နီၣ်ပၤမုၣ် အဲလ်စဘဲး လဲၤပူၤကွံာ်ဟီၣ်ခိၣ်အခါအသးနံၣ်အိၣ်ဝဲ ၉၆နံၣ် ဒီး အဝဲအဖိခွါ အဒိၣ်ကတၢၢ် လၢအသးနံၣ်အိၣ် ၇၃နံၣ် ခၠါလ် ကဲထီၣ်ဘၣ်ဝဲဒၣ်ကစီၤပၤန့ၣ်လီၤ။
တၢ်ကဘၣ်ကိးဝဲအီၤလၢ ခၠါလ် ကစီၤပၤ သၢဂၤတဂၤ ဒီး အဝဲကကဲထီၣ်ဘၣ် ထံကီၢ် ၁၆ဘ့ၣ်အခိၣ် လၢအပၣ်ဃုာ် အီစထြ့လယါ၊ ကီၢ်ခဲနဒၣ် ဒီး ကီၢ်နယူဇံၣ်လဲၣ် သ့ၣ်တဖၣ်န့ၣ်လီၤ။
တၢ်ကစီၣ်ဟူထီၣ်သါလီၤလၢ ဖဲနီၣ်ပၤမုၣ်တချုးသံဒ်ဘၣ်အခါန့ၣ် နီၣ်ပၤမုၣ် အဟံၣ်ဖိဃီဖိသ့ၣ်တဖၣ် လဲၤထံၣ်လိာ်ဖှိၣ်သကိးအီၤဖဲအဟံၣ် ဝံၤတယံၤတမီၢ်ဘၣ်ဒီးအဝဲသံဝဲဒၣ်န့ၣ်လီၤ။
96 year old Queen Elizabeth the Second pictured just a few days before her death. Credit: AAP
ဖဲ Buckingham နူၢ် အချၢန့ၣ် ပှၤကညီသ့ၣ်တဖၣ်လဲၤပာ်ဖှိၣ်ထီၣ်အသး အါအါဂီၢ်ဂီၢ် ဒ်အမ့ၢ် တၢ်ပာ်ဖျါထီၣ်တၢ်သးအုးဒီး တၢ်သ့ၣ်နီၣ်ထီၣ်ဘၣ် နီၣ်ပၤမုၣ်န့ၣ်လီၤ။
နီၣ်ပၤမုၣ်အံၤ ပၢတၢ်အစိၤယံၤဝဲအနံၣ် ၇ဝ ဘျဲၣ်န့ၣ်လီၤ။ ဖဲအ၀ဲပၢတၢ်အစိၤအဆၢကတီၢ် ကီၢ်အဲကလံး ကိတိာ်ခိၣ်ကျၢၢ်အိၣ်၀ဲ ၁၅ ဂၤ ဒီးအဝဲမ့ၢ်နီၣ်ပၤမုၣ်လၢ ပၢတၢ်အစိၤယံၤကတၢၢ်ဖဲဟီၣ်ခိၣ်ဒီဘ့ၣ်အပူၤတဂၤန့ၣ်လီၤ။
ဖဲ ၁၉၅၂နံၣ် လါဖ့ၤဖြူၤအါရံၤ ၅သီ၊ ဖဲအပၢ် ကစီၤပၤ George ဃုဂၤတဂၤ သံအလီၢ်ခံ အဝဲကဲထီၣ်ဘၣ်ဝဲနီၣ်ပၤမုၣ်န့ၣ်လီၤ။ အ၀ဲကဲထီၣ်နီၣ်ပၤမုၣ်အခါ အသးနံၣ်အိၣ်ဝဲ ၂၅နံၣ် ဒီး တၢ်မၤမူးလၢအဝဲကဲထီၣ်ဘၣ်နီၣ်ပၤမုၣ်န့ၣ်မ့ၢ်ဝဲဖဲ လါယူၤအတီၢ်ပူၤန့ၣ်လီၤ။
မ့မ့ၢ်နီၣ်ပၤမုၣ်အံၤအဝၤ Prince Philip န့ၣ် လဲၤပူၤကွံာ်ဟီၣ်ခိၣ်ဖဲ အပူၤကွံာ်တနံၣ် ၂ဝ၂၁ လါအ့ဖြ့ၣ် တချုးဖဲအသးနံၣ်ပှဲၤထီၣ် ၁ဝဝ ဒ်ဘၣ် ၂လါန့ၣ်လီၤ။ Prince Philip ဒီးနီၣ်ပၤမုၣ် ကဲဝဲဒၣ်နီၣ်ဒီမါဝၤ ၇၃နံၣ်န့ၣ်လီၤ။
စးထီၣ်ဖဲအပူၤကွံာ်တနံၣ် လါအီးကထိဘၢၣ်အတီၢ်ပူၤန့ၣ် နီၣ်ပၤမုၣ်အံၤ အတၢ်အိၣ်ဆူၣ်အိၣ်ချ့လီၤစၢ်ဒီး တပာ်ဖျါအသးလၢကမျၢၢ်မဲာ်ညါအါလၢ်ကဲၣ်ဆိးလၢၤဘၣ်။ ဖဲအပူၤကွံာ်စှၤကိးသီန့ၣ် အဝဲသ့ၣ်ပာ်မုၢ်နံၤတၢ်ဆၢကတီၢ်လၢကထံၣ်လိာ်အသးဒီး ကိတိာ်လၢအလီၢ်လးထီသ့ၣ်တဖၣ် နာ်သက့ ဘၣ်ထုးသံကွံာ်ဝဲတၢ်သ့ၣ်ဖးမုၢ်နံၤလၢကထံၣ်လိာ်သးအဂီၢ်အံၤ န့ၣ်လီၤ။
ဖဲအ၀ဲပၢတၢ်အစိၤ ဒီတကတီၢ်ညါန့ၣ် အဝဲမ့ၢ်နီၣ်ပၤမုၣ်တဂၤလၢ ဘၣ်တၢ်တဲစိၤက့ၤဝဲဒ်အမ့ၢ် နီၣ်ပၤမုၣ်တဂၤလၢ အဂဲၤလိာ်လၢ ထံရူၢ်ကီၢ်သဲး ပှၤဂ့ၢ်ဝီတၢ်ဖံးတၢ်မၤအါအါဂီၢ်ဂီၢ် ဒီး မ့ၢ်နီၣ်ပၤမုၣ်လၢ အအိၣ်စံၣ်အိၣ်ကျၢၤ တဂၤ န့ၣ်လီၤ။
တုၤလီၤလၢအဝဲဘူးကသံစှၤကိးသီအတီၢ်ပူၤဒၣ်လဲာ်န့ၣ် အဝဲမၤဒ်ဝဲဒၣ်ထံကီၢ်မူဒါတၢ်ဖံးတၢ်မၤသ့ၣ်တဖၣ်န့ၣ်လီၤ။
