အီစထြ့လယါဒီကလုာ်တၢ်သးဝံၣ်ဒီးထံဖိကီၢ်ဖိတၢ်အၢၣ်လီၤအီလီၤလၢနနီၣ်ကစၢ်အကျိာ်

SBS သ့ၣ်ညါပာ်ပနီၣ်ပှၤထူလံၤဖိ အဘီရကၠံၤနၢၤဒီး ထီရ့ၣ်စထြ့ၣ်အါလဲးဒၢၤ လၢအအိၣ်သကုၤအီစထြ့လယါကီၢ်ပူၤ ဒ်အမ့ၢ် ထံကီၢ်အံၤ ပှၤထူလံၤဖိ အကစၢ်သ့ၣ်တဖၣ်, ဒီး အဝဲသ့ၣ် အတၢ်ဆဲးအိၣ်ဘျးစဲလိာ်အသးဒီး ဟီၣ်ခိၣ်လီၢ်, ထံကျိထံကွာ်, ဒီး ပှၤတဝၢန့ၣ်လီၤ.

Advance Australia Fair ဒီကလုာ်တၢ်သးဝံၣ်အလုၢ်ဖိထါဖိအခီၣ်ထံးခီဘိန့ၣ်ဘၣ်တၢ်စးထီၣ်ကွဲးအီၤဖဲ ၁၈၇၈နံၣ် လၢ ပှၤအီစထြ့လယါကၠိသရၣ်ဒီးပှၤကွဲးတၢ်သးဝံၣ်ဖိ Peter Dodds McCormick န့ၣ်လီၤ. တၢ်သးဝံၣ်အံၤ ဘၣ်တၢ်ပာ်ပနီၣ်အီၤဒ်သိးအီစထြ့လယါထံကီၢ် ဒီကလုာ်တၢ်သးဝံၣ် ဖဲ ၁၉၈၄နံၣ် လါအ့ဖြ့ၣ် ၁၉သီအနံၤန့ၣ်လီၤ.

ဖဲ ၂ဝ၂၁နံၣ်န့ၣ် တၢ်ကတိၤဖျၢၣ် လၢအအိၣ်ဖဲ ဒီကလုာ်တၢ်သးဝံၣ် ခံကျိၤတကျိၤအပူၤန့ၣ် ဘၣ်တၢ်ဆီတလဲမၤသိထီၣ်က့ၤအီၤလၢ ‘young and free’ ဆူ ‘one and free’ ဒ်သိးလၢအမ့ၢ်တၢ်ဆဲးကလၤတၢ်ပၣ်ဃုာ်သကိးခဲလၢာ်အသိးန့ၣ်လီၤ.

ဒီကလုာ်တၢ်သးဝံၣ်အံၤ ဘၣ်တၢ်သံကျံသးဝံၣ်အီၤဖဲ ပဒိၣ်ပပှၢ်ခိၣ်နၢ်တၢ်မၤမူးပွဲသ့ၣ်တဖၣ်အပူၤ, တၢ်လိာ်ကွဲပြၢမူးသ့ၣ်တဖၣ်အပူၤ ဒီး ပှၤတဝၢမူးပွဲအဂုၤအဂၤသ့ၣ်တဖၣ်အပူၤန့ၣ်လီၤ.

အီစထြ့လယါဒီကလုာ်တၢ်သးဝံၣ်လံာ်ဖျၢၣ်

အီစထြ့လယါဖိခဲလၢာ်သ့ၣ်ဧၢ မ်ပကသးဖှံသကိး,

လၢပမ့ၢ်တၢ်တမံၤဃီဒီးသဘျ့;

ပအိၣ်ဒီးဟီၣ်ခိၣ်ညၣ်ထူ ဒီးပမ့ၢ်ကျဲးစၢးဆူၣ်ဆူၣ်န့ၣ်ပကထူးတီၤ;

ပဟံၣ်န့ၣ်ပီၣ်လဲၣ်အိၣ်ဝးတရံးအီၤ;

ပဟီၣ်ခိၣ်လီၢ်အံၤအိၣ်ပှဲၤလုာ်ကွံာ်ဒီးန့ဆၢၣ်တၢ်ဟ့ၣ်သါ

လၢအဃံလၤဒီး ကၤဒိၣ်မး;

ဖဲစံၣ်စိၤကဘျံးပၤအပူၤ, ကိးပတီၢ်ဒဲး

အီစထြ့လယါကီၢ်ကဒိၣ်ထီၣ်ပှဲၤဒီးတၢ်တီတၢ်လိၤ.

ပှဲၤဒီးတၢ်သးခု ပကသးဝံၣ်သကိး,

အီစထြ့လယါကီၢ်ကဒိၣ်ထီၣ်ပှဲၤဒီးတၢ်တီတၢ်လိၤ.

