IN BRIEF:
- SBS ဒိးန့ၢ်ဘၣ် တၢ်ဘိးဘၣ်ရၤလီၤ ခွဲးယာ်လီၤဆီ လၢတၢ်ကဘိးဘၣ်ရၤလီၤ 2030 World Cup—ဟီၣ်ခိၣ်ဒီဖျၢၣ် ဖျၢၣ်ထူတၢ်လိာ်ကွဲပြၢ, လၢအမ့ၢ်ဒ်သိး live—တၢ်ဘိးဘၣ်ရၤလီၤတဘျီဃီ ဒီး အကမ့ၢ်ဝဲတၢ်ဘိးဘၣ်ရၤလီၤကလီအီၤလၢပှၤအီစထြ့လယါဖိသ့ၣ်တဖၣ်အဂီၢ်န့ၣ်လီၤ.
- တၢ်သးလီၤပလိာ်အံၤ မၤဆူၣ်ထီၣ်ဝဲ SBS ဒီး FIFA အဘၢၣ်စၢၤ တၢ်ရ့လိာ်လၢအအိၣ်ဝဲဒၣ် အနံၣ် ၄ဝ လံန့ၣ်လီၤ.
အီစထြ့လယါကီၢ်အံၤ ဒ်အမ့ၢ် ထံကီၢ်တဘ့ၣ်လၢ အအဲၣ်တၢ်လိာ်ကွဲဖျၢၣ်ထူအသိးန့ၣ် SBS ကွဲၤထံၣ်ဟူသန့ ဒိးန့ၢ်ဘၣ်ဝဲ တၢ်လီၢ်ဂၢၢ်ဂၢၢ်ကျၢၤကျၢၤ လၢကဘိးဘၣ်ရၤလီၤဝဲဒၣ် FIFA World Cup 2030— ၂ဝ၃ဝနံၣ် ဟီၣ်ခိၣ်ဒီဖျၢၣ် ဖျၢၣ်ထူတၢ်လိာ်ကွဲပြၢ ဒ်သိးတၢ်ဘိးဘၣ်ရၤလီၤခွဲးယာ်လီၤဆီတခါအသိးန့ၣ်လီၤ.
ဖဲ ၂ဝ၃ဝနံၣ် တၢ်လိာ်ကွဲပြၢအပူၤန့ၣ် ပှၤအီစထြ့လယါဖိ လၢအအဲၣ်ကွၢ်ကီဖျၢၣ်ထူအတၢ်လိာ်ကွဲပြၢသ့ၣ်တဖၣ် ကန့ၢ်ကွၢ်ကီဒီး ဒိကနၣ်ကလီဘၣ်ဝဲ ဖျၢၣ်ထူတၢ်ပြၢ ၁ဝ၄ ခါ ဖဲ SBS ကွဲၤထံဟူအပူၤ, တၢ်ဂီၤမူအပူၤဒီး ကွဲၤလ့လိၤတၢ်ရဲၣ်တၢ်ကျဲၤသ့ၣ်တဖၣ်အပူၤန့ၣ်လီၤ.
SBS ပှၤပၢဆှၢရဲၣ်ကျဲၤတၢ်ခိၣ်ကျၢၢ် Jane Palfreyman စံးဝဲဒၣ် အီစထြ့လယါကီၢ်အံၤမ့ၢ်ဝဲဒၣ် ဟီၣ်ခိၣ်ဒီဖျၢၣ် ဖျၢၣ်ထူတၢ်လိာ်ကွဲအဟံၣ်တခါအဃိ ပှၤဘိးဘၣ်ရၤလီၤတၢ်အဂီၢ်န့ၣ် တၢ်သံကွၢ်တအိၣ်ဘၣ်.
