មគ្គទេសក៍តាំងទីលំនៅ៖ តើគួរធ្វើដូចម្តេចពេលជួបគ្រោះថ្នាក់ចរាចរណ៍?

មានច្បាប់ទម្លាប់ដ៏តឹងតែងដែលត្រូវអនុវត្តតាមក្នុងប្រទេសអូស្រ្តាលី ករណីមានគ្រោះថ្នាក់ចរាចរណ៍កើតឡើង បើទោះវាជាគ្រោះថ្នាក់ធ្ងន់ធ្ងរៗឬក៏បុកប៉ះតិចតួចក៏ដោយ។

Source: Getty

ប្រសិនបើអ្នកបើកបរជាប្រចាំ នោះមានឱកាសច្រើនដែលអ្នកអាចនឹងពាក់ព័ន្ធនៅក្នុងគ្រោះថ្នាក់ចរាចរណ៍ជាអកុសល នៅពេលណាមួយក្នុងជីវិតរបស់អ្នក។ ហើយនេះគឺជាអ្វីដែលលោកអ្នកត្រូវធ្វើនៅពេលដែលមានការប៉ះពារកើតឡើង។

ឈប់ឡានរបស់អ្នកនៅក្នុងកន្លែងសុវត្ថិភាព

រឿងដំបូងគេបំផុតដែលត្រូវធ្វើនៅពេលមានគ្រោះថ្នាក់ចរាចរណ៍នោះគឺត្រូវ ឈប់ឡានរបស់អ្នកនៅកន្លែងណាមួយដែលមានសុវត្ថិភាព។ នៅក្នុងប្រទេសអូស្រ្តាលី វាគឺជាបទឧក្រិដ្ឋព្រហ្មទណ្ឌប្រសិនបើអ្នករត់គេចចេញពីកន្លែងកើតហេតុពេលមានគ្រោះថ្នាក់ចរាចរណ៍។

ប្រសិនបើវាងងឹត បើកភ្លើងសញ្ញាគ្រោះថ្នាក់ ដើម្បីផ្តល់សញ្ញាដល់អ្នកបើកបរដទៃទៀត ថាអ្នកនៅទីនោះ។ ហើយប្រសិនបើអាចធ្វើទៅបាននោះ ត្រូវយករបស់ដែលបង្កគ្រោះថ្នាក់ចេញពីដងផ្លូវ។

ពិនិត្យមើលសុវត្ថិភាពអ្នកដែលពាក់ព័ន្ធក្នុងហេតុការណ៍នោះ

ប្រសិនបើអ្នកមិនមានរបួសធ្ងន់ធ្ងរទេនោះ ត្រូវពិនិត្យមើលអ្នកបើកបរផ្សេងទៀត អ្នកជិះកង់ និងអ្នកដំណើរថ្មើរជើង ដើម្បីឲ្យប្រាកដថាពួកគេក៏មិនកើតអ្វីធ្ងន់ធ្ងរដែរ។ សូមកុំលើកអ្នករបួសឲ្យសោះ លើកលែងតែពួកគេស្ថិតនៅក្នុងគ្រោះថ្នាក់បន្ទាន់។

Somebody holding a smartphone in a car — Source: CC0 Creative Commons

ទូរសព្ទទៅកាន់សេវាកម្មរថយន្តសង្រ្គោះបន្ទាន់និងប៉ូលិស

ពេលណាដែលត្រូវទូរសព្ទទៅកាន់លេខ ០០០?

ប្រសិនបើមាននរណាម្នាក់របួស
ប្រសិនបើមើលទៅ អ្នកបើកបរម្ខាងទៀតទំនងជាស្រវឹងឬប្រើប្រាស់គ្រឿងញៀន
ប្រសិនបើមានការខូចខាតឬគ្រោះថ្នាក់ធ្ងន់ធ្ងរ
ប្រសិនបើភាគីម្ខាងទៀតមិនព្រមឈប់ ឬក៏បដិសេធមិនព្រមផ្តល់ព័ត៌មានលំអិតរបស់ពួកគេ។

ការដោះដូរព័ត៌មានលំអិត

នៅក្នុងករណីជាច្រើន អ្នកនឹងមិនត្រូវការទូរសព្ទហៅសេវាកម្មសង្រ្គោះបន្ទាន់នោះទេ ប៉ុន្តែទោះជាយ៉ាងណាក៏ដោយ អ្នកនៅតែត្រូវការដោះដូរព័ត៌មានពិស្តារជាមួយនឹងភាគីម្ខាងទៀត។ ភាគីទាំងអស់ត្រូវការកត់ទុកនូវ៖

