របាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ ដែលផ្សព្វផ្សាយកាលពីថ្ងៃទី១៥ ខែវិច្ឆិកា បង្ហាញថា អ្នកស្លាប់ទាំង១៤នាក់ ដោយសារគ្រោះថ្នាក់ចរាចរណ៍ រយៈពេល៣ថ្ងៃនៃព្រះរាជពិធីបុណ្យអុំទូក ឆ្នាំ២០១៦នេះ គឺមានអ្នកជិះម៉ូតូ ១០នាក់ ( មិនពាក់មួកសុវត្ថិភាព ៨នាក់ ) រថយន្តធំ ស្លាប់២នាក់ និងថ្មើរជើង២នាក់។
ចំណែកមូលហេតុនៃគ្រោះថ្នាក់ ដោយសារល្បឿន ស្រវឹង ប្រជែង មិនប្រកាន់ស្តាំ មិនគោរពសិទ្ធិ បត់គ្រោះថ្នាក់ កត្តាយានយន្ត និងកត្តាផ្លូវ។ រីឯរាជធានីខេត្ត ដែលគ្រោះថ្នាក់ និងរងគ្រោះ រួមមាន៖ ខេត្តកំពង់ធំ ខេត្តកំពត តាកែវ ខេត្តព្រៃវែង ភ្នំពេញ ខេត្តកំពង់ឆ្នាំង កំពង់ស្ពឺ ខេត្តបន្ទាយមានជ័យ និងខេត្តបាត់ដំបង។
របាយការណ៍បង្ហាញថា នាថ្ងៃទី១៣ ខែវិច្ឆិកា ដែលជាថ្ងៃទី១ នៃព្រះរាជពិធីបុណ្យអុំទូក គ្រោះថ្នាក់ចរាចរណ៍ បានកើតឡើង ១២ លើក បណ្តាលឲ្យស្លាប់ ៥នាក់ និងរបួស ១៥នាក់។ ចំណែកនៅថ្ងៃទី១៤ខែវិច្ឆិកាឆ្នាំ២០១៦ ដែលជាថ្ងៃទី២នៃព្រះរាជពិធីបុណ្យអុំទូក កើតមានគ្រោះថ្នាក់ចរាចរណ៍ ១២លើក បណ្តាលឲ្យស្លាប់ ៦នាក់ និងរបួស ២០នាក់។ រីឯគ្រោះថ្នាក់ចរាចរណ៍ នៅថ្ងៃទី១៥ ខែវិច្ឆិកា ដែលជាថ្ងៃទី៣ នៃព្រះរាជពិធីបុណ្យអុំទូក កើតមានគ្រោះថ្នាក់ចរាចរណ៍ ១០លើក បណ្តាលឲ្យស្លាប់ ៣នាក់ និងរបួស ១៥នាក់។
សូមរម្លឹកថា គ្រោះថ្នាក់ចរាចរណ៍ផ្លូវគោក រយៈពេល៣ថ្ងៃ ក្នុងព្រះរាជពិធីបុណ្យអុំទូក កាលពីឆ្នាំ២០១៥ បានកើតឡើង៥៥លើក បណ្តាលឲ្យស្លាប់២៥នាក់ និងរបួសសរុប៧៧នាក់៕
