ប្រាក់ជំនួយដែលបង់តែម្តងចំនួន $1000 សម្រាប់មនុស្សពេញវ័យ (ប្តីប្រពន្ធអាចទាមទារបានម្នាក់ $1000) និង $400 សម្រាប់កុមារនៅក្នុងបន្ទុក គឺមានសម្រាប់អ្នកទាំងឡាយណាដែលមានសិទ្ធិ តាមរយៈសេវា myGov ។
ប្រាក់ជំនួយស្តារឡើងវិញពេលមានគ្រោះមហន្តរាយរបស់រដ្ឋាភិបាលអូស្រ្តាលី (Australian Government Disaster Recovery Payment) ត្រូវបានរៀបចំឡើងដើម្បីផ្តល់ឱ្យបុគ្គល និងគ្រួសារដែលរងផលប៉ះពាល់ដោយផ្ទាល់ដោយគ្រោះមហន្តរាយនានាជាមួយនឹងមូលនិធិភ្លាមៗដើម្បីទូទាត់សម្រាប់តម្រូវការចាំបាច់ដូចជា អាហារ និងសំលៀកបំពាក់ ព្រមទាំងការរៀបចំកន្លែងស្នាក់នៅរយៈពេលខ្លី។
ចំពេលមានកិច្ចខិតខំប្រឹងប្រែងបោសសម្អាតដ៏ធំ បន្ទាប់ពីការបំផ្លិចបំផ្លាញនៃទឹកជំនន់ និងព្រឹត្ដិការណ៍ខ្យល់ព្យុះនៅ រដ្ឋគ្វីនស្លេន និង ញូសៅវែល វាអាចត្រូវចំណាយពេលជាច្រើនខែ ឬអាចថាជាច្រើនឆ្នាំ មុនពេលដែលអ្នកស្រុកអាចស្តារនិងសាងសង់ឡើងវិញបានយ៉ាងពេញលេញ ឬរកផ្ទះ និងអាជីវកម្មមកជំនួសបាន។
ដើម្បីមានសិទ្ធិទទួលបានការទូទាត់សំណងគ្រោះមហន្តរាយ អ្នកត្រូវតែរងរបួសយ៉ាងធ្ងន់ធ្ងរនៅក្នុងទឹកជំនន់។ ជាសមាជិកគ្រួសារផ្ទាល់របស់នរណាម្នាក់ដែលបានស្លាប់ ឬបាត់ខ្លួនដោយសារទឹកជំនន់។ និង/ឬមានការខូចខាតយ៉ាងខ្លាំងដល់ផ្ទះរបស់អ្នក។
ដើម្បីមានលក្ខណៈគ្រប់គ្រាន់ថាជាអគារឬលំនៅដ្ឋានដែលរងការខូចខាតខ្លាំងនោះ លំនៅដ្ឋានត្រូវតែ៖
- ត្រូវបំផ្លិចបំផ្លាញ ឬត្រូវខ្ទេចខ្ទីទាំងស្រុង
- ត្រូវបានប្រកាសថារចនាសម្ព័នមិនអាចទ្រទ្រង់បាន
- ខូចខាតផ្នែកខាងក្នុងយ៉ាងធ្ងន់ធ្ងរ
- មានផ្ទៃខាងក្នុងដែលខូចខាតដោយសារទឹកជំនន់
- មានទឹកស្អុយហូរចូលទៅខាងក្នុង និង/ឬ
- មានទ្រព្យសម្បត្តិខូចខាតធ្ងន់ធ្ងរនៅក្នុងឬនៅលើអចលនទ្រព្យនោះ។
ប្រជាជនមានពេលរហូតដល់ថ្ងៃ ទី 28 ខែសីហា ឆ្នាំ 2022 ដើម្បីធ្វើការទាមទារសំណងប្រសិនបើពួកគេនៅក្នុងរដ្ឋគ្វីនស្លេន ឬរហូតដល់ថ្ងៃទី 1 ខែកញ្ញា ប្រសិនបើពួកគេនៅក្នុងរដ្ឋញូសៅវែល។
អ្នកដែលមានសិទ្ធិទាមទារសំណងត្រូវតែរស់នៅក្នុងរដ្ឋាភិបាលក្នុងតំបន់ចំនួន១៧ (17 LGAs) ដែលត្រូវបានគេចាត់ទុកថារងផលប៉ះពាល់ដោយទឹកជំនន់នៅក្នុងរដ្ឋគ្វីនស្លេន ឬនៅ តំបន់ 17 ដែលរងផលប៉ះពាល់នៅក្នុងរដ្ឋញូសៅវែល ។
ការទាមទារប្រាក់ជំនួយអាចធ្វើទៅបានតាមជំហានខាងក្រោម៖
- ចុះឈ្មោះចូលក្នុងគណនី myGov ហើយជ្រើសរើសយក Centrelink នៅក្នុងសេវាកម្មតភ្ជាប់របស់អ្នក។ការដែលសំខាន់ អ្នកត្រូវប្រាកដថា Centrelink ត្រូវបានតភ្ជាប់ទៅគណនី myGov របស់អ្នក ដោយប្រើ លេខគណនីអតិថិជន Centrelink Customer Reference Number (CRN) ឬ ប្រសិនបើអ្នកមិនមានលេខ CRNទេ អ្នកអាចបញ្ជាក់អត្តសញ្ញាណរបស់អ្នកដោយផ្តល់នូវឯកសារផ្លូវការមួយចំនួន។
- ជ្រើសរើសយក “Make a Claim or View Claim Status”.
- អូសចុះទៅ “Help in an Emergency” ហើយជ្រើសរើស “Get Started”.
- ជ្រើសរើសយក “Apply for Disaster Recovery Payment”.
- ជ្រើសរើស “Begin”.
- ឆ្លើយសំណួរដែលបញ្ជាក់ថាអ្នកមានសិទ្ធិនិងទាមទារសំណា ដោយត្រូវប្រាកដថាអ្នកមានរូបថត ឯកសារ និង/ឬ អ្វីផ្សេងទៀតដែលអ្នកអាចភ្ជាប់ដើម្បីបញ្ជាក់ថាជាភស្តុតាងនៃការខូចខាតដោយសារទឹកជំនន់។
- ចុច “Submit” ដើម្បីដាក់ពាក្យទាមទារសំណងរបស់អ្នក។
- អ្នកអាចចុចលើប៊ូតុង “Make a Claim or View Claim Status” ពីគេហទំព័រ Centrelink ពីដំបូងនៅលើគេហទំព័រ myGov ដើម្បីមើលថាតើប្រាក់ជំនួយរបស់អ្នកកំពុងតែដំណើរការនៅក្នុងពេលប៉ុន្មានថ្ងៃនិងប៉ុន្មានសប្តាហ៍ខាងមុខ។
