ការបញ្ចេញមតិនៅក្នុងប្រទេសអូស្រ្តាលីគឺមិនគ្រាន់តែជាការនិយាយទៅកាន់សមាជិកសភាក្នុងតំបន់ប៉ុណ្ណោះនោះទេ។ សំខាន់ត្រូវដឹងថា តើយើងត្រូវតវ៉ាជាមួយនរណា ហើយនរណាជាអ្នកទទួលខុសត្រូវតាមផ្នែកនិមួយៗនៅក្នុងរដ្ឋាភិបាល។
អូស្រ្តាលីមានប្រវត្តិសាស្រ្តយូរយាណាស់មកហើយនៃការចូលរួមពីសំណាក់ប្រជាជនស៊ីវិល ប៉ុន្តែអ្នកដែលទើបតែមកដល់ថ្មីជាច្រើននៅតែខ្លាចរអារក្នុងការនិយាយចេញជាសាធារណៈ និងបង្ហាញពីគោលជំហរលើបញ្ហានានា។ នេះគឺជាគំនិតមួយចំនួនថាតើអ្នកអាចចូលរួមចំណែកតាមវិធីណា។
ធ្វើការបោះឆ្នោតបញ្ចេញសំឡេងរបស់លោកអ្នក
ពិតណាស់ វិធីប្រសើរបំផុតក្នុងការបញ្ចេញសំឡេងរបស់អ្នកនោះគឺ ការចូលរួមនៅក្នុងដំណើរការលទ្ធិប្រជាធិបតេយ្យតាមរយៈការបោះឆ្នោតជ្រើសរើសមេដឹកនាំរបស់អ្នក។
ពលរដ្ឋអូស្រ្តាលីទាំងអស់ដែលមានអាយុចាប់ពី១៨ឆ្នាំឡើងទៅ ត្រូវបញ្ចេញសំឡេងរបស់ពួកគេនៅក្នុងការបោះឆ្នោតថ្នាក់មូលដ្ឋាន ថ្នាក់រដ្ឋ និងការបោះឆ្នោតរដ្ឋាភិបាលសហព័ន្ធ។
ដើម្បីប្រាកដថាអ្នកមានសិទ្ធិចូលរួមនៅក្នុងការបោះឆ្នោតរបស់អ្នកនៅពេលក្រោយ អ្នកត្រូវតែចុះឈ្មោះនៅការិយាល័យចុះឈ្មោះបោះឆ្នោត ( Australian Electoral Roll )។
នៅក្នុងប្រទេសអូស្រ្តាលីការបោះឆ្នោតគឺត្រូវតែចូលរួមជាដាច់ខាត។ ប្រសិនបើអ្នកមានសិទ្ធិបោះឆ្នោត តែអ្នកមិនបានបោះឆ្នោតនោះ អ្នកអាចនឹងត្រូវផាកពិន័យ្យ។ ប្រសិនបើអ្នកមានបញ្ហាមិនអាចទៅបោះឆ្នោតបាន ឬអ្នកត្រូវធ្វើដំណើរឆ្ងាយនៅថ្ងៃបោះឆ្នោត នោះនៅមានជម្រើសផ្សេងទៀតដែលអ្នកអាចបោះឆ្នោតពេលអវត្តមានបាន បោះឆ្នោតទុកមុន បោះឆ្នោតតាមប៉ុស្តិ៍ប្រៃសណីយ៍ និងបោះឆ្នោតពីបរទេស។
សម្រាប់ព័ត៌មានបន្ថែមសូមចូលទៅកាន់ Australian Electoral Commission។
តើអ្វីទៅជាការស្ទង់មតិតាមប្រៃសណីយ៍?
