ការសម្រេចបានអត្រាចាក់វ៉ាក់សាំងខ្ពស់នៅតាមបណ្តារដ្ឋ និងដែនដីទាំងឡាយ ធ្វើឲ្យអូស្ត្រាលីបើកដំណើរការជើងហោះហើរអន្តរជាតិឡើងវិញ និងបានបន្ធូរបន្ថយការដាក់កំហិតផ្សេងៗជាច្រើន។
ប៉ុន្តែអាជ្ញាធររំពឹងថាអត្រាឆ្លងនឹងមានការកើនឡើងដោយសារតែមានការឆ្លងមេរោគអំបូរថ្មីអូមីក្រុង និងដែលតាដែលជាអំបូរមានការឆ្លងខ្លាំង។ អាជ្ញាធរសុខាភិបាលកំពុងធ្វើការអំពាវនាវដល់ពលរដ្ឋឲ្យមកចាក់វ៉ាក់សាំងបង្ការដូសជំរុញដើម្បីទទួលបានការការពារខ្លួនកាន់តែខ្លាំង។
បច្ចេកវិទ្យាក្នុងការផលិតវ៉ាក់សាំងបង្ការដូសជំរុញដូចគ្នានឹងការការចាក់វ៉ាក់សាំងដូសទីមួយ និងដូសទីពីរដែរ។
"ដូសជំរុញមានសារៈសំខាន់ណាស់ដើម្បីផ្តល់ប្រព័ន្ធការពារបន្ថែម ជាពិសេសពេលដែលមេរោគអំបូរអូមីក្រុងអាចនឹងមានការឆ្លងរាលដាលនៅទូទាំងពិភពលោក"។ នេះបើតាមការគូសបញ្ជាក់ក្នុងខែធ្នូនេះពីអគ្គលេខាធិការក្រសួងសុខាភិបាលលោក Brendan Murphy។
យុទ្ធនាការចាក់ដូសជំរុញ
កាលពីដើមខែធ្នូនេះរដ្ឋមន្ត្រីក្រសួងសុខាភិបាលសហព័ន្ធលោក Greg Hunt បានបើកយុទ្ធនាការចាក់វ៉ាក់សាំងបង្ការដូសជំរុញនៅទូទាំងប្រទេសមុនពេលរដូវវិស្សមកាលនេះ ដោយលោកលើកទឹកចិត្តពលរដ្ឋអូស្ត្រាលីឲ្យចាក់វ៉ាក់សាំងបង្ការដូសជំរុញនេះឲ្យបានលឿនតាមដែលអាចធ្វើទៅបាន ដោយសារតែមានការព្រួយបារម្ភថាពលរដ្ឋដែលបានចាក់វ៉ាក់សាំងបានពីរដូសរួចហើយអាចមានការការពារមិនពេញលេញពីមេរោគអំបូរថ្មីអូមីក្រុង។
ជាលទ្ធផលក្រុមផ្តល់ប្រឹក្សាបច្ចេកទេសវ៉ាក់សាំង (ATAGI) បានសម្រេចកំណត់ រយៈពេល ក្នុងការទទួលវ៉ាក់សាំងដូសជំរុញពី6 ខែបន្ទាប់ពីចាក់វ៉ាក់សាំងបង្ការពេញលេញ មកត្រឹមរយៈពេលប្រាំខែវិញ។
មានពលរដ្ឋអូស្ត្រាលីរហូតដល់ 1.5 លាននាក់អាចទទួលការចាក់វ៉ាក់សាំងដូសជំរុញភ្លាមៗបាន។
ATAGI ក៏បានផ្តល់ ការអនុញ្ញាតឲ្យប្រើប្រាស់វ៉ាក់សាំង Moderna សម្រាប់ប្រើជាដូសជំរុញដូចគ្នានឹងវ៉ាក់សាំង Pfizer ដែរ។
ដើម្បីលើកកម្ពស់ការចូលរួមចាក់វ៉ាក់សាំងបង្ការដូសជំរុញ រដ្ឋាភិបាលថ្នាក់រដ្ឋ និងសហព័ន្ធ បានបើក យុទ្ធនាការចាក់ដូសជំរុញជាច្រើន នៅទូទាំងប្រទេស។
ការចាក់វ៉ាក់សាំងដូសជំរុញដល់មនុស្សចាស់
បើតាម ក្រុមផ្តល់ប្រឹក្សារបស់រដ្ឋាភិបាល បានឲ្យដឹងថាពលរដ្ឋទាំងឡាយណាដែលមានអាយុ70ឆ្នាំឡើង និងពលរដ្ឋដែលមានអាយុចាប់ពី 65ឆ្នាំហើយមានបញ្ហាសុខភាពរាំរ៉ៃ ពលរដ្ឋដែលមានប្រព័ន្ធការពាររាងកាយខ្សោយ និងពលរដ្ឋជនជាតិដើម Aboriginal and Torres Strait Islander ដែលមានអាយុលើសពី 50ឆ្នាំ និងមានបញ្ហាសុខភាពរាំរ៉ៃមានហានិភ័យធ្លាក់ខ្លួនឈឺធ្ងន់ធ្ងរប្រសិនបើឆ្លងវីរុសកូរ៉ូណា។
