ក្លាយជាអ្នកមើលថែក្មេងអាចផ្តល់ជាផលវិជ្ជមានដល់ជីវិតក្មេង និងអាចជាបទពិសោធន៍មួយដ៏ប្រសើរ។
តើអ្នកណាខ្លះអាចក្លាយជាអ្នកមើលថែក្មេង?
អ្នកត្រូវ៖
-ជាជនជាតិអូស្ត្រាលី ឬមានសិទ្ធិរស់នៅអចិន្ត្រៃយ៍
-មានសុខភាពល្អ
- មិនមានជាប់បទឧក្រិដ្ឋ
- ជាការល្អបំផុតដែលមានអាយុចាប់ពី២៥ឆ្នាំឡើងទៅ
ជាការល្អផងដែរ ប្រសិនបើអ្នកមានបន្ទប់ទំនេរមួយ ដោយសារជាការចំាបាច់ ដែលក្មេងៗទើបតែជួបនូវបញ្ហាលំបាន អាចមាននូវទីកន្លែងមួយដែលសុវត្ថិភាព ដែលគេអាចចាត់ថាជាផ្ទះរបស់គេបាន។
អ្នកត្រូវមានភាពអំណត់ និងចិត្តទូលាយ ប៉ុន្តែមិនទាស់អីនោះទេ បើសិនជាអ្នកនៅលីវឬមានគ្រួសារ អ្នកជាអ្នកប្រតិព័ទ្ធភេទផ្ទុយគ្នា ឬក៏ដូចគ្នា ឬក៏អ្នកមានផ្ទះផ្ទាល់ខ្លួន ឬជាអ្នកជួលផ្ទះនៅនោះ។
ជម្រើសមើលថែក្មេងត្រឹមត្រូវសម្រាប់អ្នក
ទោះជាការមើលថែកូនអាចជាការមើលថែក្នុងរយៈពេលវែង ហើយពេលខ្លះអាចឈានដល់ការយកជាកូនចិញ្ចឹម ដោយឡែកភាគច្រើនគឺជាការមើលថែក្នុងរយៈពេលខ្លី។
អ្នកមើលថែក្មេងភាគច្រើន នឹងស្វាគមន៍ក្មេងចូលនៅផ្ទះរបស់គេ ក្នុងរយៈពេលពីពីរបីថ្ងៃ ទៅពីរបីខែ។
-ការមើលថែលក្ខណៈបន្ទាន់ (ចាប់ពី១២ម៉ោងឡើងទៅ): វាអាចជាការផ្តល់ដំណឹងក្នុងរយៈពេលខ្លី ហើយអាចមើលក្មេងចាប់ពីពីរបីម៉ោងទៅពីរបីខែ។
-ការមើលថែបែបដកឃ្លាសំរាក (ពីរថ្ងៃទៅ ៣សប្តាហ៍): ការមើលថែបែបដកឃ្លាសំរាក ជួយឱ្យអ្នកមើលថែក្មេងអាចមានពេលសំរាក។
-ការមើលថែបែបសំរួលនិងជំនួស (រហូតដល់១២ខែ): អ្នកមើលថែក្មេងនឹងនំាក្មេងចូលនៅផ្ទះរបស់គេ រហូតដល់ក្រុមគ្រួសារក្មេងអាចទទួលមើលថែកូនវិញដោយសុវត្ថិភាព។
-ការមើលថែបែបអាណាព្យាបាល: នេះគឺជាសេចក្តីបង្គាប់ចេញដោយតុលាការ ក្នុងការយកក្មេងទៅនៅជាមួយបងប្អូន ឬបុគ្គលវ័យជំទង់ ដែលក្មេងស្គាល់ រហូតដល់ក្មេងមានអាយុ១៨ឆ្នាំ។ ប្រសិនបើក្មេងនោះគ្រាន់តែនៅជាមួយបុគ្គលនោះបណ្តោះអាសន្ន នោះហៅថាការមើលថែបែបក្រុមគ្រួសារឬសាច់ញាតិ។
-អាចទទួលជាកូនចិញ្ចឹមបន្ទាប់ពីបានមើលថែ (មួយជីវិត): ក្មេងនឹងត្រូវទទួលជាកូនចិញ្ចឹម ដោយអ្នកមើលថែ ខណៈពេលដែលកំពុងទទួលបានប្រាក់ឧបត្ថម្ភពីគ្រួសារកំណើតរបស់ក្មេង (តាមដែលអាចធ្វើបាន)។
-ការមើលថែរយៈពេលវែង (ចាប់ពី៦ខែឡើង)៖ នៅពេលក្មេងមិនអាចត្រឡប់ទៅនៅជាមួយក្រុមគ្រួសារគេវិញ ហើយក៏មិនអាចដាក់ក្រោមការមើលថែបែបអាណាព្យាបាលឬទទួលយកជាកូនចិញ្ចឹមបាន មិនថានោះជាជម្រើសរបស់ក្មេង ឬដោយសារហេតុផលវប្បធម៌សាសានាណាមួយ។
ជំហានដំបូង៖ ដាក់ពាក្យសុំ
ដើម្បីក្លាយជាអ្នកមើលថែក្មេង អ្នកត្រូវដាក់ពាក្យសុំតាមរយៈភ្នាក់ងារមើលថែក្មេង។