“FIFA World Cup န့ၣ်မ့ၢ်ဝဲ တၢ်လိာ်ကွဲပြၢအမူးစှၤကိးခါ အကျါတခါ လၢအဟဲစိာ်ပာ်ဖှိၣ်သကိး ပှၤအီစထြ့လယါဖိ တၢ်ဆဲးတၢ်လၤသ့ၣ်တဖၣ်, ကျိာ်သ့ၣ်တဖၣ် ဒီးပှၤတဝၢသ့ၣ်တဖၣ် တပူၤဃီန့ၣ်လီၤ.”
“၂ဝ၃ဝနံၣ် ခဲကၢးန့ၣ် ပှၤကွၢ်ကီတၢ်ဖိ ပှၤဒိကနၣ်တၢ်ဖိသ့ၣ်တဖၣ် ကဒိးန့ၢ်ဘၣ်ဝဲ တၢ်လဲၤခီဖျိအံၤ အသီတဘျီကဒီး လၢ SBS ကဘိးဘၣ်ရၤလီၤကလီအီၤတဘျီဃီန့ၣ်လီၤ.”
ဒ်သိးလၢအမ့ၢ်တၢ်မၤလၤကပီၤ နံၣ် ၁ဝဝ ပှဲၤထီၣ် အနံၣ်ဆဲးဆၢအသိးန့ၣ်, 2030 FIFA World Cup—၂ဝ၃ဝနံၣ် ဟီၣ်ခိၣ်ဒီဖျၢၣ် ဖျၢၣ်ထူတၢ်လိာ်ကွဲန့ၣ် အကမ့ၢ်ဝဲဟီၣ်ခိၣ်ဂီၤတၢ်လီၤဆီအကလုာ်အိၣ်အအါကတၢၢ်အတၢ်ပြၢတခါ ဖဲတၢ်လိာ်ကွဲပြၢ အတၢ်စံၣ်စိၤတဲစိၤအပူၤန့ၣ်လီၤ.
ဟီၣ်ခိၣ်ဒီဖျၢၣ် ဖျၢၣ်ထူတၢ်လိာ်ကွဲပြၢအဝဲန့ၣ် လၢတၢ်စံၣ်စိၤတဲစိၤအပူၤ အကမ့ၢ်ဝဲတၢ်အဆိကတၢၢ်တဘျီ လၢထံကီၢ်ဃုဘ့ၣ် ကကဲဟံၣ်ကစၢ် လၢအကတူၢ်လိာ်မၤဝဲဖျၢၣ်ထူတၢ်ပြၢသ့ၣ်တဖၣ်န့ၣ်လီၤ. ထံကီၢ်လၢအပၣ်ဃုာ်ဖဲတၢ်ကဲဟံၣ်ကစၢ်အပူၤ လၢကမ့ၢ်ပှၤစးထီၣ်အိးထီၣ်တၢ်လိာ်ကွဲပြၢအဆိကတၢၢ် သၢခါန့ၣ်မ့ၢ်ဝဲ, အးကၠ့ၤတံနါ, ဖးရးကွ့ဒီး အူးရူးကွ့ ထံကီၢ်သ့ၣ်တဖၣ်, ဒီးဖဲန့ၢ်အလီၢ်ခံ တၢ်ပြၢသ့ၣ်တဖၣ်န့ၣ် တၢ်ကမၤအီၤဖဲ ပှၤတူၢ်လိာ်ခီၣ်ဆၢတၢ်ဟံၣ်ကစၢ်ခိၣ်သ့ၣ်ထံကီၢ်သ့ၣ်တဖၣ်အပူၤ, လၢအမ့ၢ် မီၤရကိၤ, ဖိးတူးကၢၤလ် ဒီး စပ့ၤ န့ၣ်လီၤ.
ထံကီၢ်လၢအကဲဟံၣ်ကစၢ်ဃုဘ့ၣ်အံၤ အဖျၢၣ်ထူကရူၢ်သ့ၣ်တဖၣ်န့ၣ် ကန့ၢ်နုာ်လီၤဘၣ်ဝဲဖဲ တၢ်လိာ်ကွဲပြၢအံၤအပူၤ လၢအတလိၣ်ဘၣ် တၢ်မၤကွၢ်ပှၤထူဖျၢၣ်ထူကရူၢ်တၢ်ပြၢ အကံၢ်အစီဘၣ်န့ၣ်လီၤ.
