣ်လီၤ.
“မ့ၢ်လၢတၢ်အံၤအဃိ အဝဲသ့ၣ်ပာ်ဝဲတၢ်ပညိၣ်ဖဲ တၢ်ဂ့ၢ်အံၤအဖီခိၣ်န့ၣ်လီၤ.”
တၢ်ဘၣ်ဒိဘၣ်ထံးတၢ်ဆီၣ်ထွဲမၤစၢၤပှၤသုးလီၢ်အိၣ်ဆိး
Pauline Hanson အပၣ်တံၣ် One Nation အံၤ မ့ၢ်ဒၣ်ပၣ်တံၣ်ဆံးကိးဖိတဖုဒီး အတအိၣ်ဒီးကရၢဖိလၢလၢပှဲၤပှဲၤလၢ ကဒုးအိၣ်ထီၣ်ပဒိၣ်တဖုအဂီၢ်ဘၣ်ဒီး အနီၣ်ကစၢ်ဒၣ်ဝဲ မၤလၢထီၣ်ပှဲၤထီၣ်သနူသ့ၣ်တဖၣ်တသ့ဘၣ်.
နာ်သက့ A/Professor Boucher စံးဝဲဒၣ် တၢ်ကွဲးတၢ်ကလုၢ်ကတိၤဒ်သိးအံၤတကလုာ် ဒီး တၢ်ဟးမၤပျံၤမၤဖုးတၢ်ဒ်အံၤတကလုာ်န့ၣ် ဒုးအိၣ်ထီၣ်တၢ်ဘၣ်ဒိဘၣ်ထံးလၢ ပှၤတဝၢတၢ်အိၣ်ဆိးတပူၤဃီပှဲၤဒီးတၢ်မုာ်တၢ်ခုၣ်န့ၣ်လီၤ.
အဝဲစံးဝဲဒၣ်, “တၢ်ဒ်သိးအံၤန့ၣ် ဒုးအိၣ်ထီၣ်တၢ်တဲသကိးဘၣ်ဃး တၢ်တအဲၣ်ဒိးတူၢ်လိာ် ပှၤသုးလီၢ်အိၣ်ဆိးဘၣ် ကဟဲအါထီၣ်ဒီး ဒုးအိၣ်ထီၣ်အါထီၣ် တၢ်ထံၣ်တခီတၢၤဖဲအီစထြ့လယါကီၢ်ပူၤန့ၣ်လီၤ. တၢ်အံၤဘၣ်သ့ၣ်သ့ၣ် ကမ့ၢ်တၢ်ဟ့ၣ်ဆူၣ်ထီၣ်ကရၢဖးသ့ၣ်တဖၣ် လၢကဟံးန့ၢ်တၢ်ထံၣ်တၢ်ဆိကမိၣ်အံၤ, အမ့တမ့ၢ်ခဲလၢာ်နာ်သက့ ကဟံးန့ၢ်ဝဲတၢ်ထံၣ်အံၤတနီၤန့ၣ်လီၤ.”
* ဘၣ်တၢ်ဆီတလဲကွံာ်အမံၤ
