ការិយាល័យស្ថិតិអូស្រ្តាលីនិយាយថា នៅក្នុងពេលប៉ុន្មានឆ្នាំទៀត ៣០%នៃចំនួនមនុស្សចាស់ដែលមានអាយុចាប់ពី៦៥ឆ្នាំទៅគឺជាអ្នកដែលមានដើមកំណើតមកពីប្រទេសដែលមានវប្បធម៌និងភាសាដាច់ដោយឡែក។ មិនតែប៉ុណ្ណោះ នៅមានរនាំងវប្បធម៌ជាក់លាក់មួយចំនួនដែលអាចរារាំងពួកគាត់ខ្លះពីការប្រើប្រាស់សេវាកម្មAged care ទៀតផង។
ការកើនឡើងនូវជម្រើសនៅក្នុងកំណែទម្រង់ការមើលថែតាមផ្ទះ ដែលចាប់ផ្តើមឡើងនៅថ្ងៃទី២៧កុម្ភៈឆ្នាំ២០១៧ នឹងធ្វើឲ្យសេវាកម្មមើលថែទាំតាមផ្ទះចំពោះពលរដ្ឋអូស្រ្តាលីចាស់ៗកាន់តែប្រសើរឡើង។
នៅពេលជាមួយគ្នានេះ កម្មវិធី My Aged Care របស់រដ្ឋាភិបាលអូស្រ្តាលីដើរតួនាទីជាកម្មវិធីដ៏ពេញលេញមួយដែលមានសេវាកម្មមើលថែទាំមនុស្សចាស់គ្រប់យ៉ាងនៅទូទាំងប្រទេស ដោយរាប់ចាប់តាំងពីការកាត់ស្មៅ នាំទៅផ្សារទិញទំនិញ ឬក៏បោសសំអាត រហូតដល់ការងារស្មុគស្មាញដូចជា លទ្ធភាពក្នុងការជួយស្វែងរកទីស្នាក់អាស្រ័យទៀតផង។
ដូច្នេះតើលោកអ្នកត្រូវទៅរកនៅកន្លែងណា នៅពេលដែលលោកកំពុងតែនៅក្នុងផ្ទះ ហើយត្រូវការសេវាកម្មមើលថែមនុស្សចាស់នោះ?
តើខ្ញុំត្រូវទាក់ទងទៅអ្នកណា ប្រសិនបើខ្ញុំត្រូវការជំនួយមើលថែទាំដ៏ត្រឹមត្រូវឬក៏ការជួយគាំទ្រដល់រូបខ្ញុំនោះ?
កម្មវិធី My Aged Care របស់រដ្ឋាភិបាលបានបង្កើតនូវមជ្ឈមណ្ឌលទូរសព្ទ (Call Centre) និងគេហទំព័រដើម្បីជាជំនួយដល់លោកអ្នកក្នុងការស្វែងរកសេវាកម្មដែលអាចជួយឲ្យលោកអ្នករស់នៅក្នុងផ្ទះយូរអង្វែងបាន។ អ្នកអាចទូរសព្ទទៅនៅចន្លោះម៉ោង ៨ព្រឹកដល់ម៉ោង៨យប់ រៀងរាល់ថ្ងៃធ្វើការ និងចន្លោះពីម៉ោង១០ព្រឹក ដល់ម៉ោង២ថ្ងៃនៅថ្ងៃសៅរ៍ តាមរយៈលេខ 1800200422 ឬចូលទៅកាន់គេហទំព័រ www.myagedcare.gov.au ។
តើបន្ទាប់មកត្រូវធ្វើដូចម្តេចទៀត? ហើយតើខ្ញុំធ្វើម៉េចទើបអាចដឹងថាសេវាកម្មណាខ្លះដែលខ្ញុំអាចទទួលបាន?
