គេជឿថារថយន្តដឹកទំនិញមួយគ្រឿងបានបើកឡើងលើផ្លូវមនុស្សដើរ មុនពេលដែលបុកទម្លុះចូលក្នុងហាងទំនិញនៅកណ្តាលទីក្រុងមួយនេះ។
សាក្សីដែលបានឃើញផ្ទាល់ភ្នែកម្នាក់បានប្រាប់សារព័ត៌មានក្នុងស្រុកថា មានអ្នកលោតចូលទៅក្នុងកាប៊ីនមុខ ហើយបានបើកឡាននេះចេញទៅនៅពេលដែលអ្នកបើកបរកំពុងតែទម្លាក់អីវ៉ាន់ចុះ។
នាយកដ្ឋានប្រតិបត្តិការជាតិរបស់ប៉ូលិសស៊ុយអែត បានចេញផ្សាយនូវរូបភាពជនសង្ស័យសំខាន់មួយរូប ដែលដកស្រង់ចេញពីកាម៉េរាសុវត្ថិផាពCCTV នៅកៀកពេលនិងទីតាំងវាយប្រហារនេះ។
រូបភាពនេះបង្ហាញថា បុរសម្នាក់ពាក់អាវjacket ដែលមានមួក hood ពណ៌ក្រម៉ៅ ពីលើអាវយឺតនិងខោពណ៌ក្រម៉ៅ។
បន្តិចក្រោយមក ប៉ូលិសនិយាយថា ពួកគេបានចាប់ខ្លួនបុរសម្នាក់ដែលមានពាក់ព័ន្ធនៅក្នុងការវាយប្រហារនេះហើយ តែមិនអះអាងថាបុរសម្នាក់នោះគឺជាជនសង្ស័យដែលឡើងទៅបើករថយន្តនោះឬក៏អត់នោះទេ។
នាយករដ្ឋមន្រ្តីស៊ុយអែត លោក Stefan Lofven មានប្រសាសន៍ថា ការវាយប្រហារលើអ្នកថ្មើជើងនៅទីក្រុងStockholm នេះទំនងជាសកម្មភាពភេរវកម្ម។
លោកថា ដើម្បីជាការឆ្លើយតប ប្រទេសស៊ុយអ៊ែតនឹងរឹតបន្តឹងការត្រួតត្រាព្រំដែនរបស់ខ្លួន៕
