ព្រះរាជាណាចក្រកម្ពុជាកំពុងតែប្រារព្ធព្រះរាជពិធីបុណ្យអុំទូក បណ្តែតប្រទីប អកអំបុក សំពះព្រះខែ រយៈពេលបីថ្ងៃក្នុងទីក្រុងភ្នំពេញ គិតចាប់ពីថ្ងៃទី១៣ដល់១៥វិច្ឆិកាឆ្នាំ២០១៦ ស្របពេលដែលមនុស្សទូទាំងសកលលោកនាំគ្នាផ្អើលមើលព្រះចន្ទដែលរះចែងចាំងរស្មីខ្លាំងជាងពេលធម្មតា៣០% និងមានទំហំធំជាងពេលធម្មតា១៤% ដែលហេតុការណ៍នេះនឹងកើតឡើងម្តងទៀតរហូតដល់ទៅឆ្នាំ២០៣៤ (lunar supermoon event) ។
ជារៀងរាល់ឆ្នាំ ក្នុងឱកាសព្រះរាជពិធីបុណ្យអុំទូកម្តងៗ តែងតែមានមានមនុស្សរាប់លាននាក់ធ្វើដំណើរមកពីបណ្តាខេត្តក្រុងនានាទូទាំងប្រទេស មកចូលរួមក្នុងពិធីបុណ្យនេះ។
បើតាមអ្នកនាំពាក្យសាលាក្រុងភ្នំពេញ លោក មាន ចាន់យ៉ាដា កាលពីម្សិលមិញនេះបានឲ្យដឹងថា នៅថ្ងៃទីមួយ មានមនុស្សប្រមាណជា៦ទៅ៧សែននាក់ចូលរួមក្នុងព្រះរាជពិធីបុណ្យអុំទូក ហើយនៅថ្ងៃទីពីរមានប្រមាណជា ១លានទៅ១លាន២សែននាក់។
ចំនួនមនុស្សដែលចូលរួមតិចជារាល់ឆ្នាំនេះ ទំនងហាក់ដូចជាដោយសារតែ ឧបទ្ទវហេតុរត់ជាន់គ្នាកាលពីឆ្នាំ២០១០ (the tragic stampede of 2010) ដែលបណ្តាលមនុស្សជាង៣៤០នាក់ស្លាប់បាត់បង់ជីវិតក្នុងហេតុការណ៍នោះ។
ទោះជាយ៉ាងណាក៏ដោយ អាជ្ញាធរបានត្រៀមការប្រុងប្រយ័ត្នបន្ថែមទៀតក្នុងឆ្នាំនេះ។
បើតាមរបាយការណ៍របស់ស្នងការប៉ូលិសក្រុងភ្នំពេញ លោក ទូច ណារ៉ុងបានឲ្យដឹងថា រដ្ឋាភិបាលបានចាត់ចែងកម្លាំងចម្រុះជាង១ម៉ឺននាក់ ដើម្បីការពារសន្តិសុខ និងសណ្តាប់ធ្នាប់ក្នុងព្រះរាជពិធីបុណ្យ ដែលរៀងរាល់ឆ្នាំមានភ្ញៀវបរទេស និង ភ្ញៀវជាតិរាប់លាននាក់មកពីតាមបណ្តាខេត្តនានាចូលរួមទស្សនាក្នុងព្រះរាជពីធីបុណ្យនេះ។
ព្រះរាជពិធីបុណ្យអុំទូកនៅឆ្នាំនេះប្រារព្ធធ្វើឡើងនៅទន្លេចតុមុខក្នុងរាជធានីភ្នំពេញ ដោយមានទូកងសរុប ២៥៩ទូក និងកីឡាករជាង ១៧០០០នាក់ មកពីតាមបណ្តាខេត្តនិងរាជធានីនានាចូលរួមប្រណាំងប្រជែងដណ្តើមយកជ័យលាភី។
ក្រៅពីការប្រណាំងទូកង នៅមានប្រទីពចំនួន១៣ ដែលបណ្តែតបង្ហាញតាមដងទន្លេសាបនាពេលរាត្រី អមជាមួយនឹងតូបលក់ទំនិញរាប់រយតូប ដែលមានការប្រគុំតន្រ្តីកំដរដោយឥតគិតថ្លៃផងដែរ។
ព្រះមហាក្សត្រខ្មែរព្រះករុណាសម្តេចព្រះនរោត្តមសីហមុនី ក៏បានយាងចូលរួមលើកទឹកចិត្តដល់កីឡាករ កីឡាការិនីក្នុងឱកាសព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ក្នុងឆ្នាំនេះផងដែរ៕
