លោក Anthony Albanese ឈ្នះជានាយករដ្ឋមន្ត្រីអូស្ត្រាលីអាណត្តិទីពីរ ខណៈបក្សលេប័រធានាបានរដ្ឋាភិបាលសំឡេងភាគច្រើន

លោក Anthony Albanese ធានាបាននូវសំឡេងភាគច្រើននៅក្នុងសភា ខណៈដែលមេដឹកនាំគណបក្សប្រឆាំង លោក Peter Dutton បានបាត់បង់កៅអីរបស់លោកនៅរដ្ឋគ្វីនស្លេន។

Australian Prime Minister Anthony Albanese, Partner Jodie Haydon and son Nathan acknowledge the crowd at the Labor Election Night function at Canterbury-Hurlstone Park RSL Club. Source: AAP / LUKAS COCH/AAPIMAGE

លោក Anthony Albanese ទទួលបាននូវជ័យជម្នះនៅក្នុងការបោះឆ្នោតសហព័ន្ធឆ្នាំ 2025 ខណៈដែលបក្សលេប័រត្រូវបានកំណត់ឱ្យគ្រប់គ្រងរដ្ឋាភិបាលសម្រាប់អាណត្តិទីពីរជាមួយនឹងសំឡេងភាគច្រើនកាន់តែច្រើនជាងមុន។

លោក Albanese បានប្រាប់អ្នកគាំទ្រនៅទីក្រុងស៊ីដនីថា ការបម្រើការងារជានាយករដ្ឋមន្ត្រីគឺជាកិត្តិយសដ៏ខ្ពង់ខ្ពស់បំផុតនៃជីវិតរបស់លោក។

លោកបាននិយាយថា "វាគឺនៅជាមួយនឹងអារម្មណ៍ដ៏ជ្រាលជ្រៅនៃភាពជាមនុស្ស និងស្មារតីទទួលខុសត្រូវយ៉ាងជ្រាលជ្រៅ ដែលរឿងដំបូងដែលខ្ញុំធ្វើនៅយប់នេះគឺនិយាយពាក្យថា 'អរគុណ' ទៅកាន់ប្រជាជនអូស្ត្រាលីសម្រាប់ឱកាសដើម្បីអាចបន្តបម្រើប្រទេសល្អបំផុតនៅលើផែនដីនេះ" ។

“ថ្ងៃនេះ ប្រជាជនអូស្ត្រាលីបានបោះឆ្នោតឲ្យគុណតម្លៃអូស្ត្រាលី៖ ដើម្បីភាពយុត្តិធម៌ សេចក្តីប្រាថ្នា និងឱកាសសម្រាប់អ្នកទាំងអស់គ្នា"។

"ប្រជាជនអូស្ត្រាលីបានបោះឆ្នោតសម្រាប់អនាគតដែលប្រកាន់យកនូវគុណតម្លៃទាំងនេះ ដែលជាអនាគតដែលកសាងឡើងនៅលើអ្វីៗគ្រប់យ៉ាងដែលនាំឱ្យយើងរួបរួមគ្នា" ។

បក្សលេប័រនឹងគ្រប់គ្រងនៅក្នុងសិទ្ធិរបស់ខ្លួន ជាមួយនឹងចំនួនកើនឡើងនៅក្នុងសភា បន្ទាប់ពីមានការផ្លាស់ប្តូរទៅខាងរដ្ឋាភិបាលនៅទូទាំងរដ្ឋជាច្រើន។

ក្នុងចំណោមកៅអីដែលទទួលបានមកសម្រាប់បក្សលេប័រនោះ ក៏មានអាសនៈ Dickson របស់ប្រធានបក្សប្រឆាំងលោក Peter Dutton នៅក្នុងរដ្ឋ Queensland ផងដែរ។

លោក Dutton បានចាញ់លោកស្រី Ali France នៃបក្សលេប័រ ដែលនេះជាលើកទីមួយហើយ ដែលមេដឹកនាំគណបក្សប្រឆាំងបានបាត់បង់កៅអីរបស់ពួកគេ នៅក្នុងការបោះឆ្នោតសហព័ន្ធ។

Australian Liberal Party leader Peter Dutton, third left, stands with his family as he makes his concession speech following the general election in Brisbane. Source: AP / Pat Hoelscher/AP

លោក Dutton បានទទួលខុសត្រូវទាំងស្រុងចំពោះការចាញ់ឆ្នោតរបស់គណបក្សសម្ព័ន្ធនេះ។

លោកបាននិយាយថា “យើងធ្វើមិនបានល្អគ្រប់គ្រាន់ក្នុងអំឡុងពេលនៃយុទ្ធនាការបោះឆ្នោតនេះ នោះគឺវាច្បាស់ណាស់ នៅយប់នេះ”។

"ខ្ញុំតែងតែចង់រស់នៅក្នុងជីវិតសាធារណៈ ដើម្បីភាពល្អប្រសើរបំផុតសម្រាប់ប្រទេសរបស់យើង និងល្អប្រសើរបំផុតសម្រាប់ប្រជាជនអូស្ត្រាលីគ្រប់រូប”។

«វាជាឱកាសប្រវត្តិសាស្ត្រសម្រាប់គណបក្សលេប័រ ហើយយើងទទួលស្គាល់ប្រវត្តិសាស្រ្តនោះ»។

ក្នុងចំណោមគោលនយោបាយដែលបានប្រកាសដោយលោក Albanese គឺបានអនុញ្ញាតឱ្យអ្នកទិញផ្ទះលើកដំបូងចូលទៅក្នុងទីផ្សារអចលនទ្រព្យជាមួយនឹងប្រាក់កក់ចំនួន 5 ភាគរយ ខណៈពេលដែលមានការសន្យាថានឹងចំណាយ មួយម៉ឺនលានដុល្លារដើម្បីសាងសង់ផ្ទះថ្មីរហូតដល់ទៅ មួយសែនខ្នង។

លោកក៏បានសន្យាថានឹងផ្តល់ប្រាក់ចំនួន 8.5 ពាន់លានដុល្លារ សម្រាប់ការចូលទៅជួបគ្រូពេទ្យពិនិត្យជំងឺទូទៅដែលបានឧបត្ថម្ភធនចំនួន 18 លានដងបន្ថែមទៀត ជារៀងរាល់ឆ្នាំ ដែលជាផ្នែកមួយនៃការពង្រឹង Medicare ។

បក្សលេប័រ ក៏បានប្តេជ្ញាចិត្តជាមួយនឹងថវិកាចំនួន 2.3 ពាន់លានដុល្លារ ដើម្បីឧបត្ថម្ភធនដល់អាគុយសូឡាសម្រាប់ប្រើប្រាស់ក្នុងគ្រួសារ ដើម្បីរក្សាទុកថាមពលពន្លឺព្រះអាទិត្យ ខណៈពេលដែលសន្យាផងដែរ ក្នុងការបង្ក្រាបការឡើងថ្លៃទំនិញហួសហេតុដោយផ្សារទំនើប៕