រដ្ឋនិមួយៗមាននូវបញ្ជីភ្នាក់ងាររបស់ខ្លួន (អ្នកអាចចុចទំព័រភ្ជាប់នៅខាងក្រោមនៃអត្ថបទនេះ នៅផែ្នកទំព័រភ្ជាប់សំខាន់ៗ)
ត្រួតពិនិត្យប្រវត្តិ និងបណ្តុះបណ្តាល
នៅពេលអ្នកដាក់ពាក្យសុំហើយ គឺនឹងមាននូវវគ្គបណ្តុះបណ្តាលនិងវាយតម្លៃ ដែលអាចមានរយៈពេលដល់៦ខែ ភ្នាក់ងារនឹងធ្វើការជិតស្និទ្ធជាមួយអ្នកលើគ្រប់ចំនុចទាំងអស់ ដើម្បីឱ្យអ្នកក្លាយជាអ្នកមើលថែម្នាក់។
“គេនឹងមកដល់ផ្ទះអ្នកធ្វើការពិនិត្យ ដើម្បីប្រាកដថាក្មេងទទួលបានសុវត្ថិភាព ពិនិត្យមើលប្រវត្តិនិងឯកសាររបស់អ្នក ហើយគេនឹងប្រាប់អ្នកពីអ្វីដែលអ្នកនឹងរំពឹងទុក ពីដំណើរការ ពិនិត្យមើលការមើលថែសមស្រប និងការមើលថែបែបណាដែលសមនឹងស្ថានការណ៍រស់នៅរបស់អ្នក” ការពន្យល់ពីអ្នកមើលថែក្មេងនៅរដ្ឋNSW Sharon Broady។
ជំនួយពីភ្នាក់ងារ
ភ្នាក់ងារមើលថែក្មេងរបស់អ្នកនឹងចាត់ចែងបុគ្គលិកទំនាក់ទំនងម្នាក់ និងសេវាខ្សែទូរស័ព្ទ២៤ម៉ោង ដែលអ្នកអាចទូរស័ព្ទទាក់ទងប្រសិនបើអ្នកត្រូវការជំនួយ ។ អ្នកក៏នឹងអាចក្លាយជា អ្នកមើលថែបែបដកឃ្លាសំរាក ហើយវគ្គបណ្តុះបណ្តាលជាច្រើនទៀតនឹងផ្តល់ឱ្យនៅពេលនោះ។
ប្រាក់បង់នឹងត្រូវផ្តល់ឱ្យ ចំពោះថ្លៃមើលថែក្មេង ។ ចំនួនប៉ុន្មានគឺអាស្រ័យលើប្រភេទនៃការមើលថែ អាយុក្មេង និងសេចក្តីត្រូវការរបស់ក្មេង។
ការមើលថែពហុវប្បធម៌
ស្របពេលដែលភ្នាក់ងារខ្លះនៅជុំវិញប្រទេសមានជំនាញក្នុងការមើលថែក្មេងពហុវប្បធម៌ ភ្នាក់ងារទាំងអស់នោះនឹងប្រឹងអស់លទ្ធភាពក្នុងការបញ្ជូនក្មេងដាក់នៅជាមួយក្រុមគ្រួសារដែលមានវប្បធម៌ដូចក្មេង។
“ជាការចំាបាច់ណាស់ដែលក្មេង ត្រូវបានដាក់ឱ្យរស់នៅជាមួយក្រុមគ្រួសារដែលមានវប្បធម៌តែមួយ គោរពសាសនា និងប្រពៃណីតែមួយ ដែលអាចជួយឱ្យក្មេងមានអារម្មណ៍ថាដូចខ្លួនគេ ធ្វើដូច្នេះ ពួកគេមិនមានអារម្មណ៍ចម្លែក ដោយសារជាក់ស្តែងណាស់ ក្នុងការត្រូវបានបញ្ជូនចេញពីក្រុមគ្រួសារ មិនថាមកពីមូលហេតុណាមួយនោះទេ អាចជាការបំបាក់ស្មារតីក្មេងបាន។” ពន្យល់ពីSharon Broady។
ជាការងាយស្រួលផងដែរសម្រាប់ក្មេង នៅពេលក្មេងត្រូវត្រឡប់ទៅគ្រួសារកំណើតរបស់គេវិញ។
ទំព័រភ្ជាប់សំខាន់ៗ
Call for more multicultural foster carers
ដើម្បីស្វែងរកភ្នាក់ងារមើលថែក្មេងក្នុងរដ្ឋរបស់អ្នកសូមចុចទំព័រភ្ជាប់ខាងក្រោម៖
Foster Care in South Australia
Multicultural foster care
Settlement Services International (New South Wales)
Creating Links (New South Wales)
Fostering Connections (Victoria)
Mercy Community Services (Queensland)