ថ្ងៃ ខែ ពេលម៉ោង និងទីតាំងនៃគ្រោះថ្នាក់នេះ
ព័ត៌មានលំអិតរបស់អ្នកបើកបរម្ខាងទៀត (ឈ្មោះ លេខទូរសព្ទ អាសយដ្ឋាន ក្រុមហ៊ុនធានារ៉ាប់រង ផ្លាកលេខឡាន ពណ៌ឡាន ម៉ូដែលនិងឆ្នាំផលិត)
ប្រសិនបើអ្នកបើកបរមិនមែនជាម្ចាស់ឡានទេនោះ អ្នកត្រូវសុំឈ្មោះ លេខទូរសព្ទ និងអាសយដ្ឋានរបស់ម្ចាស់ឡានផង
ប្រសិនបើអាច ត្រូវកត់ឈ្មោះនិងព័ត៌មានពិស្តាររបស់សាក្សីផង
បើមានប៉ូលិសនៅក្នុងកន្លែងកើតហេតុ ត្រូវសុំឈ្មោះ របស់មន្រ្តីប៉ូលិសរូបនោះ ការិយាល័យប៉ូលិស និងលេខទំនាក់ទំនង។

យកទូរសព្ទរបស់លោកអ្នកថតទុកការខូចខាតនានា។

មានរឿងជាច្រើនដែលត្រូវចាំ ដូច្នេះវិធីដែលស្រួលបំផុតនោះគឺ ថាព្រីនបញ្ជីឈ្មោះឯកសារដែលត្រូវការបំពេញទាំងនោះទុកក្នុងឡានរបស់អ្នក ក្រែងលត្រូវការវាពេលណាមួយ។ មានកម្មវិធីទូរសព្ទដៃមួយចំនួនដូចជា Car Accident Reports និង iWrecked ក៏មានផ្តល់ជូននូវបញ្ជីទាំងនោះផងដែរ។

ប្រសិនបើម្ចាស់ឡានមិនមានវត្តមាននៅពេលកើតហេតុទេនោះ ហើយប្រសិនបើអ្នកបុកប៉ះពារឡានរបស់គេនៅកន្លែងចតរថយន្ត ជាឧទាហរណ៍អ្នកត្រូវទុកនូវកំណត់ហេតុមួយឲ្យគេដោយមានទាំងលេខទូរសព្ទនិងព័ត៌មានពិស្តាររបស់អ្នក ដើម្បីឲ្យគេអាចទាក់ទងអ្នកបាន។

កំណត់ហេតុគ្រោះថ្នាក់ចរាចរណ៍

ប្រសិនបើប៉ូលិសមិនបានទៅកន្លែងកើតហេតុទេ អ្នកនឹងត្រូវរាយការណ៍ទៅឲ្យប៉ូលិសនៅក្នុងរដ្ឋរបស់អ្នកដោយខ្លួនឯងក្នុងពេល២៤ម៉ោង ចំពោះគ្រោះថ្នាក់ធ្ងន់ធ្ងរ ដែលរួមមានដូចជា មានអ្នករបួស ឬស្លាប់ គ្រោះថ្នាក់ដែលមិនបានដោះដូរព័ត៌មានពិស្តារជាមួយគ្នា គ្រោះថ្នាក់ដែលមានរថយន្តត្រូវគេអូសទៅ ឬក៏មានការខាតបង់ចាប់ពី៣០០០ដុល្លារឡើងទៅ។

គ្រោះថ្នាក់តូចតាមិនចាំបាច់ត្រូវរាយការណ៍នោះទេ ប៉ុន្តែវាអាចជាគំនិតល្អមួយដែរក្នុងការធ្វើរបាយការណ៍ ខណៈដែលក្រុមហ៊ុនធានារ៉ាប់រងមួយចំនួនសួររកលេខរបាយការណ៍ប៉ូលិស។

Tow Truck Driver Lifting a Wrecked Car — Source: Getty Images

ហៅគេឲ្យមកអូសឡានរបស់អ្នក

ប្រសិបើអ្នកត្រូវការអូសឡានរបស់អ្នក អ្នកត្រូវទាក់ទងទៅកាន់ក្រុមហ៊ុនអូសឡាន។ រក្សានូវលេខទំនាក់ទំនងរបស់ពួកគេនៅក្នុងឡានរបស់អ្នកនិងកត់ត្រាទុកនៅក្នុងទូរសព្ទដៃ។

ទាក់ទងទៅកាន់ក្រុមហ៊ុនធានារ៉ាប់រងរបស់លោកអ្នក

ប្រសិនបើឡានរបស់អ្នកមានធានារ៉ាប់រង ទូរសព្ទទៅកាន់ក្រុមហ៊ុនធានារ៉ាប់រងឲ្យបានឆាប់បំផុតតាមដែលអាចធ្វើទៅបាន។ ពួកគេជួនកាលអាចជួយមកអូសឡានរបស់អ្នកយកទៅក៏ថាបាន។

ក្រុមហ៊ុនធានារ៉ាប់រងផ្តល់យោបល់ឲ្យអ្នកកុំទទួលថាខ្លួនជាអ្នកខុសរហូតដល់អ្នកជំនាញធ្វើការពិនិត្យរួចរាល់។

ចូរចងចាំថាត្រូវរក្សាភាពស្ងប់ស្ងាត់ គ្រោះថ្នាក់គឺជារឿងដ៏ស្រ្តេសមួយ ប៉ុន្តែវានឹងធ្វើឲ្យរឿងរ៉ាវធូរស្បើយឡើងប្រសិនបើគ្រប់គ្នាដែលពាក់ព័ន្ធអនុវត្តតាមក្បួនច្បាប់ដោយស្ងប់ស្ងាត់។