1 ដំបូងបុគ្គលិកនៃមណ្ឈមណ្ឌលនេះបង្កើតនូវប្រវត្តិរូបអតិថិជនមួយសម្រាប់លោកអ្នក ដែលរួមមានទាំងលេខ Medicare Card លេខPension Card (ប្រសិនបើអ្នកមាន) សេចក្តីលំអិតពីវេជ្ជបណ្ឌិតរបស់លោកអ្នក បញ្ជីឈ្មោះថ្នាំដែលលោកអ្នកកំពុងតែប្រើប្រាស់ លេខទូរសព្ទទំនាក់ទំនងនៃក្រុមគ្រួសាររបស់លោកអ្នក អាសយដ្ឋាន និងលេខទូរសព្ទរបស់លោកអ្នក។ លោកអ្នកត្រូវប្រាប់ពួកគេផងដែរថា តើលោកអ្នកកំពុងតែទទួលបាននូវជំនួយអ្វីខ្លះ លោកអ្នកមានបញ្ហាសុខភាពអ្វីខ្លះ ហើយលោកអ្នកចាត់ចែងបែបណាពេលនៅផ្ទះ។
2 នៅពេលដែលប្រវត្តិរូបអតិថិជនរបស់លោកអ្នកបង្កើតបានរួចហើយ បុគ្គលិកមជ្ឈមណ្ឌលនេះនឹងណែនាំអ្នកទៅកាន់សេវាកម្មមើលថែទាំមនុស្សចាស់ដែលមាននៅក្នុងតំបន់របស់អ្នក។ ពួកគេនឹងណែនាំលោកអ្នកថាតើសេវាកម្មអ្វីខ្លះដែលសាកសមទៅនឹងតម្រូវការរបស់លោកអ្នកបំផុត ថ្លៃចំណាយសម្រាប់សេវាកម្មនោះ រួមបញ្ចូលទាំងថ្លៃប៉ាន់ប្រមាណនិងផ្តល់ជូនលោកអ្នកនូវជម្រើសសម្រាប់ធ្វើការជ្រើសរើសអ្នកផ្តល់សេវកម្មផងដែរ។
3 នៅពេលដែលលោកអ្នកបានចុះឈ្មោះរួចរាល់ហើយ ពាក្យស្នើសុំរបស់លោកអ្នកនឹងត្រូវផ្ញើទៅអ្នកដែលផ្តល់សេវាកម្មនេះ។ អ្នកផ្តល់សេវាកម្មនឹងទាក់ទងលោកអ្នកដើម្បីរៀបចំពេលវេលាមកមើលលោកអ្នកដើម្បីចាប់ផ្តើមបម្រើនូវសេវាកម្មដែលលោកអ្នកត្រូវការ។
4 ប្រសិនបើលោកអ្នកមានតម្រូវការស្មុគស្មាញច្រើនជាងនេះ ក្រុមវាយតម្លៃសេវាកម្មមើលថែមនុស្សចាស់ អ្នកមកសួរសុខទុក្ខអ្នកដលើផ្ទះ ដើម្បីធ្វើការវាយតម្លៃនៅផ្ទះនិងរៀបចំផែនការមើលថែសម្រាប់លោកអ្នក។
តើមានព័ត៌មានជាភាសាកំណើតរបស់លោកអ្នកដែរឬទេ?
មានសេវាកម្មមើលថែទាំមនុស្សចាស់ពហុវប្បធម៌ក្នុងតំបន់នៅទូទាំងប្រទេសអូស្រ្តាលី។
នៅពេលដែលអ្នកទូរសព្ទទៅ My Aged Care លោកអ្នកអាចសុំឲ្យគេរៀបចំអ្នកបកប្រែជូនលោកអ្នកបានជានិច្ច។ ឬក៏គ្រាន់តែនិយាយឈ្មោះភាសាចេញមក ពួកគេនឹងភ្ជាប់ជូនលោកអ្នកភ្លាម។ ឬលោកអ្នកអាចទូរសព្ទទៅកាន់សេវាកម្មបកប្រែ 131 450 ហើយសុំឲ្យពួកគេភ្ជាប់ទៅមជ្ឍមណ្ឌលទូរសព្ទរបស់My Aged Care ជូនលោកអ្នក។
My Aged Care អាចជួលលោកអ្នកយល់ដឹងពីព័ត៌មានមើលថែទាំមនុស្សចាស់ជាភាសារបស់លោកអ្នក។ មានការបោះពុម្ពជាភាសាដទៃក្រៅពីភាសាអង់គ្លេសមួយចំនួនផងដែរពាក់ព័ន្ធនឹងមនុស្សចាស់ និងសេវាកម្មមើលថែទាំមនុស្សចាស់នេះ។
