ចំនួនអ្នកចេញទៅបោះឆ្នោតដល់ទៅជាង ៨០% នេះ ត្រូវបានលោក ស៊ិក ប៊ុនហុក ប្រកាសថា ជាជោគជ័យនៃការរៀបចំការបោះឆ្នោតនៅកម្ពុជា។
លោក ស៊ិក ប៊ុនហុក ក៏បានប្រកាសថា គ.ជ.ប បានរៀបចំកម្មវិធីពិសេស ក្នុងការផ្សព្វផ្សាយលទ្ធផលបោះឆ្នោតបឋម នៅយប់ថ្ងៃទី២៩ ខែកក្កដា ឆ្នាំ២០១៨ តាមទូរទស្សន៍ជាតិកម្ពុជា។ រីឯលទ្ធផលបណ្តោះអាសន្ននៃការបោះឆ្នោត នឹងត្រូវប្រកាសនៅថ្ងៃទី១១ ខែសីហា ឆ្នាំ២០១៨ ខណៈដែលលទ្ធផលបោះឆ្នោតផ្លូវការ នឹងប្រកាសនៅចន្លោះពីថ្ងៃទី១៥សីហា ដល់ថ្ងៃទី១០ ខែកញ្ញា ឆ្នាំ២០១៨។
ចំពោះសភាពការណ៍ទូទៅនៃការបោះឆ្នោត នាថ្ងៃអាទិត្យ ទី២៩កក្កដា ត្រូវបានលោក ស៊ិក ប៊ុនហុក លើកឡើងថា ដំណើរការបោះឆ្នោត នៅទូទាំងប្រទេស បានប្រព្រឹត្តទៅដោយរលូន មិនមានអំពើហិង្សា កើតឡើងទេ។ រីឯអ្នកបោះឆ្នោត មានទឹកមុខរីករាយ ក្នុងការចេញទៅបោះឆ្នោត។ ក្នុងនោះ ក៏មិនមានការគំរាមកំហែងណាមួយទេ។
សូមរម្លឹកថា នៅពេលបិទបញ្ចប់ការបោះឆ្នោត នៅម៉ោង ៣ រសៀលនេះ គ.ជ.ប ចាប់ផ្តើមរាប់សន្លឹកឆ្នោតភ្លាមៗ នៅតាមការិយាល័យបោះឆ្នោតនីមួយៗ ហើយលទ្ធផលនឹងបិទផ្សាយនៅតាមការិយាល័យបោះឆ្នោតទាំងនោះ ពេលរាប់សន្លឹកឆ្នោតរួចរាល់។ ដោយឡែក លទ្ធផលបោះឆ្នោតបណ្តោះអាសន្ន នឹងត្រូវគ.ជ.ប ប្រកាសនៅថ្ងៃទី១១ ខែសីហា ឆ្នាំ២០១៨។ រីឯលទ្ធផលបោះឆ្នោតផ្លូវការ ការបែងចែកអាសនៈ និងការកំណត់បេក្ខជនជាប់ឆ្នោត នឹងត្រូវគ.ជ.ប ប្រកាសចន្លោះពីថ្ងៃទី១៥ ខែសីហា ដល់ថ្ងៃទី១០ ខែកញ្ញា ឆ្នាំ២០១៨។
កាលពីបោះឆ្នោត ឆ្នាំ២០១៣ គ.ជ.ប បានប្រកាសថា ចំនួនអ្នកមានឈ្មោះក្នុងបញ្ជីបោះឆ្នោត ៩.៨៧៥.៤៥៣ នាក់។ រីឯអ្នកបានទៅបោះឆ្នោត មានចំនួន ៦.៧៣៥.២៥៥ នាក់ ស្មើនឹង ៦៩,៧១%៕