SBS ဒီး FIFA အဘၢၣ်စၢၤ တၢ်သးလီၤပလိာ်အံၤ မ့ၢ်ဝဲတၢ်မၤဆူၣ်ထီၣ် နံၣ် ၄ဝ အတၢ်ရ့လိာ် လၢစးထီၣ်တ့ၢ်အသးလၢ ၁၉၈၆နံၣ် အခါလံၤလံၤန့ၣ်လီၤ.
FIFA တၢ်ကစီၣ်တဝၢဒီး တၢ်မၤသကိးတၢ် ဒီး FIFA+ ပှၤပၢဆှၢတၢ်ခိၣ်ကျၢၢ် Jean-Christophe Petit စံးဝဲဒၣ်, “ပဆဲးမၤသကိးဘၣ်တၢ်ဒီး SBS, ပပှၤမၤသကိးတၢ်ဖးယံၤလံအံၤအဃိ ပသးမုာ်ဒိၣ်မးန့ၣ်လီၤ.”
“SBS တၢ်တ့ဒုးအိၣ်ထီၣ်တၢ်လဲလိာ်အသီအတၢ်ရဲၣ်တၢ်ကျဲၤသ့ၣ်တဖၣ်, တၢ်ပာ်ဖျါတၢ်အဒိၣ်အယိာ်သ့ၣ်တဖၣ်, အတၢ်ရၤလီၤသကုၤထံကီၢ်ဒီဘ့ၣ်ဒီး အတၢ်ဆၢတဲာ်ပာ်သးကျၢၤမုဆှုလၢ တၢ်ဒုးနဲၣ်ဖျါဝဲဒၣ် FIFA World Cup 2026— ၂ဝ၂၆နံၣ် ဟီၣ်ခိၣ်ဒီဖျၢၣ် ဖျၢၣ်ထူတၢ်လိာ်ကွဲပြၢ အတၢ်မၤလၤကပီၤ တၢ်ဆဲးတၢ်လၤအကလုာ်လုာ်န့ၣ်, တနံၣ်အံၤ တၢ်လိာ်ကွဲပြၢအဂီၢ် ဒုးအိၣ်ထီၣ်ဝဲ တၢ်ပာ်ပနီၣ် နီၣ်ထိၣ်အသီ ဖဲအီစထြ့လယါကီၢ်ပူၤအံၤန့ၣ်လီၤ.”
Petit စံးဝဲဒၣ် တၢ်သးလီၤပလိာ်အသီအံၤ ကဟဲစိာ်န့ၢ်ဝဲ, “အီစထြ့လယါပှၤအဲၣ်ဖျၢၣ်ထူသ့ၣ်တဖၣ် တၢ်ကွၢ်ကီတၢ်လိာ်ကွဲပြၢတၢ်အလဲၤခီဖျိလၢအလီၤဆီ” န့ၣ်လီၤ.
မ့မ့ၢ်လၢ Palfreyman တခီန့ၣ် စံးဝဲဒၣ် “တၢ်မၤသကိးတၢ်လၢအရ့ဒိၣ်န့ၣ်" ပာ်ဖျါထီၣ်ဝဲ "တၢ်မၤသကိးတၢ် လၢတၢ်ဆၢကတီၢ်ဖးယံၤအဂီၢ် အတၢ်ဆၢတဲာ်ပာ်သးကျၢၤမုဆှု လၢအမ့ၢ်ဝဲ တၢ်မၤန့ၢ်တၢ်လၢ ပှၤအီစထြ့လယါဖိခဲလၢာ် န့ၢ်ကွၢ်ကီဘၣ် ဟီၣ်ခိၣ်ဒီဖျၢၣ်တၢ်လိာ်ကွဲပြၢအဒိၣ်ကတၢၢ်”အံၤန့ၣ်လီၤ.
