លក្ខខណ្ឌក្នុងការធ្វើដំណើរទៅកាន់រដ្ឋឃ្វីនឡែនបណ្តាលឲ្យមានមនុស្សកកកុញជាច្រើននៅរដ្ឋញូសៅវ៉េលតំរង់ជួរដើម្បីធ្វើតេស្តម៉ាស៊ីនធំ PCR។ នេះបើតាមរដ្ឋមន្ត្រីក្រសួងសុខាភិបាលរដ្ឋញូសៅវ៉េលលោក Brad Hazzard ដែលបានធ្វើការវាយប្រហាររដ្ឋឃ្វីនឡែនថាជា “ការធ្វើទេសចរណ៍ដោយធ្វើតេស្តរកមេរោគ”។
រដ្ឋមន្ត្រីក្រសួងសុខាភិបាលរដ្ឋឃ្វីនឡែនលោកស្រី Yvette D’Ath បានប្រកាសថារដ្ឋឃ្វីនឡែននឹងលុបចោលការធ្វើតេស្តថ្ងៃទីប្រាំសម្រាប់អ្នកដំណើរឆ្លងរដ្ឋ ទោះបីជាការដាក់ពាក្យស្នើសុំឆ្លងព្រំដែននៅតែតម្រូវឲ្យអ្នកធ្វើដំណើរយល់ព្រមធ្វើតេស្តក៏ដោយ។
នៅ Western Australia តំបន់ Perth និង Peel នឹងបន្តដាក់ឲ្យអនុវត្តវិធានសុខាភិបាលសាធារណៈ និងវិធានការការពារផ្សេងៗទៀតរហូតដល់ម៉ោង 6ព្រឹក ថ្ងៃអង្គារទី 4 ខែមករា 2022។
កាលពីម្សិលមិញនេះប្រទេសអូស្ត្រាលីបានកត់ត្រាករណីឆ្លងកូវិដ-19 លើស 10000ករណីក្នុងមួយថ្ងៃ ដែលការកើនឡើងនេះបណ្តាលមកពីមានការឆ្លងច្រើននៅរដ្ឋញូសៅវ៉េល រដ្ឋវិកថូរៀ រដ្ឋអូស្ត្រាលីភាគខាងត្បូង ដោយក្នុងនោះ រដ្ឋញូសៅវ៉េលបានកត់ត្រានូវករណីស្លាប់ដំបូងបង្ករដោយមេរោគអំបូរអូមីក្រុង។
ស្ថិតិ COVID-19
រដ្ឋញូសៅវ៉េលមានការឆ្លងកូវិដ-19 ថ្មីចំនួន 6,062 ករណី និងស្លាប់មួយករណី ខណៈរដ្ឋវិកថូរៀមានការឆ្លងថ្មីចំនួន 2738ករណី និងស្លាប់ 4ករណី។
រដ្ឋឃ្វីនឡែនមានការឆ្លងថ្មីក្នុងសហគមន៍ចំនួន 1158 ករណី ដោយក្នុងនោះមានអ្នកជំងឺកូវិដ-19 ចំនួន 6នាក់សម្រាកព្យាបាលនៅមន្ទីរពេទ្យ។
រដ្ឋ Tasmania កត់ត្រានូវការឆ្លងកូវិដ-19 ចំនួន 43 ករណី។