បើតាមស្ថិតិពីក្រសួងសុខាភិបាលសហព័ន្ធឲ្យដឹងថាចាប់ពីខែមករាឆ្នាំ 2020 មកមានពលរដ្ឋវ័យចំណាស់1910 នាក់បានបាត់បង់ជីវិតដោយសារតែ COVID-19។
ហានិភ័យក្នុងការឆ្លងមេរោគអំបូរដែលតា និងអូមីក្រុងមានកាន់តែខ្ពស់ ហើយវ៉ាក់សាំងបង្ការប្រាកដជាកាត់បន្ថយហានិភ័យក្នុងការធ្លាក់ខ្លួនឈឺធ្ងន់ធ្ងរ ឬស្លាប់ដោយសារតែមេរោគនេះ។
PM Scott Morrison received his COVID-19 booster vaccination alongside Jane Malysiak in NSW. Source: SMH POOL
ពលរដ្ឋអូស្ត្រាលីវ័យចំណាស់គឺជាក្រុមទីមួយហើយដែលត្រូវទទួលវ៉ាក់សាំងបង្ការដូសជំរុញនៅក្នុងកម្មវិធីចាក់វ៉ាក់សាំងថ្នាក់ជាតិ។
ពលរដ្ឋអូស្ត្រាលីអាយុចាប់ពី18ឆ្នាំឡើងអាចទទួលចាក់វ៉ាក់សាំង ប្រភេទមួយណាក៏បានក្នុងចំណោមវ៉ាក់សាំងទាំងពីរប្រភេទដែលអនុញ្ញាតឲ្យប្រើប្រាស់ដោយរដ្ឋាភិបាល។
អ្នកស្នាក់នៅមណ្ឌលមនុស្សចាស់អាចទទួលការចាក់វ៉ាក់សាំងដូសជំរុញនៅតាមគ្លីនិកចាក់វ៉ាក់សាំងរបស់រដ្ឋាភិបាលសហព័ន្ធ។
អ្នកគ្រប់គ្រងមណ្ឌលស្នាក់នៅនឹងធ្វើការពិភាក្សាពីការណាត់ជួបជាមួយអ្នកស្នាក់នៅ ឬអ្នកធ្វើការសម្រេចចិត្តជំនួសគេដែលជាផ្នែកមួយនៃកម្មវិធីចាក់វ៉ាក់សាំងបង្ការដូសជំរុញនេះ។
សូមស្វែងរកដំបូន្មានបន្ថែមស្តីពីការចាក់វ៉ាក់សាំងសម្រាប់អ្នកស្នាក់នៅមណ្ឌលថែទាំមនសុ្សចាស់ នៅទីនេះ ឬធ្វើការកក់ចាក់វ៉ាក់សាំងដូសជំរុញ នៅទីនេះ។
ការចាក់វ៉ាក់សាំងសម្រាប់កុមារ
រដ្ឋបាលគ្រប់គ្រងឱសថ និង ATAGI បានផ្តល់ការអនុញ្ញាតបណ្តោះអាសន្នដល់វ៉ាក់សាំង Pfizer សម្រាប់ចាក់លើកុមារដែលមានអាយុពី 5 ដល់ 11ឆ្នាំ។
ការផ្តល់ការអនុញ្ញាតនេះផ្អែកទៅលើលទ្ធផលនៃការសិក្សាស្រាវជ្រាវថ្មីៗមួយដោយបង្ហាញថាវ៉ាក់សាំងនេះមានប្រសិទ្ធភាពខ្ពស់បំផុត ហើយផលរំខានមានតែតិចតួចបំផុតប៉ុណ្ណោះ។ នេះបើតាមការគូសបញ្ជាក់នៅក្នុងសេចក្តីថ្លែងការណ៍របស់ ATAGI។
លោកអ្នកអាច កក់ចាក់វ៉ាក់សាំងបង្ការសម្រាប់កុមារ ចាប់ពីពេលនេះទៅ ហើយការចាក់វ៉ាក់សាំងបង្ការនឹងចាប់ផ្តើមធ្វើចាប់ពីថ្ងៃទី10 ខែមករា ឆ្នាំ 2022នេះ។
លោកអ្នកអាចនាំកូនទៅចាក់វ៉ាក់សាំបង្ការជាមួយវេជ្ជបណ្ឌិត (GPs) សេវាកម្មសុខាភិបាលជនជនជាតិដើម តាមឱសថស្ថាន និងគ្លីនិកចាក់វ៉ាក់សាំងរបស់រដ្ឋ និងរដ្ឋាភិបាលសហព័ន្ធ។
Vaccinating children can help reduce community transmission and prevent them passing the virus onto the wider community. Source: Getty Images