ការស្ទង់មតិតាមប្រៃសណីយ៍នាពេលបច្ចុប្បន្ននេះលើការរៀបការភេទដូចគ្នាគឺមិនមែនជា”ការបោះឆ្នោត” ឬក៏ជាប្រជាមតិនោះទេ។ វាគឺជាការស្ទង់មតិថ្នាក់ជាតិមួយដែលគ្រាន់តែជាជម្រើស មិនមែនជាកាតព្វកិច្ចដែលយើងត្រូវតែចូលរួមជាដាច់ខាតនោះទេ។ វា ធ្វើឡើងដោយការិយាល័យស្ថិតិអូស្រ្តាលីដើម្បីស្ទង់មតិសាធារណជនថាតើគួរតែផ្លាស់ប្តូរច្បាប់អនុញ្ញាតិឲ្យមានការរៀបការភេទដូចគ្នាឬអត់។
ទោះជាយ៉ាងណា វាគឺនៅតែជាឱកាសក្នុងការបញ្ចេញយោបល់របស់លោកអ្នក និងជាការប្រាប់ទៅរដ្ឋាភិបាល ដូច្នេះវាគឺជារឿងសំខាន់ដែលពលរដ្ឋអូស្រ្តាលីទាំងអស់គួរតែចូលរួម។
វាក៏ដូចជាការបោះឆ្នោតដែរ អ្នកត្រូវតែមានសញ្ជាតិអូស្រ្តាលី មានអាយុចាប់ពី១៨ឆ្នាំឡើង និងត្រូវចុះឈ្មោះបោះឆ្នោតជាមួយនឹងAustralian Electoral Roll ទើបអាចចូលរួមបាន។ បន្ទាប់មកអ្នកនឹងទទួលបាននូវបែបបទស្ទង់មតិមួយនៅក្នុងប្រអប់សំបុត្រ រួមទាំអស្រោមសំបុត្រឆ្លើយតបដែលមានបង់ថ្លៃរួចជាស្រេចផងដែរ។
ការទាក់ទងទៅកាន់រដ្ឋាភិបាល
រដ្ឋាភិបាលអូស្រ្តាលីមានតំណាងប្រជាធិបតេយ្យ៣ថ្នាក់ គឺរដ្ឋាភិបាលក្នុងតំបន់ ថ្នាក់រដ្ឋ និងថ្នាក់សហព័ន្ធ។
រដ្ឋាភិបាលក្នុងតំបន់
រដ្ឋាភិបាលក្នុងតំបន់(Local governments ) ជាញឹកញាប់ត្រូវបានគេហៅថាជាក្រុមប្រឹក្សាឃុំសង្កាត់។
ជាទូទៅពួកគេទទួលខុសត្រូវលើការសាង់សង់ផ្លូវក្នុងតំបន់ ប្រមូលសំរាម ឬក៏ផ្តល់នូវមជ្ឈមណ្ឌលកំសាន្ត ដូចជា ទីលានកីឡា បណ្ណាល័យ ឬក៏មណ្ឈមណ្ឌលសហគមន៍ជាដើម។
យើងទាំងអស់គ្នាបង់ថ្លៃពន្ធ council rates ដើម្បីចាត់ចែងថ្លៃសេវាកម្មទាំងអស់នេះ ប៉ុន្តែក្រុមប្រឹក្សាឃុំសង្កាត់ក៏ទទួលបានប្រាក់ជំនួយពីរដ្ឋាភិបាលសហព័ន្ធនិងរដ្ឋាភិបាលប្រចាំរដ្ឋផងដែរ។
រដ្ឋាភិបាលប្រចាំរដ្ឋ (State Government)
រដ្ឋាភិបាលប្រចាំរដ្ឋផ្តល់នូវសេវាកម្មសំខាន់ៗដូចជា ការសិក្សាអប់រំ មន្ទីរពេទ្យ ការដឹកជញ្ជូននិងប៉ូលិស។
អ្នកអាចចូលទៅក្នុងគេហទំព័ររបស់សភាប្រចាំរដ្ឋរបស់អ្នក ហើយវាយលេខកូដតំបន់ ដើម្បីស្វែងរកសមាជិកសភាក្នុងតំបន់របស់លោកអ្នក។
Image
រដ្ឋាភិបាលសហព័ន្ធ
រដ្ឋាភិបាលសហព័ន្ធដើរតួនាទីយ៉ាងសំខាន់និងជាអ្នកដែលអាចតវ៉ារកខុសត្រូវលើរឿងសំខាន់ៗនៅក្នុងនយោបាយអូស្រ្តាលី។ ប្រសិនបើអ្នកចង់ទាក់ទងសមាជិកសភាសហព័ន្ធរបស់អ្នក មុនដំបូងអ្នកត្រូវដឹងមណ្ឌលបោះឆ្នោតដែលលោកអ្នករស់នៅសិន រួចទើបអាចស្វែងរកសមាជិកសភាថ្នាក់ទាបដែលជាតំណាងរាស្រ្តក្នុងតំបន់របស់អ្នកបាន។
ដើម្បីស្វែងរកមណ្ឌលបោះឆ្នោតដែលលោកអ្នករស់នៅ សូមចូលទៅកាន់តំណភ្ជាប់នេះ "find my electorate" រួចហើយធ្វើតាមការណែនាំ។
បន្ទាប់ពីរកឃើញតំណាងរាស្រ្តរបស់លោកអ្នកហើយ អ្នកគូរតែធ្វើតាមការណែនាំនេះ "these guidelines" ដើម្បីទទួលបាននូវលទ្ធផលប្រសើរបំផុត។
គេហទំព័រសំខាន់ៗ៖
សម្រាប់ព័ត៌មានបន្ថែមស្តីពីប្រព័ន្ធសហព័ន្ធអូស្រ្តាលី សូមចូលទៅកាន់៖ Australian Government។
សម្រាប់ព័ត៌មានបន្ថែមស្តីពីរបៀបបោះឆ្នោតសូមចូលទៅកាន់៖ Australian Electoral Commission។
ព័ត៌មានបោះឆ្នោតដែលបកប្រែជាភាសារបស់អ្នក "your language" ៕