ဖဲပဆၣ်ဒၢမုၢ်ဆဲးကပြုၢ်လီၤအဖီလာ်

ပကကျဲးစၢးလၢပသးဒီဖျၢၣ်ဒီးပစုဒၣ်ပဝဲ;

ခီမီဝဲးသ်ထံကီၢ်လၢပပၢအီၤအံၤ

ကမံၤဟူသၣ်ဖျါလၢတၢ်လီၢ်ကိးပူၤ;

လၢပှၤဟဲခီဂာ်ပီၣ်လဲၣ်သ့ၣ်တဖၣ်အဂီၢ်

ပအိၣ်ဒီးတၢ်ဟ့ၣ်နီၤလီၤတၢ်ပၢၤခိၣ်လၢအဒူၣ်အဆၢတအိၣ်;

ပှဲၤဒီးတၢ်သးဒူ ပာ်ဖှိၣ်ထီၣ်ပသးဃူဃူ

လၢအီစထြ့လယါကီၢ်ကဒိၣ်ထီၣ်ပှဲၤဒီးတၢ်တီတၢ်လိၤအဂီၢ်.

ပှဲၤဒီးတၢ်သးခု ပကသးဝံၣ်သကိး,

အီစထြ့လယါကီၢ်ကဒိၣ်ထီၣ်ပှဲၤဒီးတၢ်တီတၢ်လိၤ.

READ MORE

10 things you should know about Advance Australia Fair

- Credit: Don Arnold/Getty Images

စးထီၣ်လၢ ၁၉၁၉နံၣ် တၢ်ဒုးအိၣ်ထီၣ်အီစထြ့လယါထံဖိကီၢ်ဖိန့ၣ်, ပှၤကညီအါန့ၢ်အဂၤဃုကွဲၢ်ကဲထီၣ်ဘၣ်ထံဖိကီၢ်ဖိလၢတၢ်ပာ်ပနီၣ်အီၤခီဖျိတၢ်ဟ့ၣ်လီၤတၢ်ကဲထီၣ်ထံဖိကီၢ်ဖိလံာ်အုၣ်သးလၢအဖိးသဲစးတၢ်ဘျၢန့ၣ်လီၤ.

တၢ်ဟ့ၣ်လီၤထံဖိကီၢ်ဖိလံာ်အုၣ်သးအမူးသ့ၣ်တဖၣ် ဘၣ်တၢ်ရဲၣ်ကျဲၤမၤအီၤလၢ လီၢ်ကဝီၤ ကီၣ်ကးကရၢသ့ၣ်တဖၣ်, လၢအပၣ်ဃုာ် အီစထြ့လယါထံဖိကီၢ်ဖိမုၢ်နံၤ လၢတၢ်ပာ်ပနီၣ်အီၤဖဲလါစဲးပထ့ဘၢၣ် ၁၇သီအနံၤန့ၣ်လီၤ.

ဒ်သိးလၢအမ့ၢ်မူးအံၤအတၢ်ရဲၣ်တၢ်ကျဲၤတခါအသိး, အီစထြ့လယါဒီကလုာ်တၢ်သးဝံၣ်န့ၣ် တၢ်သးဝံၣ်ထီၣ်အီၤ, ဒီးပှၤကညီသ့ၣ်တဖၣ် မၤအဝဲတၢ်အၢၣ်လီၤအီလီၤ လၢအတူၢ်လိာ်ဝဲ အီစထြ့လါယထံဖိကီၢ်ဖိ အမူအဒါသ့ၣ်တဖၣ်န့ၣ်လီၤ.

တၢ်အၢၣ်လီၤအီလီၤန့ၣ်အိၣ်ဝဲဒၣ်ခံကလုာ်, လၢအမ့ၢ် တကလုာ်န့ၣ်ပၣ်ဃုာ်ဒီးတၢ်စံးပာ်ဖျါထီၣ်ကစၢ်ယွၤန့ၣ်လီၤ.

တၢ်အၢၣ်လီၤအီလီၤ အကလုာ် ၁

စးထီၣ်ဆၢကတီၢ်ခဲအံၤ, လၢကစၢ်ယွၤအမဲာ်ညါ,

ယအၢၣ်လီၤယသး လၢယကတီဒီးအီစထြ့လယါထံကီၢ်ဒီးအထံဖိကီၢ်ဖိ,

လၢယနီၤလီၤဒံၣ်မိၣ်ခြ့ၣ်ထ့းတၢ်နာ်တမံၤဃီ,

လၢအတၢ်ခွဲးတၢ်ယာ်ဒီးတၢ်သဘျ့န့ၣ်ယယူၤယီၣ်ပာ်ကဲအီၤ, ဒီး

လၢအသဲစးတၢ်ဘျၢန့ၣ်ယကလူၤပိာ်ထွဲဒီးဒိကနၣ်အီၤန့ၣ်လီၤ.

တၢ်အၢၣ်လီၤအီလီၤ အကလုာ် ၂

စးထီၣ်ဆၢကတီၢ်ခဲအံၤ,

ယအၢၣ်လီၤယသး လၢယကတီဒီးအီစထြ့လယါထံကီၢ်ဒီးအထံဖိကီၢ်ဖိ,

လၢယနီၤလီၤဒံၣ်မိၣ်ခြ့ၣ်ထ့းတၢ်နာ်တမံၤဃီ,

လၢအတၢ်ခွဲးတၢ်ယာ်ဒီးတၢ်သဘျ့န့ၣ်ယယူၤယီၣ်ပာ်ကဲအီၤ, ဒီး

လၢအသဲစးတၢ်ဘျၢန့ၣ်ယကလူၤပိာ်ထွဲဒီးဒိကနၣ်အီၤန့ၣ်လီၤ.