កុមារអាយុពី 5 ដល់ 11ឆ្នាំ ដែលមានកត្តាហានិភ័យសុខភាពក្នុងការធ្លាក់ខ្លួនឈឺខ្លាំង កុមារជនជាតិដើម Aboriginal and Torres Strait Islander និងកុមាររស់នៅក្នុងស្ថានភាពមានមនុស្សច្រើន ឬនៅតំបន់ដែលមានផ្ទុះការឆ្លងច្រើននឹងទទួលបានអត្ថប្រយោជន៍ការពារពីវ៉ាក់សាំងបង្ការកូវិដ-19 ដោយសារតែពួកគេមានហានិភ័យកាន់តែខ្ពស់ក្នុងការប៉ះពាល់នឹងអ្នកឆ្លង។ នេះបើតាមការគូសបញ្ជាក់ពី ATAGI។
កុមារក្នុងចន្លោះអាយុនេះដែលបានឆ្លងកូវិដ-19 នៅតែអាចទទួលចាក់វ៉ាក់សាំងបានបន្ទាប់ពីគេជាសះស្បើយពីជំងឺ។
បរិមាណវ៉ាក់សាំងដែលត្រូវផ្តល់ដល់កុមារ មានភាពខុសគ្នាពីបរិមាណវ៉ាក់សាំងផ្តល់ជូនមនុស្សពេញវ័យគឺត្រូវចាក់ក្នុងបរិមាណ 10មីក្រូក្រាមប៉ុណ្ណោះ បើធៀបទៅនឹងបរិមាណដែលផ្តល់ជូនពលរដ្ឋអាយុចាប់ពី 12ឆ្នាំឡើងទៅដែលមានរហូតដល់ 30មីក្រូក្រាម។
សម្រាប់កុមារដែលឈានចូលអាយុ 12ឆ្នាំបន្ទាប់ពីចាក់ដូសទីមួយរួចហើយអាចទទួលវ៉ាក់សាំងបង្ការកូវិដ-19 រូបមន្តផ្សំគ្នា (វ័យជំទង់/មនុស្សពេញវ័យ) ដើម្បីបំពេញដល់ដូសទីមួយរបស់គេ។
តើខ្ញុំអាចស្វែងរកជំនួយបន្ថែមនៅទីណាបាន?
បន្ទាប់ពីអង្គការសុខភាពពិភពលោកប្រកាសថាមេរោគអំបូរអូមីក្រុង "ជាអំបូរដែលមានការព្រួយបារម្ភ" រដ្ឋាភិបាលសហព័ន្ធបានខិតខំបើកយុទ្ធនាការជាថ្មីដើម្បី អប់រំដល់ពលរដ្ឋពីការចាក់វ៉ាក់សាំងបង្ការដូសជំរុញ។
Booster doses provide an added layer of protection. Source: AAPAAP Image/Bianca De Marchi
"មកទល់ពេលនេះគ្មានថ្នាំព្យាបាលណាមួយដែលមានប្រសិទ្ធភាពបំផុតក្នុងការព្យាបាលកូវិដ-19នោះទេ"។ អ្នកអាចចាក់វ៉ាក់សាំងដូសជំរុញបន្ទាប់ពីបានចាក់ដូសទីពីរបាន 5ខែមុន ហើយកាលបរិច្ឆេទក្នុងការចាក់វ៉ាក់សាំងដូសទីពីរនេះមានកត់ត្រានៅក្នុងប័ណ្ណចាក់វ៉ាក់សាំងឌីជីថលរបស់អ្នក។
ចាប់ពីថ្ងៃទី 15 ខែធ្នូនេះទៅ ការកក់ចាក់វ៉ាក់សាំងទាំងអស់ដោយរួមទាំងការកក់ចាក់វ៉ាក់សាំងសម្រាប់កុមារផង អាចធ្វើបានតាមរយៈ ការស្វែងរកកន្លែងចាក់វ៉ាក់សាំង។
លោកអ្នកអាចមើលការដាក់កំហិតផ្សេងៗនៅតាមរដ្ឋរបស់អ្នកតាមរយៈ ការតាមដានការដាក់កំហិតផ្សេងៗ។
ប្រសិនបើលោកអ្នកត្រូវការអ្នកបកប្រែដើម្បីស្វែងរកព័ត៌មានបន្ថែមពីកូវីដ-19 លោកអ្នកអាចទូរសព្ទទៅកាន់ សេវាកម្មបកប្រែអូស្ត្រាលី តាមលេខ 1800 131 450។
សម្រាប់ព័ត៌មានបន្ថែមស្តីពីការកក់ការចាក់វ៉ាក់សាំងបង្ការកូវិដ-19 សូមទូរសព្ទទៅខ្សែទូរស័ព្ទផ្តល់ជំនួយកូវិដ-19 តាមលេខ 1800 020 080។
សម្រាប់ព័ត៌មានបន្ថែមស្តីពី COVID-19, សូមទាក់ទងទៅវេជ្ជបណ្ឌិតរបស់លោកអ្នក ឬអ្នកមានអាជីពសុខាភិបាល។
ខណៈដែលដំបូន្មានស្តីពីវ៉ាក់សាំងបន្តមានជារឿយៗ សូមតាមដានព័ត៌មានថ្មីៗដោយមើល SBS Coronavirus Portal ដើម្បីអានព័ត៌មានជាភាសារបស់អ្នក។