တၢ်မၤန့ၢ်တၢ်သးလီၤပလိာ်အံၤ မ့ၢ်ဝဲတၢ်ပိာ်ထွဲထီၣ်အသးလၢ SBS အတၢ်ဘိးဘၣ်ရၤလီၤ ၂ဝ၂၆နံၣ် ဟီၣ်ခိၣ်ဒီဖျၢၣ် ဖျၢၣ်ထူတၢ်လိာ်ကွဲပြၢန့ၣ် အိၣ်ဒီးတၢ်တုၤထီၣ်ထီၣ်ဘးဂ့ၤမး, လၢအအိၣ်ဒီးပှၤနုာ်လီၤကွၢ်ကီတၢ်အါန့ၣ် ၁၈ ကကွဲၢ်န့ၣ်လီၤ.
အတၢ်ရဲၣ်တၢ်ကျဲၤသ့ၣ်တဖၣ်န့ၣ်မ့ၢ်ဝဲဒၣ် တၢ်ဘိးဘၣ်ရၤလီၤ တၢ်လိာ်ကွဲပြၢသ့ၣ်တဖၣ် လၢတၢ်ဆၢကတီၢ်ပှဲၤပှဲၤ ဒီး တၢ်ပာ်ဖျါဖှိၣ်ဖုၣ်ကိး လၢအယံၤဝဲဒၣ် အမံးနံး ၃ဝ, ၁၂မံးနံးဒီး သၢမံးနံး တၢ်ဂီၤမူ ဖဲ SBS On Demand သန့အပူၤန့ၣ်လီၤ.
ပှၤကွၢ်ကီတၢ်ရဲၣ်တၢ်ကျဲၤသ့ၣ်တဖၣ်အံၤထီၣ်ဘးဝဲဒၣ် ၂ဝ၉ ကကွဲၢ်နၣ်ရံၣ် — ပှၤကွၢ်ကီတၢ် ၅၅ မျးကယၤန့ၣ် မ့ၢ်ဝဲဒၣ်ဖဲ ဒံၢ်ကၠံၢ်ထၢၣ်အပူၤ န့ၣ်လီၤ.
SBS တၢ်လိာ်ကွဲဂ့ၢ်ဝီ ပှၤပၢဆှၢတၢ်ခိၣ်ကျၢၢ် Ken Shipp စံးဝဲဒၣ်, “SBS အတၢ်ရ့လိာ်မၤသကိးတၢ်ဒီး FIFA World Cup န့ၣ် မ့ၢ်တၢ်လၢ အအါန့ၢ်ဒံး တၢ်လိာ်ကွဲပြၢအမူးတခါအသိးန့ၣ်လီၤ.”
“ပတၢ်ဖံးတၢ်မၤန့ၣ်မ့ၢ်ဝဲ တၢ်ဖီၣ်န့ၢ်ပာ်ဖျါထီၣ် တၢ်လိာ်ကွဲဖျၢၣ်ထူ, တၢ်ဂဲၤပူသ့ၣ်တဖၣ်, တၢ်ဆဲးတၢ်လၤသ့ၣ်တဖၣ်ဒီး သးအတၢ်တူၢ်ဘၣ် လၢအတလီၤဂာ်ဒ်သိးဒီး ဟီၣ်ခိၣ်ဒီဖျၢၣ်အပူၤ တၢ်လိာ်ကွဲအဂုၤအဂၤသ့ၣ်တဖၣ်. ပပာ်ကဖၢလၢပသးဒိၣ်မးလၢ ပန့ၢ်ဘၣ် တၢ်ခွဲးတၢ်ယာ်အသီတဘျီ လၢ ၂ဝ၃ဝ နံၣ်အဂီၢ်န့ၣ်လီၤ.”
For the latest from SBS News, download our app and subscribe to our newsletter.
